Maʼlumki, Oʻzbekiston Respublikasi Vazirlar Mahkamasining 2024 yil 20 maydagi 294-sonli qarori bilan, Oʻzbekiston mahallalari uyushmasiga Kadastr agentligi bilan birgalikda respublikadagi barcha mahallalarni xatlovdan oʻtkazish, ularning aniq chegaralarini belgilash, bunda har bir mahallaning chegarasi bir aholi punkti (shahar, shaharcha, qishloq va ovul) doirasida boʻlishini taʼminlash, shuningdek, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda mavjud mahallalar faoliyati tashkiliy va moliyaviy jihatdan toʻgʻri yoʻlga qoʻyilganligi, boshqaruv jihatidan oʻzini oqlashi yuzasidan oʻrganishlarni olib borish hamda ushbu talablarga javob bermaydigan mahallalarni birlashtirish va ixchamlashtirish choralarini koʻrish tavsiya etilgan.

Shunga koʻra, viloyat hokimligi huzuridagi Mahallalarni tuzish, birlashtirish, boʻlish va tugatish, shuningdek ularni chegarlarini belgilash va oʻzgartirish masalalarini koʻrib chiquvchi idoralararo doimiy komissiyasi (keyingi mantlarda - Idoralararo doimiy komissiyasi)ning ishchi organi-Oʻzbekiston mahallalari uyushmasi viloyat boshqarmasi 2025 yil 19 maydagi 02-09/01-05/359-sonli aloqa xati orqali viloyat Kengashiga murojaat qilinib, bu borada amalga oshirilgan ishlar maʼlum qilingan.

Unda, viloyatdagi mavjud 1062 ta mahallalar xatlovdan oʻtkazilib, ularning aniq chegaralari, faoliyati tashkiliy va moliyaviy jihatdan toʻgʻri yoʻlga qoʻyilganligi hamda boshqaruv jihatidan oʻzini oqlashi yuzasidan tahlillar olib borilgan.

Oʻrganish va tahlillar natijasida ayrim mahallalarni birlashtirish va ixchamlashtirish yuzasidan dastlabki takliflar ishlab chiqilb, tegishliligi boʻyicha mahalla fuqarolar yigʻini va uning huzurida tashkil etilgan fuqarolar yigʻinlari kengashlariga taqdim etilgan.

Mazkur takliflarni maʼqullash yuzasidan mahalla fuqarolar yigʻinlari tomonidan tuman (shahar) hokimliklariga kiritilgan iltimosnomalar hokimliklar tomonidan koʻrib chiqilib, Idoralararo komissiyaga tegishli aloqa xatlari orqali takliflar kiritilgan.

Jumladan,

Qoʻqon shahridagi “Buloqboshi”, “Qipchoqariq”, “Navbaxor” “Bunyodkor”, “Ustabozor”, “Istiqlol”, “Obod”, “Amir Temur”, “Ziyolilar” va “Temiryoʻlchi”;

Margʻilon shahridagi “Baynalminal”, “Iqbol”, “Sholdirma”, “Uzumzor”, “Uzun xovuz” va “Yangi xayot”;

Beshariq tumanidagi “Boy”, “Beshariq”, “Chorbogʻ”, “Adolat” va “Nabi”;

Bogʻdod tumanidagi “Paxtaobod”, “Saxovat” va “Mirishkor”;

Buvayda tumanidagi “Jilva” va “Xonobod”;

Dangʻara tumanidagi “Tangriqul” va “Qora koʻrpa”;

Yozyovon tumanidagi “Tegirmonboshi”;

Quva tumanidagi “Doʻstlik” va “Gumxona”;

Qoʻshtepa tumanidagi “Boʻston” va “Mumtoz”;

Oltiariq tumanidagi “Guliston”, “Oʻzbekiston” va “Oltiariq”;

Rishton tumanidagi “Farovonlik”, “Gumbaz” va “Dorulomon”;

Soʻx tumanidagi “Soxibkor”, “Sebzor”, “Soʻx”, “Zangat” va “Istiqlol”;

Oʻzbekiston tumanidagi “Olmazor” va “Naymansoy”;

Uchkoʻprik tumanidagi “Anhor boʻyi”;

Fargʻona tumanidagi “Yangiobod” va “Qorayantoq”;

Furqat tumanidagi “Mustaqillik” mahalla fuqarolar yigʻinlarini qisqartirish yaʼni boshqa bir mahallalarga birlashtirish (optimallashtirish) boʻyicha takliflar berilgan.

Hokimliklar tomonidan kiritilgan mazkur takliflar dastlab viloyat hokimligi ishchi guruhi tomonidan organib chiqilib, tegishli ijobiy xulosa tasdiqlangan.

Shuningdek, mazkur takliflar Idoralararo komissiya tomonidan ham koʻrib chiqilib, barcha takliflar maʼqullangan holda komissiyaning 2025 yil 19 maydagi 167/01-49-sonli bayoni rasmiylashtirilgan.

Oʻzbekiston Respublikasi Vazirlar Mahkamasining 2024 yil 20 maydagi 294-sonli qarori bilan tasdiqlangan “Shaharlar, shaharchalar, qishloqlar va ovullarning mahallalarini tuzish, birlashtirish, boʻlish va tugatish, shuningdek ularning chegaralarini belgilash va oʻzgartirish, ularga nom berish va ularning nomini oʻzgartirish tartibi toʻgʻrisida”gi Nizom (keyingi matnlarda-Nizom)da xalq deputatlari viloyat Kengashi tomonidan navbatdagi sessiyada Idoralararo komissiya tomonidan taqdim etilgan hujjatlarni koʻrib chiqishi va mahallalarni tuzish, birlashtirish, boʻlish va tugatish, shuningdek, ularning chegaralarini belgilash va oʻzgartirish yoki ushbu taklifni rad etish toʻgʻrisida qaror qabul qilishi belgilangan. Viloyatda mahallalarni qoʻllab-quvvatlashni yanada takomillashtirish, faoliyatini tashkiliy va moliyaviy jihatdan toʻgʻri yoʻlga qoʻyish, ularda samarali boshqaruv tizimini shakllantirish maqsadida Oʻzbekiston Respublikasi Vazirlar Mahkamasining 2024 yil 20 maydagi “Mahallalar faoliyati takomillashtirilishi munosabati bilan Vazirlar Mahkamasining “Shaharlar, shaharchalar, qishloqlar va ovullarning mahallalarini tuzish, birlashtirish, boʻlish va tugatish, shuningdek ularning chegaralarini belgilash va oʻzgartirish, ularga nom berish va ularning nomini oʻzgartirish tartibi toʻgʻrisidagi nizomni tasdiqlash haqida” 2014-yil 4-martdagi 48-son qaroriga oʻzgartirish va qoʻshimchalar kiritish toʻgʻrisida”gi 294-sonli qarori hamda “Mahalliy davlat hokimiyati toʻgʻrisida”gi Qonunining 6- va 24-moddalariga asosan xalq deputatlari viloyat Kengashi qaror qiladi:

1. Viloyatda mavjud mahallalar faoliyati tashkiliy va moliyaviy jihatdan toʻgʻri yoʻlga qoʻyilganligi, boshqaruv jihatidan oʻzini oqlashi yuzasidan olib borilgan oʻrganish yakunlari hamda ushbu talablarga javob bermaydigan mahallalarni birlashtirish va ixchamlashtirish boʻyicha shakllantirilgan takliflar yuzasidan Idoralararo doimiy komissiyasi ishchi organi - Oʻzbekiston mahallalari uyushmasi viloyat boshqarmasi boshligʻi A.Ziyavitdinovning axboroti maʼlumot uchun qabul qilinsin.

2. Quyidagilar:

viloyat ishchi guruhining xulosasi hamda Idoralararo doimiy komissiyasining 2025 yil 19 maydagi 167/01-49 - sonli bayoni (xulosasi);

Idoralararo doimiy komissiyasi ishchi organi - Oʻzbekiston mahallalari uyushmasi viloyat boshqarmasining 2025 yil 19 maydagi 02-09/01-05/359- sonli xati inobatga olinsin.

3. Idoralararo doimiy komissiyaning viloyatdagi faoliyati tashkiliy va moliyaviy jihatdan toʻgʻri va samarali yoʻlga qoʻyilmagan, boshqaruv jihatidan oʻzini oqlamayotgan ayrim mahallalarni birlashtirish va ixchamlashtirish yuzasidan taklifi maʼqullansin va bu boʻyicha tahliliy jadval ilovaga muvofiq tasdiqlansin.

4. Oʻzbekiston Respublikasi Vazirlar Mahkamasining 2024 yil 20 maydagi 294-sonli qarori bilan tasdiqlangan “Shaharlar, shaharchalar, qishloqlar va ovullarning mahallalarini tuzish, birlashtirish, boʻlish va tugatish, shuningdek, ularning chegaralarini belgilash va oʻzgartirishda amalga oshiriladigan tadbirlar” sxemasiga (talablariga) asosan Oʻzbekiston mahallalari uyushmasi viloyat boshqarmasi boshligʻi A.Ziyavitdinovga 1-va 2- bosqichlar, tuman (shahar) hokimlariga 3-bosqich hamda Davlat kadastrlari palatasi viloyat boshqarmasi boshligʻi R.Mirzaxmedovga 4-bosqich doirasida ishlar toʻliq va sifatli amalga oshirilganligi yuzasidan shaxsiy masʼuliyat va javobgarlik yuklansin.

5. Oʻzbekiston mahallalari uyushmasi viloyat boshqarmasi (A.Ziyavitdinov) tegishli hokimliklar vakillari hamda mahalliy kengash deputatlari bilan birgalikda birlashtirish va ixchamlashtirish nazarda tutilayotgan mahallalarga borgan holda hudud aholisi, mahalla faollari va mahalla ettiligi vakillari, shuningdek fuqarolar yigʻinlari Kengashlari aʼzolari bilan uchrashgan holda tushuntirish va targʻibot tadbirlarini olib borsin.

6. Idoralararo doimiy komissiyasi aʼzolariga:

mazkur Kengash qaroriga asosan mahallalarni boshqa bir mahallarga birlashtirish (qoʻshish) ishlarini amaldagi qonunchilik asosida amalga oshirsin;

mahallalarni boshqa bir mahallalarga birlashtirish (optimallashtirish) natijasida ixchamlashgan (hududiy chegarasi kengaygan hamda aholi va xonadonlar soni ortgan) mahallalarni tashkiliy-huquqiy va moliyaviy jihatdan samarali yoʻlga qoʻyish choralarini koʻrsin.

7. Davlat kadastrlari palatasi viloyat boshqarmasi (R.Miraxmedov) mahallalarning chegaralarini aks ettirgan va tavsiflagan holda, mahallalar hududi chizmasini tayyorlasin hamda qoʻshni mahallalarning fuqarolar yigʻinlari bilan kelishish ishlarini oʻz vaqtida va tizimli tashkil etsin.

8. Optimallashayotgan mahalla fuqarolar yigʻinlari (fuqarolarni oʻzini-oʻzi boshqarish organlari) hodimlari hamda ushbu mahallalarga biriktirilgan holda faoliyat yuritayotgan (ishlayotgan) “mahalla ettiligi” hodimlari bilan yakka tartibdagi mehnat munosabatlari amaldagi mehnat qonunchiligi talablaridan chetga chiqmagan holda amalga oshirilsin.

9. Belgilansinki, mazkur kengash qarori ijrosi faqatgina Oʻzbekiston Respublikasi Vazirlar Mahkamasining 2024 yil 20 maydagi 294-sonli qarori bilan tasdiqlangan “Shaharlar, shaharchalar, qishloqlar va ovullarning mahallalarini tuzish, birlashtirish, boʻlish va tugatish, shuningdek, ularning chegaralarini belgilash va oʻzgartirishda amalga oshiriladigan tadbirlar” sxemasining 1-, 2- va 3-bosqichlarida amalga oshirilishi belgilangan ishlar (tadbirlar) toʻliq va sifatli bajarilgan mahallalar doirasida taʼminlanadi.

10. Tegishli tuman (shahar) hokimliklari aloqador (manfaatdor) tashkilotlar bilan birgalikda optimallashgan mahalla fuqarolar yigʻinlarini qayta davlat roʻyxatidan oʻtkazish ishlarini amaldagi tartib asosida amalga oshirish choralarini koʻrsin.

11. Belgilansinki, mazkur Kengash qarori Oʻzbekiston Respublikasi Vazirlar Mahkamasining 2014-yil 4-martdagi 48-sonli qarori bilan tasdiqlangan “Shaharlar, shaharchalar, qishloqlar va ovullarning mahallalarini tuzish, birlashtirish, boʻlish va tugatish, shuningdek ularning chegaralarini belgilash va oʻzgartirish, ularga nom berish va ularning nomini oʻzgartirish tartibi toʻgʻrisida”gi Nizomning 17-bandi talablaridan kelib chiqib, mahallalarni tugatish uchun asos boʻlmaydi.

12. Ushbu qaror viloyat hamda tegishli tuman (shahar) hokimliklarining rasmiy veb-saytlari, shuningdek ommaviy axborot vositalarida eʼlon qilinsin.

13. Mazkur kengash qarori ijrosini nazorat qilish xalq deputatlari viloyat Kengashining “Korrupsiyaga qarshi kurashish va xavfsizlik masalalari boʻyicha” doimiy komissiyasi (Sh.Gʻaniyeva) hamda viloyat hokimining oʻrinbosari Sh.Polvonov zimmasiga yuklansin.

14. Ushbu Qaror qabul qilingan kundan eʼtiboran kuchga kiradi.