Ўзбекистон Республикаси Ҳукумати ва Россия Федерацияси Ҳукумати, бундан кейин Томонлар деб аталувчилар,

Ўзбекистон Республикаси Ҳукумати билан Россия Федерацияси Ҳукумати ўртасида 1993 йил 19 мартдаги маданият, фан ва техника, таълим, соғлиқни сақлаш, ахборот, спорт ва туризм соҳасидаги Шартнома асосида,

Ўзбекистон Республикаси ва Россия Федерацияси ўртасида қўшма кино ишлаб чиқариш соҳасидаги ҳамкорликни ривожлантиришга кўмаклашишга интилиб,

ҳамкорликда кино ишлаб чиқаришнинг кино саноатини ривожлантиришга, шунингдек, Томонлар давлатлари ўртасидаги иқтисодий ва маданий алоқаларни мустаҳкамлашга қўшаётган ҳиссасини ҳисобга олиб,

икки томонлама муносабатларда Томонлар давлатларининг кинематографиясини ривожлантиришга ҳисса қўшиши мумкин бўлган фильмларни биргаликда ишлаб чиқариш ва тарқатишга кўмаклашиш истагини билдирган ҳолда,

қуйидагилар тўғрисида келишиб олдилар:

Мазкур Шартнома мақсадлари учун атамалар қуйидагича тушунилади:

«фильм» — бадиий, анимацион, ҳужжатли-хроникавий, телевизион ёки ижодий концепцияга асосланган бошқа шаклда Томонлар давлатларининг қонунчилигига мувофиқ яратилган ва кино залларда, телевидение ва бошқа платформаларида трансляция қилишга мўлжалланган ҳар қандай давомийликдаги, ҳар қандай ташувчидаги исталган аудиовизуал асар;

«биргаликда ишлаб чиқарилган фильм» — ишлаб чиқариш Томонлар давлатларининг ҳамкорликдаги ишлаб чиқарувчилари томонидан амалга ошириладиган фильм;

«продюсер» — тегишли равишда Ўзбекистон Республикаси ёки Россия Федерацияси фуқаролигига эга бўлган жисмоний шахс ёки Томонлар давлатларидан бирининг ҳудудида жойлашган, фильмни молиялаштириш, ишлаб чиқариш ва (ёки) ундан фойдаланиш учун масъул бўлган юридик шахс);

«биргаликда ишлаб чиқарувчилар» — мазкур Шартноманинг ажралмас қисми бўлган Иловада кўрсатилган талабларга жавоб берадиган фильмни биргаликда ишлаб чиқариш (шу жумладан уни молиялаштириш) тўғрисидаги шартнома бўйича боғланган продюсерлар;

«ваколатли органлар» — Томонлар давлатларининг мазкур Шартномани амалга ошириш учун масъул бўлган ваколатли органлари қуйидагилардир: Ўзбекистон томонидан — Ўзбекистон Республикаси Маданият вазирлиги, Россия томонидан — Россия Федерацияси Маданият вазирлиги;

Томонлар ўзларининг ваколатли органлари таркибидаги ўзгаришлар тўғрисида бир-бирларини дипломатик каналлар орқали ёзма равишда хабардор қиладилар.

1. Мазкур Шартнома талабларига жавоб берадиган биргаликда ишлаб чиқарилган фильмлар ҳар бир Томон давлатининг қонунчилигига мувофиқ Ўзбекистон Республикасида ва Россия Федерациясида миллий фильмлар деб тан олинади.

2. Томонлар биргаликда ишлаб чиқарилган фильмларга тегишли Томон давлати қонунларига мувофиқ миллий фильмларга бериладиган имтиёзларни берадилар.

3. Россия Федерациясида ҳамкорликда ишлаб чиқарилган фильмлар учун имтиёзлар фақат россиялик ҳамкор продюсерга, Ўзбекистон Республикасида ҳамкорликда ишлаб чиқарилган фильмлар учун имтиёзлар эса фақат Ўзбекистонлик ҳамкор продюсерга берилади.

4. Фильмга «биргаликда ишлаб чиқарилган фильм» мақомини бериш тартиби ва шартлари мазкур Шартноманинг ажралмас қисми бўлган Илова билан белгиланади.

1. Агар фильм мазкур Шартнома шартларига мос келадиган бўлса, фильмга «биргаликда ишлаб чиқарилган кино маҳсулоти» мақомини бериш тўғрисидаги қарор ҳар бир алоҳида ҳолатда ваколатли органлар томонидан қабул қилинади.

2. Агар фильм мазкур Шартнома шартларига мос келишни тўхтатса, мазкур модданинг 1-бандида кўрсатилган қарор уни қабул қилган ваколатли орган томонидан бекор қилиниши мумкин.

1. Мазкур Шартнома Иловасининг 3.3-бандда кўрсатилган фильмни биргаликда ишлаб чиқаришда иштирок этувчи шахслар қуйидаги шахслар доирасига ҳавола қилинади:

а) Россия Федерациясига нисбатан — Россия Федерацияси фуқаролигига ёки Россия Федерацияси ҳудудида доимий яшаш жойига эга бўлган шахслар;

б) Ўзбекистон Республикасига нисбатан — Ўзбекистон Республикаси фуқаролигига ёки Ўзбекистон Республикаси ҳудудида доимий яшаш жойига эга бўлган жисмоний шахслар.

2. Мазкур модданинг 1 бандидаги шартларга жавоб бермайдиган шахсларнинг, режиссёрни бундан мустасно қилган ҳолда, биргаликдаги фильм ишлаб чиқаришда иштирок этишига истисно тариқасида ва фильм билан боғлиқ талабларни ҳисобга олган ҳолда йўл қўйилиши мумкин.

1. Биргаликда ишлаб чиқарилган фильмнинг умумий қийматининг 20 фоизидан 80 фоизигача ҳамкорликда ишлаб чиқарувчиларнинг молиявий ҳиссалари улуши бўлиши мумкин.

Биргаликда ишлаб чиқарувчиларнинг техник ва ижодий ҳиссалари одатда уларнинг молиявий ҳиссаларига мутаносиб бўлиши ва кино ижодкорлари, актёрлари, продюсер ходимлари, лабораториялар ва ишлаб чиқариш биноларининг ҳиссаларини ўз ичига олиши керак.

2. Томонлар келишувига кўра, ваколатли органлар ҳамкорликда ишлаб чиқарилган фильмнинг умумий қийматининг 10 фоизидан 90 фоизигача бўлган продюсерларнинг молиявий бадаллари улуши нисбатига рухсат бериши мумкин.

3. Мазкур Шартнома қоидаларига зарар етказмаган ҳолда, учинчи давлатнинг бошқа продюсерининг биргаликда ишлаб чиқарилишида иштирок этишга, агар бундай продюсернинг ҳиссаси биргаликда ишлаб чиқарилган фильмнинг умумий қийматининг камида 10 фоизини ташкил этса, рухсат этилади ва Томонлар давлатларининг ҳамкор ишлаб чиқарувчиларининг ҳар бирининг ҳиссасидан ошмайди.

Ҳар бир Томон ўз давлатининг қонунчилигига мувофиқ бошқа Томон давлатининг санъат ва ишлаб чиқариш ходимларининг ўз давлати ҳудудига киришига, шунингдек, биргаликда фильм ишлаб чиқариш учун зарур бўлган асбоб-ускуналар ва материалларини вақтинча олиб кириш ва олиб чиқишга кўмаклашади.

1. Агар биргаликда ишлаб чиқарилган фильмлар импорт чекланган мамлакатга экспорт қилинса, қуйидаги тартиб қўлланилади:

а) биргаликда ишлаб чиқарилган фильм, қоида тариқасида, бундай фильмнинг ҳамкорликдаги продюсерлари ўртасидаги шартномада белгиланадиган энг катта иштирок улуши бўлган давлат квотасига киритилади;

б) ишлаб чиқаришда ҳаммуаллифлар тенг иштирок этган тақдирда, кинофильм импорт қилувчи давлатга фильмни экспорт қилиш учун энг қулай шарт-шароитларга эга бўлган Томон давлатининг ҳамкор ишлаб чиқарувчисига берилади;

в) агар мазкур модданинг «а» ва «б» бандлари қоидалари қўлланилмаса, биргаликда ишлаб чиқарилган фильм квотаси биргаликда ишлаб чиқарилган фильмнинг режиссёрининг давлатига киритилади.

2. Агар биргаликда ишлаб чиқарилган фильм Томонлардан бирининг давлати учун квота амал қилувчи давлат ҳудудида сотилса, биргаликда ишлаб чиқарилган фильм давлатига нисбатан квота амал қилмайдиган Томон номидан сотилиши мумкин.

Агарда импорт чекланган давлат ҳудудида биргаликда ишлаб чиқарилган фильмнинг иккала Томонлари давлатларига нисбатан квота амал қилса, ваколатли органлар мазкур модданинг 1-банди «а» ва «б» кичик бандларидан фарқ қилувчи қарор қабул қилишлари мумкин.

1. Мазкур Шартнома доирасида яратилган ҳар бир ҳамкорликдаги фильм икки хил вариантда — рус ва ўзбек тилларида ишлаб чиқарилади. Агар сценарий шуни талаб қилса талаб қилса, мазкур версиялар бошқа тиллардаги диалогни ўз ичига олиши мумкин.

2. Биргаликда ишлаб чиқарилган фильмлар Россия иштироки устувор бўлган тақдирда «Россия-Ўзбекистон маҳсулоти», агарда Ўзбекистон иштироки устувор бўлса «Ўзбекистон-Россия маҳсулоти» ёзуви билан тақдим этилади. Бундай ёзув очилиш ва ёпилиш титрларида, реклама маҳсулотларида ва биргаликда ишлаб чиқарилган фильмлар иштирок этиши учун тақдим этиладиган жойларда, шу жумладан, халқаро кинофестивалларда, бўлиши керак.

Халқаро кинофестивалларга тақдим этилган ҳамкорликда суратга олинган фильмлар энг кўп улуш билан иштирок этган продюсернинг иши сифатида, тенг иштирок этган тақдирда эса фильм режиссёри тақдим этган биргаликда ишлаб чиқарувчининг иши сифатида тақдим этилади.

Маданий алмашинувлар доирасида Томонлар кино тадбирларини ташкил этиш, кинематография соҳасида мутахассислар алмашинуви, шунингдек, Ўзбекистон Республикаси ёки Россия Федерацияси ҳудудида ўтказиладиган халқаро кинофестивалларда фестиваллар қоидалари ва Томонлар давлатларининг қонунчилигига мувофиқ ўзаро иштирок этишда кўмаклашадилар.

Мазкур Шартномани қўллаш ёки талқин қилишда Томонлар ўртасида юзага келадиган келишмовчиликлар улар ўртасидаги маслаҳатлашувлар ва музокаралар йўли билан ҳал қилинади.

Томонларнинг ўзаро келишувига кўра, мазкур Шартномага тегишли баённомалар билан расмийлаштириладиган ўзгартиришлар ва қўшимчалар киритилиши мумкин.

1. Мазкур Шартнома дипломатик каналлар орқали унинг кучга кириши учун зарур бўлган давлат ички тартиб-қоидалари Томонлар тарафидан бажарилганлиги тўғрисида охирги ёзма билдиришнома олинган кундан бошлаб кучга киради.

2. Мазкур Шартнома 5 йил муддатга амал қилади. Томонлардан бири дастлабки ёки кейинги муддатлар тугашидан камида 90 кун олдин дипломатик каналлар орқали бошқа Томонни мазкур Шартномани бекор қилиш нияти ҳақида ёзма равишда хабардор қилмаган тақдирда мазкур Шартнома автоматик равишда кейинги 5 йиллик даврларга узайтирилади.

3. Мазкур Шартнома тугатилгандан сўнг, унинг қоидалари мазкур Шартнома доирасида бошланган ва уни тугатиш санасидан олдин тугалланмаган қўшма дастурлар ва лойиҳаларга нисбатан қўлланилади.

Тошкент шаҳрида 2024 йил 27 майда, икки нусхада, ҳар бири ўзбек ва рус тилларида тузилди, бунда иккала матн бир хил кучга эга.

1. Мазкур илова Ўзбекистон Республикаси Ҳукумати ва Россия Федерацияси Ҳукумати ўртасида ҳамкорликда кино ишлаб чиқариш соҳасида ҳамкорлик тўғрисидаги Шартномага мувофиқ яратилган фильмларга «биргаликда ишлаб чиқарилган фильм» мақомини бериш тартиби ва шартларини белгилайди.

2. Фильмга «биргаликда ишлаб чиқарилган фильм» мақомини бериш учун биргаликда ишлаб чиқарувчилар фильмни суратга олиш даври бошланишидан камида 30 кун олдин ваколатли органларга ариза берадилар.

3. Аризага қуйидаги ҳужжатлар илова қилинади:

3.1. фильмнинг адабий сценарийси ва синопсиси;

3.2. Томонлар давлатларининг қонун ҳужжатларига мувофиқ фильмда фойдаланилганда, шунингдек, бундай фильмни ишлаб чиқариш учун зарур бўлган ҳуқуқларни қўлга киритган тақдирда асарларга муаллифлик ҳуқуқи мавжудлигини тасдиқловчи ҳужжатлар;

3.3. фуқаролиги ва бажарадиган иш тоифаси кўрсатилган маълумотларни ўз ичига олган суратга олиш гуруҳи аъзоларининг рўйхати ҳамда фуқаролиги кўрсатилган маълумотларни ўз ичига олган асосий ва иккинчи даражали роллар ижрочилари рўйхати;

3.4. фильм сценарийси муаллифи ва режиссёри билан тузилган шартномалар нусхалари;

3.5. биргаликда ишлаб чиқариш фильмини яратиш бўйича биргаликда ишлаб чиқарувчилар томонидан имзоланган шартноманинг нусхаси (кейинги ўринларда Шартнома деб юритилади).

4. Шартнома қуйидаги маълумотларни ўз ичига олиши керак:

4.1. фильм номи;

4.2. биргаликда ишлаб чиқарувчиларнинг исмлари ва жойлашган жойи;

4.3. фильм сценарийси муаллифлари ва режиссёрларининг фамилиялари ва исмлари;

4.4. кино ишлаб чиқариш жадвали;

4.5. ҳар бир продюсернинг ҳисса улушини кўрсатган ҳолда фильмни суратга олиш қиймати;

4.6. кино ишлаб чиқариш харажатлари сметаси;

4.7. молиялаштириш манбаларини кўрсатган ҳолда фильмни молиялаштириш режаси;

4.8. фильмдан тижорат мақсадларида фойдаланишдан олинган даромадларни тақсимлаш тартиби;

4.9. фильмни ишлаб чиқаришда ҳар қандай харажат ошиб кетган ёки иқтисод қилинган тақдирда биргаликда ишлаб чиқарувчиларни жалб қилишни тартибга солувчи қоида;

4.10. шартнома шартларини бажармаганлик учун биргаликда ишлаб чиқарувчиларнинг жавобгарлиги;

4.11. фильмни халқаро кинофестивалларда тақдим этиш тартиби;

4.12. биргаликда ишлаб чиқарувчиларнинг ҳар бири қаерда сақланишидан қатъи назар, фильмнинг ўхшаш материалларининг (тасвир ва овоз) ҳам эгаси эканлиги тўғрисидаги банд. Уларни сақлаш бўйича имтиёзли ҳуқуққа продюсери энг кўп молиявий ресурсларни қўшган давлатга тегишли бўлади.

4.13. биргаликда ишлаб чиқарувчилар ўзаро келишувга кўра ишлаб чиқиш ва фильмнинг асл материалларини қайта ишлаш учун лаборатория танлашлари мумкинлиги ҳақидаги банд;

4.14. биргаликда ишлаб чиқарувчиларнинг ҳар бири фильмнинг ўз тилидаги нусхасига эгалик қилиш ҳуқуқига эга эканлигини белгиловчи банд;

4.15. биргаликда ишлаб чиқарувчилар ўртасидаги барча ўзаро ҳисоб-китоблар шартномада кўрсатилган фильмни ишлаб чиқариш тугаган кундан бошлаб 60 кун ичида якунланиши тўғрисидаги банд.

5. Ҳар бир продюсернинг ҳиссаси камида битта тасвирга олиш гуруҳи аъзоси, битта бош рол ижрочиси, битта ёрдамчи актёрни ўз ичига олиши керак. Ваколатли органларнинг келишуви билан биргаликда ишлаб чиқарувчиларнинг бадаллари миқдорини ўзгартиришга рухсат берилади.

6. Шартномага ўзгартиришлар биргаликда ишлаб чиқарувчилар томонидан фильм тугагунига қадар ваколатли органларга тасдиқлаш учун тақдим этилади.

7. Ҳамкор ишлаб чиқарувчилардан бирини алмаштиришга фақат истисно ҳолларда ваколатли органлар билан келишилган ҳолда рухсат этилади.

8. Фильмга «биргаликда ишлаб чиқарилган фильм» мақомини бериш тўғрисидаги қарор Томонлардан бирининг ваколатли органи томонидан бошқа Томоннинг ваколатли органининг розилиги олинганидан кейин қабул қилинади.

9. Томонлардан бирининг ваколатли органи бошқа Томоннинг ваколатли органини келиб тушган аризалар бўйича қабул қилинган қарорлар тўғрисида хабардор қилади.