Ўзбекистон Республикасининг «Муҳофаза этиладиган табиий ҳудудлар тўғрисида»ги Қонунига мувофиқ давлат қўриқхоналари ҳудудидаги табиий мажмуаларга хўжалик фаолиятининг салбий таъсирининг олдини олиш, ноёб ҳамда йўқолиб кетиш хавфи остида турган ўсимлик ва ҳайвонларнинг турларини сақлаб қолиш ҳамда кўпайтириш, шунингдек, Ўзбекистон Республикаси Президентининг «Экология, атроф-муҳитни муҳофаза қилиш ва иқлим ўзгариши вазирлиги фаолиятини самарали ташкил этиш чора-тадбирлари тўғрисида» 2023 йил 31 майдаги ПҚ-171-сон қарори ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги, Ветеринария ва чорвачиликни ривожлантириш қўмитаси, Ўрмон хўжалиги агентлиги, Тошкент, Наманган ва Навоий вилоятлари ҳокимликларининг «Чотқол» давлат биосфера қўриқхонасига туташ 32 859,89 гектар ҳамда «Оқтоғ-Томди» давлат қўриқхонасига туташ 28 500,0 гектар ҳудудда уларнинг қўриқланма зоналарини белгилаш тўғрисидаги таклифи маъқуллансин.

2. Қуйидагилар:

«Чотқол» давлат биосфера қўриқхонасининг қўриқланма зонаси майдони 1-иловага мувофиқ;

«Оқтоғ-Томди» давлат биосфера қўриқхонасининг қўриқланма зонаси майдони 2-иловага мувофиқ тасдиқлансин.

3. Белгилансинки, қўриқхоналарнинг қўриқланма зонасидаги ерлар ушбу зоналарда жойлашган ер эгалари, ердан фойдаланувчилар, ижарачилар ва мулкдорлар ихтиёрида қўриқланма зона режимига риоя этиш шарти билан қолади.

4. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги:

бир ой муддатда «Чотқол» давлат биосфера ва «Оқтоғ-Томди» давлат қўриқхоналарининг қўриқланма зоналари тўғрисидаги низомларни тасдиқласин;

икки ой муддатда Тошкент, Наманган ва Навоий вилоятлари ҳокимликлари ҳамда Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги билан биргаликда қўриқхоналарнинг белгиланаётган қўриқланма зоналари чегараларини белгиласин ҳамда хариталарини ишлаб чиқсин;

ер эгалари, ердан фойдаланувчилар, ижарачилар ва мулкдорлар қўриқланма зоналар ҳудудида жойлашган ер майдонларидан фойдаланишда қўриқланма зона режимига риоя этилиши буйича қонунчиликда белгиланган тартибда доимий равишда назорат ишларини амалга оширсин.

5. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ва Ўзбекистон Республикаси экология, атроф-муҳитни муҳофаза қилиш ва иқлим ўзгариши вазири А.А. Абдухакимов зиммасига юклансин.