Сидқидилдан ва самарали ишлаётган, ўз фаолиятида юксак натижаларга эришган, ижтимоий ҳаётдаги фаоллиги, меҳнатсеварлиги билан ажралиб турадиган Ўзбекистон Республикаси Олий Мажлиси Қонунчилик палатасининг депутатларини ҳамда Девони ходимларини маънавий ва моддий рағбатлантириб бориш мақсадида Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси депутатларини ва Девони ходимларини маънавий ва моддий рағбатлантириш бўйича комиссия (бундан буён матнда Комиссия деб юритилади) 1-иловага* мувофиқ таркибда тузилсин.

2. Ўзбекистон Республикаси Олий Мажлиси Қонунчилик палатаси депутатларини ва Девони ходимларини маънавий ва моддий рағбатлантириш тўғрисидаги низом 2-иловага* мувофиқ тасдиқлансин.

3. Комиссия:

Ўзбекистон Республикаси Олий Мажлиси Қонунчилик палатаси депутатлари (бундан буён матнда депутатлар деб юритилади) томонидан ўз ваколатлари ва вазифалари, Ўзбекистон Республикаси Олий Мажлиси Қонунчилик палатаси Девони ходимлари (бундан буён матнда ходимлар деб юритилади) томонидан ўз меҳнат мажбуриятлари ва вазифаларининг бажарилишини мунтазам равишда таҳлил қилиб бориш;

депутатларга «Адолатли депутат», «Халқпарвар депутат», «Меҳнаткаш депутат» мақомларини бериш, собиқ депутатларга «Фахрий депутат» мақомини бериш бўйича Ўзбекистон Республикаси Олий Мажлиси Қонунчилик палатасининг Кенгашига тавсия киритиш;

сидқидилдан ва самарали ишлаётган, ўз фаолиятида юксак натижаларга эришган, ижтимоий ҳаётдаги фаоллиги, меҳнатсеварлиги билан ажралиб турадиган депутатларга ҳамда ходимларга рағбатлантириш чораларини қўллаш билан боғлиқ масалаларни кўриб чиқиш;

депутатлар ва ходимлар фаолиятини янада самарали ташкил этиш бўйича Ўзбекистон Республикаси Олий Мажлиси Қонунчилик палатасининг раҳбариятига таклифлар киритиб бориш чораларини кўрсин.

4. Ўзбекистон Республикаси Олий Мажлиси Қонунчилик палатасининг Девони (М. Истамов) Комиссиянинг фаолиятини ташкил этишга, унинг мажлисларини ўтказиб боришга кўмаклашсин.

5. Комиссия ўз фаолияти тўғрисида ҳар йил якунида Ўзбекистон Республикаси Олий Мажлиси Қонунчилик палатасининг мажлисида ахборот тақдим этсин.

6. Ўзбекистон Республикаси Олий Мажлиси Қонунчилик палатаси Кенгашининг 2023 йил 26 декабрдаги 3862-IV-сонли Қарори билан тасдиқланган «Ўзбекистон Республикаси Олий Мажлиси Қонунчилик палатасининг Фахрий ёрлиғи ва Ташаккурномаси билан тақдирлаш тўғрисида»ги низомнинг 5-банди «Қонунчилик палатаси депутатларини» деган сўзлардан кейин «ва Девони ходимларини» деган сўзлар билан тўлдирилсин.

7. Ўзбекистон Республикаси Олий Мажлиси Қонунчилик палатаси Кенгашининг:

2020 йил 5 августдаги «Карантинга оид чораларнинг амал қилиши даврида масофавий иш усулига ўтказилган Ўзбекистон Республикаси Олий Мажлиси Қонунчилик палатаси депутатлари ва Девони ходимларининг фаолияти натижадорлигини ошириш масалалари тўғрисида»ги 420-IV-сонли;

2020 йил 22 декабрдаги «Ўзбекистон Республикаси Олий Мажлиси Қонунчилик палатаси депутатларини маънавий ва моддий рағбатлантириш бўйича комиссияни тузиш тўғрисида»ги 660-IV-сонли;

2021 йил 2 мартдаги «Ўзбекистон Республикаси Олий Мажлиси Қонунчилик палатаси Кенгашининг 2020 йил 22 декабрдаги «Ўзбекистон Республикаси Олий Мажлиси Қонунчилик палатаси депутатларини маънавий ва моддий рағбатлантириш бўйича комиссияни тузиш тўғрисида»ги 660-IV-сонли Қарорига ўзгартиш киритиш ҳақида»ги 776-IV-сонли (Ўзбекистон Республикаси Олий Мажлиси палаталарининг Ахборотномаси, 2021 йил, № 3, 283-модда);

2022 йил 14 мартдаги «Ўзбекистон Республикаси Олий Мажлиси Қонунчилик палатаси Кенгашининг 2020 йил 22 декабрдаги «Ўзбекистон Республикаси Олий Мажлиси Қонунчилик палатаси депутатларини маънавий ва моддий рағбатлантириш бўйича комиссияни тузиш тўғрисида»ги 660-IV-сонли Қарорига ўзгартиш киритиш ҳақида»ги 1944-IV-сонли (Ўзбекистон Республикаси Олий Мажлиси палаталарининг Ахборотномаси, 2022 йил, № 3, 312-модда) қарорлари ўз кучини йўқотган деб топилсин.

8. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари М. Ходжаева зиммасига юклатилсин.

9. Ушбу Қарор қабул қилинган кундан эътиборан кучга киради.