Ўзбекистон Республикаси Вазирлар Маҳкамасининг 2003 йил 13 февралдаги «Ўзбекистон Республикасида чакана савдо қоидаларини ҳамда Ўзбекистон Республикасида умумий овқатланиш маҳсулотларини (хизматларини) ишлаб чиқариш ва сотиш қоидаларини тасдиқлаш тўғрисида»ги 75-сонли қарори ижросини таъминлаш юзасидан вилоят ҳудудида умумий овқатланиш таомларининг айрим турларини махсус ажратилган жойларда сотиш тартибини белгилаш мақсадида Ўзбекистон Республикаси «Маҳаллий давлат ҳокимияти тўғрисида»ги Қонунининг 6-моддасига асосан қарор қиламан:

1. Вилоят ҳудудида умумий овқатланиш махсулотлари (таомлари) айрим турларини махсус ажратилган жойларда сотиш тартиби (кейинги ўринларда Тартиб деб аталади) иловага мувофиқ тасдиқлансин.

2. Вилоят Фавқулодда вазиятлар бошқармаси (О. Ҳазратқулов), Давлат солиқ бошқармаси (А. Бозоров), Давлат санитария-эпидемиология назорати бошқармаси (Ш. Шеров), Санитария-эпидемиологик осойишталик маркази (С. Раҳимов) Қурилиш бош бошқармаси (О. Худойназаров) ва туман (шаҳар) ҳокимликлари ушбу Тартибга риоя этилишини таъминласинлар.

3. Мазкур қарор «Қашқадарё» ва «Новости Кашкадарьи» газеталарида эълон қилинсин ҳамда ҳокимликнинг qashqadaryo.uz расмий веб-сайтига жойлаштирилсин.

4. Мазкур қарор расмий эълон қилинган кундан бошлаб кучга киритилсин.

5. Ушбу қарорнинг бажарилишини назорат қилиш вилоят ҳокимининг биринчи ўринбосари У. Бутаев зиммасига юклансин.

1. Ушбу Тартиб Қашқадарё вилояти ҳудудида мажбурий тартибда устав фондидаги улуши камида 51 фоиз бўлган маҳаллий давлат ҳокимияти органи муассислигида ташкил этилган деҳқон (озиқ-овқат) бозорлари ва савдо комплекслари (кейинги ўринларда ташкилотлар деб юритилади) ҳудудидаумумий овқатланиш махсулотлари (таомлари) айрим турларини махсус ажратилган жойларда сотиш тартиб-қоидаларини белгилайди.

2 Умумий овқатланиш махсулотлари (таомлари) айрим турларини уй шароитларида тайёрлаб келинган ёки жойлардаги ваколатли орган қарори билан махсус ажратилган жойларда овқатланиш ўринлари ташкил этмасдан донали тайёрлаш ва сотиш бўйича хизмат кўрсатувчи — якка тартибдаги тадбиркор сифатида рўйхатдан ўтган жисмоний шахслар томонидан амалга оширилади.

3. Умумий овқатланиш махсулотлари (таомлари) айрим турларини, донали тайёрлаш, пишириш ва сотиш учун махсус ажратилган жойлар енгил конструктив қурилган ва шаҳарсозлик, санитария ва ёнғин хавфсизлиги нормалари ва талабларига жавоб берадиган, озиқ-овқат маҳсулотларини вақтинча сақлаш, масаллик тайёрлаш, пишириш ва персонал шахсий гигиенасига риоя этиш имкониятига эга бўлиши керак.

4. Ушбу Тартибда қуйидаги асосий тушунчалар қўлланилади:

умумий овқатланиш махсулотлари (таомлари) айрим турлари — масаллиғи уй шароитида ёки ваколатли орган томонидан махсус ажратилган жойларда тайёрланиб, овқат пишириш воситаларида пишириладиган ва сотиладиган донали таомлар (сомса, блинчик, чебурек, манти, хоним, сосискали кулча, фаст-фуд ва бошқа донали таомлар);

махсус ажратилган жой — туман (шаҳар) ҳокимликлари томонидан белгиланган тартибда ажратилган, умумий овкатланиш махсулотлари (таомлари) айрим турлари тайёрланадиган ва сотиладиган жой;

талабгор — уй шароитида ёки махсус ажратилган жойларда овқатланиш жойларини ташкил этмасдан умумий овқатланиш махсулотлари (таомлари) айрим турларини тайёрлаш ва сотиш истагини билдирган якка тартибдаги тадбиркор;

ваколатли орган — туман (шаҳар) ҳокимликлари;

ваколатли давлат органлари — вилоят Фавқулодда вазиятлар бошқармаси, Давлат солиқ бошқармаси, Давлат санитария-эпидемиология назорати бошқармаси, Санитария-эпидемиологик осойишталик маркази, Қурилиш бош бошқармаси;

жойлашиш схемаси — ваколатли орган томонидан махсус ажратилган жойларнинг олдиндан тасдиқланган жойлашуви.

5. Туман (шаҳар) ҳокимликлари томонидан ташкилотлар маъмурияти таклифига биноан умумий овқатланиш махсулотлари (таомлари) айрим турларини тайёрлаш ва сотиш учун махсус ажратилган жой танланган кундан кейин 1 иш куни давомида ваколатли давлат органлари (Давлат санитария-эпидемиология назорати бошцармаси ва унинг туман (шаҳар) фшиаллари бундан мустасно) билан келишиш учун юборилади.

Ваколатли давлат органлари мазкур келишишни 3 иш кунида амалга ошириши лозим.

Умумий овқатланиш махсулотлари (таомлари) айрим турларини тайёрлаш ва сотиш учун махсус ажратилаётган жойни келишиш асослари кўрсатилиб рад этилган тақдирда, ваколатли органлар томонидан 2 иш куни давомида янги таклиф тайёрланиб, қайта келишиш учун юборилади.

6. Ваколатли давлат органлари билан келишиш учун махсус ажратилаётган жой алоҳида кўрсатилган ҳолда ташкилот ҳудудининг умумий жойлашиш схемаси тақдим этилиши лозим.

7. Ташкилот ҳудудидаги махсус ажратилаётган жойлар санитария қоидалари ва гигиена нормалари, ёнғиндан сақланиш ва шаҳарсозлик нормаларига жавоб берган тақдирда келишилади.

8. Махсус ажратилган жойларнинг сони ҳудуднинг ижтимоий-иқтисодий ривожланганлик даражаси, савдо айланмасининг юқори ва пастлиги, аҳолининг кунлик истеъмол талабидан келиб чиқиб ваколатли органлар томонидан белгиланади.

9. Донабай умумий овқатланиш махсулотлари (таомлари) айрим турлари масаллиқларини уй шароитида тайёрлаб келиб пишириб сотиш ёки махсус ажратилган жойда тайёрлаб, пишириб сотиш жойларининг жойлашиш схемаси ташкилот маъмурияти таклифига биноан ваколатли органлари томонидан тузилади ҳамда жойлашув схемаси харитаси ташкилотга кириш жойи қисмида кўринарли тарзда жойлаштирилиши шарт.

Умумий овқатланиш махсулотлари (таомлари) айрим турларини сотиш учун махсус жойларни ажратиш ҳар икки йилда бир марта қайта кўриб чиқилади.

10. Талабгор ташкилот маъмурияти билан тузилган ижара шартномаси асосида уй шароитида ёки ваколатли орган қарори билан махсус ажратилган жойларда умумий овқатланиш махсулотлари (таомлари) айрим турларини тайёрлаш ва сотиш бўйича хизмат кўрсатади.

Ушбу хизмат кўрсатиш фаолияти билан шуғулланиш учун рухсатнома талаб этилмайди.

Хизмат кўрсатиш фаолиятини амалга ошириш давомида назорат-касса техникаси қўлланилмайди.

Умумий овқатланиш махсулотлари (таомлари) айрим турларини тайёрлаш ва сотишни амалга оширишнинг мажбурий талаблари ва шартлари қуйидагилардан иборат:

санитария қоидалари ва гигиена нормалари;

ёнғиндан сақланиш нормалари;

техника хавфсизлиги қоидаларига риоя қилиниши лозим.

Талабгорлар ва улар томонидан ёлланган ходимлар қонун ҳужжатларида белгиланган тартибда тўлиқ тиббий кўрикдан ўтишлари шарт.

Умумий овқатланиш маҳсулотлари (таомлари) айрим турлари уй шароитида тайёрланса, овқат масаллиқлари вақтинча сақланиши, таом тайёрланиши, пиширилиши жараёни ва фойдаланиладиган хоналар ҳамда жиҳозлар санитария қоидалари ва гигиена нормаларига мувофиқлиги якка тартибдаги тадбиркорнинг зиммасига юкланади.

Махсус ажратилган жойларда маиший чиқиндиларни йиғиш учун қопқоқли чиқинди қутилари бўлиши лозим.

11. Умумий овқатланиш махсулотлари (таомлари) айрим турларини ташкилотларнинг кириш йўлаклари, автомобиль тўхташ жойларида, бозор ва савдо комплекси ҳудудида жойлашган савдо магазинларига кириш йўлларига туташ жойлар, ҳожатхона, чиқиндихонага 25 метр ва ундан кам масофада жойлашган ҳудудларда тайёрлаш ва сотишга йўл қўйилмайди.

12. Ушбу Тартибга риоя этилишини назорат қилиш қонун ҳужжатларида белгиланган тартибда ваколатли давлат органлари томонидан амалга оширилади.

13. Ушбу Тартиб асосида фаолият олиб борувчи талабгорларнинг сони чекланмайди.

14. Махсус ажратилган жойларда умумий овқатланиш махсулотлари (таомлари) айрим турларини тайёрлаш ва сотиш давомида муҳандислик- коммуникация тармоқларига уланиш талабгорлар томонидан қонун ҳужжатларида белгиланган тартибга мувофиқ амалга оширилади.

15. Ушбу Тартиб талабларини бузган айбдор шахслар қонун ҳужжатларида белгиланган тартибда жавобгар бўладилар.