Ўзбекистон Республикаси Президенти томонидан 2017 йил 14 февралда қабул қилинган Р-4849-сонли фармойиши — «2017 — 2021 йилларда Ўзбекистон Республикасининг ривожланишининг бешта устувор йўналиши бўйича Ҳаракатлар стратегиясини амалга оширишга доир ташкилий чора-тадбирлар тўғрисида» ижросини таъминлаш, шунингдек, «Стратегия ривожланиши» марказининг моддий-техник базасини мустаҳкамлашга давлат томонидан кўмаклашиш мақсадида, Ўзбекистон Республикаси Вазирлар Маҳкамаси қарор қилади:

1. Маълумот учун қабул қилинсинки, Ўзбекистон Республикаси Ҳарбий суди томонидан 2015 йил 27 ноябрь ва 2016 йил 12 августдаги ҳукмларига асосан, иловада кўрсатилган рўйхат бўйича автотранспорт воситалари давлат даромадига ўтказилган.

2. Ўзбекистон Республикаси Адлия вазирлиги, Хусусийлаштириш, демонополизация ва рақобатни ривожлантириш бўйича давлат қўмитаси, Молия вазирлиги ва Иқтисодиёт вазирлигининг мазкур қарорга иловада кўрсатилган автотранспорт воситаларини истисно тариқасида «Стратегия ривожланиши» марказининг мулкига беғараз топшириш тўғрисидаги таклифига розилик берилсин.

3. «Стратегия ривожланиши» маркази ушбу қарорга иловада кўрсатилган автотранспорт воситаларини белгиланган тартибда қабул қилиб олиши ва уларнинг самарали фойдаланилишини таъминлаши лозим.

4. Белгилаб қўйилсинки, агар Ўзбекистон Республикаси Ҳарбий суди томонидан 2015 йил 27 ноябрь ва 2016 йил 12 августда чиқарилган ҳукмлар бекор қилинса ёки ўзгартирилса, ушбу қарорга иловада кўрсатилган автотранспорт воситаларига нисбатан ҳибсдан озод қилиш (рўйхатдан чиқариш) тўғрисида суд қарори қабул қилинса, уларни асл ҳолида қайтариш ёки уларнинг қийматини қоплаш тўғрисида қарор чиқарилса, «Стратегия ривожланиши» маркази ушбу автотранспорт воситаларини белгиланган тартибда қайтариши ёки суд қарорида кўрсатилган шахсга уларнинг қийматини тўлиқ қоплаб бериши шарт.

5. Ушбу қарорнинг ижросини назорат қилиш Ўзбекистон Республикаси Вазирлар Маҳкамаси ҳузуридаги Ёшлар сиёсати, маданият, ахборот тизимлари ва телекоммуникация масалалари бўйича Ахборот-таҳлил департаментига юклатилсин.