Ўзбекистон Республикаси Ҳукумати ва Туркия Республикаси Ҳукумати, кейинги ўринларда «Томонлар» деб аталувчилар,

Томонлар ўртасидаги дўстлик алоқаларини мустаҳкамлаш жараёнига ҳиссасини қўшиб,

Томонлар ўртасида метеорология соҳасидаги ҳамкорликни янада ривожлантириш мақсадида,

метеорология соҳасида яқин ҳамкорлик натижасида келадиган фойда ва ўзаро манфаатдорликни инобатга олиб,

қуйидагилар тўғрисида келишиб олдилар:

Метеорологик фаолиятни такомиллаштириш учун ҳамда ҳар бир Томон давлатининг миллий қонунчилигига мувофиқ, Томонлар тенглик, ўзаролик ва ўзаро фойда принциплари асосида маълумот, тажриба ва технологиялар билан алмашиш орқали ҳамкорлик қиладилар.

Томонлар қуйидаги соҳаларда ҳамкорлик қиладилар:

a) қисқа муддатли прогноз ва дастлабки об-ҳаво прогнози;

b) атроф-муҳит ва иқлим ўзгариши масалалари бўйича маълумотни баҳолаш ва таҳлил қилиш;

c) замонавий технологияларни қўллаш, жумладан, об-ҳаво прогнозида рақамли моделлардан фойдаланиш ҳамда об-ҳаво прогнози учун сунъий йўлдошлар ва метеорологик радарларнинг маълумотларидан фойдаланиш;

d) барвақт огоҳлантириш тизимларини ишлаб чиқиш ва табиий офатлар хавфини камайтириш;

e) метеорологик асбобларни калибрлаш;

Мазкур Битимнинг 2-моддасида санаб ўтилган соҳаларда ҳамкорликни амалга ошириш учун Томонлар қуйидаги усулларда ҳамкорлик қиладилар:

a) метеорология соҳасидаги ҳар бир Томон давлати миллий қонунчилигида тақиқланмаган илмий-техникавий маълумотлар ҳамда илмий-тадқиқот ва тажриба-конструкторлик ишлари бўйича ҳужжатлар билан алмашиш;

b) мутахассислар, тадқиқотчилар ва маслаҳатчилар билан алмашиш;

c) қўшма ишчи мажлислар, учрашувлар, семинарлар, ўқув дастурлари ва ўқув сафарларини ташкил этиш;

d) қўшма илмий-техникавий лойиҳаларни тайёрлаш ва амалга ошириш.

Қуйидаги органлар мазкур Битим қоидаларини амалга оширишда ваколатли ҳисобланади:

Ўзбекистон томонидан — Ўзбекистон Республикаси Фавқулодда вазиятлар вазирлиги ҳузуридаги Гидрометеорология хизмати маркази (Ўзгидромет);

Туркия томонидан — Туркия Республикаси Ўрмон хўжалиги ва сув ишлари вазирлиги ҳузуридаги Метеорология бош директорати.

Томонлар ўзларининг ваколатли органлари тўғрисидаги ҳар қандай ўзгариш ҳақида бир-бирларини дарҳол дипломатик канал орқали хабардор қиладилар.

Томонлар, ўз давлатининг тегишли миллий қонунчилиги ва ўзлари иштирокчи бўлган халқаро шартномаларга мувофиқ, мазкур Битим доирасида тақдим этилган ёки яратилган интеллектуал мулк ҳуқуқини самарали ҳимоя қилишни таъминлайдилар. Мазкур Битим мақсади учун интеллектуал мулк тушунчаси 1967 йил 14 июлда Стокгольмда имзоланган Бутунжаҳон интеллектуал мулк ташкилотини ташкил этиш тўғрисидаги Конвенциянинг 2-моддасида баён қилинган мазмунда тушунилади.

Мазкур Битим доирасида амалга ошириладиган ҳамкорлик фаолияти билан боғлиқ харажатлар Томонларнинг ҳар бир алоҳида ҳолат бўйича ўзаро келишувларига биноан қопланади.

Томонлар мазкур Битим доирасидаги ҳамкорлик фаолиятида иштирок этиш учун ҳукуматга оид ва илмий (академик) муассасалар, хусусий корхоналар ва ноҳукумат ташкилотларни таклиф этишлари мумкин.

Томонларнинг ўзаро ёзма келишувига асосан мазкур Битимга унинг ажралмас қисми ҳисобланадиган тегишли баённомалар билан расмийлаштириладиган ва мазкур Битимнинг 12-моддасига мувофиқ кучга кирадиган ўзгартириш ва қўшимчалар киритилиши мумкин.

Мазкур Битим қоидаларини талқин қилиш ёки қўллашда юзага келадиган ҳар қандай низо Томонлар тарафидан музокаралар ва маслаҳатлашувлар орқали ҳал этилади.

Ўзаро ёзма келишувга асосан, Томонлар ҳар бир Томон давлати миллий қонунчилигига мувофиқ, мазкур ҳамкорлик натижаларини учинчи томонларга тақдим этишга келишишлари мумкин.

Мазкур Битим Томонларнинг давлатлари иштирокчи бўлган бошқа халқаро битимлардан келиб чиқадиган мажбуриятларига дахл қиладиган тарзда талқин этилмаслиги лозим.

Мазкур Битим Томонлар унинг кучга кириши учун зарур бўлган давлат ички процедураларини бажарганликлари тўғрисида бир-бирларига юборган сўнгги ёзма хабарнома дипломатик каналлар орқали олинган санадан бошлаб кучга киради.

Мазкур Битим бир (1) йиллик муддат давомида амал қилади. Башарти Томонлардан бири бошқа Томонни мазкур Битимнинг амал қилиш муддати тугалланишига олти (6) ой қолгунга қадар унинг амал қилишини тугатиш нияти тўғрисида дипломатик каналлар орқали ёзма хабардор қилмаса, унинг амал қилиши ўз-ўзидан кейинги бир (1) йиллик даврларга узаяверади.

Мазкур Битимнинг тугатилиши Битимга мувофиқ келишилган ва у тугатилишига қадар бошланган лойиҳалар ва тадбирларнинг амал қилиш муддати ва давомийлигига дахл қилмайди.

Тошкент шаҳрида 2018 йил 30 апрелда икки (2) асл нусхада, ҳар бири ўзбек, турк ва инглиз тилларида тузилди, бунда барча матнлар тенг аутентикдир. Талқин қилишда келишмовчиликлар юзага келганда, инглиз тилидаги матн устувор ҳисобланади.