Ўзбекистон Республикаси Ҳукумати ва Туркия Республикаси Ҳукумати (кейинги ўринларда «Томонлар» деб аталувчилар),

тенг ҳуқуқлилик ва ўзаро ҳурмат асосида мавжуд маданий алоқаларни мустаҳкамлаш ҳамда ўзаро ҳамкорликни янада ривожлантириш истагида,

қуйидагилар тўғрисида келишиб олдилар:

Мазкур Битимни амалга ошириш мақсадида Томонлар қуйидаги ваколатли органларни белгилайдилар:

а) Ўзбекистон Республикаси Ҳукумати номидан — Маданият вазирлиги;

b) Туркия Республикаси Ҳукумати номидан — Маданият ва туризм вазирлиги.

Томонлар икки мамлакатнинг маданият ва санъат муассасалари ўртасида ҳамкорликни ривожлантиришга интиладилар.

Томонлар маданий тараққиёт, айниқса, санъат, умумий анъаналар, кутубхоначилик, ноширлик, археология, музейшунослик соҳаларида ҳамкорлик қиладилар ҳамда номоддий маданий меросни муҳофаза қилиш, уни қайта тиклаш ва илмий тадқиқ этиш бўйича қўшма лойиҳаларни ташкил қиладилар.

Томонлар маданий меросни асраш, қайта тиклаш ва идентификациялаш бўйича ўзларининг тегишли органлари ва муассасалари ўртасида тўғридан-тўғри алоқа ва ҳамкорликни қўллаб-қувватлайдилар.

Томонлар бошқа мамлакат мутахассисларини, айниқса, маданий меросни асраш соҳасидаги халқаро конгресслар, симпозиумлар ва кўргазмаларда иштирок этиш учун таклиф этадилар.

Томонлар маданий бойликларнинг ноқонуний ўтказилишига қарши зарур эҳтиёткорлик чоралари ва тадбирларни амалга ошириш орқали ҳамкорлик қиладилар.

Томонлар театр, мусиқа, хореография, опера, балет ва санъатнинг бошқа тармоқлари соҳасидаги алоқаларни ривожлантиришни ҳамда ушбу доирада анъанавий ҳунармандчиликни ривожлантириш, қўшма тадбирлар ҳамда санъаткорлар ва ижодий жамоаларнинг ўзаро ташрифларини ташкил этишни қўллаб-қувватлайдилар.

Томонлар, қадимий ашёлар истисно бўлгани ҳолда, ўзаро кўргазмалар ташкил этишни рағбатлантирадилар ва зарур чора-тадбирларни таъминлайдилар.

Томонлар ўз мамлакатларида бошқа мамлакатнинг адабиётини тарғиб қилишда ҳамкорлик қиладилар.

Томонлар икки мамлакат ёзувчиларининг бадиий асарларини таржима қилиш ва чоп этишни ўзаро рағбатлантирадилар.

Томонлар бир-бирларининг телерадиоэшиттириш корпорациялари ўртасида икки томонлама ҳамкорликни қўллаб-қувватлайдилар ҳамда ўз мамлакатларида ташкил этиладиган адабиёт ва нашриётга оид халқаро симпозиумлар, гуруҳлар ва фестивалларда иштирок этишни рағбатлантирадилар.

Томонлар ўз мамлакатларида ташкил этиладиган китоб ярмаркалари ҳақида бир-бирларини хабардор қиладилар ҳамда икки давлат ёзувчилари ва нашриёт муассасаларининг ушбу ярмаркалардаги ўзаро иштирокини қўллаб-қувватлайдилар.

Томонлар кинематография соҳасида ҳамкорлик қиладилар ҳамда ўз мамлакатларида ташкил этиладиган халқаро кино фестивалларида ўзаро иштирок этишни қўллаб-қувватлайдилар.

Томонлар ўз давлатларининг тегишли миллий қонунчилиги ва улар иштирокчи ҳисобланган халқаро шартномаларга мувофиқ мазкур Битим асосида ўтказилган ёки вужудга келган интеллектуал мулк ҳуқуқлари самарали муҳофаза қилинишини таъминлайдилар. Мазкур Битим мақсади учун «интеллектуал мулк» тушунчаси 1967 йил 14 июлда Стокгольмда имзоланган Жаҳон интеллектуал мулк ташкилотини ташкил этиш тўғрисидаги Конвенциянинг 2-моддасида баён этилган мазмун асосида англашилади.

Томонларнинг ваколатли идоралари, зарурат бўлганда, мазкур Битим қоидаларини амалга ошириш билан боғлиқ масалалар бўйича масалаҳатлашувлар ўтказадилар ва ишчи гуруҳлар тузадилар.

Мазкур Битим доирасида амалга ошириладиган барча фаолият билан боғлиқ молиявий масалалар Томонларнинг ваколатли идоралари ўртасида ўзаро келишув асосида дипломатик каналлар орқали ҳал қилинади.

Мазкур Битим қоидаларини талқин қилиш ёки қўллаш юзасидан келиб чиқадиган ҳар қандай тафовут ёки келишмовчиликлар Томонлар ўртасида музокаралар орқали ҳал этилади.

Томонларнинг ўзаро ёзма келишувига кўра мазкур Битимга ўзгартириш ва қўшимчалар киритилиши мумкин. Ушбу ўзгартириш ва қўшимчалар мазкур Битим 18-моддасининг биринчи хатбошисида белгиланган бир хил юридик тартибга мувофиқ кучга киради.

Мазкур Битим Томонларнинг давлатлари иштирок этадиган бошқа халқаро шартномалар юзасидан келиб чиқадиган ҳуқуқ ва мажбуриятларига таъсир кўрсатмайди.

Мазкур Битим Томонлар унинг кучга кириши учун зарур давлат ички процедураларини бажарганликлари тўғрисида бир-бирларини хабардор қилувчи сўнгги ёзма хабарнома дипломатик каналлар орқали олинган санадан бошлаб кучга киради.

Мазкур Битим беш (5) йил давомида амалда бўлади, башарти Томонлардан бири бошқа Томонни мазкур Битимни тугатиш нияти тўғрисида олти ой олдин ёзма хабардор қилмаса, кейинги тенг ва кетма-кет муддатларга ўз-ўзидан узаяверади.

Мазкур Битим амал қилишининг тугатилиши, башарти Томонлар бошқача келишувга эришмаган бўлса, Битим доирасида амалга оширилаётган мавжуд дастурлар ва давом этаётган фаолиятга таъсир қилмайди.

Тошкент шаҳрида 2018 йил 30 апрелда икки асл нусхада, ҳар бири ўзбек, турк ва инглиз тилларида тузилди, бунда барча матнлар тенг аутентикдир. Мазкур Битим қоидаларини талқин қилишда келишмовчиликлар юзага келган тақдирда, инглиз тилидаги матн устувор ҳисобланади.