Ўзбекистон Республикаси Президентининг «Ўзбекистон Республикаси Олий ва ўрта махсус таълим вазирлигининг Ўрта махсус, касб-ҳунар таълими маркази фаолиятини такомиллаштириш тўғрисида» 2018 йил 3 февралдаги ПҚ-3504-сон қарори ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Олий ва ўрта махсус таълим вазирлигининг Касб-ҳунар таълими маркази тўғрисида низом 1-иловага мувофиқ тасдиқлансин.

2. Ўзбекистон Республикаси Ҳукуматининг 2-иловага мувофиқ айрим қарорлари ўз кучини йўқотган деб ҳисоблансин.

3. Ўзбекистон Республикаси Олий ва ўрта махсус таълим вазирлигининг Касб-ҳунар таълими маркази манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсинлар.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Қ.В. Акмалов ва Ўзбекистон Республикаси Олий ва ўрта махсус таълим вазирлигининг Касб-ҳунар таълими маркази директори — олий ва ўрта махсус таълим вазирининг биринчи ўринбосари М.М. Холмухамедов зиммасига юклансин.

1. Ушбу Низом Ўзбекистон Республикаси Олий ва ўрта махсус таълим вазирлигининг Касб-ҳунар таълими маркази (кейинги ўринларда Марказ деб аталади) мақоми, асосий вазифалари ва функцияларини, ҳуқуқлари ва жавобгарлигини, фаолиятини ташкил этиш ҳамда ҳисобот бериш тартибини, шунингдек, унинг раҳбарларининг функционал вазифалари ва жавобгарлигини белгилайди.

2. Марказ касб-ҳунар таълими соҳасида давлат сиёсатини ишлаб чиқиш ва амалга ошириш учун жавоб берадиган ваколатли давлат бошқаруви органи ҳисобланади.

3. Марказ Ўзбекистон Республикаси Олий ва ўрта махсус таълим вазирлигига ҳамда Ўзбекистон Республикаси Вазирлар Маҳкамасига бўйсунади.

4. Марказ ўз фаолиятини Ўзбекистон Республикаси Президентининг «Ўзбекистон Республикаси Олий ва ўрта махсус таълим вазирлигининг Ўрта махсус, касб-ҳунар таълими маркази фаолиятини такомиллаштириш тўғрисида» 2018 йил 3 февралдаги ПҚ-3504-сон қарорига мувофиқ амалга оширади.

5. Марказ ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, Ўзбекистон Республикаси Олий ва ўрта махсус таълими вазирининг буйруқларига, шунингдек, ушбу Низомга ва бошқа қонун ҳужжатларига амал қилади.

6. Марказнинг ўз ваколатлари доирасида қабул қилинган қарорлари давлат ва хўжалик бошқаруви органлари, маҳаллий давлат ҳокимияти органлари, бошқа ташкилотлар ва уларнинг мансабдор шахслари, шунингдек, фуқаролар томонидан бажарилиши мажбурийдир.

7. Қорақалпоғистон Республикаси, вилоятлар ва Тошкент шаҳар касб-ҳунар таълими бошқармалари, шунингдек, Марказ таркибига кирувчи Касб-ҳунар таълими тизимини инновацион ривожлантириш, педагог кадрларнинг малакасини ошириш ва уларни қайта тайёрлаш институти ҳамда Метрологик назорат хизмати (кейинги ўринларда Марказ таркибига кирувчи бошқа ташкилотлар деб аталади) юридик шахслар ҳисобланадилар, Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ҳамда бланкаларга, мустақил балансга, Ўзбекистон Республикаси Молия вазирлигининг Ғазначилигида шахсий ғазна ҳисобварақларига, банк ҳисоб рақамларига, шу жумладан хорижий валютадаги банк ҳисоб рақамларига эга бўладилар.

8. Марказнинг расмий номи:

а) давлат тилида:

тўлиқ номи — Ўзбекистон Республикаси Олий ва ўрта махсус таълим вазирлигининг Касб-ҳунар таълими маркази, қисқартмаси — КҲТМ;

б) рус тилида:

тўлиқ номи — Центр профессионального образования Министерства высшего и среднего специального образования Республики Узбекистан, қисқартмаси — ЦПО;

в) инглиз тилида:

тўлиқ номи — The Center vocational education of the Ministry оf Нigher and secondary specialized educаtiоn оf the Republic оf Uzbekistаn, қисқартмаси — CVE.

9. Марказ тизимига қуйидагилар киради:

марказий аппарат;

Қорақалпоғистон Республикаси, вилоятлар ва Тошкент шаҳар касб-ҳунар таълими ҳудудий бошқармалари (кейинги ўринларда ҳудудий бошқармалар деб аталади);

Касб-ҳунар таълими тизимини инновацион ривожлантириш, педагог кадрларнинг малакасини ошириш ва уларни қайта тайёрлаш институти;

Метрологик назорат хизмати;

идоравий касб-ҳунар коллежлари;

нодавлат касб-ҳунар коллежлари.

10. Қуйидагилар Марказнинг асосий вазифалари ҳисобланади:

1) тасарруфида касб-ҳунар коллежлари бўлган вазирликлар, идоралар, хўжалик бирлашмалари, тижорат банклари ва йирик корхоналар билан биргаликда касб-ҳунар таълими соҳасида ягона давлат сиёсатини амалга ошириш, касб-ҳунар таълимини ривожлантириш бўйича ўрта ва узоқ муддатли дастурларни ҳаётга татбиқ этиш ва касб-ҳунар коллежларида ўқув-тарбия жараёнига ташкилий ва методик раҳбарлик қилишни таъминлаш;

2) иш берувчиларнинг эҳтиёжлари ва таклифларидан ҳамда илғор хорижий тажрибадан келиб чиқиб, шунингдек, иқтисодиётнинг реал секторидаги таркибий ўзгаришларни ҳисобга олиб касб-ҳунар коллежларида ўрта бўғиннинг меҳнат бозорида талаб этилган мутахассисларини тайёрлашнинг ўқув режалари ва дастурлари ишлаб чиқилишини ташкил этиш;

3) юқори профессионал раҳбарлар ва педагог кадрларни танлаш ҳамда улар билан касб-ҳунар коллежларини таъминлаш, уларнинг малакаси ва касбий даражасини мунтазам равишда ошириш, шунингдек, улар меҳнатини рағбатлантириш ишларини тизимли асосда таъминлаш;

4) тизимнинг раҳбар ва педагог кадрлари малакасини ошириш ҳамда уларни қайта тайёрлашнинг янги шакллари ва усулларини жорий этиш;

5) республикадаги барча касб-ҳунар коллежлари ўқув-методик ишларини уларнинг идоравий мансублигидан қатъи назар, мувофиқлаштириш;

6) касб-ҳунар коллежларида таълим сифатини оширишга йўналтирилган чора-тадбирларни ишлаб чиқиш ва амалга ошириш, таълим жараёнини доимий равишда такомиллаштириш;

7) умумтаълим мактаблари 10-11-синф ўқувчиларининг касбий кўникмаларини шакллантириш бўйича ихтисослаштирилган ўқув-ишлаб чиқариш мажмуаларида касб-ҳунар таълими жараёнини мувофиқлаштириш ва методик таъминлаш.

11. Марказ ўзига юкланган вазифаларга мувофиқ қуйидаги функцияларни амалга оширади:

1) тасарруфида касб-ҳунар коллежлари бўлган вазирликлар, идоралар, хўжалик бирлашмалари, тижорат банклари ва йирик корхоналар билан биргаликда касб-ҳунар таълими соҳасида ягона давлат сиёсатини амалга ошириш, касб-ҳунар таълимини ривожлантириш бўйича ўрта ва узоқ муддатли дастурларни ҳаётга татбиқ этиш ва касб-ҳунар коллежларида ўқув-тарбия жараёнига ташкилий ва методик раҳбарлик қилишни таъминлаш соҳасида:

касб-ҳунар коллежлари фаолиятини ташкил этиш ва яхшилаш масалаларида давлат бошқарувини амалга оширади;

ягона давлат сиёсатининг асосий йўналишлари, шу жумладан, касб-ҳунар таълими тизимини янада ривожланишини назарда тутадиган давлат дастурлари ва бошқа дастурлар, шунингдек, уларни амалга ошириш механизмлари бўйича Вазирлар Маҳкамасига таклифлар киритади;

норматив-ҳуқуқий ҳужжатлар лойиҳаларини, шунингдек, Марказга юкланган вазифалар ва функцияларни бажариш билан боғлиқ бошқа ҳужжатларни Вазирлар Маҳкамасига белгиланган тартибда киритади;

Марказ тизимига кирадиган касб-ҳунар таълими муассасалари ва ташкилотларни ривожлантириш истиқболларини прогнозлаштиради, давлат ва ҳудудий дастурларни ишлаб чиқади;

иқтисодиёт тармоқлари ва соҳаларда касб-ҳунар коллежлари битирувчиларига бўлган талабни ҳисобга олган ҳолда, тасарруфида касб-ҳунар коллежлари мавжуд бўлган вазирлик ва идоралар билан биргаликда касблар ва мутахассисликлар йўналишларини хатловдан ўтказади ва кадрлар тайёрлаш бўйича таклифлар ишлаб чиқади;

касб-ҳунар коллежларини лойиҳалаштириш, қуриш, таъмирлаш ва реконструкция қилиш ишларининг мониторингини олиб боради;

касб-ҳунар таълими соҳасида халқаро ҳамкорликни амалга оширади, касб-ҳунар коллежлари фаолиятини ривожлантириш ва такомиллаштиришга хорижий инвестицияларни жалб этишда иштирок этади, мамлакатимиз ва хорижий молия ташкилотларининг кредитлари ва грант маблағларидан мақсадли ва самарали фойдаланилиши мониторингини олиб боради;

касб-ҳунар таълими давлат таълим стандартининг сифатли бажарилишини таъминлаш учун идоравий мансуб бўлинмалар, шунингдек, идоравий ва нодавлат касб-ҳунар коллежлари ҳамда Қорақалпоғистон Республикаси, вилоятлар ва Тошкент шаҳар касб-ҳунар таълими ҳудудий бошқармалари фаолиятини мувофиқлаштиради;

касб-ҳунар таълими давлат таълим стандарти ҳамда касб-ҳунар таълими тизими мутахассисларига қўйиладиган малака талабларининг бажарилиши юзасидан идоравий назоратни ташкил этади;

касб-ҳунар коллежлари ва ҳудудий бошқармалар фаолиятига методик раҳбарликни амалга оширади;

ахборот технологиялари ва молиявий назоратнинг эътироф этилган халқаро стандартларини жорий этиш орқали идоравий мансуб касб-ҳунар коллежларида бюджет қонунчилиги бузилишининг олдини олишга йўналтирилган молиявий назоратни амалга оширади;

касб-ҳунар таълими тизимида халқаро алоқаларни кенгайтириш ва унинг самарадорлигини оширишга кўмаклашади, касб-ҳунар таълими соҳасида хорижий ва халқаро ташкилотлар билан алоқаларни ва ҳамкорликни йўлга қўяди;

хорижий касб-ҳунар таълими муассасалари билан мамлакатимиз касб-ҳунар коллежларининг ўзаро ҳамкорлигини таъминлашга қаратилган дастурларнинг ишлаб чиқилиши ҳамда амалга оширилишини мувофиқлаштиради;

2) иш берувчиларнинг эҳтиёжлари ва таклифларидан ҳамда илғор хорижий тажрибадан келиб чиқиб, шунингдек, иқтисодиётнинг реал секторидаги таркибий ўзгаришларни ҳисобга олиб касб-ҳунар коллежларида меҳнат бозорида талаб этилган ўрта бўғин мутахассисларини тайёрлашнинг ўқув режалари ва дастурлари ишлаб чиқилишини ташкил этиш соҳасида:

таълим жараёнига давлат таълим стандартини жорий этади, касблар ва мутахассисликлар бўйича таълим стандартлари, ўқув режалари ва дастурларини ишлаб чиқади;

иқтисодиётнинг реал секторидаги таркибий ўзгаришларни ва меҳнат бозоридаги эҳтиёжлардан келиб чиқиб, касб-ҳунар коллежларининг кадрлар тайёрлаш имкониятларини ҳисобга олган ҳолда давлат таълим стандарти, мутахассисликлар (касблар) бўйича таълим стандартлари, ўқув режа ва дастурлари ҳамда дарсликларни узлуксиз равишда такомиллаштириб боради;

касб-ҳунар таълимининг йўналишлари, мутахассисликлари ва касблари классификаторини ишлаб чиқади;

манфаатдор вазирликлар ва идоралар билан биргаликда касб-ҳунар таълими тизимини ривожлантириш ва такомиллаштиришнинг илмий асосланган прогнозларини ишлаб чиқади;

таълим жараёнининг табақалаштирилган дастурларини жорий этиш орқали 6 ойдан 2 йилгача бўлган муддатда кадрларни тайёрлашга методик раҳбарликни амалга оширади;

касбий фанларни ўқитиш билан биргаликда, касб-ҳунарга йўналтирилган хорижий тиллар ва меҳнат фаолиятида ахборот-коммуникация технологияларини қўллаш бўйича ўқувчиларнинг билимларини мустаҳкамлаш дастурларини ишлаб чиқади;

манфаатдор вазирликлар ва идоралар билан биргаликда касб-ҳунар коллежларини жиҳозлашга бўлган норматив талабларни ишлаб чиқишда иштирок этади;

3) юқори профессионал раҳбарлар ва педагог кадрларни танлаш ҳамда улар билан касб-ҳунар коллежларини таъминлаш, уларнинг малакаси ва касбий даражасини мунтазам ошириш, шунингдек, меҳнатини рағбатлантириш ишларини тизимли асосда таъминлаш соҳасида:

Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси билан биргаликда касб-ҳунар коллежларининг барча педагог ходимларини, ишлаб чиқариш таълими усталарини аттестациядан ўтказади ҳамда унинг натижалари бўйича ходимларга тегишли малака тоифаларини белгилайди;

касб-ҳунар коллежларининг педагог-ўқитувчилари ва ишлаб чиқариш таълими усталарига бўлган эҳтиёжини ўрганади ҳамда олий таълим муассасаларида кадрлар тайёрлаш учун буюртмалар тақдим этади;

педагог ходимларни рағбатлантириш ва меҳнатига ҳақ тўлаш тизимини такомиллаштириш бўйича таклифлар тайёрлайди, касб-ҳунар таълими тизими ходимларини давлат мукофотларига тақдим этилишини ташкил қилади;

идоравий мансублигидан қатъи назар, касб-ҳунар коллежларининг ўқув-методик ишларини ривожлантириш, раҳбар ходимларнинг малака ошириш ўқув курслари натижасида ўз лавозимларига лойиқлиги ёки лойиқ эмаслиги ҳақида тақдимномалар тайёрлайди;

4) тизимнинг раҳбар ва педагог кадрлари малакасини ошириш ҳамда уларни қайта тайёрлашнинг янги шакллари ва усулларини жорий этиш соҳасида:

малака ошириш ва қайта тайёрлаш жараёнида илғор хорижий тажрибадан келиб чиққан ҳолда янги шакллар ва усулларни жорий этади;

замонавий таълим технологияларидан фойдаланган ҳолда, педагог кадрлар малакасини ошириш ва уларни қайта тайёрлаш тизимини бошқаришнинг янги вертикалини ташкил этади;

малака ошириш ва қайта тайёрлаш даврида касб-ҳунар коллежлари раҳбар ва педагог ходимларининг иш берувчи корхона ва ташкилотларда амалиёт ўташини ташкил этади;

касб-ҳунар таълими тизимининг барча ходимлари учун малака талаблари ва лавозим вазифаларини ишлаб чиқади;

малака ошириш ва қайта тайёрлаш тизимига ахборот технологияларини жорий этиш ва янги ахборот тизимларини ишлаб чиқиш орқали раҳбар ва педагог ходимлар учун ривожланиб борувчи ўқув-методик муҳит яратилишини таъминлайди;

малака оширишнинг турли шакл ва услубларини ишлаб чиқади ва амалиётга жорий этади;

касб-ҳунар таълими тизимининг раҳбар ва педагог ходимлари малакасини ошириш ва уларни қайта тайёрлаш ишларини тизимли равишда ташкил этади;

малака ошириш ва қайта тайёрлаш бўйича ўқув режалари ва дастурларининг ишлаб чиқилишини ташкил этади ва тасдиқлайди;

манфаатдор давлат органлари ва нодавлат нотижорат ташкилотлар, шу жумладан касаба уюшмалари билан биргаликда меҳнатни муҳофаза қилиш, касб-ҳунар таълими тизими ўқувчилари ва ходимларининг соғлиғини ҳимоя қилиш ҳамда ўқиш ва меҳнат қилиши учун хавфсиз шарт-шароитларни таъминлаш чора-тадбирлари комплексини ишлаб чиқиш ва амалга оширишни ташкил этади;

5) республикадаги барча касб-ҳунар коллежларининг идоравий мансублигидан қатъи назар ўқув-методик ишини мувофиқлаштириш соҳасида:

кадрларга бўлган реал эҳтиёжни, иш берувчи корхоналарнинг таклифларини ҳисобга олган ҳолда, иқтисодиёт соҳалари ва тармоқлари учун зарур мутахассислар тайёрлаш сифатини тубдан яхшилаш бўйича касб-ҳунар коллежлари фаолиятини мувофиқлаштириш;

ёшларни ҳар томонлама баркамол, ватанпарварлик ва миллий мустақиллик ғояларига содиқлик руҳида тарбиялаш, уларнинг қалбларида мустақиллик ғояларига садоқат, миллий ифтихор, Ватанга муҳаббат ва унинг тақдирига дахлдорлик, фидойилик туйғуларини шакллантириш, маънавий ва ахлоқий сифатларни ривожлантиришга йўналтирилган педагогик жараённи янги педагогик шакллар ва усуллар асосида ташкил этади;

Марказ тизими фаолиятига тааллуқли журнал ва газеталар, бланкалар, ўқув-методик мажмуалар, бюллетенлар ҳамда ўқув қўлланмаларни нашр этишни, шунингдек, Марказнинг веб-сайти ишини ташкил этади;

етакчи маҳаллий ва хорижий таълим муассасалари билан ҳар томонлама ҳамкорликни ривожлантиради, замонавий инновацион ўқув лойиҳаларини биргаликда амалга ошириш учун касб-ҳунар таълими соҳасига юқори малакали хорижий мутахассисларни жалб этади;

касб-ҳунар коллежларида маънавий-ахлоқий тарбиялашнинг миллий мустақиллик ғояларига, бой миллий маданий-тарихий анъаналарга, халқ урф-одатларига ва умуминсоний қадриятларга асосланган самарали ташкилий ҳамда педагогик шакл ва воситаларини жорий этади;

касб-ҳунар коллежларида таълим жараёнини ишлаб чиқариш жараёни билан интеграциялаштиришни чуқурлаштиришга қаратилган чора-тадбирлар комплексини ишлаб чиқади ва жорий этади;

касб-ҳунар таълимини такомиллаштириш борасидаги муаммолар бўйича кенгашлар, симпозиумлар, семинарлар, илмий, ўқув-методик конференциялар, танловлар, кўргазмалар ва бошқа тадбирларни ташкил этади;

касб-ҳунар коллежлари ўқувчилари ўртасида фан, касб ва спорт бўйича турли танлов ва мусобақалар ташкил этади;

6) касб-ҳунар коллежларида таълим сифатини оширишга йўналтирилган чора-тадбирларни ишлаб чиқиш ва амалга ошириш, таълим жараёнини доимий равишда такомиллаштириш соҳасида:

таълим тизимида илмий тадқиқотлар олиб борилишини қўллаб-қувватлайди, рағбатлантиради ва уларни муаммоли вазифаларнинг ҳал этилишига йўналтиради;

таълим ва илмий-тадқиқот муассасалари мутахассисларини, янгиланган ўқув-методик материаллар ва дарсликларни, ўқитишнинг замонавий шакл ва методларини касб-ҳунар коллежларида ўқув-тарбия жараёнини ташкил этишга кенг жалб қилишни таъминлайди;

касб-ҳунар коллежларида ёшларнинг илмий-техник ижодкорлигини, инновацион ғояларини рағбатлантиради, ривожлантиради ва унинг самарадорлигини оширади;

мамлакат иқтисодиётини барқарор ривожлантириш ҳамда модернизациялаш жараёнларида самарали иштирок этишга қодир бўлган кадрларни тайёрлаш мақсадида ўқув жараёнида инновацион ғоялар, технологиялар ва ишланмаларни фаол қўллаб, касб-ҳунар таълими ва ишлаб чиқаришнинг ўзаро яқин ҳамкорлигини таъминлайди;

касб-ҳунар коллежларида «Ҳаёт давомида таълим олиш» принципи асосида катталар таълимининг турли шакллари ва турларини, жумладан қисқа муддатли курсларни жорий этади;

касб-ҳунар коллежлари битирувчиларини якуний давлат аттестациясидан ўтказиш тўғрисидаги низомни тасдиқлайди ва унинг жорий этилишини назоратга олади;

касб-ҳунар коллежлари ва иш берувчи ташкилотларда ўқувчиларнинг ўқув ва ишлаб-чиқариш амалиётини сифатли ўтказиши юзасидан мониторингни амалга оширади;

касб-ҳунар коллежлари ўқувчиларининг билими ва таълим сифатига таъсир қиладиган омилларни аниқлаш бўйича тизимли мониторингни амалга оширади;

таълим сифати мониторинги олиб борилишини назорат қилиш ва амалга ошириш бўйича ҳужжатлар ва методик тавсияларни ишлаб чиқади;

таълим сифатининг умумий ҳолати асосида касб-ҳунар коллежлари рейтингини аниқлайди;

7) умумтаълим мактаблари 10-11-синф ўқувчиларининг касбий кўникмаларини шакллантириш бўйича ихтисослаштирилган ўқув-ишлаб чиқариш мажмуаларида касб-ҳунар таълими жараёнини мувофиқлаштириш ва методик таъминлаш соҳасида:

ўқув-ишлаб чиқариш мажмуаларида умумтаълим мактабларининг 10-11-синф ўқувчиларига касбларни ўргатиш ишларини ташкил этади;

касбларнинг малака талаблари, машғулотлар режалари ва дастурларини ҳамда касбий таълим бериш жараёнининг методик таъминотини такомиллаштириб бориш бўйича таклифлар ишлаб чиқади;

касб-ҳунар коллежларидан олисда жойлашган умумий ўрта таълим муассасаларида ташкил этиладиган ўқув-ишлаб чиқариш мажмуаларининг касбий таълим соҳасидаги фаолиятини ўрганиш асосида таклиф ва тавсиялар тайёрлайди;

касб-ҳунар коллежларининг амалий-методик иш тажрибасига эга бўлган малакали педагог кадрлар ва ишлаб чиқариш таълими усталарининг ўқув-ишлаб чиқариш мажмуаларида белгиланган тартибда фаолият юритиши юзасидан таклифлар тайёрлайди;

касбий таълим жараёнида «уста-шогирд» анъаналари, маҳаллий ва хорижий илғор тажрибани ўрганган ҳолда энг мақбул усуллардан фойдаланиш бўйича ўқув-методик қўлланмалар ишлаб чиқади.

12. Қуйидагилар марказий аппаратнинг асосий вазифалари ҳисобланади:

1) ҳудудий бошқармалар ва Марказ таркибига кирувчи бошқа ташкилотлар билан биргаликда Марказга юкланган вазифалар ва функцияларнинг самарали бажарилишини таъминлаш;

2) касб-ҳунар таълими давлат таълим стандарти, мутахассисликлар (касблар) таълим стандартлари, ўқув режа ва дастурларнинг такомиллаштирилишини ва ривожланган хорижий давлатлар тажрибасини ўрганиш асосида таълим сифати мониторинги олиб борилишини ташкил этиш;

3) ўқув-методик мажмуаларни ишлаб чиқиш ва нашр этиш фаолиятини мувофиқлаштириш;

4) ўқувчиларни маънавий-ахлоқий тарбиялаш ва ижтимоий қўллаб-қувватлашни ташкил этиш;

5) касб-ҳунар коллежларида ахборот-коммуникация технологияларини жорий этиш;

6) Марказ тизимида ички аудит ва молиявий назоратни ташкил этиш ва амалга ошириш;

7) ҳудудий бошқармаларда ва Марказ таркибига кирувчи бошқа ташкилотларда кадрлар билан таъминлашни мувофиқлаштириш;

8) Марказ таркибига кирувчи бошқа ташкилотларни ривожлантиришга кўмаклашиш, уларни ривожлантириш концепциялари ва истиқболларини белгилаш.

13. Марказий аппарат унга юкланган асосий вазифаларга мувофиқ қуйидаги функцияларни амалга оширади:

1) Марказ ва унинг раҳбарияти фаолиятини ташкилий ва ахборот-таҳлил жиҳатидан таъминлайди;

2) ҳудудий бошқармалар ва Марказ таркибига кирувчи бошқа ташкилотлар томонидан Ўзбекистон Республикаси қонунлари, Ўзбекистон Республикаси Президентининг фармонлари, қарорлари ва фармойишлари, Ҳукумат қарорлари ва фармойишлари бажарилиши юзасидан мунтазам назоратни таъминлайди;

3) Ўзбекистон Республикаси Олий ва ўрта махсус таълим вазирлигининг Касб-ҳунар таълими маркази директори — олий ва ўрта махсус таълим вазирининг биринчи ўринбосари (кейинги ўринларда Марказ директори деб аталади) ва буйруқлари ва фармойишлари амалга оширилишини ўз ваколатлари доирасида ташкил этади;

4) Марказ томонидан Вазирлар Маҳкамасига киритиладиган ҳужжатларнинг сифатли ва ўз вақтида ишлаб чиқилишини ҳамда уларнинг иқтисодий, молиявий ва ҳуқуқий экспертизадан ўтказилишини ташкил этади;

5) ҳудудий бошқармалар ва Марказ таркибига кирувчи бошқа ташкилотлар фаолияти мониторингини олиб борилишини ташкил этади;

6) касб-ҳунар таълимини ривожлантириш мақсадида илмий-тадқиқот ишлари олиб борилишига кўмаклашади;

7) Марказнинг фаолияти, шу жумладан қонун ижодкорлиги соҳасидаги фаолияти ҳуқуқий таъминланишини ташкил этади;

8) бошқарув қарорларини қабул қилиш мақсадида касб-ҳунар таълими тенденциялари тўғрисида Марказ раҳбарияти учун ахборотни тўплайди, умумлаштиради ва таҳлил қилади;

9) касб-ҳунар таълими масалалари бўйича тадбиркорлик субъектларига ахборот, методик, ташкилий ва маслаҳат ёрдами беради;

10) Марказ ваколатига тегишли оператив, ташкилий, кадрлар, молия, ишлаб чиқариш-хўжалик масалалари ва бошқа масалалар билан шуғулланади;

11) Марказнинг ҳудудий бошқармалар ва Марказ таркибига кирувчи бошқа ташкилотлар фаолиятини назорат қилади ва таҳлил этади;

12) Марказнинг ҳудудий бошқармалар ва Марказ таркибига кирувчи бошқа ташкилотлар билан биргаликда ўзига юкланган вазифаларнинг самарали бажарилишини таъминлайди;

13) касб-ҳунар коллежлари фаолиятини мувофиқлаштиради;

14) касб-ҳунар таълими соҳасида нодавлат таълим хизматларини кўрсатиш фаолиятини амалга оширадиган юридик шахслар билан ўзаро ҳамкорлик қилади;

15) касб-ҳунар таълими тизимини инновацион ривожлантириш бўйича ўрта ва узоқ муддатли дастурлар ишлаб чиқилишини ташкил этади;

16) касб-ҳунар таълими сифатининг мониторингини олиб боради;

17) касб-ҳунар коллежларида ўқитишнинг турли шаклларини жорий этади ва таълим беришнинг муқобил шаклларини ривожлантиради;

18) умумтаълим мактабларининг 10-11-синф ўқувчиларига касбий таълим бериш жараёнини мувофиқлаштиради ва методик таъминлайди;

19) республика бюджетидан молиялаштириладиган Марказ таркибига кирувчи бошқа ташкилотларда молия, бухгалтерия ҳисоби ва ҳисоботини ташкил этади;

20) Марказ тизимидаги ташкилотларда ички аудит ва молиявий назоратни ташкил этади ва амалга оширади;

21) касб-ҳунар коллежларининг бинолари ва иншоотларидан жорий фойдаланиш ишлари мониторингини олиб боради ва мувофиқлаштиради;

22) жисмоний ва юридик шахсларнинг мурожаатлари билан ишлашни ташкил этади;

23) хорижий инвестициялар жалб этилишини ва халқаро ҳамкорликни ташкил этади.

14. Қуйидагилар ҳудудий бошқармаларнинг асосий вазифалари ҳисобланади:

1) Марказга юкланган вазифалар ва функцияларнинг самарали бажарилишини таъминлашда иштирок этиш;

2) Қорақалпоғистон Республикаси Жўқорғи Кенгеси Раиси, вилоятлар ва Тошкент шаҳри, туманлар (шаҳарлар) ҳокимлари, прокуратура, ички ишлар ва давлат солиқ хизмати ҳудудий органлари раҳбарлари бошчилик қиладиган комплекс ижтимоий-иқтисодий ривожлантириш секторлари (кейинги ўринларда комплекс ижтимоий-иқтисодий ривожлантириш секторлари деб аталади) билан ҳамкорлик қилиш;

3) касб-ҳунар таълими соҳасида қонун ҳужжатларига риоя этилиши юзасидан мониторинг олиб бориш ва назорат қилиш;

4) касб-ҳунар коллежларида ўқув-методик фаолиятни мувофиқлаштириш;

5) нодавлат таълим хизматлари кўрсатиш фаолиятини амалга оширадиган юридик шахсларни қўллаб-қувватлаш ҳамда касб-ҳунар коллежларида таълим беришнинг муқобил шаклларини ривожлантириш;

6) касб-ҳунар коллежларида ички аудит ва молиявий назоратни ташкил этиш ҳамда амалга ошириш.

15. Ҳудудий бошқармалар ўзларига юкланган асосий вазифаларга мувофиқ қуйидаги функцияларни амалга оширади:

1) ҳудудий бошқармалар ва уларнинг раҳбарияти фаолиятини ташкилий ва ахборот-таҳлилий жиҳатдан таъминлайди;

2) касб-ҳунар коллежлари томонидан Ўзбекистон Республикаси қонунлари, Ўзбекистон Республикаси Президентининг фармонлари, қарорлари ва фармойишлари, Ҳукумат қарорлари ва фармойишлари, Марказнинг буйруқлари бажарилиши мунтазам назорат қилинишини таъминлайди;

3) касб-ҳунар коллежлари томонидан киритиладиган ҳужжатларнинг сифатли ва ўз вақтида қайта ишланишини, уларнинг иқтисодий, молиявий ва ҳуқуқий экспертизадан ўтказилишини ташкил этади;

4) касб-ҳунар коллежлари фаолиятини мувофиқлаштиради ва назорат қилади;

5) касб-ҳунар коллежларининг методик фаолиятини мувофиқлаштиради;

6) идоравий касб-ҳунар коллежлари фаолиятини мувофиқлаштиради;

7) касб-ҳунар таълими соҳасида нодавлат таълим хизматлари кўрсатиш фаолиятини амалга оширадиган юридик шахслар билан ўзаро ҳамкорлик қилади;

8) нодавлат таълим хизматлари кўрсатиш фаолиятини амалга оширадиган юридик шахсларни қўллаб-қувватлайди ҳамда касб-ҳунар коллежларида таълим беришнинг муқобил шаклларини ривожлантиради;

9) касб-ҳунар коллежларида давлат таълим стандартини ва мутахассисликлар (касблар) таълим стандартларини бажариш мониторингини ташкил этади;

10) касб-ҳунар коллежларининг бинолари ва иншоотларини жорий таъмирлаш ишлари мониторингини олиб боради ва мувофиқлаштиради;

11) жисмоний ва юридик шахсларнинг мурожаатлари билан ишлашни ташкил этади;

12) ваколатига тегишли ташкилий, кадрлар, молия, ишлаб чиқариш-хўжалик масалалари ва бошқа масалалар бўйича қарорлар қабул қилади.

16. Марказ ўзига юкланган вазифалар ва функцияларни амалга ошириш учун қуйидаги ҳуқуқларга эга:

норматив-ҳуқуқий ҳужжатлар лойиҳаларини, шунингдек, Марказга юкланган вазифалар ва функцияларни бажариш билан боғлиқ бўлган бошқа ҳужжатларни белгиланган тартибда Вазирлар Маҳкамасига ёки Ўзбекистон Республикаси Олий ва ўрта махсус таълим вазирлигига киритиш;

Марказ ваколатига кирадиган масалаларни ҳал этиш учун давлат ва хўжалик бошқаруви органларидан, маҳаллий давлат ҳокимияти органларидан зарур ахборотни белгиланган тартибда сўраш ва олиш;

Марказ ваколатига кирадиган масалалар бўйича зарур статистик ахборотни давлат статистика органларидан бепул асосда олиш;

Марказ таркибига кирувчи бошқа ташкилотлар, ҳудудий бошқармалардан, касб-ҳунар коллежларидан тизимга тегишли маълумотларини ва касб-ҳунар таълими тизимини ривожлантириш ҳамда такомиллаштириш прогноз кўрсаткичларини олиш;

Марказнинг ва Марказ таркибига кирувчи бошқа ташкилотларнинг давлат мулкини бир бўлинмадан бошқасига белгиланган тартибда бериш;

Ўзбекистон Республикасининг халқаро шартномаларини белгиланган тартибда ишлаб чиқишда иштирок этиш, Марказ ваколатига кирадиган масалалар бўйича идоралараро тусдаги халқаро шартномаларни белгиланган тартибда тузиш;

Марказ ваколатига тегишли бўлган масалалар бўйича Ўзбекистон Республикаси манфаатларини халқаро даражада белгиланган тартибда ифодалаш;

Марказ ваколатига кирадиган масалаларда давлат ва хўжалик бошқаруви органлари, маҳаллий давлат ҳокимияти органлари фаолиятини белгиланган тартибда мувофиқлаштириш;

ўз ваколатлари доирасида норматив-ҳуқуқий ҳужжатлар қабул қилиш, зарур ҳолларда, давлат бошқарувининг бошқа органлари билан биргаликда қарорлар ва бошқа ҳужжатларни қабул қилиш;

Марказ ва Марказ таркибига кирувчи бошқа ташкилотлар ходимлари томонидан уларнинг тегишли соҳадаги фаолияти асосий кўрсаткичларининг параметрлари бажарилишини ҳисобга олган ҳолда, уларни моддий рағбатлантириш тартиби, миқдорлари ва шартларини белгилаш;

касб-ҳунар таълимининг тааллуқли масалаларини ҳал этиш, касб-ҳунар коллежлари фаолиятини такомиллаштириш, уларнинг ўқув-моддий базасини мустаҳкамлаш, малакали кадрлар тайёрлаш, ходимлари ва ўқувчиларининг белгиланган ижтимоий муҳофазасини таъминлаш бўйича таклифларни Ўзбекистон Республикаси Вазирлар Маҳкамасига киритиш;

халқаро ва республика миқёсидаги илмий-тадқиқот дастурларида иштирок этиш, илмий инвестицияларни жалб этиш, таълим тизимига халқаро грантлар киритилишини таъминлаш;

идоравий мансублигидан қатъи назар, касб-ҳунар коллежлари томонидан «Таълим тўғрисида»ги Ўзбекистон Республикаси Қонуни ва касб-ҳунар таълими масалалари бўйича бошқа қонун ҳужжатлари бажарилишини белгиланган тартибда ўрганиш;

мутахассисликлар (касблар) таълим стандартлари, ўқув режалари ва дастурлари, дарсликлар ва ўқув қўлланмалари мазмунини такомиллаштириш бўйича педагогика фани ютуқлари ва илғор тажриба асосида тавсиялар ишлаб чиқиш учун Илмий-методик кенгаш ташкил этиш, Илмий-методик кенгаш таркибини ва Кенгаш низомини тасдиқлаш;

касб-ҳунар коллежларини ташкил этиш, қайта ташкил этиш ва тугатиш юзасидан хулосалар бериш;

идоравий мансублигидан қатъи назар, касб-ҳунар коллежлари ўқув-методик ишларини ривожлантириш, раҳбар ходимларнинг ўз лавозимларига лойиқлиги масалаларини тасарруфида касб-ҳунар коллежлари бўлган вазирликлар, идоралар, хўжалик бирлашмалари, тижорат банклари ва йирик корхоналар билан биргаликда кўриб чиқиш ҳамда хулосалар тайёрлаш;

хорижий инвестициялар ҳисобига сотиб олинадиган ўқув-лаборатория ва устахона жиҳозларининг қабул қилинган таълим стандартларига мос келиши, ишлатилиши ва сақланиши юзасидан таклифлар ва хулосалар бериш;

касб-ҳунар таълимини ривожлантириш ҳамда ахборот-методик таъминлашни яхшилашга қаратилган газета ва журналларга муассислик қилиш;

ўқувчиларни спортга жалб этишни кенгайтириш ва уларнинг турли мусобақаларда фаол иштирокини таъминлашга кўмаклашадиган жамғармаларни ташкил этиш;

олий таълим муассасаларида касб-ҳунар коллежлари учун малакали педагоглар ва ишлаб-чиқариш таълими усталари тайёрлашни мувофиқлаштириш ва унга методик раҳбарлик қилишда иштирок этиш;

ўз ваколатлари доирасида халқаро ва хорижий ташкилотлар билан ҳамкорлик қилиш;

Марказ фаолиятини кенг ёритиш мақсадида ижтимоий тармоқларда расмий веб-сайтлар, шунингдек, саҳифалар яратиш;

ўз ваколатлари доирасида конференциялар, семинарлар, симпозиумлар, кўргазмалар, ярмаркалар ўтказиш, шунингдек, бошқа ташкилотлар томонидан ташкил этиладиган шундай тадбирларда иштирок этиш;

ўз ваколатига кирадиган масалалар бўйича методик материаллар ва тавсиялар ишлаб чиқиш;

Марказ ваколатига кирадиган масалалар бўйича ҳайъат мажлисларида ҳудудий бошқармалар раҳбарларининг ҳисоботларини эшитиш;

давлат муассасалари ва касб-ҳунар таълими соҳасида нодавлат таълим хизматлари кўрсатиш фаолиятини амалга оширадиган юридик шахслар томонидан касб-ҳунар таълими тўғрисидаги қонун ҳужжатларининг бажарилишини назорат қилиш;

касб-ҳунар таълими тизимини ривожлантириш билан боғлиқ долзарб ва истиқболли муаммоларни ишлаб чиқиш бўйича ишчи гуруҳлар ташкил этиш;

ўқув дастурлари, дарсликлар, ўқув қўлланмалари ва методик материаллар тўғрисида хулосалар тайёрлаш;

ноширлик фаолияти билан шуғулланиш.

Марказ қонун ҳужжатларига мувофиқ бошқа ҳуқуқларга ҳам эга бўлиши мумкин.

17. Марказ:

ўзига юкланган вазифалар ва функцияларнинг самарали бажарилиши, шунингдек, касб-ҳунар таълими соҳасидаги давлат сиёсатининг самарали амалга оширилиши;

Марказ фаолияти билан боғлиқ прогноз кўрсаткичларга сўзсиз эришилишини таъминлаш;

Вазирлар Маҳкамасига киритиладиган норматив-ҳуқуқий ҳужжатлар ва бошқа ҳужжатлар лойиҳалари, шунингдек, Марказ томонидан қабул қилинадиган норматив-ҳуқуқий ҳужжатлар амалга оширилишининг сифати, пировард натижалари ва оқибатлари;

касб-ҳунар таълими соҳасини ривожлантириш, шунингдек, касб-ҳунар таълими соҳасида ҳудудларни ижтимоий-иқтисодий ривожлантириш ва улардаги муаммоли масалаларни ҳал қилиш бўйича дастурлар, тадбирлар режалари, «йўл хариталари» ва бошқа дастурий ҳужжатларнинг самарали амалга оширилиши учун жавоб беради.

18. Марказий аппарат ўзига юкланган вазифалар ва функцияларни амалга ошириш учун:

касб-ҳунар таълими масалалари бўйича таҳлил қилиш ва қайта ишлаш учун зарур бўлган материаллар ва маълумотларни ҳудудий бошқармаларидан ва Марказ таркибига кирувчи бошқа ташкилотлардан сўраш ва олиш;

Марказда кўриб чиқиладиган касб-ҳунар таълими масалаларини ишлаб чиқиш, ахборот ва таҳлилий материалларни, шунингдек, норматив-ҳуқуқий ҳужжатлар ва бошқа ҳужжатлар лойиҳаларини тайёрлаш учун ҳудудий бошқармалар ва Марказ таркибига кирувчи бошқа ташкилотлар раҳбарлари ҳамда вакилларини зарур бўлганда белгиланган тартибда жалб қилиш, шу мақсадда эксперт ва ишчи гуруҳлар ташкил этиш;

ҳудудий бошқармалар ва Марказ таркибига кирувчи бошқа ташкилотлардан ўзлари томонидан киритилган касб-ҳунар таълими бўйича норматив-ҳуқуқий ҳужжатлар ва бошқа ҳужжатлар лойиҳаларини пухта ишлашни талаб қилиш, зарурат бўлганда уларни қайта ишлаш учун қайтариш;

ҳудудий бошқармалар ва Марказ таркибига кирувчи бошқа ташкилотлар раҳбарлари ҳамда вакиллари, шунингдек касб-ҳунар коллежлари директорлари иштирокида йиғилишлар ўтказиш;

ҳудудий бошқармалар ва Марказ таркибига кирувчи бошқа ташкилотлар раҳбарларига ҳал қилишни талаб этадиган ва Марказга юкланган вазифалар ҳамда функцияларни бажариш билан боғлиқ масалалар юзасидан топшириқлар бериш;

қабул қилинган норматив-ҳуқуқий ҳужжатлар, Ўзбекистон Республикаси Президенти ва Вазирлар Маҳкамасининг топшириқлари, шунингдек, Марказнинг буйруқлари ҳудудий бошқармалар ва Марказ таркибига кирувчи бошқа ташкилотлар томонидан бажарилиши юзасидан уларнинг фаолиятини белгиланган тартибда ўрганиш ва текшириш ҳуқуқига эга.

Марказий аппарат қонун ҳужжатларига мувофиқ бошқа ҳуқуқларга ҳам эга бўлиши мумкин.

19. Марказий аппарат:

ҳудудий бошқармалар ва Марказ таркибига кирувчи бошқа ташкилотлар билан биргаликда Марказга юкланган вазифалар ва функцияларнинг сифатли ва ўз вақтида бажарилишини таъминлаш;

Марказ фаолияти билан боғлиқ прогноз кўрсаткичларга эришишни таъминлаш бўйича марказий аппарат таркибий бўлинмалари ишини ташкил этиш;

Марказ томонидан кўриб чиқиш учун Вазирлар Маҳкамасига киритиладиган норматив-ҳуқуқий ҳужжатлар ва бошқа ҳужжатлар лойиҳалари, шунингдек, Марказ томонидан қабул қилинадиган буйруқларнинг тайёрланиш сифати ва экспертизадан ўтказилиши;

касб-ҳунар таълимини ривожлантириш, шунингдек, касб-ҳунар таълими соҳасида ҳудудларни ижтимоий-иқтисодий ривожлантириш ва улардаги муаммоли масалаларни ҳал қилиш бўйича дастурлар, тадбирлар режалари, «йўл хариталари» ва бошқа дастурий ҳужжатлар ҳудудий бошқармалар ва Марказ таркибига кирувчи бошқа ташкилотлар томонидан амалга оширилишини ташкил этиш учун жавоб беради.

20. Ҳудудий бошқармалар ўзларига юкланган вазифалар ва функцияларни амалга ошириш учун:

давлат ва хўжалик бошқаруви органлари, маҳаллий давлат ҳокимияти органларининг ҳудудий бошқармалардан ўз ваколатига кирадиган масалаларни ҳал қилиш учун зарур бўлган ахборотни белгиланган тартибда сўраш ва олиш;

касб-ҳунар таълими соҳасининг энг муҳим муаммоларини ишлаб чиқиш ва кўриб чиқиш бўйича ҳудудий даражада идоралараро комиссиялар ва кенгашлар тузиш;

касб-ҳунар коллежлари фаолиятини мувофиқлаштириш ва назорат қилиш;

Марказ ваколатига кирадиган масалалар бўйича давлат ва хўжалик бошқаруви органлари, маҳаллий давлат ҳокимияти органларининг кўриб чиқиши учун таклифлар киритиш ҳуқуқига эга.

Ҳудудий бошқармалар қонун ҳужжатларига мувофиқ бошқа ҳуқуқларга ҳам эга бўлиши мумкин.

21. Ҳудудий бошқармалар:

Марказга юкланган вазифалар ва функциялар сифатли ва ўз вақтида бажарилишини таъминлаш;

ўзларининг фаолияти билан боғлиқ бўлган прогноз кўрсаткичларга эришишни таъминлаш;

Марказга киритилаётган ҳужжатлар лойиҳалари ва таклифлар, шунингдек, ҳудудий бошқармалар томонидан қабул қилинадиган қарорларнинг сифатли амалга оширилиши, пировард натижалари ва оқибатлари;

туман (шаҳар)ларда аниқланган муаммоларни ҳар томонлама ва чуқур таҳлил қилиш ҳамда умумлаштириш асосида касб-ҳунар таълими соҳасини Қорақалпоғистон Республикаси, вилоятлар ва Тошкент шаҳрида ривожлантиришга доир таклифларни тайёрлаш;

касб-ҳунар таълими соҳасини ривожлантириш бўйича дастурлар, тадбирлар режалари, «йўл хариталари» ва бошқа дастурий ҳужжатларнинг Қорақалпоғистон Республикаси, вилоятлар ва Тошкент шаҳрида самарали амалга оширилиши, муаммоли масалалар ҳал этилиши учун жавоб беради.

22. Қуйидагилар Марказ директорининг асосий функционал вазифалари ҳисобланади:

1) Ўзбекистон Республикаси Конституцияси ва қонунлари талабларига, шунингдек, бошқа норматив-ҳуқуқий ҳужжатларга риоя этиш;

2) Марказ фаолиятига умумий раҳбарлик қилиш, Ўзбекистон Республикаси Президенти, Вазирлар Маҳкамасининг қарорлари ва бошқа қонун ҳужжатларига мувофиқ Марказга юкланган вазифалар ва функцияларнинг бажарилишини ташкил этиш;

3) Ўзбекистон Республикаси Президенти ва Вазирлар Маҳкамасининг қарорлари билан тасдиқланган Марказ фаолиятини янада такомиллаштириш бўйича комплекс дастурлар ва тадбирлар ижросини танқидий ва чуқур таҳлил қилиш;

4) Марказ, унинг ҳудудий бошқармалари ва Марказ таркибига кирувчи бошқа ташкилотлар фаолияти билан боғлиқ прогноз кўрсаткичларга эришишни сўзсиз таъминлаш бўйича амалий чора-тадбирларни ишлаб чиқиш ва қабул қилиш;

5) Ўзбекистон Республикаси Президенти Администрацияси таркибий бўлинмалари, шунингдек, тегишли вазирликлар ва идоралар билан ҳамкорлик қилиш, Вазирлар Маҳкамаси ва унинг Раёсати мажлисларида масалаларни кўриб чиқишда иштирок этиш;

6) Ўзбекистон Республикаси Президенти, Ўзбекистон Республикасининг Бош вазири ва унинг ўринбосарлари топшириқларини бажариш;

7) ўз ўринбосарлари ваколатларини белгилаш, улар ўртасида вазифаларни тақсимлаш, Марказнинг бошқа мансабдор шахслари ваколатларини белгилаш, Марказ фаолиятининг алоҳида участкаларига раҳбарлик қилиш учун ўз ўринбосарлари ва бошқа мансабдор шахсларнинг шахсий масъулият даражасини белгилаш;

8) Марказ фаолиятининг режалаштирилишини ташкил этиш, Марказ ва ўз ўринбосарларининг ҳар чораклик иш режаларини тасдиқлаш, уларнинг бажарилиши юзасидан назоратни таъминлаш;

9) Ўзбекистон Республикаси Президенти ва Вазирлар Маҳкамасининг қарорлари ва топшириқлари ижросини ташкил этиш ва мониторинг олиб боришнинг амалий тизимини яратиш, Марказ фаолиятида ижро интизомини мустаҳкамлаш бўйича комплекс амалий чора-тадбирларни бажариш, шунингдек, Ўзбекистон Республикаси Президентининг «Ўзбекистон Республикаси Президентининг ҳужжатлари ва топшириқлари самарали ва натижали ижро этилиши, шунингдек, ижро интизоми мустаҳкамланиши учун Ўзбекистон Республикаси Президенти Давлат маслаҳатчиларининг, Вазирлар Маҳкамаси ва унинг комплекслари, давлат ва хўжалик бошқаруви органлари ҳамда барча даражалардаги ҳокимликлар раҳбарларининг шахсий жавобгарлиги тўғрисида» 2017 йил 11 апрелдаги ПҚ-2881-сон қарорига ва Вазирлар Маҳкамасининг «Ижро интизомини мустаҳкамлаш чора-тадбирлари тўғрисида» 1999 йил 12 январдаги 12-сон қарорига мувофиқ ҳудудий бошқармалар, шунингдек, Марказ таркибига кирувчи бошқа ташкилотлар раҳбарларининг шахсий масъулиятини ошириш чора-тадбирларини кўриш;

10) Марказ ходимларини тизимли қайта тайёрлашни ва уларнинг малакасини оширишни ташкил этиш;

11) Марказ тизимида кадрларни танлаш ва жой-жойига қўйиш, уларнинг самарали фаолият кўрсатиши учун зарур шарт-шароитлар яратиш, Марказнинг кадрлар захирасини шакллантириш;

12) Ўзбекистон Республикаси Президенти, Ўзбекистон Республикаси Президенти Администрацияси ва Вазирлар Маҳкамаси номенклатурасига кирадиган бўш лавозимларга таклиф этилган кадрларнинг, шунингдек, Марказга ишга қабул қилинаётган бошқа кадрларнинг профессионал даражасини, амалий тажрибага, юксак даражада ишлаш хусусиятлари ва маънавий-ахлоқий фазилатларга эга эканлигининг кафолатини таъминлаш;

13) фаолият соҳасига оид масалалар бўйича норматив-ҳуқуқий ҳужжатлар лойиҳаларининг сифатли ишлаб чиқилишини, «Норматив-ҳуқуқий ҳужжатлар тўғрисида», «Қонунлар лойиҳаларини тайёрлаш ва уларни Ўзбекистон Республикаси Олий Мажлиси Қонунчилик палатасига киритиш тартиби тўғрисида»ги Ўзбекистон Республикаси қонунлари, Ўзбекистон Республикаси Вазирлар Маҳкамасининг регламенти ва Ўзбекистон Республикаси Президенти Администрациясининг регламенти талабларига қатъий мувофиқ равишда ўз вақтида киритилишини ташкил этиш, уларнинг Вазирлар Маҳкамаси Аппаратида пухта ишланишида, Вазирлар Маҳкамаси раҳбарияти ҳузурида ҳимоя қилиниши ва Ўзбекистон Республикаси Президенти Администрациясида кўриб чиқилишида иштирок этиш;

14) «Норматив-ҳуқуқий ҳужжатлар тўғрисида», «Қонунлар лойиҳаларини тайёрлаш ва уларни Ўзбекистон Республикаси Олий Мажлиси Қонунчилик палатасига киритиш тартиби тўғрисида»ги Ўзбекистон Республикаси қонунларига ва Вазирлар Маҳкамасининг 2016 йил 17 октябрдаги 345-сон қарори билан тасдиқланган Давлат ва хўжалик бошқаруви органлари, маҳаллий ижро этувчи ҳокимият органларининг қонун лойиҳаларига доир фаолиятининг намунавий регламентига мувофиқ Марказнинг қонун лойиҳаларини тайёрлаш фаолиятини ташкил этиш;

15) Марказга тақдим этилган таклифлар ва норматив-ҳуқуқий ҳужжатлар лойиҳалари тўлиқ ва ўз вақтида кўриб чиқилишини таъминлаш, уларни ҳуқуқий, молиявий, иқтисодий экспертиза ва бошқа экспертизадан пухта ўтказиш, шунингдек, уларни Ўзбекистон Республикаси Президенти Администрациясининг регламенти ва Ўзбекистон Республикаси Вазирлар Маҳкамасининг регламентида белгиланган муддатларда келишиш (виза қўйиш);

16) Ўзбекистон Республикаси Президентининг «Мансабдор шахсларнинг хорижий мамлакатларга чиқиш тартибини такомиллаштириш чоралари тўғрисида» 2014 йил 5 мартдаги ПҚ-2142-сон ва «Хорижий хизмат сафарларида бўлишнинг самарадорлиги ва хорижий делегацияларнинг Ўзбекистон Республикасига ташрифини ташкил этиш учун мансабдор шахсларнинг шахсий жавобгарлигини янада ошириш чора-тадбирлари тўғрисида» 2017 йил 3 августдаги ПҚ-3170-сон қарорлари талабларига мувофиқ Марказ раҳбарлари ва ходимлари хизмат сафарларини ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланишни таъминлаш;

17) ўз ўринбосарлари ва ҳудудий бошқармалар, шунингдек, Марказ таркибига кирувчи бошқа ташкилотлар раҳбарлари фаолиятининг самарадорлиги ва натижадорлигини мунтазам танқидий таҳлил қилиш, Марказ ҳайъати мажлисларида уларнинг шахсий ҳисоботларини эшитиш, уларнинг якунлари бўйича зарур чора-тадбирлар кўриш;

18) Марказ ходимларини рағбатлантириш ва интизомий жавобгарликка тортиш масалаларини ҳал қилиш, ўз ўринбосарларини рағбатлантириш ва интизомий жавобгарликка тортиш, шу жумладан уларнинг эгаллаб турган лавозимда қолишининг мақсадга мувофиқлигига доир масалаларни кўриб чиқиш тўғрисида таклифлар киритиш, уларнинг шахсий масъулиятини оширишга доир тизимли чора-тадбирларни амалга ошириш;

19) Марказ ходимлари томонидан Вазирлар Маҳкамасининг 2016 йил 2 мартдаги 62-сон қарори билан тасдиқланган Давлат бошқаруви органлари ва маҳаллий ижро этувчи ҳокимият органлари ходимларининг одоб-ахлоқ намунавий қоидалари асосида тасдиқланган Марказ ходимларининг одоб-ахлоқ қоидалари (кейинги ўринларда Марказ ходимларининг одоб-ахлоқ қоидалари деб аталади) талабларига риоя этилишини таъминлаш;

20) «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ Марказ тизимида коррупция ва бошқа ҳуқуқбузарликларнинг олдини олиш чораларини кўриш, шунингдек, ҳуқуқни қўллаш амалиётини ва қонун ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

21) Марказ ва унинг ҳудудий бошқармалари, шунингдек, Марказ таркибига кирувчи бошқа ташкилотлар ишини ташкил этишнинг замонавий шакллари жорий этилишини таъминлаш;

22) аҳоли ва тадбиркорлик субъектлари билан ҳамкорлик қилишда, шу жумладан, «ягона дарча» принципини жорий этиш орқали давлат хизматлари сифати ва самарадорлигини ҳамда улардан эркин фойдаланишни ошириш ҳамда «Электрон ҳукумат тўғрисида»ги Ўзбекистон Республикаси Қонунини амалга ошириш доирасида замонавий ахборот-коммуникация технологияларидан фойдаланиш;

23) жисмоний ва юридик шахсларнинг мурожаатларини кўриб чиқишга доир самарали ишларни ташкил этиш, аҳоли билан тўғридан-тўғри ва очиқ мулоқотни йўлга қўйиш, «Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонунида белгиланган муддатларда ва тартибда жисмоний шахсларни ва юридик шахслар вакилларини мунтазам равишда шахсан қабул қилиш, шу жумладан жойларга бориб қабул қилиш;

24) Ўзбекистон Республикаси Президентининг Халқ қабулхоналари билан самарали ҳамкорликни, уларнинг фаолиятида Марказ ходимлари ва раҳбарларининг фаол иштирок этишини ташкил этиш, жисмоний ва юридик шахсларнинг Ўзбекистон Республикаси Президенти Виртуал қабулхонасига тушган мурожаатлари ўз вақтида ва тўлиқ кўриб чиқилишини таъминлаш;

25) давлат сирига киритилган маълумотлар ва махфий ахборот билан ишлашда қонун ҳужжатлари талабларига риоя қилиш;

26) Марказий аппарат ва ҳудудий бошқармалар тўғрисидаги низомларни, Марказ таркибига кирувчи бошқа ташкилотларнинг уставларини белгиланган тартибда тасдиқлаш;

27) Марказ фаолиятига умумий раҳбарлик қилиш;

28) Марказий аппарат ходимларини, ҳудудий бошқармалар, шунингдек, Марказ таркибига кирувчи бошқа ташкилотлар раҳбарларини қонун ҳужжатларида белгиланган тартибда лавозимга тайинлаш ва лавозимдан озод этиш;

29) Марказий аппарат, ҳудудий бошқармалар, Марказ таркибига кирувчи бошқа ташкилотлар мансабдор шахслари бажариши мажбурий бўлган буйруқлар чиқариш ва кўрсатмалар бериш, шунингдек, уларнинг ижросини белгиланган тартибда назорат қилиш;

30) Марказий аппарат, ҳудудий бошқармалар, Марказ таркибига кирувчи бошқа ташкилотлар тузилмаси ва штат жадвалини Вазирлар Маҳкамаси томонидан тасдиқланган ходимларнинг сони доирасида тасдиқлаш;

31) Марказий аппарат, ҳудудий бошқармалар, Марказ таркибига кирувчи бошқа ташкилотлар тузилмасига зарур ҳолларда ўзгартиришлар киритиш.

23. Қуйидагилар Марказ директори ўринбосарларининг асосий функционал вазифалари ҳисобланади:

1) Ўзбекистон Республикаси Конституцияси ва қонунлари талабларига, шунингдек, бошқа норматив-ҳуқуқий ҳужжатларга риоя қилиш;

2) Марказ директори вақтинча бўлмаганда, тегишли буйруқ асосида унинг вазифаларини бажариш;

3) Марказнинг таркибий бўлинмалари фаолиятини мувофиқлаштириш, назорат қилиш ва уларга бевосита раҳбарлик қилиш, уларнинг ходимлари ўртасида вазифаларни тақсимлаш;

4) Марказ фаолиятининг йўналишлари бўйича Ўзбекистон Республикаси Президенти ва Вазирлар Маҳкамасининг қарорлари билан тасдиқланган Марказ фаолиятини янада такомиллаштириш бўйича концепциялар, комплекс дастурлар ва комплекс тадбирлар ижросини танқидий ва чуқур таҳлил қилиш;

5) таркибий бўлинмалар томонидан прогноз кўрсаткичларга эришишни сўзсиз таъминлаш чора-тадбирларини амалга ошириш, бўлинмалар раҳбарларининг ҳисоботларини мунтазам эшитиш ва ушбу кўрсаткичларга эришиш учун уларнинг шахсий жавобгарлигини ошириш;

6) таркибий бўлинмалар раҳбарларининг ҳар чораклик режаларини тасдиқлаш, уларнинг бажарилиши юзасидан назоратни таъминлаш;

7) Ўзбекистон Республикаси Президенти ва Вазирлар Маҳкамасининг қарорлари ва топшириқлари ижросини таъминлаш, Марказнинг таркибий бўлинмаларида ижро интизоми бўйича комплекс амалий чора-тадбирларни амалга ошириш, шунингдек, Ўзбекистон Республикаси Президентининг «Ўзбекистон Республикаси Президентининг ҳужжатлари ва топшириқлари самарали ва натижали ижро этилиши, шунингдек ижро интизоми мустаҳкамланиши учун Ўзбекистон Республикаси Президенти Давлат маслаҳатчиларининг, Вазирлар Маҳкамаси ва унинг комплекслари, давлат ва хўжалик бошқаруви органлари ҳамда барча даражалардаги ҳокимликлар раҳбарларининг шахсий жавобгарлиги тўғрисида» 2017 йил 11 апрелдаги ПҚ-2881-сон қарорига ва Вазирлар Маҳкамасининг «Ижро интизомини мустаҳкамлаш чора-тадбирлари тўғрисида» 1999 йил 12 январдаги 12-сон қарорига мувофиқ топшириқлар ўз вақтида ва сифатли ижро этилиши учун таркибий бўлинмалар раҳбарларининг шахсий масъулиятини ошириш чора-тадбирларини кўриш;

8) Марказ ҳайъати, Марказ директорининг буйруқлари ва топшириқлари ўз вақтида ва сифатли бажарилишини таъминлаш;

9) таркибий бўлинмаларда кадрларни танлаш ва жой-жойига қўйиш бўйича Марказ директорига таклифлар тақдим этиш, уларнинг профессионал даражасини, амалий тажрибага, юксак даражада ишлаш хусусиятларига ва маънавий-ахлоқий фазилатларга эга эканлигининг кафолатини таъминлаш, уларнинг касбий малакасини ошириш чора-тадбирларини кўриш, мутасаддилик қилинадиган бўлинмаларда кадрлар захирасини шакллантириш;

10) таркибий бўлинмалар томонидан норматив-ҳуқуқий ҳужжатлар лойиҳалари сифатли ишлаб чиқилишини ташкил этиш, Марказнинг таркибий бўлинмаларида тайёрланган ҳужжатлар лойиҳаларини кўриб чиқиш ва улар кейинчалик Марказ директори томонидан кўриб чиқилиши, имзоланиши (виза қўйилиши) учун виза қўйиш, уларнинг Ўзбекистон Республикаси Президенти Администрацияси регламенти талабларига қатъий мувофиқ равишда Вазирлар Маҳкамасига ўз вақтида киритилишини таъминлаш, шунингдек, Вазирлар Маҳкамаси аппаратида норматив-ҳуқуқий ҳужжатлар лойиҳаларини ишлаб чиқишда Марказ директорининг топшириғига биноан иштирок этиш;

11) Марказга тақдим этилган таклифлар ва норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш, молиявий, иқтисодий, ҳуқуқий экспертиза ва бошқа экспертизадан пухта ўтказиш;

12) Ўзбекистон Республикаси Президентининг «Мансабдор шахсларнинг хорижий мамлакатларга чиқиш тартибини такомиллаштириш чора-тадбирлари тўғрисида» 2014 йил 5 мартдаги ПҚ-2142-сон ва «Хорижий хизмат сафарларида бўлишнинг самарадорлиги ва хорижий делегацияларнинг Ўзбекистон Республикасига ташрифини ташкил этиш учун мансабдор шахсларнинг шахсий масъулиятини янада ошириш чора-тадбирлари тўғрисида» 2017 йил 3 августдаги ПҚ-3137-сон қарорлари талабларига мувофиқ хизмат сафарларини амалга ошириш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланишни таъминлаш;

13) таркибий бўлинмалар раҳбарлари ва ходимлари фаолияти самарадорлиги ва натижадорлигини мунтазам танқидий таҳлил қилиш, Марказ ҳайъати мажлисларида уларнинг шахсий ҳисоботларини эшитиш, уларнинг якунлари бўйича зарур чора-тадбирлар кўриш;

14) касб-ҳунар таълими соҳасига тегишли масалалар бўйича Марказ фаолиятини такомиллаштиришга доир амалий чора-тадбирлар кўриш, касб-ҳунар таълими соҳасидаги қонун ҳужжатларини такомиллаштиришга оид таклифлар ишлаб чиқиш ва уларни Марказ директорига киритиш;

15) таркибий бўлинмалар раҳбарлари ва ходимларини рағбатлантириш ва интизомий жавобгарликка тортиш, шу жумладан уларнинг эгаллаб турган лавозимида қолиши мақсадга мувофиқлиги билан боғлиқ масалани кўриб чиқиш бўйича Марказ директорига таклифлар киритиш, функционал вазифалар ва юкланган вазифалар бажарилиши учун уларнинг шахсий масъулиятини ошириш бўйича тизимли чора-тадбирлар кўриш;

16) Марказ ходимларининг Одоб-ахлоқ қоидалари талабларига риоя қилишини, мутасаддилик қилинадиган таркибий бўлинмалар раҳбарлари ва ходимларининг ушбу қоидаларга риоя этишини таъминлаш;

17) ҳуқуқни қўллаш амалиётини ва қонун ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ коррупция ва бошқа ҳуқуқбузарликларнинг олдини олиш чораларини кўриш, шунингдек, уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

18) Марказ директорига давлат хизматларининг самарадорлиги, сифатини ва улардан эркин фойдаланишни оширишга доир таклифларни киритиш;

19) «Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонунида белгиланган муддатларда ва тартибда жисмоний ва юридик шахсларнинг мурожаатларини кўриб чиқиш бўйича самарали ишларни ташкил этиш, аҳоли билан тўғридан-тўғри ва очиқ мулоқотни йўлга қўйиш, жисмоний шахсларни ва юридик шахслар вакилларини мунтазам равишда шахсан қабул қилиш, шу жумладан жойларга бориб қабул қилиш;

20) Ўзбекистон Республикаси Президентининг Халқ қабулхоналари билан самарали ҳамкорлик қилиш, уларнинг фаолиятида фаол иштирок этиш, жисмоний ва юридик шахслар вакилларининг Ўзбекистон Республикаси Президенти Виртуал қабулхонасига тушган мурожаатлари ўз вақтида ва тўлақонли кўриб чиқилишини таъминлаш;

21) давлат сирига киритилган маълумотлар ва махфий ахборот билан ишлашда қонун ҳужжатлари талабларига риоя қилиш.

24. Қуйидагилар марказий аппарат таркибий бўлинмалари раҳбарларининг асосий функционал вазифалари ҳисобланади:

1) Ўзбекистон Республикаси Конституцияси ва қонунлари талабларига, шунингдек, бошқа норматив-ҳуқуқий ҳужжатларга риоя этиш;

2) таркибий бўлинмалар фаолиятига бевосита раҳбарлик қилиш, ушбу бўлинмаларга юкланган вазифалар ва функцияларнинг бажарилишини ташкил этиш;

3) тегишли таркибий бўлинмалар ва Марказ таркибига кирувчи бошқа ташкилотлар фаолиятини ўз ваколатлари доирасида мувофиқлаштириш;

4) прогноз кўрсаткичларнинг бажарилишини мунтазам таҳлил қилиш ҳамда таркибий бўлинмалар ушбу кўрсаткичларга сўзсиз эришишини таъминлашга қаратилган қўшимча чора-тадбирларни амалга ошириш бўйича Марказ директорининг мутасаддилик қиладиган ўринбосарларига таклифлар киритиш;

5) Ўзбекистон Республикаси Президенти ва Вазирлар Маҳкамаси қарорлари ва топшириқлари ижросини таъминлаш, Марказ таркибий бўлинмалари ходимларининг ижро интизомини мустаҳкамлаш бўйича комплекс амалий чора-тадбирларни амалга ошириш, Ўзбекистон Республикаси Президентининг «Ўзбекистон Республикаси Президентининг ҳужжатлари ва топшириқлари самарали ва натижали ижро этилиши, шунингдек ижро интизоми мустаҳкамланиши учун Ўзбекистон Республикаси Президенти Давлат маслаҳатчиларининг, Вазирлар Маҳкамаси ва унинг комплекслари, давлат ва хўжалик бошқаруви органлари ҳамда барча даражалардаги ҳокимликлар раҳбарларининг шахсий жавобгарлиги тўғрисида» 2017 йил 11 апрелдаги ПҚ-2881-сон қарорига ва Вазирлар Маҳкамасининг «Ижро интизомини мустаҳкамлаш чора-тадбирлари тўғрисида» 1999 йил 12 январдаги 12-сон қарорига мувофиқ топшириқларнинг ўз вақтида ва сифатли бажарилиши учун таркибий бўлинмалар ходимларининг шахсий масъулиятини ошириш чора-тадбирларини кўриш;

6) Марказ ҳайъати қарорлари, Марказ директори ва унинг ўринбосарларининг буйруқлари ҳамда топшириқлари ўз вақтида ва сифатли бажарилишини таъминлаш;

7) таркибий бўлинмаларнинг ҳар чораклик иш режалари ишлаб чиқилишини таъминлаш, уларни тасдиқлаш учун киритиш, уларда кўрсатилган вазифалар ва тадбирлар ўз вақтида ва сифатли бажарилишини таъминлаш;

8) таркибий бўлинмаларга юкланган вазифалар бажарилишини назорат қилиш ва мувофиқлаштириш, ҳудудий бошқармалар ва Марказ таркибига кирувчи бошқа ташкилотлар фаолиятига амалий ва методик ёрдам кўрсатиш;

9) таркибий бўлинмалар фаолиятига оид масалалар юзасидан қонун ҳужжатларини такомиллаштириш бўйича таклифларни ишлаб чиқиш ва уларни кўриб чиқиш учун Марказ раҳбариятига киритиш;

10) таркибий бўлинмаларда кадрларни танлаш ва жой-жойига қўйишда Марказ директори ўринбосарларига таклифлар тақдим этиш, уларнинг профессионал даражасини, амалий тажрибага, юксак даражада ишлаш хусусиятларига ва маънавий-ахлоқий фазилатларга эга эканлигининг кафолатини таъминлаш, касб малакасини ошириш чораларини кўриш, таркибий бўлинмаларда кадрлар захирасини шакллантириш;

11) норматив-ҳуқуқий ҳужжатлар лойиҳаларининг таркибий бўлинмалар томонидан сифатли ишлаб чиқилишини ташкил этиш, Марказнинг таркибий бўлинмаларида тайёрланган ҳужжатлар лойиҳаларини кейинчалик Марказ раҳбарияти томонидан кўриб чиқиш, имзолаш (виза қўйиш) учун кўриб чиқиш ва виза қўйиш, уларнинг Ўзбекистон Республикаси Президенти Администрациясининг регламенти ва Вазирлар Маҳкамаси регламенти талабларига қатъий мувофиқ равишда Вазирлар Маҳкамасига ўз вақтида киритилишини таъминлаш, Марказ раҳбариятининг топшириғи бўйича норматив-ҳуқуқий ҳужжатлар лойиҳаларини Вазирлар Маҳкамаси аппаратида ишлаб чиқишда иштирок этиш;

12) Марказга тақдим этилган таклифлар ва норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш, молиявий, иқтисодий, ҳуқуқий экспертиза ва бошқа экспертизадан пухта ўтказиш;

13) Ўзбекистон Республикаси Президентининг «Мансабдор шахсларнинг хорижий мамлакатларга чиқиш тартибини такомиллаштириш чора-тадбирлари тўғрисида» 2014 йил 5 мартдаги ПҚ-2142-сон ва «Хорижий хизмат сафарларида бўлишнинг самарадорлиги ва хорижий делегацияларнинг Ўзбекистон Республикасига ташрифини ташкил этиш учун мансабдор шахсларнинг шахсий жавобгарлигини янада ошириш чора-тадбирлари тўғрисида» 2017 йил 3 августдаги ПҚ-3170-сон қарорлари талабларига мувофиқ хизмат сафарларини амалга ошириш, хизмат сафарлари асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланишни таъминлаш;

14) таркибий бўлинмалар ходимлари фаолиятининг самарадорлиги ва натижадорлигини мунтазам равишда танқидий таҳлил қилиш, йиғилишларда уларнинг шахсий ҳисоботларини эшитиш, уларнинг якунлари бўйича зарур чора-тадбирлар кўриш;

15) Марказ ходимларининг Одоб-ахлоқ қоидалари талабларига риоя қилишини, таркибий бўлинмалар ходимлари ушбу қоидаларга риоя этишини таъминлаш;

16) «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ Марказ тизимида коррупция ва бошқа ҳуқуқбузарликларнинг олдини олиш чораларини кўриш, шунингдек, ҳуқуқни қўллаш амалиёти ва қонун ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

17) Марказ раҳбариятига давлат хизматларининг самарадорлиги, сифатини ва улардан эркин фойдаланишни оширишга доир таклифлар киритиш;

18) жисмоний ва юридик шахсларнинг мурожаатларини кўриб чиқиш, «Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонуни билан белгиланган муддатларда ва тартибда аҳоли билан тўғридан-тўғри ва очиқ мулоқотни йўлга қўйиш, жисмоний шахсларни ва юридик шахслар вакилларини мунтазам равишда шахсан қабул қилиш, шу жумладан жойларга бориб қабул қилиш;

19) Ўзбекистон Республикаси Президентининг Халқ қабулхоналари билан самарали ҳамкорлик қилиш, уларнинг фаолиятида фаол иштирок этиш, жисмоний ва юридик шахсларнинг Ўзбекистон Республикаси Президенти Виртуал қабулхонасига тушган мурожаатларини ўз вақтида ва тўлақонли кўриб чиқиш;

20) давлат сирига киритилган маълумотлар ва махфий ахборот билан ишлашда қонун ҳужжатлари талабларига риоя қилиш.

25. Қуйидагилар ҳудудий бошқармалар раҳбарларининг асосий функционал вазифалари ҳисобланади:

1) Ўзбекистон Республикаси Конституцияси ва қонунлари талабларига, шунингдек, бошқа норматив-ҳуқуқий ҳужжатларга риоя қилиш;

2) ҳудудий бошқармалар фаолиятига умумий раҳбарлик қилиш, Ўзбекистон Республикаси Президенти, Вазирлар Маҳкамасининг тегишли қарорлари ва бошқа қонун ҳужжатлари ва Марказ буйруқлари билан уларга юкланган вазифалар ва функциялар бажарилишини ташкил этиш;

3) ҳудудий бошқармалар фаолияти билан боғлиқ прогноз кўрсаткичларга эришишни сўзсиз таъминлаш бўйича амалий чора-тадбирларни ишлаб чиқиш ва қабул қилиш;

4) Ўзбекистон Республикаси Президенти ва Вазирлар Маҳкамасининг қарорлари ва топшириқлари ижросини таъминлаш, ижро интизомини мустаҳкамлаш бўйича комплекс амалий чора-тадбирларни амалга ошириш, шунингдек, Ўзбекистон Республикаси Президентининг «Ўзбекистон Республикаси Президентининг ҳужжатлари ва топшириқлари самарали ва натижали ижро этилиши, шунингдек ижро интизоми мустаҳкамланиши учун Ўзбекистон Республикаси Президенти Давлат маслаҳатчиларининг, Вазирлар Маҳкамаси ва унинг комплекслари, давлат ва хўжалик бошқаруви органлари ҳамда барча даражалардаги ҳокимликлар раҳбарларининг шахсий жавобгарлиги тўғрисида» 2017 йил 11 апрелдаги ПҚ-2881-сон қарорига ва Вазирлар Маҳкамасининг «Ижро интизомини мустаҳкамлаш чора-тадбирлари тўғрисида» 1999 йил 12 январдаги 12-сон қарорига мувофиқ топшириқларнинг ўз вақтида ва сифатли бажарилиши учун ҳудудий бошқармалар ходимларининг шахсий масъулиятини ошириш чора-тадбирларини кўриш;

5) Марказ ҳайъати қарорлари, Марказ директори ва унинг ўринбосарларининг буйруқлари ва топшириқлари ўз вақтида ва сифатли бажарилишини таъминлаш;

6) касб-ҳунар таълими соҳасига кирадиган масалалар юзасидан маҳаллий давлат ҳокимияти органлари ва комплекс ижтимоий-иқтисодий ривожлантириш секторлари билан ҳамкорлик қилиш;

7) ўз ўринбосарлари ваколатларини белгилаш, улар ўртасида вазифаларни тақсимлаш, ҳудудий бошқармаларнинг бошқа мансабдор шахслари ваколатларини белгилаш, Марказнинг ҳудудий бошқармалари фаолиятининг алоҳида участкаларига раҳбарлик қилиш учун ўз ўринбосарлари ва бошқа мансабдор шахсларнинг шахсий жавобгарлик даражасини белгилаш;

8) Марказнинг ҳудудий бошқармалари фаолиятини режалаштиришни ташкил этиш, ҳудудий бошқармалар ва ўз ўринбосарларининг ҳар чораклик иш режаларини тасдиқлаш, уларнинг бажарилиши юзасидан назоратни таъминлаш;

9) Марказнинг ҳудудий бошқармаларда кадрларни танлаш ва жой-жойига қўйиш, уларнинг самарали фаолият кўрсатиши учун зарур шарт-шароитлар яратиш, ҳудудий бошқармалар кадрлар захирасини шакллантириш;

10) Марказ директори номенклатурасига кирадиган бўш лавозимларга таклиф этилган кадрларнинг, шунингдек, ҳудудий бошқармаларга ишга қабул қилинаётган бошқа кадрларнинг профессионал даражасини амалий тажрибага, юксак даражада ишлаш хусусиятларига ва маънавий-ахлоқий фазилатларга эга эканлигининг кафолатини таъминлаш;

11) ҳудудий бошқармалар ходимларини, ўз ўринбосарларини рағбатлантириш ва интизомий жавобгарликка тортиш масалаларини ҳал қилиш, шу жумладан улар эгаллаб турган лавозимда қолиши мақсадга мувофиқлигига доир масалаларни кўриб чиқиш, уларнинг шахсий масъулиятини ошириш бўйича мунтазам чора-тадбирлар кўриш;

12) ҳудудий бошқармалар ходимлари томонидан Марказ ходимларининг Одоб-ахлоқ қоидалари талабларига риоя этишини таъминлаш;

13) ҳуқуқни қўллаш амалиётини ва қонун ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали ҳудудий бошқармалар тизимида «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ коррупция ва бошқа ҳуқуқбузарликларнинг олдини олиш чораларини кўриш, шунингдек, уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

14) прогноз кўрсаткичларнинг бажарилишини мунтазам таҳлил қилиш ҳамда ҳудудий бошқармалар томонидан ушбу кўрсаткичларга сўзсиз эришишни таъминлашга қаратилган қўшимча чора-тадбирларни амалга ошириш бўйича Марказ директорининг мутасаддилик қиладиган ўринбосарларига таклифлар киритиш;

15) ҳудудий бошқармалар ходимлари фаолиятининг самарадорлиги ва натижадорлигини тизимли равишда танқидий таҳлил қилиш, йиғилишларда уларнинг шахсий ҳисоботларини эшитиш, уларнинг якунлари бўйича зарур чора-тадбирлар кўриш;

16) ҳудудий бошқармалар фаолиятига оид масалалар бўйича қонун ҳужжатларини такомиллаштириш, шунингдек, давлат хизматлари самарадорлиги, сифатини ва улардан эркин фойдаланишни ошириш бўйича таклифлар ишлаб чиқиш ҳамда уларни кўриб чиқиш учун Марказ раҳбариятига киритиш;

17) касб-ҳунар коллежлари фаолиятини мувофиқлаштириш ва назорат қилиш;

18) жисмоний ва юридик шахсларнинг мурожаатларини кўриб чиқиш, «Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонуни билан белгиланган муддатларда ва тартибда аҳоли билан тўғридан-тўғри ва очиқ мулоқотни йўлга қўйиш, жисмоний шахсларни ва юридик шахсларнинг вакилларини мунтазам равишда шахсан қабул қилиш, шу жумладан, жойларга бориб қабул қилиш;

19) Ўзбекистон Республикаси Президентининг Халқ қабулхоналари билан самарали ҳамкорлик қилиш, уларнинг фаолиятида фаол иштирок этиш, жисмоний ва юридик шахсларнинг Ўзбекистон Республикаси Президенти Виртуал қабулхонасига тушган мурожаатларини ўз вақтида ва тўлақонли кўриб чиқиш;

20) ҳудудий бошқармалар ходимларининг лавозим маошига мукофотлар, устамалар тўлаш, уларга моддий ёрдам бериш, уларни мукофотлаш, рағбатлантириш ва уларга нисбатан интизомий чора қўллаш тўғрисида қарор қабул қилиш, давлат мукофотлари ва идоравий мукофотлар билан тақдирлаш тўғрисида Марказга таклифлар киритиш;

21) давлат сирини ёки қонун билан қўриқланадиган бошқа сирни ташкил этувчи маълумотларнинг ҳимоя қилинишини таъминлаш.

26. Марказ директори:

1) Марказга юкланган вазифалар ва функцияларнинг бажарилиши;

2) ушбу Низомнинг 17-бандида назарда тутилган Марказнинг жавобгарлик соҳалари бўйича;

3) ушбу Низомнинг 22-бандида кўрсатилган ўз функционал вазифаларининг сифатли бажарилиши учун шахсан жавоб беради.

27. Марказ ўринбосарлари:

1) Марказнинг мутасаддилик қилинадиган таркибий бўлинмаларида Марказга юкланган вазифалар ва функцияларнинг бажарилиши;

2) ушбу Низомнинг 17-бандида назарда тутилган Марказнинг мутасаддилик қилинадиган масалаларга доир жавобгарлик соҳалари бўйича;

3) ушбу Низомнинг 23-бандида кўрсатилган ўз функционал вазифаларининг сифатли бажарилиши учун шахсан жавоб беради.

28. Марказий аппарат таркибий бўлинмалари раҳбарлари:

1) тегишли таркибий бўлинмаларга юкланган вазифалар ва функцияларнинг амалга оширилиши;

2) ушбу Низомнинг 19-бандида назарда тутилган марказий аппаратнинг жавобгарлик соҳалари бўйича;

3) ушбу Низомнинг 24-бандида кўрсатилган ўз функционал вазифаларининг сифатли бажарилиши учун шахсан жавоб беради.

29. Ҳудудий бошқармалар раҳбарлари:

1) ҳудудий бошқармаларга юкланган вазифалар ва функцияларнинг бажарилиши;

2) ушбу Низомнинг 21-бандида назарда тутилган ҳудудий бошқармаларнинг жавобгарлик соҳалари бўйича;

3) ушбу Низомнинг 25-бандида кўрсатилган ўз функционал вазифаларининг сифатли бажарилиши учун шахсан жавоб беради.

30. Марказга Ўзбекистон Республикаси олий ва ўрта махсус таълим вазирининг тақдимномасига асосан Ўзбекистон Республикаси Президенти томонидан лавозимга тайинланадиган ва лавозимдан озод этиладиган Марказ директори — Ўзбекистон Республикаси олий ва ўрта махсус таълим вазирининг биринчи ўринбосари бошчилик қилади.

31. Марказ директорининг икки нафар ўринбосари, шу жумладан бир нафар биринчи ўринбосари бўлади.

32. Марказ директорининг ўринбосарлари Ўзбекистон Республикаси Вазирлар Маҳкамаси томонидан лавозимга тайинланади ва лавозимдан озод этилади.

33. Марказ директори бўлмаган вақтда унинг ваколатлари вазифалар тақсимотига биноан унинг ўринбосарлари томонидан бажарилади.

34. Ҳудудий бошқармалар бошлиқлари тегишли равишда Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари билан келишилган ҳолда Марказ директори томонидан лавозимга тайинланади ва лавозимдан озод этилади.

35. Марказ директори Марказнинг таркибига кирувчи бошқа ташкилотлар раҳбарларини белгиланган тартибда лавозимга тайинлайди ва лавозимдан озод этади.

36. Марказ директори марказий аппарат бошқармалари ва бўлимлари, ҳудудий бошқармалар тўғрисидаги низомни, Марказ таркибига кирувчи бошқа ташкилотларнинг уставларини белгиланган тартибда тасдиқлайди.

37. Марказий аппарат таркибий бўлинмаларининг ҳудудий бошқармалар ва Марказ таркибига кирувчи бошқа ташкилотлар билан ўзаро ҳамкорлиги марказий аппарат таркибий бўлинмаларининг раҳбарлари томонидан таъминланади.

Марказий аппаратнинг таркибий бўлинмалари ҳудудий бошқармалар ва Марказ таркибига кирувчи бошқа ташкилотлар билан ўз фаолияти йўналишлари бўйича ҳамкорлик қилиш доирасида:

1) топшириқларни ҳудудий бошқармаларга ва Марказ таркибига кирувчи бошқа ташкилотларга етказади ҳамда уларнинг бажарилишини назорат қилади;

2) ҳудудий бошқармаларга ва Марказ таркибига кирувчи бошқа ташкилотларга таркибий бўлинмаларнинг бевосита фаолияти масалалари бўйича сўровлар юборади ҳамда уларнинг ижро этилишини назорат қилади;

3) ҳудудий бошқармалар ва Марказ таркибига кирувчи бошқа ташкилотларнинг фаолият юритиш амалиётини текширади ва ўрганади, умумлаштиради, уни такомиллаштиришга қаратилган чора-тадбирларни ишлаб чиқади ва қабул қилади;

4) ҳудудий бошқармалар ва Марказ таркибига кирувчи бошқа ташкилотлар фаолиятини ташкил этиш ва фаолияти натижалари тўғрисида ҳисобот ва ахборот материаллари, статистика маълумотлари ва бошқа маълумотлар ўрганилишини ташкил этади;

5) ҳудудий бошқармалар ва Марказ таркибига кирувчи бошқа ташкилотларнинг иш режаларини таҳлил қилади, фаолиятини режалаштиришни такомиллаштиришга доир чора-тадбирлар кўради;

6) ҳудудий бошқармалар ва Марказ таркибига кирувчи бошқа ташкилотлардан тушган таклифларни кўриб чиқади;

7) норматив-ҳуқуқий ҳужжатлар лойиҳаларини тайёрлашда ҳудудий бошқармалар ва Марказ таркибига кирувчи бошқа ташкилотларнинг иштирокини ташкил этади, касб-ҳунар таълими соҳасида қонун ҳужжатларини такомиллаштириш бўйича улардан тушган таклифларни кўриб чиқади.

38. Ҳудудий бошқармалар ва Марказ таркибига кирувчи бошқа ташкилотлар марказий аппаратнинг таркибий бўлинмалари билан ҳамкорлик қилади, шу жумладан:

1) Марказ раҳбарияти топшириқларининг ижроси ҳақида ахборот беради;

2) касб-ҳунар таълими соҳасида қонун ҳужжатларини амалга ошириш бўйича фаолият натижалари тўғрисида марказий аппаратга ахборот тақдим этади;

3) уларнинг фаолиятини текшириш ва ўрганиш натижасида аниқланган камчиликларни ва қоидабузарликларни бартараф этиш натижалари тўғрисида маълумот беради;

4) ўз фаолияти натижалари тўғрисидаги ҳисоботларни белгиланган тартибда ва муддатларда марказий аппаратга тақдим этади;

5) касб-ҳунар таълими муаммоларини ҳал қилишга қаратилган таклифларни марказий аппаратга юборади;

6) комплекс ижтимоий-иқтисодий ривожлантириш секторлари билан ўзаро ҳамкорлик натижалари тўғрисида ахборот беради;

7) ваколатли органлар томонидан ўтказилган ўз фаолиятини текшириш натижалари тўғрисида хабар беради.

39. Марказий аппарат таркибий бўлинмалари, ҳудудий бошқармалар ҳамда Марказ таркибига кирувчи бошқа ташкилотларнинг ўзаро ҳамкорлиги жараёнида юзага келадиган келишмовчиликлар Марказ директорининг топшириғига биноан тегишли ўринбосари томонидан кўриб чиқилади.

Агар кўриб чиқишдан кейин келишмовчиликлар ҳал этилмаса, бевосита Марказ директори уларни бартараф этиш бўйича қарор қабул қилади.

40. Марказ ўз вазифалари ва функцияларини амалга оширишда давлат ва хўжалик бошқаруви органлари, маҳаллий давлат ҳокимияти органлари ва бошқа ташкилотлар билан ҳамкорлик қилади.

Ҳудудий бошқармалар ўз ваколати доирасида давлат ва хўжалик бошқаруви органлари, маҳаллий давлат ҳокимияти органларининг ҳудудий бўлинмалари ва бошқа ташкилотлар билан ҳамкорлик қилади.

41. Ҳудудий бошқармалар тегишли ҳудудларни ижтимоий-иқтисодий ривожлантириш бўйича «йўл хариталари»ни ишлаб чиқишда ва амалга оширишда комплекс ижтимоий-иқтисодий ривожлантириш бўйича секторлар билан ўзаро яқин ҳамкорлик қилади.

42. Марказ фаолиятига Вазирлар Маҳкамасининг тегишли комплекси раҳбари ва Вазирлар Маҳкамасининг ахборот-таҳлил департаментлари ҳамда Ўзбекистон Республикаси Президенти девонининг тегишли хизмати мутасаддилик қилади.

43. Марказда Марказ директори (ҳайъат раиси), Марказ директорининг ўринбосарлари (лавозими бўйича), шунингдек, Марказ фаолиятининг асосий йўналишларини мувофиқлаштирувчи Марказ таркибий бўлинмалари раҳбарларидан иборат таркибда ҳайъат тузилади.

Ҳайъат таркибининг сони ва шахсий таркиби Марказ директорининг тақдимномасига биноан Вазирлар Маҳкамаси томонидан тасдиқланади.

44. Ҳайъатга қуйидаги вазифалар юкланади:

Марказ фаолиятининг асосий йўналишларини ишлаб чиқиш ва амалга ошириш;

қонун ҳужжатларида белгиланган вазифалар ўз вақтида ва сифатли амалга оширилишини таъминлаш учун касб-ҳунар таълими тизими ходимлари ва раҳбарларининг шахсий жавобгарлигини ошириш чораларини кўрган ҳолда, ҳудудий бошқармалар ва Марказ таркибига кирувчи бошқа ташкилотлар раҳбарларининг ҳисоботлари мунтазам равишда эшитилишини ташкил этиш;

Марказ фаолиятининг касб-ҳунар таълими соҳасида кенг дунёқараш, чуқур билимга эга бўлган, ҳозирги бозор шароитларида муайян касб-ҳунар ва иш кўникмаларини эгаллаган ёшларни тайёрлашга йўналтирилган ягона давлат сиёсатини олиб бориш, касб-ҳунар таълими соҳасида мақсадли вазифалар ва устувор йўналишларни рўёбга чиқариш бўйича амалга оширилаётган чора-тадбирларнинг натижадорлигини ҳар чоракда мунтазам кўриб чиқиш;

жойларда касб-ҳунар таълимининг долзарб масалалари муҳокама қилинишини таъминлаган ҳолда, ҳайъатнинг кенгайтирилган сайёр мажлислари ўтказилишини ташкил этиш, шунингдек, юзага келган муаммоларни бартараф этиш бўйича тегишли қарорларни ишлаб чиқиш ва қабул қилиш;

Марказий аппаратга ва унинг тизимига кирадиган лавозимлар номенклатурасини кўриб чиқиш ва тасдиқлаш;

Марказ номенклатурасига кирадиган лавозимларга кадрларни танлаш, жой-жойига қўйиш масалаларини кўриб чиқиш;

Ўзбекистон Республикаси Президенти ва Вазирлар Маҳкамасининг қарорлари ва топшириқлари билан белгиланган вазифалар ўз вақтида ва сифатли бажарилишини таъминлаш учун Марказ раҳбарлари ва ходимларининг ижро интизомини мустаҳкамлаш ва шахсий жавобгарлигини ошириш.

Ҳайъат Марказ ваколатига киритилган бошқа масалаларни ҳам кўриб чиқишга ҳақли.

45. Ҳайъат мажлисига Марказ ваколатига кирадиган масалалар юзасидан давлат ва хўжалик бошқаруви органлари, бошқа ташкилотлар раҳбарлари таклиф этилиши мумкин.

46. Ҳайъат, агар унинг мажлисида ҳайъат таркибининг ярмидан кўпи қатнашса, ваколатли ҳисобланади. Кўриб чиқилаётган масалалар юзасидан қарорлар оддий кўпчилик овоз билан қабул қилинади.

47. Ҳайъат қарорлари Марказ директорининг буйруқлари билан амалга оширилади.

48. Марказ директори ва ҳайъат аъзолари ўртасида келишмовчиликлар юзага келган тақдирда, Марказ директори юзага келган келишмовчиликлар ҳақида Олий ва ўрта махсус таълим вазирига ва Ўзбекистон Республикаси Бош вазирининг ижтимоий ривожлантириш масалалари бўйича ўринбосарига ахборот берган ҳолда мустақил равишда қарор қабул қилади. Шунингдек, ҳайъат аъзолари ҳам Олий ва ўрта махсус таълим вазирига ва Ўзбекистон Республикаси Бош вазирининг ижтимоий ривожлантириш масалалари бўйича ўринбосарига ўз фикрини маълум қилиши мумкин.

49. Ҳайъат фаолиятининг тартиби унинг ҳайъат томонидан тасдиқланадиган регламенти билан белгиланади.

50. Марказда Илмий методик кенгаш жамоатчилик асосида фаолият юритади. Кенгаш таркиби ҳар 3 йилда бир марта Марказ директорининг буйруғи билан тасдиқланади.

51. Илмий методик кенгаш:

давлат таълим стандартлари, ўқув режалар, дастурлар, дарслик ва ўқув қўлланмалари мазмунини такомиллаштириш бўйича илғор тажрибалар асосида тавсиялар ишлаб чиқади;

илғор педагогик ва ахборот-коммуникация технологияларини, шунингдек, касб-ҳунар таълими соҳасидаги илмий изланишлар натижаларининг таълим жараёнида қўлланилишини ривожлантириш масалаларни кўриб чиқади.

Илмий методик кенгаш касб-ҳунар таълимини методик таъминлашни мустаҳкамлашга қаратилган бошқа масалаларни ҳам кўриб чиқишга ҳақли.

52. Илмий методик кенгаш йиғилишларига Марказ ваколатига кирадиган масалалар бўйича бошқа вазирликлар ва идоралар, иш берувчи ташкилотлар вакиллари таклиф этилиши мумкин.

53. Илмий методик кенгаш ўз фаолиятини Марказ директори томонидан тасдиқланадиган низомга мувофиқ амалга оширади.

54. Марказ фаолиятининг самарадорлиги ва натижадорлиги мунтазам баҳоланиши лозим.

55. Марказ фаолиятининг самарадорлиги ва натижадорлигига берилган баҳолар Ўзбекистон Республикаси Президенти Администрациясининг тегишли таркибий бўлинмалари билан келишилган ҳолда Ўзбекистон Республикаси Бош вазирининг ижтимоий ривожлантириш масалалари бўйича ўринбосари томонидан тасдиқланадиган Марказ фаолиятининг самарадорлиги ва натижадорлигини баҳолаш мезонлари ва иш индикаторларига асосланади.

56. Марказ фаолиятининг самарадорлиги ва натижадорлигини баҳолаш якунлари бўйича:

Марказ раҳбарлари ва ходимларини рағбатлантириш (мукофотлаш) ёки интизомий жавобгарликка тортиш;

Марказ фаолиятида аниқланган камчиликларни бартараф этиш ва унинг фаолиятини янада такомиллаштириш чора-тадбирлари кўрилади.

Марказ фаолиятининг самарадорлиги ва натижадорлигини баҳолаш тартиби ва методикаси қонун ҳужжатларига кўра белгиланади.

57. Марказий аппарат, ҳудудий бошқармалар ҳамда Марказ таркибига кирувчи бошқа ташкилотларни моддий-техник таъминлаш ва ходимлар меҳнатига ҳақ тўлаш Ўзбекистон Республикаси республика бюджети маблағлари, шунингдек, қонун ҳужжатларида тақиқланмаган бошқа манбалар ҳисобига молиялаштирилади.

58. Марказ ходимларига Ўзбекистон Республикаси Олий ва ўрта махсус таълим вазирлигининг тегишли лавозимлари учун белгиланган меҳнатга ҳақ тўлаш ва моддий рағбатлантириш шартлари қўлланилади.

Марказ ходимларининг лавозим маошларига ҳар ойда қўшиладиган рағбатлантириш хусусиятига эга бўлган қўшимча ҳақлар ва устамалар Марказ директори томонидан тасдиқланадиган низомга мувофиқ тўланади.

59. Марказ ходимларига ойлик иш ҳақи тўлаш ва уларни моддий рағбатлантириш манбалари Ўзбекистон Республикаси Давлат бюджети, бюджет ташкилотини ривожлантириш жамғармаси маблағларидан ва қонун ҳужжатларида тақиқланмаган бошқа манбалар ҳисобига амалга оширилади.

60. Марказ директори Марказнинг фаолияти тўғрисида Ўзбекистон Республикаси Олий ва ўрта махсус таълим вазирлигига, Вазирлар Маҳкамасига, Ўзбекистон Республикаси Президенти Администрациясининг тегишли таркибий бўлинмаларига ва Ўзбекистон Республикаси Президентига мунтазам равишда ҳисобот беради.

61. Ўзбекистон Республикаси Бош вазирининг ижтимоий ривожлантириш масалалари бўйича ўринбосари Марказ раҳбарларига юкланган вазифаларнинг самарали бажарилиши учун уларнинг фаолияти бўйича мунтазам мониторинг олиб боради, Марказ фаолиятининг самарадорлигига холисона баҳо беради.

62. Мониторинг ва баҳолаш якунлари бўйича Марказнинг алоҳида ўрнак кўрсатган раҳбарлари, мансабдор шахслари ва ходимлари рағбатлантирилади ёхуд йўл қўйилган жиддий камчиликлар учун эгаллаб турган лавозимидан озод этишгача бўлган жавобгарликка тортилади.

63. Марказни қайта ташкил этиш ва тугатиш қонун ҳужжатларида белгиланган тартибда амалга оширилади.

1. Вазирлар Маҳкамасининг «2010-2011 ўқув йилида Ўзбекистон Республикасининг ўрта махсус, касб-ҳунар таълим муассасаларига қабул тўғрисида» 2010 йил 1 июлдаги 131-сон қарорининг (Ўзбекистон Республикаси ҚҲТ, 2010 й., 26-27-сон, 212-модда) 1-иловаси.

2. Вазирлар Маҳкамасининг «Таянч касб-ҳунар коллежи ва унинг филиаллари тўғрисидаги низомни тасдиқлаш ҳақида» 2010 йил 19 августдаги 180-сон қарори (Ўзбекистон Республикаси ҚТ, 2010 й., 8-сон, 45-модда).

3. Вазирлар Маҳкамасининг «Ўзбекистон Республикаси Олий ва ўрта махсус таълим вазирлигининг Ўрта махсус, касб-ҳунар таълими маркази фаолиятини янада такомиллаштириш чора-тадбирлари тўғрисида» 2011 йил 12 июлдаги 204-сон қарори (Ўзбекистон Республикаси ҚҲТ, 2011 й., 28-сон, 291-модда).

4. Вазирлар Маҳкамасининг «Ўзбекистон Республикаси Олий ва ўрта махсус таълим вазирлигининг Ўрта махсус, касб-ҳунар таълими маркази тўғрисидаги низомни тасдиқлаш ҳақида» 2011 йил 26 августдаги 244-сон қарори(Ўзбекистон Республикаси ҚТ, 2011 й., 8-сон, 73-модда).

5. Вазирлар Маҳкамасининг «Ўрта махсус, касб-ҳунар таълими муассасаларини ахборот-методик таъминлаш хизмати фаолиятини ташкил этиш тўғрисида» 2014 йил 14 апрелдаги 91-сон қарори(Ўзбекистон Республикаси ҚҲТ, 2014 й., 16-сон, 179-модда).