Ўзбекистон Республикаси Ҳукумати ва Россия Федерацияси Ҳукумати, кейинги ўринларда «Томонлар» деб аталувчилар,

туризмни ривожлантириш ва Томонлар давлатлари аҳолисининг маданий ҳаёти билан яхшироқ таништириш учун қулай шарт- шароитлар яратиш мақсадида,

Ўзбекистон Республикаси Ҳукумати билан Россия Федерацияси Ҳукумати ўртасида маданият, фан ва техника, таълим, соғлиқни сақлаш, ахборот, спорт ва туризм соҳасида ҳамкорлик қилиш тўғрисида 1993 йил 19 мартда имзоланган Битим қоидаларига ҳамда Ўзбекистон Республикаси билан Россия Федерацияси ўртасида стратегик шерикчилик тўғрисида 2004 йил 16 июнда имзоланган Битимда ўз аксини топган Ўзбекистон-Россия муносабатларининг фундаментал принципларига амал қилган ҳолда,

Томонлар давлатларининг иқтисодий, ижтимоий ва маданий тараққиётида туризмнинг муҳим ўрнини эътиборга олган ҳолда,

туризм соҳасида икки томонлама асосда самарали ҳамкорликка эришишга интилиб.

қуйидагилар тўғрисида келишиб олдилар:

Томонлар бир Томон давлати фуқароларини бошқа Томон давлатининг фан, иқтисодиёт, ижтимоий ривожланиш, маданият соҳасидаги ютуқлари, табиати ва диққатга сазовор жойлари, шунингдек тарихий обидалари ва халқларининг маданий анъаналари билан таништириш мақсадида туризм соҳасида ҳамкорликни кенгайтиришга кўмаклашадилар.

Томонлар халқаро конференциялар, форумлар, семинарлар, кўргазмалар, оммавий ахборот воситаларида нашрлар ташкил қилиш орқали «Буюк Ипак йўли» каби қўшма туристик йўналишлар ва брендларни илгари суришга кўмаклашадилар.

Томонлар қуйидаги йўналишларда ҳамкорлик қиладилар:

Томонлар давлатларида оммавий ахборот воситалари орқали реклама кампанияларини ўтказиш;

туризмни ривожлантириш бўйича турли тадбирлар ўтказиш;

Томонлар давлатлари ҳудудларида ўтказиладиган туристик ярмарка ва кўргазмаларда иштирок этиш;

Томонлар давлатларининг туристик ташкилотлари ва оммавий ахборот воситалари вакиллари учун ўзаро таништирув саёҳатларини ташкил қилиш;

туризм соҳасига инвестиция жалб қилишда Томонлар ҳамкорлигини қўллаб-қувватлаш;

Томонлар давлатларининг манфаатдор муассасалари мутахассисларининг тажриба алмашишлари орқали кадрлар тайёрлашга ва туризм саноати вакиллари учун стажировкалар ташкил қилишга кўмаклашиш;

туризм соҳасида, жумладан, туристик мажмуалар ва рекреация зоналарини ташкил қилишда ахборот ва иш тажрибаси, шунингдек инвестициялар соҳасида Томонлар давлатлари қонунчилигига мувофиқ тақдим этиладиган имтиёзлар тўғрисида ахборот алмашиш;

Томонлар давлатлари қонунчилиги доирасида туристик нашрлар ва бошқа материаллар, хусусан, Томонлар давлатларининг туристик салоҳиятини реклама қилувчи аудио ва видео материалларни тарқатиш.

Томонлар Ўзбекистон Республикасининг туристик ва маданий-тарихий салоҳиятлари тўғрисидаги ахборот ва реклама-тарқатма материалларини учинчи давлатларда Россия Федерациясининг миллий туристик идоралари орқали тарқатиш имкониятини кўриб чиқадилар.

Томонлар бошқа Томон давлати ҳудудида бўлиб турган Томонлар давлатлари туристларининг ҳуқуқ ва қонуний манфаатларини ҳимоя қилиш, шунингдек уларнинг хавфсизлигини таъминлаш бўйича, шу жумладан, фавқулодда вазиятлар юзага келганда уларни эвакуация қилиш бўйича ўз давлатлари қонунчилигида ўрнатилган тартибда чоралар кўрадилар.

Мазкур Битим қоидаларини қўллаш ёки талқин қилиш билан боғлиқ тарзда юзага келадиган ҳар қандай низо ва келишмовчиликлар Томонлар ўртасида ўзаро маслаҳатлашув ва музокаралар йўли билан ҳал қилинади.

Томонлар зарурият туғилганда мазкур Битим қоидаларини бажариш билан боғлиқ масалалар бўйича маслаҳатлашувлар ўтказадилар ва ишчи гуруҳлар ташкил қиладилар.

Мазкур Битим Томонларнинг давлатлари иштирокчилар ҳисобланган бошқа халқаро шартномалардан келиб чиқадиган уларнинг ҳуқуқ ва мажбуриятларига дахл қилмайди.

Мазкур Битим қоидаларини бажариш билан боғлиқ сарф-харажатлар, башарти ҳар бир алоҳида ҳолатда бошқача тарзда келишилган бўлмаса, Томонлар давлатларининг қонунчилигига мувофиқ тегишли соҳа учун ажратилган мавжуд молиявий ресурслар доирасида ҳар бир Томон тарафидан қопланади.

Томонларнинг келишувига кўра мазкур Битимга алоҳида баённомалар билан расмийлаштириладиган ва унинг ажралмас қисми ҳисобланадиган ўзгартишлар киритилиши мумкин.

Томонлар мазкур Битимни амалга ошириш учун масъул бўлган қуйидаги ваколатли органларни тайинлайдилар:

Ўзбекистон томонидан — Ўзбекистон Республикаси туризмни ривожлантириш бўйича давлат қўмитаси;

Россия томонидан — Туризм бўйича федерал агентлик.

Мазкур Битим имзоланган санадан бошлаб кучга киради ва Томонлардан бири унинг амал қилишини тугатиш нияти тўғрисида бошқа Томоннинг ёзма хабарномасини олган санадан уч ой ўтгунига қадар амалда бўлади.

Москва шаҳрида 2017 йил 5 апрелда ҳар бири ўзбек ва рус тилларида бўлган икки нусхада имзоланди, бунда барча матнлар бир хил кучга эга.