Ўзбекистон Республикаси билан Россия Федерацияси, (бундан кейин «Томонлар» деб аталувчилар),

Ўзбекистон Республикаси билан Россия Федерацияси ўртасида давлатлараро алоқалар, дўстлик ва ҳамкорлик тўғрисида 1992 йил 30 майдаги Шартнома, Ўзбекистон Республикаси билан Россия Федерацияси ўртасида ҳар томонлама ҳамкорликни ривожлантириш ва чуқурлаштириш тўғрисида 1994 йил 2 мартдаги Декларация, Ўзбекистон Республикаси билан Россия Федерацияси ўртасида 1998—2007 йилларда иқтисодий ҳамкорликни чуқурлаштириш тўғрисида 1998 йил 12 октябрдаги Шартнома, Ўзбекистон Республикаси билан Россия Федерацияси ўртасида ҳарбий ва ҳарбий-техникавий соҳаларда ҳар томонлама ҳамкорликни янада чуқурлаштириш тўғрисида 1999 йил 11 декабрдаги Шартномада белгиланган ўзбек-россия муносабатларининг фундаментал принципларига риоя этиб,

Бирлашган Миллатлар Ташкилоти Низоми, Хелсинки Якуний акти ҳамда Европада хавфсизлик ва ҳамкорлик ташкилотининг бошқа ҳужжатларининг мақсад ва принципларига содиқликларини тасдиқлаб,

Ўзбекистон Республикаси билан Россия Федерацияси халқларининг анъанавий дўстлик ва ҳамкорлик муносабатларини янада мустаҳкамлашга бўлган ўзаро интилишини ҳисобга олиб,

стратегик шерикчиликнинг Ўзбекистон Республикаси билан Россия Федерацияси ўртасидаги муносабатларнинг асоси сифатида шартномавий-ҳуқуқий бириктирилиши барча йўналишларда ҳамкорликни ривожлантиришга кўмаклашишига бўлган ишончдан келиб чиқиб,

Ўзаро хавфсизликни таъминлаш, глобал таҳдид ва даъватларга қарши ҳаракат қилиш, минтақавий барқарорликни мустаҳкамлаш, сиёсий, иқтисодий ва гуманитар соҳалардаги ҳамкорликни кенгайтиришга қаратилган стратегик шерикчилик Ўзбекистон Республикаси билан Россия Федерацияси ўртасидаги муносабатларни узоқ муддатли ва ҳар томонлама ривожланишининг кучли асосини шакллантиради.

Томонлар энг аввало олий ва юқори даражадаги мунтазам учрашувлар механизмидан фойдаланиб ҳамда уни ривожлантириб, мунтазам фикр алмашувини амалга ошириш ва икки томонлама муносабатлар масалалари, ўзаро қизиқиш уйғотувчи долзарб халқаро муаммолар бўйича позицияларни келишган ҳолда тенг ҳуқуқли стратегик шерикчиликни мустаҳкамлайдилар.

Томонлар Бирлашган Миллатлар Ташкилотида, унинг ихтисослаштирилган муассасаларида, Европада хавфсизлик ва ҳамкорлик ташкилотида, бошқа давлатлараро тузилмаларда ўзаро фаол ҳамжиҳатлик қиладилар. Улар халқаро процедуралар доирасида ўзларининг миллий манфаатларига таъсир этувчи масалаларни кўриб чиқилишида бир-бирларини қўллаб-қувватлайдилар.

Томонлар Марказий Осиёда минтақавий хавфсизликнинг кучли ва самарали тизимини яратишга қаратилган ҳаракатларни мувофиқлаштирадилар. Ушбу мақсадларда доимий асосда, шунингдек зарур ҳолларда хавфсизлик кенгашлари, ташқи ишлар вазирликлари ва бошқа манфаатдор вазирлик ва идоралар даражасидаги икки томонлама маслаҳатлашув механизмларини тузадилар.

Томонлар ўзаро хавфсизлик манфаатлари ёки улардан бирининг хавфсизлик манфаатларига салбий таъсир этиши мумкин бўлган ҳолат юзага келган тақдирда, ўзаро келишувга мувофиқ позицияларни келишиш ва шундай ҳолатни тартибга солиш бўйича амалий чораларни мувофиқлаштириш учун тегишли маслаҳатлашув механизмини ишга соладилар.

Томонлар бошқа Томоннинг суверенитетига, хавфсизлигига ва ҳудудий яхлитлигига зиён келтирувчи ҳар қандай хатти-ҳаракатларни, шу жумладан, учинчи давлатлар билан шартномалар тузишни амалга оширмайдилар. Ҳеч қайси Томон ўз ҳудудининг учинчи давлатлар томонидан бошқа Томоннинг давлат суверенитети, хавфсизлиги ва ҳудудий яхлитлигига зиён келтирган ҳолда фойдаланилишига йўл қўймайди.

Терроризмга ва экстремизмнинг бошқа зўравон кўринишларига, оммавий қирғин қуролини тарқатишга, гиёҳвандлик воситалари, психотроп моддалар ва уларнинг прекурсорлари ноқонуний айланмасига, трансмиллий уюшган жиноятчиликка ва халқаро тинчлик ҳамда хавфсизликнинг янги даъват ва таҳдидларга қарши самарали ҳаракат қилиш мақсадларида Томонлар тегишли шартнома ва битимлар, шунингдек бошқа халқаро-ҳуқуқий инструментлар асосда хавфсизлик кенгашлари, ташқи сиёсий, мудофаа, ҳуқуқни муҳофаза қилувчи идора ва махсус хизматлар ўртасидаги шерикчилик алоқаларини қўллаб-қувватлайдилар.

Томонлар ҳарбий ва ҳарбий-техникавий ҳамкорликни тегишли битимлар асосида амалга оширадилар. Ушбу ҳамкорликнинг устувор йўналишлари қуйидагилар ҳисобланади:

— Россия Федерациясидан Ўзбекистон Республикасига ҳарбий мақсаддаги маҳсулотларни етказиб бериш;

— Ўзбекистон Республикасидаги мавжуд ҳарбий техникани, бунга ҳарбий-ҳаво кучлари ва ҳаводан мудофаа воситалари ҳам киради, соғлом ҳолатда сақлаш ва модернизациялаш, шу жумладан Ўзбекистон Республикасида мавжуд саноат-техника базасидан фойдаланган ҳолда;

— Россия Федерациясининг ҳарбий ўқув муассасаларида Ўзбекистон Республикаси Қуролли Кучлари учун зобит кадрларни тайёрлаш;

— Ўзбекистон Республикаси ва Россия Федерацияси қуролли кучларининг ҳарбий тайёргарлиги қўшма тадбирларини ўтказиш, шунингдек ушбу мавзудаги Томонлар ўтказадиган тадбирларда қатнашиш;

— Ўзбекистон Республикаси ҳудудида мавжуд бўлган инфратузилмадан фойдаланган ҳолда Ер ва космик фазони тадқиқ этиш давлатлараро космик дастурларини амалга оширишда ҳамкорлик.

Икки томонлама ҳарбий-техникавий ҳамкорлик жараёнида яратилган интеллектуал фаолият натижаларига бўлган мутлақ ҳуқуқлар тўғрисидаги масала тегишли ҳукуматлараро битим тузиш орқали тартибга солинади.

Хавфсизликни таъминлаш, тинчлик ва барқарорликни сақлаш мақсадларида Томонлар зарур ҳолларда бир-бирларига алоҳида битимлар асосида ўзларининг ҳудудларида жойлашган ҳарбий объектлардан фойдаланиш ҳуқуқини берадилар.

Томонлар қуйидаги соҳалардаги интеграция ва ҳамкорликни жадал ривожлантириш мақсадида савдо-иқтисодий ҳамкорлик доирасида келишилган саъй-ҳаракатларни бажариш мажбуриятини оладилар:

— ёнилғи-энергетика комплекси;

— авиақурилиш;

— транспорт ва коммуникация;

— банк соҳаси;

— энергетика;

— атом энергиясидан тинч йўлда фойдаланиш.

Томонлар ўзаролик асосида бир-бирларига ўз ҳудудларидаги инвестицивий ва хусусийлаштириш лойиҳаларида иштирок этиш учун максимал қулай шароитлар яратадилар.

Томонлар икки томонлама ва кўп томонлама асосда Марказий Осиё минтақасидаги интеграцион жараёнлар доирасида иқтисодий, гуманитар ва бошқа лойиҳа ҳамда дастурларни амалга оширишда ўзаро ҳамжиҳатлик қиладилар.

Томонлар илмий, маданий, ижодий, жамоат ташкилотлари ва уюшмалари ўртасида алоқа ва алмашувларни ўрнатиш ҳамда қўллаб-қувватлаш, кўрсатиб ўтилган йўналишларда қўшма дастур ва тадбирларни амалга ошириш орқали гуманитар соҳадаги ҳамкорликни ривожлантирадилар.

Томонлар миллий таълим ва фан тизимларининг яқинлашувини ҳар томонлама рағбатлантирадилар. Улар ўқув юртлари, илмий-тадқиқот ва лойиҳа-конструкторлик муассасалари ўртасида тўғридан-тўғри алоқаларни ўрнатишга, илғор технологиялардан фойдаланган ҳолда, академик ҳамда амалий характерга эга бўлган қўшма тадқиқотларни амалга оширишга кўмаклашадилар.

Томонлар профессионал кадрларни тайёрлаш соҳасида ҳамкорлик учун қулай шароитлар яратадилар. Улар олим ва мутахассислар, олий ва ўрта махсус ўқув муассасаларининг профессор-ўқитувчи таркиби вакиллари, аспирантлар, стажёр ва талабаларнинг мунтазам алмашувини амалга оширадилар.

Томонлар гуманитар соҳада ҳамкорликнинг шартнома-ҳуқуқий базасини янада кенгайтириш ва такомиллаштиришга кўмаклашадилар.

Ушбу Шартнома учинчи мамлакатларга қарши қаратилмаган ва Томонларнинг улар иштирок этган бошқа халқаро шартномалардан келиб чиқадиган ҳуқуқ ва мажбуриятларга дахл қилмайди.

Ушбу Шартнома унинг кучга кириши учун зарур бўлган давлат ички процедураларининг Томонлар бажаргани тўғрисида охирги ёзма хабар олинган кундан бошлаб кучга киради.

Ушбу Шартнома муддатсиз характерга эга ва Томонлардан бири унинг амал қилишини тўхтатиш нияти тўғрисида бошқа Томонни ёзма равишда хабар қилмагунга қадар амал қилишдан тўхтамайди. Бу ҳолда, Шартнома бошқа Томон шундай хабарномани олган санадан бошлаб ўн икки ой ўтгач ўз кучини йўқотади.

Тошкент шаҳрида, 2004 йил 16 июнда икки асл нусхада, ҳар бири ўзбек ва рус тилларида тузилди, бунда иккала матн бир хил кучга эга.