Ўзбекистон Республикаси Ҳукумати ва Россия Федерацияси Ҳукумати, бундан кейинги ўринларда «Томонлар» деб аталувчилар,

икки давлат ўртасида соғлиқни сақлаш, тиббий таълим ва фан соҳасида ҳамкорликни янада ривожлантириш ва чуқурлаштиришга кўмаклашиш истагида,

Ўзбекистон Республикаси билан Россия Федерацияси ўртасида стратегик шерикчилик тўғрисида 2004 йил 16 июнда имзоланган Битим ҳамда Ўзбекистон Республикаси билан Россия Федерацияси ўртасида иттифоқчилик муносабатлари тўғрисида 2005 йил 14 ноябрда имзоланган Шартнома қоидаларига асосланган ҳолда,

соғлиқни сақлаш, тиббий таълим ва фан соҳасида ўзаро қизиқиш уйғотадиган бир қатор муаммоларни ҳал этишда иккала давлат саъй-ҳаракатларини бирлаштириш мақсадга мувофиқлигини англаб,

соғлиқни сақлаш, тиббий таълим ва фан соҳасида ҳамкорлик икки давлат ўртасида ўзаро дўстона муносабатларни мустаҳкамлашга ўз ҳиссасини қўшишини эътироф этиб,

қуйидагилар тўғрисида келишиб олдилар:

Томонлар тенглик ва ўзаро манфаатларни инобатга олиш принциплари асосида ҳамда Томонлар давлатлари қонунчилигига мувофиқ соғлиқни сақлаш, тиббий таълим ва фан соҳасида ҳамкорликни ривожлантирадилар, аҳолининг санитария-эпидемиологик осойишталигини таъминлаш бўйича чора-тадбирларни амалга оширадилар.

Томонлар Ўзбекистон билан Россия ташкилотлари ўртасида соғлиқни сақлаш, тиббий таълим ва фан соҳасида тўғридан-тўғри алоқаларни рағбатлантирадилар ва қўллаб-қувватлайдилар.

Томонлар соғлиқни сақлаш, тиббий таълим ва фан соҳасида долзарб масалалар бўйича қуйидаги йўналишларда ҳамкорликни амалга оширадилар:

соғлиқни сақлаш миллий тизимини ташкил этиш ва соғлиқни сақлаш соҳасида фаолиятни бошқариш;

атрофдагилар учун хавфли бўлган касалликлар, шу жумладан сил касаллиги, одамнинг иммунитет танқислиги вируси келтириб чиқарадиган касаллик (ОИВ инфекцияси) ва бошқа касалликлар;

юқумли бўлмаган касалликлар, шу жумладан юрак-қон-томир, онкологик, эндокрин ва бошқа касалликларнинг олдини олиш, ташхис қўйиш ва даволаш;

оналар ва болалар соғлиғини муҳофаза қилиш;

тиббий буюмлар ва тиббиётда қўллаш учун дори воситалари муомаласи соҳасида давлат томонидан тартибга солиш масалалари;

тиббий буюмлар ва тиббиётда қўллаш учун дори воситаларини ишлаб чиқариш;

аҳолининг санитария-эпидемиологик осойишталигини таъминлаш;

соғлом турмуш тарзини тарғиб қилиш;

саломатлик ва атроф-муҳит;

овқатланиш гигиенаси;

ҳалокатлар вақтида тиббий ёрдам кўрсатиш;

соғлиқни сақлаш соҳасида мутахассисларни ўқитиш, қайта тайёрлаш ва уларнинг малакасини ошириш;

соғлиқни сақлаш, тиббий таълим ва фан соҳасида Томонлар давлатларининг ваколатли органлари тарафидан келишилган ҳамкорликнинг бошқа йўналишлари.

Мазкур Битим доирасидаги ҳамкорлик қуйидаги шаклда амалга оширилади:

соғлиқни сақлаш соҳасида мазкур Битимнинг 3-моддасида кўрсатилган йўналишлар бўйича норматив-ҳуқуқий, статистик ва тахлилий ахборот билан алмашиш;

мутахассислар, ўқитувчилар ва талабалар алмашинуви;

мутахассислар, ўқитувчилар ва талабаларнинг Томонлардан бири ташкиллаштираётган конгресс, илмий конференциялар ва бошқа тадбирларда иштирок этиши;

қўшма илмий тадқиқотлар олиб бориш;

Томонлар давлатларининг ваколатли органлари тарафидан келишилган ҳамкорликнинг бошқа кўринишлари.

Мазкур Битимни амалга ошириш, шу жумладан, Томонлар вакилларининг хизмат сафарлари ва уларнинг қабул қилувчи давлат ҳудудида яшаши билан боғлиқ бўлган барча харажатларни Томонлар мустақил равишда қоплайдилар, башарти бошқача тарзда келишиб олмасалар.

Мазкур Битим бажарилиши учун қуйидагилар ваколатли органлар ҳисобланади:

Ўзбекистон томонидан:

Ўзбекистон Республикаси Соғлиқни сақлаш вазирлиги;

«Ўзфармсаноат» давлат-акциядорлик концерни;

Россия томонидан:

Россия Федерацияси Соғлиқни сақлаш вазирлиги;

Россия Федерацияси саноат ва савдо вазирлиги.

Мазкур Битим амалга оширилишини таъминлаш мақсадида Томонлар давлатларининг ваколатли органлари:

мазкур Битимни бажариш бўйича аниқ чора-тадбирларни назарда тутувчи дастурлар ва режаларни тасдиқлайдилар;

зарур ҳолларда Томонлар давлатларининг ваколатли органлари ва бошқа ташкилотлари вакиллари иштирокида соғлиқни сақлаш, тиббий таълим ва фан соҳасида ҳамкорликни ривожлантириш билан боғлиқ масалалар бўйича учрашувлар ўтказадилар.

Ҳар бир Томон давлати қонунчилигига ҳамда Ўзбекистон Республикаси ва Россия Федерацияси иштирокчиси бўлган халқаро шартномаларга мувофиқ, Томонлар интеллектуал фаолият натижаларини ҳуқуқий ҳимоя қилишни таъминлаш, шунингдек интеллектуал фаолиятдан ва интеллектуал мулкдан ноқонуний фойдаланишнинг олдини олиш бўйича зарур чоралар кўрадилар.

Мазкур Битимни амалга ошириш жараёнида яратиладиган, фойдаланиладиган ва тақдим этиладиган интеллектуал фаолият натижаларига ҳуқуқни тақсимлаш, ушбу натижаларнинг ҳуқуқий ҳимояси ва улардан фойдаланиш тартиби, шунингдек мазкур Битимни амалга ошириш жараёнида яратиладиган, фойдаланиладиган ва тақдим этиладиган интеллектуал мулкни ҳимоялаш ва ундан фойдаланиш тартиби алоҳида икки томонлама битимлар предмети ҳисобланади.

Томонлар мазкур Битимни талқин қилиш ва қўллаш билан боғлиқ хар қандай келишмовчиликларни, шунингдек мазкур Битимни бажаришдан келиб чиқиши мумкин бўлган низоли масалаларни маслаҳатлашув ва музокаралар йўли билан ҳал қиладилар.

Томонларнинг ўзаро розилигига кўра мазкур Битимга алоҳида баённомалар билан расмийлаштириладиган, унинг ажралмас қисми ҳисобланадиган ва мазкур Битим 11-моддасида назарда тутилган тартибда кучга кирадиган ўзгартиш ва қўшимчалар киритилиши мумкин.

Мазкур Битим имзоланган кундан бошлаб кучга киради ва Томонлардан бири унинг амал қилишини тугатиш нияти тўғрисида бошқа Томоннинг тегишли ёзма хабарномасини дипломатик каналлар орқали олган санадан олти ой ўтгунига қадар амалда бўлади.

Мазкур Битим амал қилишининг тугатилиши, башарти Томонлар ўртасида бошқа келишувга эришилмаган бўлса, ушбу Битим доирасида амалга оширилаётган амалдаги дастурлар, режалар ва келишувларни бажаришга нисбатан дахл қилмайди.

Москва шаҳрида 2017 йил 5 апрелда ҳар бири ўзбек ва рус тилларида бўлган икки нусхада тузилди, бунда барча матнлар бир хил кучга эга.