Ўзбекистон Республикаси «Чиқиндилар тўғрисида»ги Қонунига (Ўзбекистон Республикаси Олий Мажлисининг Ахборотномаси, 2002 й., 4-5-сон, 72-модда) асосан ҳамда Ўзбекистон Республикаси Вазирлар Маҳкамасининг 1992 йил 14 августдаги «Аҳолига сотиладиган ёқилғи, энергия ва кўрсатиладиган хизматлар чакана нархлари ҳамда тарифларини қайта кўриб чиқиш тўғрисида»ги 381-сонли, 2013 йил 3 декабрдаги «Республика аҳоли пунктларида санитария жиҳатдан тозалаш тизимини ривожлантириш ва такомиллаштириш чора-тадбирлари тўғрисида»ги 315-сонли (Ўзбекистон Республикаси қонун ҳужжатлари тўплами, 2013 й., 49-сон, 632-модда) ҳамда 2014 йил 15 июлдаги 194-сонли ( Ўзбекистон Республикаси қонун ҳужжатлари тўплами, 2014 й., 30-сон, 368-модда) қарори билан тасдиқланган «Қаттиқ ва суюқ маиший чиқиндиларни тўплаш ва олиб чиқиб кетиш хизматлари кўрсатиш қоидалари» ижросини таъминлаш мақсадида, шунингдек бу борадаги Ўзбекистон Республикаси Молия вазирлигининг 2015 йил 2 октябрдаги БЮ/15-04-34-26/125-1827-сонли хатини инобатга олган ҳолда, ҳудудларда қаттиқ ва маиший чиқиндиларни тўплаш, ташиш ва утилизация қилиш хизматларини такомиллаштириш ҳамда санитария ҳолатни яхшилаш мақсадида қарор қиламан:

1. Ўзбекистон Республикаси Молия вазирлигининг 2015 йил 2 октябрдаги БЮ/15-04-34-26/125-1827-сонли хати маълумот ва ижро учун қабул қилинсин.

2. Худудларда қаттиқ ва маиший чиқиндиларни тўплаш ҳамда олиб чиқиб кетиш хизматлари тарифларининг миқдорлари иловага мувофиқ тасдиқлансин.

3. Ободонлаштириш бошқармалари ҳамда санитар тозалашга ихтисослаштирилган ташкилот раҳбарларига:

вилоятдаги барча юридик ва жисмоний шахсларга кўрсатиладиган хизматлар учун шартномалар тузилишини ҳамда кўрсатилган хизматлар бўйича тўловларни ундириш юзасидан зарур чора-тадбирлар кўриб бориш;

хизмат кўрсатадиган ташкилотлардаги мавжуд автотранспорт воситаларини автоматлаштирилган назорат тизими (GPS) ускуналари билан жиҳозлаш;

хизмат кўрсатадиган ташкилотлардаги санитар тозалаш хизмати абонентлари ва кўрсатилаётган хизматлар ҳисоб-китобини автоматлаштириш мақсадида «Биллинг» дастурини жорий қилиш;

бир ҳафта муддатда аҳоли пунктлари ҳудудидан чиқинди ташишнинг кунлик режа-графигини ишлаб чиқиб, туман (шаҳар) ҳокими тасдиғига киритишсин ва ушбуни фуқароларнинг ўзини ўзи бошқариш органлари ҳамкорлигида аҳоли эътиборига етказишни таъминлаш;

ўз фаолият давомида зарарсиз чиқиндиларнинг вужудга келиши меъёрлари, санитария-гигена қоидалари ва бошқа меъёрий хужжатларга қатъий амал қилган ҳолда иш олиб борилиши;

кўрсатилаётган хизмат сифатини ва самарадорлигини ошириб бориш мақсадида, иш фаолияти давомида пайдо бўладиган бўш айланма маблағлар ҳисобидан ташкилотнинг моддий техник базасини ривожлантириб бориш, қўшимча ва янги техника, транспорт, асбоб-ускуналар ва жиҳозлар харид қилиб бориш;

аҳоли пунктларида жойлашган маиший чиқиндиларни тўплаш хандақларини замонавий талаблар асосида ташкил этиш;

ободонлаштириш бошқармаларида техникаларни янгилаш бўйича очилган алоҳида шахсий ғазна ҳисоб рақамига маблағларни ўз вақтида ва тўлиқ тушишини қатъий назоратга олиш вазифалари юклатилсин.

4. Шундай тартиб ўрнатилсинки, унга мувофиқ жойларда санитар тозалов корхоналари томонидан қаттиқ маиший чиқиндиларни тўплаш ва ташиб келиш хизматлари учун ҳисоб-китобларни амалга оширишда ҳудудда фаолият кўрсатаётган тадбиркорлик субъектлари, юридик ва жисмоний шахслар, паспорт тизими бўйича доимий рўйхатдан ўтган манзилидан қатъий назар, яшаётган манзилида оила сонидан келиб чиқиб, ҳисобланиши ва тўланиш тартиби белгилансин.

5. Вилоятда мулкчилик шаклидан қатъи назар, корхона ва ташкилот раҳбарлари, ўз ҳудудларида ҳосил бўлган қаттиқ ва маиший чиқиндиларни тасдиқланган тарифлар бўйича ташиб чиқариш юзасидан хизмат кўрсатаётган санитар корхоналар билан шартнома тузилишини, шунингдек кўрсатилган хизматлар бўйича тўловларни ўз вақтида ҳисоб-китоб қилиб борилишини амалга оширсинлар.

6. Марказий банк Фарғона вилояти бош бошқармаси (Эгамов)га Ободонлаштириш бошқармалари ва ихтисослаштирилган санитар корхоналари томонидан хизмат кўрсатувчи тижорат банклари ва назоратчи (кассир)лар ўртасида 3 томонлама меҳнат шартномасини тузиш орқали ёлланма кассирни белгилаш ва аҳолидан пул тўловларини йиғишни йўлга қўйишни таъминлаш, банк мижозларидан қаттиқ ва маиший чиқинди ташиб чиқариш бўйича кўрсатилган хизматлар учун тўловларни ўз вақтида ҳисоб-китоб қилиб борилишини назорат қилиб борилсин.

7. Барча туман (шаҳар) ҳокимларига бир ҳафта муддатда:

ҳудудларда қаттиқ ва маиший чиқиндиларни ташиб кетиш, хизмат кўрсатиш бўйича тарифларни белгилаш юзасидан қабул қилган ҳужжатларини ушбу қарорга мувофиқлаштиришсин ва вилоят ҳокимлигига ахборот беришсин.

8. Мазкур қарор «Фарғона ҳақиқати» ва «Ферганская правда» газеталарида эълон қилинсин ҳамда ҳокимликнинг расмий веб-сайтига жойлаштирилсин.

9. Мазкур қарор расмий нашрда эълон қилинган кундан эътиборан кучга киради.

10. Мазкур қарорнинг ижросини назорат қилиш вилоят ҳокимининг ўринбосари О. Аҳмедов зиммасига юклатилсин.