«Тадбиркорлик фаолияти эркинлигининг кафолатлари тўғрисида»ги Ўзбекистон Республикаси Қонунининг 39-моддасига мувофиқ Ўзбекистон Республикаси Адлия вазирлиги, Миллий хавфсизлик хизмати, Бош прокуратураси, Ички ишлар вазирлиги, Давлат солиқ қўмитаси ва Давлат божхона қўмитаси қарор қилади:

1. Қўзғатилган жиноят ишлари бўйича тадбиркорлик субъектлари фаолиятини текширишларда адвокатларнинг мажбурий иштирокини таъминлаш тартиби тўғрисидаги низом иловага мувофиқ тасдиқлансин.

2. Мазкур қарор расмий эълон қилинган кундан эътиборан кучга киради.

Мазкур Низом «Тадбиркорлик фаолияти эркинлигининг кафолатлари тўғрисида»ги Ўзбекистон Республикаси Қонунига мувофиқ қўзғатилган жиноят ишлари бўйича тадбиркорлик субъектлари фаолиятида ўтказиладиган текширишларда адвокатларнинг мажбурий иштирокини таъминлаш тартибини белгилайди.

1. «Тадбиркорлик фаолияти эркинлигининг кафолатлари тўғрисида»ги Ўзбекистон Республикаси Қонунининг 39-моддасига мувофиқ қўзғатилган жиноят ишлари бўйича текширишлар уларни ўтказишнинг барча босқичларида тадбиркорлик субъектларининг ваколатли вакиллари томонидан жалб этилган адвокатлар албатта иштирок этган ҳолда (тадбиркорлик субъектлари томонидан ушбу ҳуқуқнинг рад этилиши ҳоллари бундан мустасно) амалга оширилади.

2. Текшириш бошланишидан олдин, текширувни амалга оширувчи мансабдор шахс томонидан тадбиркорлик субъектининг ваколатли вакилига унинг текширишда иштирок этиш учун адвокатни жалб этиш ёки унинг иштирокини рад этиш ҳуқуқи ёзма шаклда тушунтирилади, бу ҳақда баённома тузилади. Бунда адвокат хизматларидан фойдаланиш ҳуқуқининг рад этилиши тадбиркорлик субъекти томонидан адвокатни текширишнинг кейинги босқичларига жалб этиш учун монелик қилмайди.

3. Агар тадбиркорлик субъекти томонидан адвокатни жалб этиш истаги билдирилган бўлса, текширишни бошлаш адвокат етиб келгунга қадар йигирма тўрт соатга тўхтатиб турилади. Адвокат йигирма тўрт соат ўтгандан кейин тадбиркорлик субъектини ҳимоя қилишга киришмаган тақдирда, текшириш унинг иштирокисиз бошланади.

Тадбиркорлик субъекти жиноят иши бўйича гумон қилинувчи ёки айбланувчи тариқасида ишга жалб этилган тақдирда, уни адвокат билан таъминлаш Ўзбекистон Республикасининг Жиноят-процессуал кодекси асосида амалга оширилади.

4. Суриштирув ва тергов органлари томонидан тадбиркорлик субъектлари фаолиятини текшириш учун қўзғатилган жиноят ишининг мавжудлиги асос бўлади. Бунда текшириш тадбиркорлик субъектининг фақат қўзғатилган жиноят иши билан боғлиқ фаолиятини қамраб олиши мумкин бўлиб, бу ҳақда текширишни тайинлаш тўғрисидаги қарорда кўрсатилган бўлиши лозим.

Тадбиркорлик субъектлари фаолиятида текширишлар, ўтказилишидан олдин, тадбиркорлик субъектининг ваколатли вакилига текширишни тайинлаш тўғрисидаги қарор тақдим қилинади ва унинг нусхаси унга имзоси қўйилган ҳолда топширилади.

5. Текширишни тайинлаш тўғрисидаги қарор жиноят иши юритуви учун масъул бўлган шахс томонидан имзоланган ва суриштирув ёки тергов органининг гербли муҳри қўйилган бўлиши лозим.

6. Тадбиркорлик субъектининг ваколатли вакили текширишни тайинлаш тўғрисидаги қарор билан таништирилгандан сўнг, унга адвокат жалб этиш ҳуқуқи тушунтирилади, бу ҳақда баённома тузилади.

Баённомада қуйидагилар кўрсатилиши лозим:

баённома тузилган сана, вақт ва жой;

баённома тузган шахснинг фамилияси, исми, отасининг исми ва лавозими;

тадбиркорлик субъектининг фаолиятини текшириш ким томонидан, қайси жиноят иши юзасидан, қачон ва қандай ҳужжат асосида тайинланганлиги;

фаолияти текширилиши лозим бўлган тадбиркорлик субъектининг тўлиқ номи ва реквизитлари;

тадбиркорлик субъектининг ваколатли вакилининг фамилияси, исми, отасининг исми, лавозими, шунингдек вакилнинг шахсини ва ваколатини тасдиқловчи ҳужжатлар тўғрисидаги маълумотлар;

текширишни амалга оширувчи шахсларнинг фамилияси, исми, отасининг исми ва лавозими;

тадбиркорлик субъектининг ваколатли вакилига текширишда иштирок этиш учун адвокатни жалб этиш ҳуқуқи тушунтирилганлиги тўғрисидаги маълумотлар;

жалб этилган адвокатнинг фамилияси, исми, отасининг исми, адвокатлик тузилмасининг номи ва ишни олиб боришга ордер реквизитлари;

тадбиркорлик субъектининг ваколатли вакилининг текширишда иштирок этиш учун адвокат жалб этиш ёки унинг иштирокини рад этиш масаласи бўйича фикри.

7. Баённома уч нусхада тузилиб, жалб этилган мансабдор шахслар, тадбиркорлик субъектининг ваколатли вакили ва адвокат томонидан имзоланади. Баённоманинг биринчи нусхаси жиноят ишига қўшилади, иккинчи ва учинчи нусхалари тадбиркорлик субъектининг ваколатли вакили ҳамда адвокатга тақдим этилади.

8. Тадбиркорлик субъектлари фаолиятини текширишда ушбу субъектнинг бирор-бир ходимининг адвокати жиноят ишида иштирок этаётганлигидан қатъи назар, текширишда иштирок этиш учун адвокатни жалб этиш ҳуқуқи таъминланиши лозим.

9. Адвокат муайян иш бўйича юридик ёрдам кўрсатаётган ёки илгари юридик ёрдам кўрсатган шахсларнинг манфаатлари ишни олиб боришни сўраб мурожаат этган тадбиркорлик субъектининг манфаатларига зид келган ёки у судья, прокурор, терговчи, суриштирув ўтказувчи шахс, жамоат айбловчиси, суд мажлиси котиби, эксперт, мутахассис, жабрланувчининг, фуқаровий даъвогарнинг, фуқаровий жавобгарнинг вакили, гувоҳ, холис, таржимон сифатида иштирок этган ҳолларда, шунингдек агар ишни дастлабки тергов қилишда ёхуд судда адвокатнинг қариндоши бўлган мансабдор шахс иштирок этган ёки иштирок этаётган бўлса, худди шунингдек агар адвокат бевосита ёки билвосита шу ишдан шахсан манфаатдор бўлса бу ҳол унга тадбиркорлик субъектининг манфаатларига зид келса, юридик ёрдам кўрсатиш тўғрисидаги топшириқни қабул қилишга ҳақли эмас.

10. Текшириш давомида тадбиркорлик субъектининг ваколатли вакили ёки адвокат, шунингдек текширувни амалга оширувчи мансабдор шахслар Жиноят-процессуал кодексида назарда тутилган ҳуқуқлардан фойдаланадилар, шунингдек тегишли органларга текшириш юзасидан таклифлар ва илтимосномалар киритишлари, фикр ва эътирозлар билдиришлари ва қўшимча маълумотлар тақдим этишлари мумкин. Мазкур ҳужжатлар жиноят иши материалларига қўшиб қўйилади.

11. Тадбиркорлик субъектлари томонидан жалб этилган адвокатларга юридик ёрдам кўрсатганлиги учун ҳақ тўлаш қонунчиликда белгиланган тартибда амалга оширилади.

12. Ушбу Низом талаблари бузилишида айбдор бўлган шахслар қонун ҳужжатларида белгиланган тартибда жавобгар бўладилар.

13. Мазкур Низом Ўзбекистон Республикаси Адвокатлар палатаси билан келишилган.