LexUZ шарҳи
Мазкур қарор Ўзбекистон Республикаси Вазирлар Маҳкамасининг 2005 йил 28 сентябрдаги 217-сонли «Ўзбекистон Республикаси соғлиқни сақлаш муассасаларини молиялаштириш ва бошқариш тизимини янада такомиллаштириш тўғрисида»ги қарори билан ўз кучини йўқотган.
Ўзбекистон Республикаси Президентининг «Ўзбекистон Республикасида соғлиқни сақлаш тизимини ислоҳ қилиш давлат дастури тўғрисида» 1998 йил 10 ноябрдаги ПФ-2107-сон Фармонини ва Ўзбекистон Республикаси Вазирлар Маҳкамасининг «Халқаро тикланиш ва тараққиёт банки билан ҳамкорлик қилиш дастурини амалга оширишга оид чора-тадбирлар тўғрисида» 1997 йил 2 октябрдаги 462-сон, «Халқаро тикланиш ва тараққиёт банки берадиган қарз доирасида соғлиқни сақлашнинг бошланғич бўғинини ислоҳ қилиш лойиҳасини амалга оширишни жадаллаштириш чора-тадбирлари тўғрисида» 1998 йил 1 июндаги 236-сон қарорларини бажариш юзасидан Вазирлар Маҳкамаси қарор қилади:
1. 1999 йил 10 мартдан бошлаб Фарғона вилоятининг Бешариқ, Қува ва Ёзёвон туманларида қишлоқ врачлик пунктларини, қишлоқ врачлик амбулаториялари ва фельдшер-акушерлик пунктлари комплексларини (кейинги ўринларда — биринчи тиббий санитария ёрдами — БТСЁ муассасалари деб аталади) молиялаштиришнинг янги механизмини жорий қилиш бўйича эксперимент ўтказилсин, бунда уларга сарфланадиган харажатлар уларга бириктирилган бир киши ҳисобидан келиб чиқиб, маблағ билан таъминланиши назарда тутилсин.
2. Фарғона вилояти ҳокимлиги кўрсатилган туманларнинг БТСЁ муассасаларини маблағ билан таъминлашни 1999 йил 1 январдаги ҳолатига кўра вилоят соғлиқни сақлаш бошқармасига берсин. Вилоят соғлиқни сақлаш харажатлари таркибида эксперимент асосида ишлашга ўтказиладиган БТСЁ муассасалари харажатлари улуши 1998 йил даражасида сақлаб қолинсин.
3. Белгилаб қўйилсинки, тиббиёт тармоғини таркибий қайта ташкил этиш, даволаш-профилактика ишларининг тежамлироқ усулларини ўзлаштириш ва бошқа тадбирлар ҳисобига вилоят соғлиқни сақлаш тизимида тежалган маблағлар олиб қўйилмайди ва биринчи навбатда эксперимент ўтказиладиган туманлардаги БТСЁ муассасаларини ривожлантиришга, шунингдек вилоят даволаш муассасаларининг моддий-техника базасини мустаҳкамлашга йўналтирилади.
4. БТСЁ муассасаларини маблағ билан таъминлаш тўғрисидаги Вақтинчалик низом иловага мувофиқ тасдиқлансин.
5. БТСЁ муассасаларини бир киши ҳисобидан келиб чиқиб маблағ билан таъминлашга ўтказиш бўйича эксперимент олиб боришда АҚШнинг Халқаро ривожланиш агентлигининг Фарғона вилоятининг кўрсатилган туманларига беғараз техник ёрдам сифатида ажратилган 800 минг АҚШ доллари миқдоридаги маблағларидан ҳам фойдаланилиши маълумот учун қабул қилинсин.
БТСЁ муассасалари учун врачлар ва бошқарув ходимларини, шунингдек харажатларни бир киши ҳисобига маблағ билан таъминлаш шароитларида даволаш ва молиявий ишларни ташкил этиш бўйича вилоят ва туманлар соғлиқни сақлаш тизими раҳбарларини тайёрлашни таъминласин;
1999 йил 10 мартгача — БТСЁ муассасалари учун давлат томонидан кафолатланган тиббий-санитария хизматларининг асосий турлари пакетини ишлаб чиқсин;
1999 йил 1 июлгача — БТСЁ муассасалари учун тиббий-санитария хизматларининг сифатини ва самарадорлигини яхшилаш тизимини ва мезонларини ишлаб чиқсин;
Фарғона вилояти БТСЁ муассасаларидаги эксперимент натижалари бўйича 1999 йилнинг биринчи ярмида Ўзбекистон Республикаси Молия вазирлиги, Сирдарё ва Навоий вилоятлари ҳокимликлари билан биргаликда ушбу вилоятларнинг БТСЁ муассасаларини бир киши ҳисобидан келиб чиқиб маблағ билан таъминлашга ўтказиш бўйича эксперимент ўтказишни кўриб чиқсин ва бу ҳақда қарор қабул қилсин;
эксперимент натижаларини умумлаштирсин ва 1999 йил 15 декабргача Ўзбекистон Республикаси Молия вазирлиги билан биргаликда республиканинг бошқа бошланғич тиббий-санитария ёрдами муассасаларида маблағ билан таъминлашнинг янги механизмини жорий қилиш юзасидан таклифлар киритсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ҳ.С. Кароматов зиммасига юклансин.
1. Ушбу Низомда эксперимент ўтказишга киритилган Фарғона вилоятининг Бешариқ, Қува ва Ёзёвон туманлари бошланғич тиббий-санитария ёрдами (БТСЁ) муассасаларини молиялаштириш шартлари ва тартиби белгиланади.
2. Экспериментнинг мақсади — қишлоқ аҳолисига янада малакали тиббий ёрдам кўрсатиш учун Ўзбекистон Республикаси қишлоқ соғлиқни сақлаш тизимида бошланғич тиббий-санитария ёрдами бўғинини кучайтиришдан иборатдир.
3. Эксперимент шартларига кўра БТСЁ муассасалари ўртача бириктирилган ҳар бир киши нормативи бўйича маблағ билан таъминлашга ўтказилади.
Вилоят бўйича ҳар бир киши ҳисобига маблағ билан таъминлаш нормативи қуйидаги формула бўйича аниқланади:
бунда: ЖМН — жон бошига маблағ билан таъминлаш нормативи, ССБ — ҳисобот йилида вилоят соғлиқни сақлаш соҳасининг бюджети, Аҳоли – ҳисобот йилидаги вилоят аҳолисининг сони, %ХУ — БТСЁ муассасалари харажатларининг туманлар бюджетидаги ҳисобот даври даражасидаги ўртача улуши.
4. Ҳар бир БТСЁ муассасасининг бюджети вилоят бўйича жон бошига ўртача нормативнинг тегишли муассасага бириктирилган аҳоли сонига кўпайтирилганига тенг (3-банд).
5. БТСЁ муассасаларининг функционал хизматлари кенгайишига қараб вилоят соғлиқни сақлаш тизимининг ички захиралари ҳисобига базавий нормативни оширишга йўл қўйилади.
6. Бириктириладиган кишилар сони даставвал мавжуд участкалар бўйича белгиланади. Экспериментнинг кейинги босқичларида кишиларни эркин бириктириш мумкин. Эксперимент ўтказиладиган туманларнинг аҳолиси эркин бириктириш даврида маълум бир БТСЁ муассасасини танлайди ва кейинги йилда дастлабки ёрдам ҳамда маслаҳатлашишга, ташҳис қўйишга ва касалхонада ётишга йўлланма олиш учун унда рўйхатдан ўтадилар.
7. Бириктирилган ҳар бир киши ҳисобидан белгиланган БТСЁ муассасасининг харажатлар сметаси дастлабки даволаш-профилактика ёрдами кўрсатишнинг жорий харажатларини молиялаштиришни таъминлашга қаратилгандир. Капитал қўйилмалар ҳар бир кишига белгиланган харажатлар доирасидан ташқари маблағ билан таъминланади.
8. БТСЁ муассасалари вилоят соғлиқни сақлаш бошқармаси томонидан маблағ билан таъминланади. БТСЁ муассасаларини молиялаштириш учун маблағлар, туманлар ҳокимларининг розилиги билан вилоят соғлиқни сақлаш бошқармасига келиб тушади ҳамда аҳоли сонига, жинси, балоғат ёши таркибига ва аҳолининг зичлигига мувофиқ туманлар бўйича қайта тақсимланади.
9. Бошланғич тиббий-санитария ёрдамини маблағ билан таъминлаш учун харажатлар сметаси белгиланган тартибда тасдиқланади.
10. Бошланғич тиббий-санитария ёрдами муассасаларини сақлаш харажатларини маблағ билан ҳар ойда йиллик бюджетнинг 1/12 қисми миқдорида амалга оширилади. Ҳар ойлик маблағ кўчириш бириктирилган аҳолининг жорий сонини ҳисобга олган ҳолда ўзгартирилади. БТСЁ муассасалари ҳар ойда вилоят соғлиқни сақлаш бошқармасини вафот этганлар, рўйхатдан ўчганлар ва янги бириктирилган аҳоли сонини ҳисобга олиб, хизмат кўрсатадиган ходимлар ҳақида хабардор қилиб туради.
11. Йил якуни бўйича тежалган маблағлар БТСЁ муассасаси ихтиёрида қолади ва муассасанинг моддий-техника базасини мустаҳкамлашга, шунингдек, вилоят соғлиқни сақлаш бошқармаси билан келишган ҳолда унинг ходимларини моддий рағбатлантиришга йўналтирилади.
12. Ҳар бир киши ҳисобига маблағ билан таъминлаш мижозларни йўналтиришнинг ягона тизими мажбурий равишда жорий қилинишини ва турли даражадаги тиббиёт муассасалари ўртасида ўзаро шартномавий муносабатлар ўрнатилишини тақозо этади.
13. БТСЁ муассасалари ишининг сифатини назорат қилиш туманлар ҳокимликлари билан биргаликда вилоят соғлиқни сақлаш бошқармасига юклатилади. Сифат тиббий ёрдамнинг ҳаммага баробарлиги ва ўз вақтида кўрсатилиши, унинг замонавий клиник протоколларга ва санитария-гигиена стандартларига мувофиқлиги, мижозларнинг хизмат кўрсатиш даражаси ва даволаниш натижаларидан қониққанлиги кўрсаткичлари бўйича баҳоланади.