Ўзбекистон Республикаси ва Беларусь Республикаси, бундан кейин «Томонлар» деб аталувчилар,

Ўзбекистон Республикаси билан Беларусь Республикаси ўртасида давлатлараро муносабатлар асослари тўғрисида 1991 йил 6 ноябрдаги Шартнома, Ўзбекистон Республикаси билан Беларусь Республикаси ўртасида савдо муносабатлари тўғрисида 1993 йил 21 январдаги Битим, Ўзбекистон Республикаси билан Беларусь Республикасининг дўстлик ва ҳамкорликни янада мустаҳкамлаш тўғрисида 1994 йил 22 декабрдаги декларациясига, шунингдек Томонлар иштирокчи бўлган бошқа халқаро шартномаларга амал қилиб,

ўзаро манфаатли савдо-иқтисодий ва ишлаб чиқариш муносабатларини янада мустаҳкамлаш ва ривожлантириш, уларга узоқ муддатлилик ва барқарорлик туси бериш, Томонларнинг иқтисодий ва илмий-техникавий имкониятларидан самарали фойдаланиш ва улар халқларининг фаровонлигини ошириш зарурлигини англаб,

иқтисодиётни изчил ривожлантириш ва иқтисодий ислоҳотларни ўтказишга муҳим аҳамият бериб, халқаро ҳуқуқнинг умумэътироф этилган нормалари ва принципларига амал қилиб,

қуйидагилар тўғрисида келишиб олдилар:

Томонлар ушбу Шартноманинг ажралмас қисми ҳисобланувчи Ўзбекистон Республикаси билан Беларусь Республикаси ўртасида 2008 — 2017 йилларга мўлжалланган иқтисодий ҳамкорлик дастурини (бундан кейин — Дастур) амалга оширадилар.

Томонлар иқтисодий ҳамкорликни халқаро ҳуқуқнинг умумэътироф этилган принципларига оғишмай риоя этиш асосида, шу жумладан давлат бошқаруви органлари ўртасида, бевосита хўжалик юритувчи субъектлар ўртасида, мулк шакли ва ташкилий қарашлилигидан қатъи назар, Томонлар миллий қонунчилигига риоя этиб, шартномалар тузиш йўли билан амалга оширадилар.

Олинган мажбуриятларни бажариш учун шартнома тузган хўжалик юритувчи субъектлар жавобгардирлар.

Томонлар ўз зиммаларига бошқа Томон иқтисодий манфаатларига зарар етказмаслик мажбуриятини оладилар.

Томонлар Ўзбекистон Республикаси билан Беларусь Республикаси ўртасидаги икки томонлама ҳамкорлик бўйича Ҳукуматлараро қўшма комиссияга (бундан кейин Комиссия) Дастур бажарилишини мувофиқлаштириш, унинг амалга оширилишини назорат қилиш ва зарурият туғилганда унга ўзгартиришлар киритиш бўйича таклифлар ишлаб чиқиш вазифасини юклашга келишиб олдилар.

Ушбу Шартнома қоидаларини талқин қилиш ва қўллашда юзага келадиган баҳслар маслаҳатлашувлар ва музокаралар ўтказиш йўли билан ҳал қилинади.

Томонларнинг ўзаро келишувига кўра, мазкур Шартномага ушбу Шартноманинг 7-моддасига мувофиқ кучга кирадиган ва кучга кирган вақтдан бошлаб Шартноманинг ажралмас қисми бўлиб ҳисобланадиган протоколлар билан расмийлаштириладиган ўзгартириш ва қўшимчалар киритилиши мумкин.

Ушбу Шартнома Ўзбекистон Республикаси билан Беларусь Республикаси иштирокчи бўлган бошқа халқаро шартномалардан келиб чиқадиган Томонларнинг ҳуқуқ ва мажбуриятларига дахл қилмайди.

Ушбу Шартнома Томонлардан Шартноманинг кучга кириши учун зарур бўлган давлат ички процедуралари бажарилганини тасдиқловчи охирги ёзма хабарнома олинган санадан бошлаб кучга киради ва 2017 йилнинг 31 декабрига қадар амал қилади.

Томонлардан ҳар бири бошқа Томонга ёзма хабарнома юбориб, ушбу Шартнома амалини тугатиши мумкин.

Бу ҳолда Шартнома бундай ёзма хабарнома олинган санадан бошлаб 6 (олти) ой ўтгач, ўз амалини тугатади.

Ушбу Шартнома амалининг тугатилиши, агар Томонлар ўзгача келишмаган бўлсалар, Дастурга мувофиқ амалга оширилаётган лойиҳаларга дахл қилмайди.

Минск шаҳрида 2008 йил 19 июнда икки нусхада, ҳар бири ўзбек ва рус тилларида тузилди, бунда иккала матн ҳам бир хил кучга эга. Ушбу Шартнома қоидаларини талқин қилишда рус тилидаги матндан фойдаланилади.

Ўзбекистон Республикаси ва Беларусь Республикаси анъанавий иқтисодий шериклар ҳисобланади. Икки мамлакат ҳамкорлиги — Мустақил Давлатлар Ҳамдўстлигида хўжалик алоқаларининг энг муҳим таркибий қисмидир.

Жаҳон хўжалиги глобаллашуви жараёнининг жадал ривожланиши ва шунингдек Ўзбекистон Республикаси билан Беларусъ Республикаси ўртасидаги иқтисодий муносабатларни сифат жиҳатидан янги босқичга ўтказиш зарурати ўзаро манфаатли икки томонлама ҳамкорликнинг узоқ муддатли стратегиясини ишлаб чиқишни талаб қилмоқда.

Ўзбекистон Республикаси билан Беларусь Республикаси ўртасида давлатлараро муносабатлар асослари тўғрисида 1991 йил 6 ноябрдаги Шартнома, Ўзбекистон Республикаси билан Беларусь Республикаси ўртасида савдо муносабатлари тўғрисида 1993 йил 21 январдаги Битим, Ўзбекистон Республикаси билан Беларусь Республикасининг дўстлик ва ҳамкорликни янада мустаҳкамлаш тўғрисида 1994 йил 22 декабрдаги декларацияси бу фаолиятни биргаликда олиб бориш учун асосдир. Мазкур ҳужжатларнинг қоидаларидан келиб чиқиб, Ўзбекистон Республикаси билан Беларусь Республикаси ўртасида 2008 — 2017 йилларга мўлжалланган иқтисодий ҳамкорликнинг ушбу Дастури (бундан кейин — Дастур) ишлаб чиқилди.

Дастурнинг мақсади — икки давлат ўртасида, уларнинг маъмурий-ҳудудий бирликлари ва хўжалик юритувчи субъектлари ўртасида ўзаро манфаатли иқтисодий, илмий-техникавий ва маданий алоқаларни ривожлантиришга қаратилган чоралар, шу жумладан шартномавий-ҳуқуқий хусусиятдаги, мажмуини ишлаб чиқиш, миллий иқтисодиётлар етакчи соҳаларининг ишлаб чиқариш соҳасидаги ҳамкорлигида ютуқларга эришиш, шу асосда ўзаро товар айланишини ўстириш ва шунингдек халқларнинг маънавий-маданий эҳтиёжларини қондириш, соғлом турмуш тарзини шакллантириш ва фаровонлигини ўстиришдир.

Дастур мақсадларини амалга ошириш учун қуйидаги вазифаларни бажариш талаб қилинади:

турли кўринишдаги ва шакллардаги қўшма корхоналар тузиш, ишлаб чиқариш кооперациясини ривожлантириш учун қулай шарт-шароитлар яратиш;

ташқи иқтисодий фаолият соҳасида ахборот базасини яратиш, шу жумладан товарлар ва хизматлар экспорти масалалари бўйича икки давлат кичик ва ўрта бизнес вакиллари ўртасида амалий алоқалар ўрнатиш мақсадида товар ишлаб чиқарувчилар маълумотлар базасини яратиш;

савдо-иқтисодий ва илмий-техникавий масалалар бўйича бир-бирини қизиқтирадиган очиқ ахборот билан алмашиш;

минтақалараро ҳамкорликни ривожлантириш;

маданият, спорт ва туризм соҳаларида манфаатли ҳамкорлик тадбирларини тайёрлаш ва амалга ошириш;

халқаро транспорт коммуникациялари ва алоқасидан самарали фойдаланиш ва ривожлантириш, амалдаги транспорт коридорлари самарадорлигини ошириш ҳамда янгиларини яратиш;

Ўзбекистон Республикаси билан Беларусь Республикаси товар ва фондлар бозорларининг баҳамжиҳат ҳаракат қилиши.

Ўзбекистон Республикаси ва Беларусь Республикаси (бундан кейин — Томонлар) узоқ муддатли иқтисодий ҳамкорликни қуйидаги йўналишлар бўйича ривожлантирадилар:

Томонлар хўжалик юритувчи субъектларига ўзаро манфаатли шароитларни таъминловчи ҳуқуқий база яратиш йўли билан миллий қонунчиликларни яқинлаштириш;

норматив-ҳуқуқий базани уйғунлаштириш ва унинг давлатлараро интеграциялашган тузилмалар ҳамда қўшма корхоналар яратиш бўйича самарали механизмларини ишлаб чиқиш;

зарур статистик ахборот, статистик нашр ва эълонлар, методологик материаллар ва ишланмалар, дастурлар ва шунингдек статистик кузатишлар, рўйхатга олиш, текширишлар ўтказиш тажрибаси билан алмашиш, ташқи савдо статистикасини шакллантириш принципларини келишиб олиш;

ноинсоф хўжалик юритувчи субъектларнинг фаолиятига ва сифатсиз товарларнинг иккала давлат ҳудудларига киришига йўл қўймаслик чора-тадбирларини кўриш;

икки томонлама ҳамкорликнинг шартномавий-ҳуқуқий базасими кенгайтириш;

миллий ва халқаро кўргазмалар, ярмаркалар, семинарлар, конференциялар ҳамда ахборот алмашиш ва амалий алоқалар ўрнатиш бўйича чора-тадбирлар ўтказиш;

Ўзбекистон Республикаси ҳудудида фойдали қазилмалар захираларини биргаликда ўзлаштириш, табиатдан фойдаланишда иқтисодий усулларни ривожлантириш, экологик тоза ресурсларни тежайдиган технологиялардан ўзаро фойдаланиш ва алмашишга кўмаклашиш, бу мақсадларда илмий-тадқиқот, геологик ва технологик ишлар олиб бориш.

Томонлар ўртасида савдо ҳамкорлигини ривожлантириш ва чуқурлаштириш давлатлар ўртасида қўлланиладиган эркин савдо режими доирасида ва шунингдек ЕврАзЭС доирасида қабул қилинаётган мажбуриятларга мувофиқ амалга оширилади, бунда халқаро савдонинг умумэътироф этилган принциплари ва қоидаларига босқичма-босқич ўтиш ҳисобга олинади.

Божхона сиёсатини олиб бориш, транспорт воситалари, товарлар ва йўловчилар ҳаракати, божхона назоратини оптималлаштириш учун қулай шароитлар яратиш соҳасида божхона ва бошқа органларнинг икки томонлама тартибга солувчи ҳужжатлар ва ЕврАзЭС доирасида қабул қилинган ҳужжатлар асосида баҳамжиҳат ҳаракатини қуйидаги йўналишлар бўйича аста-секин ва изчил ривожлантириш кутилмоқда:

товарларнинг транзити учун қулай шароитлар яратиб бориш, транзит юк ташишда божхона процедураларини соддалаштириш;

божхона қонунчиликларини бузишга қарши курашиш бўйича, хусусан наркотик воситалар, психотроп моддалар, прекурсорлар, ўқотар қуроллар, ўқ-дорилар, портловчи ва заҳарли моддаларни, шунингдек, аҳоли саломатлиги ва атроф-муҳит учун хавфли бўлган радиоактив материалларни ноқонуний ташишга барҳам бериш соҳасида келишилган чоралар кўриш;

божхона ишини дастурий таъминлашни такомиллаштириш;

акцизланадиган товарлар ўтказилиши устидан божхона назоратини ташкил этишга келишилган ёндашувлар ишлаб чиқиш;

интеллектуал мулк объектига оид маҳсулотни етказиб беришда божхона назоратини такомиллаштириш.

Томонлар табиий ва техноген хусусиятидаги фавқулодда вазиятларнинг олдини олиш ва уларнинг оқибатларини бартараф этиш, ёнғин, саноат ва радиация хавфсизлиги, аҳолини ва ҳудудларни табиий ва техноген хусусиятидаги фавқулодда вазиятлардан ҳимоя қилиш, шу соҳадаги фаолиятни норматив-ҳуқуқий жиҳатдан тартибга солишни такомиллаштириш, янги технологияларни ишлаб чиқиш ва жорий қилиш, шу соҳада бир-бирига рухсат бериш ёки бошқа йўналишлар бўйича ҳамкорликни ривожлантирадилар.

Дастур Томонлар давлат бошқарув органлари ва хўжалик юритувчи субъектларининг Дастурни амалга ошириш бўйича Тадбирларда белгиланадиган аниқ вазифаларни бажариш воситаси билан амалга оширилади, бу тадбирлар Дастурнинг ажралмас қисми бўлиб ҳисобланади.

Ушбу Дастурни бажариш мақсадида Ўзбекистон Республикаси ва Беларусь Республикаси ўртасида икки томонлама ҳамкорлик бўйича Ҳукуматлараро қўшма комиссия доирасида аниқ масалаларни ҳал қилиш учун ишчи гуруҳлари тузилади.

Ишчи гуруҳлар ўз фаолиятининг натижалари тўғрисида Ўзбекистон Республикаси ва Беларусь Республикаси ўртасида икки томонлама ҳамкорлик бўйича Ҳукуматлараро қўшма комиссия мажлисларида маълумот берадилар.