Ўзбекистон Республикаси Ҳукумати ва Беларусь Республикаси Ҳукумати, кейинги ўринларда «Аҳдлашувчи Томонлар» деб аталади,

Ўзбекистон Республикаси билан Беларусь Республикаси ўртасида давлатлараро муносабатларнинг асослари тўғрисида 1991 йил 6 ноябрда имзоланган Шартнома қоидаларига амал қилиб,

Ўзбекистон Республикаси билан Беларусь Республикаси ўртасидаги савдо-иқтисодий ҳамкорликни тенглик ва ўзаро фойдалилик асосида ривожлантиришга интилиб,

ҳар бир давлатнинг мустақил ташқи иқтисодий сиёсат ўтказиш ҳамда тегишли халқаро мажбуриятларни бажаришни ва эълон қилинган мақсадларни рўёбга чиқаришни таъминлашдан иборат суверен ҳуқуқидан келиб чиқиб,

қуйидагилар тўғрисида аҳдлашиб олдилар:

1. Ўзбекистон Республикаси билан Беларусь Республикаси ўртасидаги савдо муносабатлари эркин савдо тартибида амалга оширилади.

Аҳдлашувчи Томонлар Аҳдлашувчи Томонлардан бирининг бож олиш ҳудудидан чиқувчи ва иккинчи Аҳдлашувчи Томоннинг бож олиш ҳудуди учун мўлжалланувчи бир хил ҳаракатга эга бўлган товарларнинг экспорти ёки импортига бож тўловларини, солиқлар, шунингдек, ҳар қандай йиғимларни жорий қилмайдилар. Товарларнинг келишилган номенклатураси бўйича савдо тартибига киритилиши мумкин бўлган истиснолар ушбу Битимнинг ажралмас қисми бўлган ҳар йилги икки томонлама ҳужжатлар билан расмийлаштирилади.

2. Аҳдлашувчи Томонлар мазкур Битимнинг таркибий қисми бўлувчи алоҳида ҳужжатда товарларнинг келиб чиқишини аниқлашнинг батафсил қоидаларини ишлаб чиқишга келишдилар.

Аҳдлашувчи Томонлар:

мазкур Битимнинг кучи амал қиладиган товарларни импорт ёки экспорт қилишга нисбатан шундай вазиятда айнан шундай ички ишлаб чиқарилган товарларга ёки учинчи мамлакатларда ишлаб чиқарилган товарларга қўлланилмайдиган қандайдир махсус чеклашларни ёки талабларни жорий қилмайдилар;

Аҳдлашувчи Томонларнинг бирига тегишли бўлган товарларни омборларга жойлаш, юклаш-тушириш, сақлаш, ташиш, шунингдек, тўловлар ва тўловларни кўчиришга нисбатан шундай вазиятларда ўз товарларига ёки учинчи мамлакатларда ишлаб чиқарилган товарларга нисбатан қўлланиладиган бошқача қоидаларни қўлламайдилар.

Аҳдлашувчи Томонлар миқдорий чеклашларни қўллаш муносабати билан пайдо бўлувчи барча масалаларни маслаҳатлашувлар йўли билан ҳал қилишга интиладилар.

Аҳдлашувчи Томонларнинг ҳар бири товарларни қайта экспорт қилишга йўл қўймайдилар.

Бундай товарларни учинчи мамлакатларга қайта экспорт қилиш фақат мазкур товарларни ишлаб чиқарувчи мамлакат ҳисобланувчи давлат ваколатли органининг ёзма розилиги билан ва у белгилайдиган шартларда амалга оширилиши мумкин.

Мазкур модданинг мақсадлари учун қайта экспорт деганда ишлаб чиқарилган товарни Аҳдлашувчи Томонлардан бирининг бож олиш ҳудудидан иккинчи Аҳдлашувчи Томоннинг учинчи мамлакатга экспорт қилиш мақсадида ўз бож олиш ҳудудидан олиб чиқиб кетиши тушунилади.

Аҳдлашувчи Томонлар мунтазам асосда бож масалалари, шу жумладан, бож статистикаси юзасидан тўла ҳажмда ахборот алмашиб турадилар. Аҳдлашувчи Томонларнинг тегишли ваколатли органлари бундай ахборотни алмашлаш тартибини келишиб оладилар.

Аҳдлашувчи Томонлар учинчи мамлакатлар билан савдо-сотиқда қўлланиладиган бож тўловлари ставкалари даражаларини яқинлаштириш чораларини кўрадилар ва шу мақсадда мунтазам маслаҳатлашувлар ўтказиб турадилар.

Аҳдлашувчи Томонлар инсофсизлик билан қилинган, жумладан, қуйидагиларда намоён бўлувчи амалий ишни мазкур Битим мақсадларига мос эмас деб ҳисоблайдилар:

корхоналар, уларнинг Аҳдлашувчи Томонларнинг ҳудудида рақобатга халақит бериш ёки чеклашни ёхуд унинг учун шарт-шароитни барбод этишни мақсад қилиб қўйган бирлашмалари ўртасида шартномалар тузишда;

бир ёки бир неча корхонанинг ўз устунлик мавқеидан фойдаланиб, Аҳдлашувчи Томонлар ҳудудининг барча ёки катта қисмида рақобатни чеклаб қўядиган хатти-ҳаракатларни қилишда.

Аҳдлашувчи Томонлар транзит эркинлиги қоидасига риоя қилиш мазкур Битим мақсадларига эришишнинг муҳим шарти эканлигига ҳамда уларнинг халқаро меҳнат тақсимоти ва кооперацияси тизимига қўшилиши жараёнининг асосий элементи ҳисобланишига розидирлар.

Шу муносабат билан ҳар бир Аҳдлашувчи Томон иккинчи Аҳдлашувчи Томоннинг ёки учинчи мамлакатнинг бож олиш ҳудудида ишлаб чиқарилган ҳамда бошқа Аҳдлашувчи Томоннинг ёки исталган учинчи томоннинг бож олиш ҳудуди учун мўлжалланган товарларни ўз ҳудуди орқали тўсиқсиз олиб ўтишни таъминлайди, экспортчиларга, импортчиларга ёки ташувчиларга транзитни таъминлаш учун барча мавжуд бўлган ва зарур воситалар ва хизматларни ўз экспортчиларига, импортчиларига ёки ташувчиларига ёхуд исталган учинчи мамлакатнинг экспортчиларига, импортчиларига ёки ташувчиларига айнан шу воситалар ва хизматларни берадиганидан ёмон бўлмаган шартларда беради.

Транспортнинг исталган туридаги транзит учун тарифлар, шу жумладан, тушириш-юклаш ишлари учун тарифлар иқтисодий асосланган бўлади ва Аҳдлашувчи томонлар товарларни омборларга жойлаш, юклаш-тушириш, сақлаш ва ташиш хизматлари ҳақини исталган учинчи давлатнинг валютасида тўлашни талаб қилмайдилар.

Мазкур Битим қоидалари Аҳдлашувчи Томонлар ўртасида илгари тузилган битимлар қоидаларини кейинги қоидалар биринчиларига қанчалик номослиги ёки улар билан айнанлиги даражасига қараб ўзгартиради. Аҳдлашувчи Томонлар ўз ваколатли органларига мазкур масала бўйича тегишли протокол тайёрлашни топширадилар.

Мазкур Битимдаги ҳеч бир нарса Аҳдлашувчи Томонларнинг учинчи давлатлар билан, шунингдек, уларнинг бирлашмалари ва халқаро ташкилотлар билан бўлган мазкур Битимнинг мақсадлари ва шартларига зид келмайдиган муносабатларини амалга оширишга монелик қилмайди.

Аҳдлашувчи Томонлар ўртасидаги мазкур Битим қоидаларини талқин қилиш ёки қўлланишга доир баҳслар музокаралар йўли билан ҳал этилади.

Аҳдлашувчи Томонлар шунга келишдиларки, улар ўз савдо ваколатхоналари билан алмашишлари мумкин.

Ҳар қандай давлат, мазкур Битимга, қўшиладиган давлат билан Аҳдлашувчи Томонлар ўртасида келишиб олинадиган шартларда, қўшилиши мумкин.

Мазкур Битим Аҳдлашувчи Томонларнинг бунинг учун зарур бўлган давлат ичидаги аъмолларни бажарганликлари тўғрисидаги хабарномаларни алмашишган пайтдан бошлаб кучга киради ҳамда унинг муддати Аҳдлашувчи Томонлардан бири бошқа Аҳдлашувчи Томонга Битимнинг амал қилишини тўхтатиш мақсади ҳақида ёзма хабарнома юборган пайтдан бошлаб олти ой ўтгунга қадар ҳар йили автоматик равишда узайтирилади.

Битим 1993 йил 21 январда Минск шаҳрида ҳар бири ўзбек, беларусь ва рус тилларида бўлган иккита нусхада тузилди, бунда учала матн бир хил кучга эгадир.

Мазкур Битимнинг бирор бир моддасини талқин қилишда келишмовчиликлар пайдо бўлган тақдирда рус тилидаги матн маълумот матни ҳисобланади.