Ўзбекистон Республикаси Президентининг 1998 йил 28 октябрдаги ПФ-2100-сон Фармони (Ўзбекистон Республикаси Олий Мажлиси Ахборотномаси, 1998 й., 10-11-сон, 203-модда) ижросини таъминлаш ҳамда туман ҳудудидаги тўй-ҳашамлар, оилавий тантаналар, маърака ва маросимлар, шуҳратпарастлик, дабдабабозлик ва исрофгарчилик билан ўтказилиши кенг жамоатчиликни ташвишга солаётганлиги сабабли бундай ҳолатларга чек қўйиш, фуқаролар соғлиғи ва хавфсизлигини таъминлаш мақсадида, Ўзбекистон Республикасининг «Маҳаллий давлат ҳокимияти тўғрисида»ги Қонуни (Ўзбекистон Республикаси Олий Кенгашининг Ахборотномаси, 1993 й., 9-сон, 320-модда) 6-моддасига асосан қарор қиламан:

1. Туман хотин-қизлар қўмитаси, «Маҳалла» хайрия жамоат фонди туман бўлими, «Нуроний» жамғармаси туман бўлими, Маънавият-тарғибот маркази туман бўлими, нодавлат нотижорат ташкилотлари ва фуқароларнинг ўзини-ўзи бошқариш органлари билан биргаликда тўй-ҳашам, маросим ва оилавий тадбирларни ўтказишни мувофиқлаштирувчи Жамоатчилик Кенгашини тузиш таклифлари маъқулланиб, иловага* мувофиқ тасдиқлансин.

2. Туман хотин-қизлар қўмитаси (Ш. Рахмонова), «Маҳалла» хайрия жамоат фонди туман бўлими (Б. Маматов), «Нуроний» жамғармаси туман бўлими (Б. Эргашев), Маънавият тарғибот маркази туман бўлими (Ш. Тоғаева) ва тумандаги барча ҚФЙ ва МФЙ раисларига:

жамоатчилик Кенгашининг мақсад ва вазифаларини белгилаб, ўтказиладиган тўй-ҳашам, маросим, оилавий тантаналар ва бошқа тадбирларни ўтказиш ҳолати юзасидан жамоатчилик назоратини ўрнатиш ҳамда тўй ва маросим эгалари билан ихчам, исрофгарчиликсиз ва белгиланган талаблар асосида ўтказиш бўйича тушунтириш ишларини олиб бориш;

кенг жамоатчилик вакилларини жалб қилган ҳолда тўй-ҳашамлар, оилавий тантаналар, маърака ва маросимлар, марҳумлар хотираларига бағишланган тадбирларни тартибга солиш ҳамда ихчам ва миллий қадриятлар асосида ўтказиш бўйича таклифларни ишлаб чиқиб, тарғибот қилиш орқали жамият ҳаётига татбиқ этиш;

тўй-ҳашамлар, оилавий тантаналар ва маросимларни ўтказиш бўйича жамоатчилик фикрини инобатга олмайдиган фуқароларни маҳалла фуқаролар йиғинига таклиф қилиш, ушбу масалани маҳалла ва меҳнат жамоасида муҳокама этиш, таъсир чорасини кўриш ва тушунтириш ишларини ўтказиш тизимини яратиш бўйича ишларни амалга ошириш тавсия этилсин.

3. Туман бош имом-хатиби (Ф. Мухторов) ва тумандаги барча ҚФЙ ва МФЙ раисларига:

тўй-ҳашамлар, оилавий тантаналар, маърака ва маросимлар, марҳумлар хотираларига бағишланган тадбирларни ихчам ўтказишни, дабдабали ўтказилаётган тадбирларга сарфланаётган маблағларни кам таъминланган оилаларни моддий қўллаб-қувватлашга йўналтиришни тарғиб қилиш;

диний ташкилотлар, имом-хатиблар тўйлар ва маросимлардаги маърузаларида аҳолининг эътиборини ёшлар тарбияси, ота-онанинг масъулияти, жамият ҳаётига хавф солаётган таҳдидларнинг олдини олиш, тинчлик ва мустақиллик неъматини асраш каби масалаларга қаратиши тавсия этилсин.

4. Тумандаги давлат бошқаруви органлари, корхона, ташкилот ва муассасаларда меҳнат унумдорлигини сақлаш мақсадида ресторан, ошхона, кафе ва тўйхоналарда иш кунлари тўй ва маросим муносабати билан соат 07.00 дан 09.00 гача ёки 12.00 дан 14.00 гача ош бериш ва аксинча иш вақтида соат 09.00 дан 12.00 гача, 14.00 дан 18.00 гача ош беришни таъқиқлаш, ҳамда соат 23.00 дан кейин тўй ва базмларни давом эттириш ҳолатларининг олдини олиш бўйича жамоатчиликнинг таклифлари қўллаб-қувватлансин.

5. Туман Давлат солиқ инспекцияси (Ш. Эрдонаев)га:

ресторан, ошхона, кафе ва тўйхоналарда тўй-ҳашам ва турли маросимларни ўтказишда пластик карточкалар, нақд пул ўтказиш йўли ва банк кредити орқали ўтказиладиган тўловларни қабул қилишда ҳеч қандай чекловларсиз, бир хил белгиланган нархларда амалга оширилиши назоратга олинсин.

6. Туман Ички ишлар бўлими (А. Юлдошев)га:

барча ресторан, ошхона, кафе ва тўйхона эгалари тўй ва маросимларда фуқаролар ҳаётига хавф солувчи техникалар, кўргазмалар ва пиротехникадан фойдаланмаслик ҳамда тўйхона атрофида яшовчи аҳолининг тинчлиги бузилмаслиги учун тўй-ҳашамдан сўнг шовқинли ҳолатлар бўлмаслигини таъминлаш бўйича;

тўй-ҳашам муносабати билан келин-куёв ва уларнинг яқинлари туман ҳудудида айланиши ва суратга олиши жараёнида фуқаролар ҳамда йўл ҳаракати хавфсизлигига қатъий риоя этилишини назорат қилиш бўйича, шунингдек мазкур турдаги тадбирларни тантанали ўтказишга жалб қилинадиган автомашиналар сонини 4 тадан ошмаган миқдорда бўлишини таъминлаш юзасидан чора-тадбирлар белгиласин.

7. Туман Маданият ва спорт ишлари бўлими (А. Рахматов)га:

тўйлар ва базмларда санъаткорлар иштироки ва уларнинг кийиниш маданиятига риоя қилиниши, шунингдек хонанда ва раққосаларни Ўзбекистон Республикаси Вазирлар Маҳкамасининг 2003 йил 11 ноябрдаги 498-сон қарори билан тасдиқланган «Концерт-томоша фаолиятини лицензиялаш тўғрисида»ги низом (Ўзбекистон Республикаси қонун ҳужжатлари тўплами, 2003 й., 31-сон, 380-модда) талабларига мувофиқ тўй, юбилей ва бошқа тантаналарга хизмат кўрсатиш лицензияси мавжудлиги назоратга олинсин ва раққосалик касбига номуносиб бўлган қиз-жувонларнинг тўй-ҳашам ва базмларга раққоса номи остида чиқиши қатъий чеклансин.

8. Туман Хотин-қизлар қўмитаси (Ш. Рахмонова), «Маҳалла» хайрия жамоат фонди туман бўлими (Б. Маматов), «Нуроний» жамғармаси туман бўлими (Б. Эргашев), Маънавият тарғибот Маркази туман бўлими (Ш. Тоғаева), «Kesh» газетаси (С. Примов) ҳамда тумандаги маҳалла ва қишлоқ фуқаролар йиғини раислари, диний ташкилотлар имом-хатибларига ушбу қарорнинг мазмун-моҳиятини аҳоли ва кенг жамоатчилик ўртасида кенг тарғиб қилиш ва оммавий ахборот воситаларида ёритиб бориш тавсия этилсин.

9. Мазкур қарор назоратга олинсин.

10. Ушбу қарор нусхаси тумандаги барча ресторан, ошхона, кафе ва тўйхона эгаларига етказилсин ҳамда ижросини тўлиқ назорат қилиш туман ҳокими ўринбосарлари З. Халилов ва Ш. Рахмоновалар зиммасига юклатилсин.

11. Мазкур қарор «Kesh» газетасида расман эълон қилинган кундан эътиборан кучга киради.