Вилоят ҳудудида ҳайвонлар касалликларини тарқалишини олдини олиш, аҳоли истеъмоли учун чорвачилик маҳсулотлари билан таъминлашда унинг хавфсизлигини таъминлаш, шунингдек юзага келиши мумкин бўлган фавқулодда ҳолатларни ўз вақтида олдини олиш ҳамда масъул шахсларнинг жавобгарлигини ошириш мақсадида, Ўзбекистон Республикасининг «Ветеринария тўғрисида»ги Қонуни (Ўзбекистон Республикаси Олий Кенгашининг Ахборотномаси, 1993 й., 9-сон, 335-модда), Ўзбекистон Республикаси «Маъмурий жавобгарлик тўғрисида»ги кодекс (Ўзбекистон Республикаси Олий Мажлисининг Ахборотномаси, 1995 й., 9-сон, 193-модда)нинг 6-моддаси ҳамда Ўзбекистон Республикаси «Маҳаллий давлат ҳокимияти тўғрисида»ги Қонуни (Ўзбекистон Республикаси Олий Кенгашининг Ахборотномаси, 1993 й., 9-сон, 320-модда)нинг 6-моддасига асосан қарор қиламан:

1. Вилоят ҳудудида ҳайвонларни карантинга қўйиш қоидалари иловага мувофиқ тасдиқлансин.

2. Туман ва шаҳарлар ҳокимлари, вилоят давлат Ветеринария бошқармаси (Имомов), мулкчилик шаклидан қатъи назар, ҳайвонларни парвариш қилаётган аҳоли, ёрдамчи, деҳқон ва чорвачиликка ихтисослаштирилган фермер хўжаликлари ҳамда корхона, ташкилотлар раҳбарларига:

вилоят ҳудудига киритилган барча турдаги ҳайвонлар, ҳудудий давлат ветеринария хизмати назорати остида керакли ташхис текширувлари ўтказилишини;

аниқ ҳудуд учун тузилган эпизоотик касалликларга қарши тадбирлар режасига биноан, касалликларни олдини олиш бўйича иммунитетни кўтарувчи барча чоралар кўрилишини;

карантин вақтида ҳайвонларнинг ҳар бир бошини тана ҳароратини ўлчаш билан бирга, клиник кўрикдан ўтказилиши ҳамда ушбу муддатда белгиланган ветеринария-санитария тадбирлари ўтказилгандан кейингина сотилиши ёки тарқатилиши йўлга қўйилишини;

зоогигиена талабларига мувофиқ ҳайвонларнинг тегишли тартибда сақланиши ва озиқлантирилишини, шунингдек уларни сақлаш бўйича мавжуд йўриқнома, қўлланма ва кўрсатмалар асосида мажбурий даволаш, касалликнинг олдини олиш тадбирлари ўз вақтида ўтказилишини;

давлат ветеринария хизматининг талабига биноан, ҳайвонларни текшириш учун кўрсатиш, диагностик текшириш, даволаш ва профилактик тадбирларни ўтказиш ҳамда уларни рўйхатга олинишини таъминлаб, янги ҳайвон сотиб олинганлиги тўғрисида, ҳайвонларнинг тўсатдан ўлиши, касалланиши ёки уларда ғайритабиий ҳолатлар пайдо бўлган ҳолларда дарҳол хабар беришни таъминласинлар.

3. Вилоят Ички ишлар бошқармаси (Қурбонов), Вилоят давлат Ветеринария бошқармаси (Имомов), Бозорлар ва савдо комплекслари фаолиятини назорат қилиш Бош бошқармаси Қашқадарё вилоят бўлими (Мирзаев), «Қашқадарё бозорсавдо» уюшмаси (Игамбердиев) билан биргаликда мол бозорларига сотишга олиб келинган ҳайвонларни соғлиғи ва юқумли касалликларга эмланганлиги тўғрисидаги ветеринария врачининг белгиланган тартибда расмийлаштирилган маълумотномаси асосида сотишга рухсат этилиши устидан назоратни кучайтирсинлар.

4. Вилоят давлат Ветеринария бошқармаси (Имомов), Вилоят давлат Санитария ва эпидемиология назорати маркази (Бўриев) қишлоқ хўжалик ҳайвонларини уй шароитида боқилишида аҳолини тозаликка ва ветеринария-санитария қоидаларига .риоя қилиш бўйича маданиятини ошириш юзасидан тарғибот ва ташвиқот ишларини кенг кўламда олиб борсинлар.

5. Вилоят Молия бошқармаси (Қулматов), Вилоят давлат Ветеринария бошқармаси (Имомов) билан биргаликда жойлардаги ветеринария бўлимлари ва лабораторияларининг моддий-техника базасини замонавий асбоб-ускуналар, автотранспорт воситалари билан босқичма-босқич жиҳозлаб, мустаҳкамлаб бориш бўйича тегишли чораларни кўрсинлар.

6. Вилоят Ўрта махсус касб-ҳунар таълими бошқармаси (Қобилов), Вилоят давлат Ветеринария бошқармаси (Имомов) билан биргаликда ветеринария соҳаси бўйича кадрлар билан таъминланганлик масаласини ўрганиб чиқиб, ўрганиш натижаси асосида кадрларни салоҳиятига кўра иш билан таъминлаш ва уларнинг касбий маҳоратини ошириш бўйича ўқув амалий семинарларини ўтказсин.

7. Ветеринария тўғрисидаги қонун ҳужжатлари бузилишида айбдор бўлган шахслар Ўзбекистон Республикасининг қонун ҳужжатларига мувофиқ интизомий, моддий, маъмурий ва жиноий жавобгар бўлишлари таъкидлаб ўтилсин.

8. Мазкур қарорнинг ижросини назорат қилиш вилоят ҳокимининг ўринбосари Б. Ражапов зиммасига юклатилсин.

9. Мазкур қарор «Қашқадарё» ва «Новости Кашкадарья» газеталарида эълон қилинсин ҳамда ҳокимликнинг qashqadaryo.uz расмий веб-сайтига жойлаштирилсин.

10. Ушбу қарор расмий эълон қилинган кундан эътиборан кучга киради.

1. Мазкур қоидалар вилоят ҳудудида ҳайвонларнинг юқумли касалликлари тарқалганида ҳайвонларни карантинга қўйишнинг бошқа ветеринария-санитария чораларини кўриш тартибини белгилайди.

2. Мазкур қоидалар Ўзбекистон Республикаси Қишлоқ ва сув хўжалиги вазирлиги Давлат Ветеринария Бош бошқармаси томонидан 1998 йил 28 августда тасдиқланган «Ҳайвонлар касалликларига қарши кураш тадбирлари ҳақида»ги қўлланмаларга асосан амалга оширилади.

3. Мулкчилик шаклидан қатъи назар, барча турдаги хўжаликлар, шунингдек ҳайвон ва чорвачилик маҳсулотларининг эгалари томонидан олиб келинаётган моллар тегишли ҳудудий давлат ветеринария бўлимларининг назорати остида 30 кунлик профилактик карантинда сақланади ҳамда шу даврда серологик усулда бруцеллёзга текширилади.

4. Давлат ветеринария бошқармаси ва унинг ҳудудий бўлинмалари томонидан якка тартибдаги тадбиркорлар томонидан гўшт ва сут маҳсулотларини белгиланмаган жойларда ҳамда келиб чиқиши ва сифатини тасдиқловчи ҳужжатларсиз сотилиши устидан назорат ишлари амалга оширилади.

5. Мулкчилик шаклидан қатъи назар, барча турдаги хўжаликлар, шунингдек ҳайвон ва чорвачилик маҳсулотларининг эгалари мазкур қоида ва тартиб билан боғлиқ қонун ҳужжатлари ижроси юзасидан қуйидаги ҳуқуқларга эга:

ветеринария хизмати кўрсатилиши учун давлат, идоравий ва хусусий ветеринария хизматлари билан шартномалар тузиш;

ветеринария хизматидан ҳайвонларнинг касалликка чалиниш даражаси, эпизоотик вазият ва ҳайвонлар ҳамда чорвачилик маҳсулотларини махсус тадқиқ этиш натижалари ҳақида ахборотлар олиш;

Ўзбекистон Республикаси Қишлоқ ва сув хўжалиги вазирлиги ҳузуридаги Давлат ветеринария бош бошқармаси белгилаган тартибда ҳайвонлар ва чорвачилик маҳсулотлари, ем-хашак, ветеринария дори-дармонлари сотиб олиш ва сотиш, шу жумладан хориждан сотиб олиш ва хорижга сотиш;

маҳаллий ҳокимият органлари, давлат, идоравий ветеринария хизматлари ҳамда хусусий ветеринария фаолияти билан шуғулланаётган мутахассисларнинг ғайриқонуний хатти-ҳаракатлари ва кўрсатмалари устидан шикоят қилиш ҳуқуқига эгадирлар.

6. Мулкчилик шаклидан қатъи назар, барча турдаги хўжаликлар, шунингдек ҳайвон ва чорвачилик маҳсулотларининг эгалари ушбу қоидалар ва тартиб билан боғлиқ қонун ҳужжатлари ижроси юзасидан қуйидагиларни таъминлайди:

ўз маблағлари ҳисобига ҳайвонлар юқумли касалликларга чалинишининг олдини олишга қаратилган ташкилий-хўжалик ва ветеринария тадбирларини амалга оширишлари, бюджетдан молиявий таъминланадиган тадбирлар бундан мустасно;

касал ҳайвонни даволатишлари, зарур бўлганда ветеринария мутахассисининг кўрсатмасига биноан сўйиш ёки йўқ қилиб ташланишини таъминлашлари;

истеъмолчилар соғлиғи учун хавфли бўлган моддалар ёки юқумли касаллик қўзғатувчи микроблар билан ифлосланган ёхуд зарарланган чорвачилик маҳсулотлари ишлаб чиқарилиши ва сотилишини истисно этувчи ҳайвонлар гигиенаси нормаларини бажаришлари ва ветеринария-санитария қоидаларига риоя этишлари;

ҳайвон сотиб олинганлиги ва уларнинг тўсатдан ҳаром ўлиши ёки ғайриодатий хатти-ҳаракати ҳоллари тўғрисида муайян ҳудудга хизмат кўрсатувчи тегишли ветеринария хизматига зудлик билан хабар қилишлари;

ветеринария хизматининг ҳайвонларни юқумли касалликлардан муҳофаза этиш юзасидан берган тақдимномаларини бажаришлари ҳамда карантинга доир тегишли тадбирлар ва бошқа ветеринария тадбирлари ўтказилишини таъминлашлари, шунингдек даволаш-профилактика ишловларини тўлиқ ҳажмда ўтказишлари;

чорвачилик фермаларини, ҳайвонлар ҳамда чорвачилик маҳсулотлари сақланадиган бинолар ва бошқа иншоотларни, шунингдек яйловлар, сув ҳавзалари, мол ҳайдаб ўтиладиган йўллар, темир йўл бекатлари, кўргазмалар, ярмаркалар, бозорлар, сўйиш пунктлари, майдончалар, гўшт комбинатлари, сепаратор бўлимлари, сут пунктлари ва заводларини лозим бўлган ветеринария- санитария ҳолатида сақлашлари, уларда дезинфекциялаш, дезинсекциялаш ва дератизациялаш ишларини ўз вақтида ўтказишлари, шунингдек ўлган ҳайвонлар жасадини йиғиштириб олишлари ва йўқ қилиб ташлашлари;

ҳайвонлар ҳамда чорвачилик маҳсулотлари ва хом ашёси савдо сотиғини фақат давлат ветеринария хизматининг рухсати билан махсус ажратилган жойларда ветеринария-санитария қоидаларига риоя этган ҳолда амалга оширишлари;

ветеринария мутахассисларининг талабига биноан ҳайвонларни кўрикдан, диагностик текширувдан, эҳтиёти шарт йўсинида эмлашдан ва даволаш-профилактика ишловларидан ўтказиш учун топширилишини таъминлашлари, ветеринария ходимларига кўрсатилган ветеринария хизматлари эвазига ҳақ тўлаган ҳолда ветеринария тадбирларини ўтказиш учун зарур шарт- шароит яратиб беришлари;

юқумли касалликларнинг пайдо бўлиши ёки чорва маҳсулотларининг яроқсизлиги ҳайвон эгаларининг айби билан пайдо бўлганлиги суд томонидан исботланган ҳолларда соғломлаштириш тадбирларига кетган харажатларни давлат ветеринария хизматига тўлашлари;

Ўзбекистон Республикаси Қишлоқ ва сув хўжалиги вазирлиги ҳузуридаги Давлат ветеринария бош бошқармаси томонидан тасдиқланмаган биопрепаратлар, дори-дармонлар, озуқабоп қўшимчалар, микроэлементлар, биологик кучайтиргичлар ва гормонларни чорвачиликда қўлламасликлари;

Ўзбекистон Республикаси Қишлоқ ва сув хўжалиги вазирлиги ҳузуридаги Давлат ветеринария бош бошқармаси томонидан белгиланган ветеринария-санитария талабларига ҳамда ҳайвонлар, ҳайвонотга мансуб маҳсулотлар ва хом ашё ҳамда ем-хашакни чет элдан сотиб олиш ва чет элга чиқариш талабларига риоя этишлари шарт.

7. Вилоят ҳудудида ҳайвонларнинг юқумли касалликлари тарқалганида юқоридаги қўлланма талабларига асосан тегишли чоралар кўрилади.

8. Ҳайвонларнинг юқумли касалликлари тарқалгани аниқланган ҳолларда туман (шаҳар) давлат ветеринария инспекторининг тақдимномасига биноан маҳаллий ҳокимият органларининг қарорлари билан айрим подалар, отарлар, уюрлар, қўралар, фермалар, хўжаликлар, корхоналар, темир йўл бекатлари, аэропортлар, дарё портлари, қишлоқ ва қўрғонларнинг ҳудудлари ҳайвонларнинг юқумли касалликлари тарқалганлиги жиҳатидан ёмон аҳволда деб эълон қилинади ҳамда уларда карантин ёки зарур чеклашлар ўрнатилади.

9. Туманларни, шаҳарларни ҳайвонларнинг юқумли касалликлари тарқалганлиги жиҳатидан ёмон аҳволда деб эълон қилиш ҳамда уларда карантин ёки бошқа чеклашлар ўрнатиш тегишли бош давлат инспекторларининг тақдимномасига биноан амалга оширилади.

10. Ҳайвонларни юқумли касалликлар билан оғриши батамом тўхтаганидан кейин карантин ёки чеклашлар ўрнатилган ҳудудда зарур ветеринария-санитария тадбирлари амалга оширилгандан (касалликларга қарши кураш қўлланмаларида кўрсатилган муддат ўтганидан) сўнг тегишли бош давлат ветеринария инспекторларининг тақдимномасига биноан карантин ёки чеклашлар ўрнатган туман, шаҳар ҳокимиятининг вакиллик органлари ёки ҳокимларнинг қарорлари билан карантин ёки чеклашлар бекор қилинади.

11. Тарқалиши оқибатида карантин ёки чеклашлар белгиланадиган ҳайвонларнинг юқумли касалликлари рўйхати Ўзбекистон Республикаси Қишлоқ ва сув хўжалиги вазирлиги ҳузуридаги Давлат ветеринария бош бошқармаси томонидан тасдиқланади.

12. Ҳайвонлар ялпи касалланиши ҳамда нобуд бўлишининг олдини олиш ва бартараф этиш юзасидан корхоналар, муассасалар, ташкилотлар ва айрим шахслар фаолиятига кундалик раҳбарлик қилиш ҳамда бу борадаги ишни мувофиқлаштириш мақсадида вилоят, шаҳар ва туман ҳокимиятининг вакиллик органлари ёки ҳокимлар томонидан ўзининг тасдиқланган Низомига мувофиқ иш олиб борувчи эпизоотик касалликларга қарши фавқулодда комиссиялар тузилади.

13. Мазкур қоидалар талабларини бузган шахслар қонун ҳужжатларида белгиланган тартибда жавобгар бўладилар.