Ўзбекистон Республикаси Давлат Статистика қўмитаси томонидан 2013 йилнинг 1 январь ҳолатига тайёрланган маълумотлар бўйича амалга оширилган хатлов натижасига кўра туман ҳудудида номлари «Географик объектларнинг номлари тўғрисида»ги Ўзбекистон Республикаси Қонунининг 4-моддаси талабларига мос келмайдиган маъмурий-ҳудудий бирликлар аниқланган.

Жумладан, туманда 13 та маҳалла фуқаролар йиғини номлари Қонунга, 31 та кўчаларнинг номлари миллий ғоя ва менталитетимизга мос келмайди.

Тумандаги маҳалла фуқаролар йиғинларининг таклифларини кўриб чиқиб, Ўзбекистон Республикаси «Географик объектларнинг номлари тўғрисида»ги Қонунининг 10-моддасига (Ўзбекистон Республикаси қонун ҳужжатлари тўплами, 2011 й., 41-сон, 448-модда) асосан халқ депутатлари Ургут туман Кенгаши қарор қилади:

1. Ўзбекистон Республикасининг «Географик объектларнинг номлари тўғрисида»ги Қонуни талабларига мос келмайдиган объектларнинг номларини ўзгартириш юзасидан маҳалла фуқаролар йиғинлари, ташкилот ва муассасаларнинг таклифлари асосида номлари «Географик объектларнинг номлари тўғрисида»ги Қонуни талабларига мос келмайдиган маҳалла фуқаролар йиғинлари, кўчалар рўйхати 1-2-иловаларга*, номлари ўзгармайдиган географик объектлар рўйхати 3-иловага* мувофиқ тасдиқлансин.

2. Туман ички ишлар бўлими (А. Ҳошимов), туман «Маҳалла» хайрия жамоат фонди туман бўлинмаси (О. Ҳошимов) ҳамда тегишли қишлоқ ва маҳалла фуқаролар йиғинлари раислари бир ойлик муддат ичида:

қишлоқ аҳоли пунктлари, қишлоқ ва маҳалла фуқаролар йиғинлари, кўчаларнинг қайта номланиши муносабати билан амалга оширилиши лозим бўлган барча (географик ном кўрсаткичларини алмаштириш, фуқаролар паспортларига, муассаса, корхона ва ташкилотларнинг муҳр ва штамплари ҳамда иш қоғозларига тегишли ўзгартиришлар киритиш ва бошқалар) ишларнинг қисқа муддатларда сифатли бажарилишини таъминласин.

3. Туман статистика бўлими (Д. Турсунқулов) 2 ҳафта муддатда номлари қонун талабларига мос келмайдиган кўчалар, қишлоқ аҳоли пунктлари, қишлоқ ва маҳалла фуқаролар йиғинларининг статистик кўрсаткичларига белгиланган тартибда зарурий ўзгартиришлар киритсин.

4. Ушбу қарор қабул қилиниши муносабати билан халқ депутатлари туман Кенгашининг 2013 йил 30 декабрдаги 126/19-сонли қарори ўз кучини йўқотган деб ҳисоблансин.

5. Мазкур қарор расмий эълон қилинган кундан бошлаб кучга киради.

6. Мазкур қарорнинг ижросини назорат қилиш халқ депутатлари туман Кенгашининг ижтимоий-маданий ривожланиш масалалари доимий комиссияси (И. Шарипов)га юклатилсин.