Қуйида «Аҳдлашувчи Томонлар» деб аталувчи Ўзбекистон Республикаси ва Туркия Жумҳурияти,

Ўзбекистон Республикаси ва Туркия Жумҳурияти халқлари ўртасидаги дўстона алоқаларини мустаҳкамлаш борасида икки томон хоҳишига амал қилиб,

фуқаролик, савдо ва жиноий ишлар бўйича ўзаро ҳуқуқий ёрдам кўрсатиш соҳасидаги ҳамкорликни суверенитет, миллий мустақиллик ва Томонларнинг ички ишларига аралашмаслик асосида ривожлантиришга муҳим аҳамият берган ҳолда,

Ўзбекистон Республикаси ва Туркия Жумҳурияти ўртасида фуқаролик, савдо ва жиноий ишлар бўйича ўзаро ҳуқуқий ёрдам кўрсатиш ҳақидаги Шартномани имзолаш ҳақида келишиб олдилар:

1. Аҳдлашувчи Томонлардан бирининг фуқаролари бошқа Аҳдлашувчи Томон ҳудудида ўзларининг шахсий ва мулкий ҳуқуқлари борасида худди шу Аҳдлашувчи Томон фуқаролари эга бўлган ҳуқуқий ҳимоядан фойдаланадилар.

2. Аҳдлашувчи Томонлардан бирининг фуқаролари ўзларининг шахсий, мулкий ҳуқуқлари ва манфаатларини ҳимоя қилиш мақсадида фуқаролик, савдо ва жиноий ишлар бўйича ваколатга эга бўлган ҳуқуқни муҳофаза қилиш ташкилотлари (бундан кейин «адлия муассасалари»)га худди шу Томон фуқароларига тааллуқли шартлар ва расмиятчиликларга амал қилган ҳолда, эркин ва бирон бир тўсиқсиз мурожаат қилишлари мумкин.

3. Ушбу Шартноманинг қоидалари Аҳдлашувчи Томонлардан бирининг ҳудудида жойлашган ва ушбу Томон қонунларига мувофиқ таъсис этилган юридик шахсларга ҳам қўлланиши мумкин бўлган қадар тааллуқлидир.

Ушбу Шартномани қўллаш мақсадида Аҳдлашувчи Томонларнинг муассасалари бир-бирлари билан дипломатик тартибда алоқа боғлашади.

Аҳдлашувчи Томонларнинг адлия вазирликлари бир бирларига илтимосга биноан ушбу Шартноманинг мавзуи бўлмиш ўз ҳудудларида амал қилаётган ёки амал қилган қонунлар ва суд практикаси ҳақида ҳуқуқий масалалар бўйича ахборот тақдим қиладилар.

1. Аҳдлашувчи Томонларнинг ваколатли муассасалари фуқаролик ва савдо ишлари бўйича ўзаро ҳуқуқий ёрдам кўрсатиш мажбуриятини оладилар.

2. Ўзаро ҳуқуқий ёрдам кўрсатишга процессуал ҳаракатларни бажариш, хусусан ҳужжатларни жўнатиш, экспертиза ўтказиш, Томонлар, гувоҳлар, ва экспертларни эшитиш киради.

1. Ҳуқуқий ёрдам ҳақидаги илтимосда қуйидагилар кўрсатилади:

а) сўров юборувчи ва сўров олувчи муассасалар номлари;

б) ҳуқуқий ёрдамга муҳтож бўлган ишнинг мазмуни;

в) томонларнинг исм-шарифлари, уларнинг турар жойлари ёки жойлашган ерлари, фуқаролиги ва касби;

г) Томонлар вакилларининг исм-шарифлари ва манзилгоҳлари;

д) илтимос мазмуни ва уни бажариш учун лозим бўлган ахборот.

2. Ҳуқуқий ёрдам ҳақидаги илтимослар ва уларга илова қилинувчи ҳужжатлар имзоланган ва сўров юборувчи муассасанинг муҳри билан тасдиқланган бўлиши шарт.

1. Ҳуқуқий ёрдам ҳақидаги илтимосни бажаришда сўров олувчи муассаса ўз давлатининг қонунларини ишлатади. Бироқ сўров юборувчи Томоннинг илтимосига кўра у бошқа Аҳдлашувчи Томоннинг процессуал қоидаларини, агар улар сўров олувчи Аҳдлашувчи Томоннинг қонунларига зид келмаса, ишлатиши мумкин.

2. Агар ҳуқуқий ёрдам ҳақидаги илтимосни бажаришга сўров олувчи муассасанинг ваколати бўлмаса, у уни сўров олувчи Томоннинг ваколатли муассасасига юборади ва сўров юборувчи муассасани бу ҳақда хабардор қилади.

3. Ҳуқуқий ёрдам ҳақидаги илтимос бажарилгандан кейин, сўров олувчи муассаса сўров юборувчи муассасага ҳужжатларни қайтариб беради ёки унга илтимосининг бажарилмаганлиги сабаблари ҳақида хабар беради.

1. Ҳужжатларни топшириш сўров олувчи муассаса томонидан ўз давлати қонунчилиги қоидаларига мувофиқ равишда, агар топширилаётган ҳужжатлар сўров олувчи Томон тилида тузилган ёки шу Томон тилидаги тасдиқланган таржима билан таъминланган бўлса, амалга оширилади. Бошқа ҳолларда сўров олувчи муассаса ҳужжатларни адресатга, агар у ўзи рози бўлсагина, топширади.

2. Топшириш ҳақидаги илтимосда қабул қилувчининг аниқ манзилгоҳи ва топшириладиган ҳужжатнинг номи кўрсатилиши керак.

3. Ҳужжатларни топшириш тўғрисидаги илтимосномада кўрсатилган манзилгоҳ бўйича топшириш имкони бўлмаган тақдирда, сўров олувчи муассаса қабул қилувчининг аниқ манзилгоҳини топиш учун тегишли чоралар кўради. Агар аниқ манзилгоҳни топиш мумкин бўлмаса, сўров олувчи муассаса бу ҳақда сўров юборувчи муассасани хабардор қилади ва унга топшириш лозим бўлган ҳужжатларни қайтариб беради.

Ҳужжатлар топширилганини тасдиқлаш сўров олувчи Томон ҳудудида амал қилувчи тартибларга мувофиқ расмийлаштирилади. Топшириш тасдиқномасида топшириш вақти ва жойи кўрсатилади.

Сўров олувчи Аҳдлашувчи Томон ўз ҳудудида ўзаро ҳуқуқий ёрдам кўрсатиш билан боғлиқ бўлган барча харажатларни ўз зиммасига олади ва уларни тўлашни талаб қилмайди.

Ҳуқуқий ёрдам кўрсатиш илтимоси, агар уни бажариш сўров олувчи Аҳдлашувчи Томоннинг мустақиллиги, хавфсизлиги ёки ўрнатилган тартибларига зарар етказадиган бўлса, рад қилиниши мумкин.

1. Ҳуқуқий ёрдам ҳақидаги илтимослар, шунингдек уларга илова қилинган ҳужжатлар, ушбу Шартноманинг 7-моддаси 1-банди ва 13-моддасида кўзда тутилган ҳоллардан ташқари, сўров олувчи Томон тилига ёхуд, француз ёки инглиз тилига қилинган тасдиқланган таржимаси билан биргаликда қўшиб юборилади.

2. Таржима сўров юборувчи муассаса, расмий таржимон, нотариус ёки Аҳдлашувчи Томонлардан бирининг дипломатик вакили ёхуд консуллик ходими томонидан тасдиқланади.

3. Ҳуқуқий ёрдам ҳақидаги илтимосларнинг бажарилишида сўров олувчи Аҳдлашувчи Томоннинг тили қабул қилинади.

1. Бошқа Аҳдлашувчи Томоннинг адлия муассасасига чақириқ бўйича кўнгилли равишда келган гувоҳ ёки эксперт, унинг қандай фуқаролигидан қатъи назар, ушбу Аҳдлашувчи Томон ҳудудида унинг сўров юборувчи Аҳдлашувчи Томон чегарасидан ўтганга қадар қилган бирор жиноий жазога лойиқ иши учун таъқиб қилиниши ёки ҳибсга олиниши мумкин эмас, шунингдек у илгари чиқарилган ҳукмга биноан жазога тортилиши мумкин эмас.

Гувоҳ ёки эксперт ушбу дахлсизликдан, агар у сўров юборувчи Аҳдлашувчи Томон ҳудудини ўзининг иштироки шарт эмаслиги ҳақида хабар олганидан сўнг 15 кеча-кундуз ичида тарк этмаса, маҳрум бўлади. Бу муҳлатга гувоҳ ёки экспертнинг сўров юборувчи Аҳдлашувчи Томоннинг ҳудудини ўзига боғлиқ бўлмаган вазиятларга кўра тарк этолмаган вақти кирмайди.

Бу шахслар, ўзларининг гувоҳлиги ёки эксперт сифатида берган хулосалари туфайли таъқиб қилинишлари ёки ҳибсга олинишлари ҳам мумкин эмас.

2. Сўров юборувчи муассаса гувоҳ ёки эксперт сифатида чақирилаётган шахсга унинг йўл ва кундалик харажатларининг тўланишини, экспертга эса бундай ҳолларда сўров юборувчи Аҳдлашувчи Томон қонуни бўйича лозим бўлган ҳақ ҳам тўланишини хабар қилиши керак. Ушбу шахснинг илтимосига кўра мазкур муассаса унга йўл ва кундалик харажатларни қоплаш учун аванс тўлайди.

Аҳдлашувчи Томонлардан бирининг судлари ва бошқа ваколатли муассасалари илтимосига кўра бошқа Томон уларга таржимасиз ва бепул фуқаролик ҳолати актларини қайд этиш китобидан кўчирма ва сўров юборувчи Томон фуқароларининг шахсий ҳуқуқ ва манфаатларига тааллуқли бошқа ҳужжатларни тақдим қилади.

1. Аҳдлашувчи Томонлардан бирининг ҳудудида ваколатли муассасалар томонидан тузилган, берилган ёки тасдиқланган ва расмий муҳр босилган ҳужжатлар, ва шунингдек уларнинг тасдиқланган нусхалари ёки кўчирмаларини бошқа Томон ҳудудида легаллаштиришнинг ҳожати йўқ.

2. Аҳдлашувчи Томонлардан бирининг ҳудудида берилган расмий ҳужжатлар бошқа Томон ҳудудида расмий ҳужжат сифатида тан олинади.

Аҳдлашувчи Томонлардан бирининг фуқаролари judicatum solvi гаровини фақат ўзларининг чет эллик бўлганлари ва ушбу Аҳдлашувчи Томонда турар жой ёки тўхташ жойига эга бўлмаганлари сабабли тўлашлари мажбур эмас.

1. Аҳдлашувчи Томонлардан бирининг фуқаролари бошқа Аҳдлашувчи Томоннинг судларида суд ва нотариус божлари ва чиқимларидан озод қилинадилар ва бепул юридик ёрдамдан худди ушбу Аҳдлашувчи Томон фуқаролари эга бўлган шартлар асосида ва ҳажмда фойдаланадилар.

2. Суд божлари ва чиқимларидан озод этиш ва бепул юридик ёрдам кўрсатиш процессуал ҳаракатларга, шу жумладан ҳукмни бажаришга тааллуқлидир.

3. Аҳдлашувчи Томонлардан бирининг ҳуқуқий нормаларига мувофиқ судда бирор ишни кўриш мобайнида суд божи ва чиқимлардан озод қилинган фуқаролар ушбу режимдан бошқа Томон ҳудудида худди шундай иш бўйича амалга оширилаётган процессуал ҳаракатларга нисбатан ҳам фойдаланадилар.

1. 16-моддага биноан имтиёзлар олиш учун лозим бўлган шахсий, оилавий ва мулкий аҳвол ҳақидаги ҳужжатлар ҳудудида ариза берувчининг турар жойи ёки қароргоҳи мавжуд бўлган Аҳдлашувчи Томоннинг ваколатли муассасаси томонидан берилади.

2. Агар ариза берувчи Аҳдлашувчи Томонлар ҳудудида турар жойи ёки қароргоҳи бўлмаса, ҳужжат дипломатик ваколатхона ёки консуллик муассасаси томонидан берилиши мумкин.

3. Суд божи ва чиқимларидан озод қилиш ҳақидаги ариза бўйича қарор қабул қилувчи адлия муассасаси ушбу Шартноманинг 2-моддасида кўзда тутилган тартибда ҳужжат берган муассасадан қўшимча маълумотлар талаб қила олади.

Агар Аҳдлашувчи Томонлардан бирининг суди бошқа Томон ҳудудида турар жой ёки қароргоҳга эга бўлган шахснинг маълум бир процессуал ҳаракатни бажариши учун муҳлат тайинласа, бу тайинланган муҳлатнинг кечиши суд қарорининг нусхаси олувчига топширилган санадан бошланади.

1. Ҳар бир Аҳдлашувчи Томон ўз ҳудудида ушбу Шартномада кўзда тутилган шартлар асосида бошқа Аҳдлашувчи Томон ҳудудида чиқарилган қуйидаги ҳукмни тан олади ва ижро этади:

а) мулкка оид фуқаролик ва савдо ишлари бўйича суд қарори;

б) жиноий ишлар бўйича келтирилган зарарни қоплаш ҳақида суд қарори;

в) фуқаролик ва савдо ишлари бўйича узил-кесил арбитраж қарорлари.

2. Фуқаролик ва савдо ишлари бўйича қарор деганда ушбу Шартноманинг кучга кирганидан сўнг чиқарилган қарор тушунилади. Биринчи банднинг «а» кичик бандида эслатилган қарорлар ушбу Шартнома кучга кирганидан сўнг келиб чиққан ҳуқуқий муносабатлар бўйича чиқарилган бўлса, тан олинади ва ижро этилади.

3. Шахсий статусга тааллуқли қарорлар ушбу Шартнома кучга киргунга қадар чиқарилган тақдирда тан олинади.

19-моддада кўрсатилган қарорлар бошқа Аҳдлашувчи Томон ҳудудида, агар улар қуйидаги шартларга жавоб берсалар, тан олинади ва ижро этилади:

а) қарор Аҳдлашаётган Томон ҳудудида чиқарилган ва унинг қонунларига мувофиқ қонуний кучга кирган ва ижро этилиши лозим бўлганда;

б) ҳудудида қарорлар чиқарилган Аҳдлашувчи Томон муассасаси ҳудудида қарорнинг бажарилиши талаб қилинган Аҳдлашувчи Томон қонунларига мувофиқ ушбу масала бўйича ваколатли деб ҳисобланганда;

в) ўзига нисбатан қарор чиқарилган Томон ҳудудида қарор чиқарилган Аҳдлашувчи Томон қонунларига мувофиқ судга ўз вақтида ва тегишли равишда чақирилган бўлса;

г) Томонлар ҳуқуқий ҳимоя воситаларидан фойдаланиши чақириқ асосида суд муҳокамасига иштирок этиш ва суд кенгашларида, агар уларда иштирок этиш имкони бўлмаса, вакиллик имкониятидан маҳрум этилмаган бўлганларида;

д) худди ўша Томонлар ўртасидаги тортишув бўйича қарорнинг бажарилиши лозим бўлган Аҳдлашувчи Томон ҳудудида худди ўша суд жараёнидан аввал қонуний кучга кирган суд ёки арбитраж қарори чиқарилмаган бўлса;

е) сўров олувчи Аҳдлашувчи Томон суди худди ўша Томонлар ўртасида ўша мавзу ва ўша асослар бўйича илгари қўзғатилган ишни олиб бормаганда;

ж) ҳудудида қарорнинг тан олиниши ва бажарилиши лозим бўлган Аҳдлашувчи Томон қонунларига мувофиқ шу мамлакат қонунларини ишлатиш керак бўлган ҳолда, қарор 1) бу қонунлар ҳақиқатда қўлланилган бўлса ёки 2) бошқа Аҳдлашувчи Томоннинг қўлланилган қонунлари туб маъноси билан бу қонунлардан фарқ қилмасагина, бажарилади;

з) қарор ҳудудида тан олиниши ва бажарилиши лозим бўлган Аҳдлашувчи Томон қонунларининг асосий қоидаларига ва ўрнатилган тартиботларига зид келмайди.

Арбитраж қарори 20-моддада кўзда тутилган («е» банди бундан мустасно) шартлардан ташқари куйидаги шартларга ҳам жавоб берса, бажарилиши лозим бўлади:

а) қарор ижро этилиши лозим бўлган Аҳдлашувчи Томон қонунига кўра, бундай иш қарор учун, арбитраж муҳокамаси учун мавзу бўлса;

б) арбитраж қарори манфаатдор Томонлар ўртасидаги арбитраж битими ёки арбитраж қўшимча тушунтиришида кўзда тутилган ёки уларга тўғри келувчи тортишув бўйича чиқарилса;

в) арбитраж органи таркиби Томонлар келишувига ёки манфаатдор томонлар ўртасидаги арбитраж қўшимча тушунтириши ёки арбитраж бўлган давлат қонунига мувофиқ келганда;

г) Томонлар тегишли равишда ҳакамнинг тайинлангани ёки арбитраж муҳокамаси ҳақида хабардор бўлишса;

д) арбитраж қарори у чиқарилган давлатда узил-кесил ҳисобланса.

1. Қарорни тан олишга ва бажаришга рухсат бериш ҳақидаги илтимос ушбу Шартноманинг 2-моддасига мувофиқ ҳудудида қарор бажарилиши лозим бўлган Аҳдлашувчи Давлатнинг ваколатли адлия муассасасига берилади.

2. Илтимосга куйидагилар илова қилинган бўлиши керак:

а) қарорнинг нотариал ёки тегишли равишда тасдиқланган нусхаси, шунингдек қарор қонуний кучга киргани ва бажарилиши лозимлигини тасдиқловчи, агар бу қарорнинг ўзидан келиб чиқмаса, маълумотнома;

б) ўзига нисбатан қарор чиқарилган Томоннинг ўз вақтида ва тегишли равишда судга чақирилгани ва судда сўзлаш имкони бўлмаган тақдирда, унга тегишли равишда вакил юбориш мумкин бўлганини тасдиқловчи маълумотнома;

в) «а» ва «б» кичик бандларида эслатилган ҳужжатларнинг ҳудудида қарорнинг бажарилиши лозим бўлган Аҳдлашувчи Томон тилига ёхуд француз ёки инглиз тилида тасдиқланган таржимаси.

3. Агар бажаришга рухсат бериш ҳақидаги илтимос арбитраж қарорига асосланган бўлса унга 2-банднинг «в» кичик бандига мувофиқ арбитраж битими ёки арбитраж қўшимча тушунтиришининг тасдиқланган таржимаси илова қилинган бўлиши керак.

1. Қарор бажарилишига ва бошқа Аҳдлашувчи Томонда чиқарилган қарор ўзининг бажарилишига рухсат бериш расмий маросимига нисбатан ҳудудида қарор бажарилиши керак бўлган Аҳдлашувчи Томон қонунлари ишлатилади.

2. Бу расмий маросимда суд, қарорни туб маъноси билан қайта кўриб ўтирмасдан, ушбу Шартномада кўзда тутилган барча шартларнинг мавжудлигини текшириш билан кифояланиб қолади.

Ушбу Шартноманинг қарорларнинг бажарилишига тааллуқли моддалари қарорни бажариш натижасида олинган пул суммаларини ўтказиш ва ашёларни олиб чиқиб кетиш ҳақида Аҳдлашувчи Томонлар қонунларининг қоидаларига дахлдор эмас.

1. Аҳдлашувчи Томонлар жиноий ишлар бўйича ўзаро ҳуқуқий ёрдам кўрсатиш мажбуриятини оладилар.

2. Жиноий ишлар бўйича ўзаро ҳуқуқий ёрдам кўрсатиш процессуал ҳаракатларни бажаришни, жумладан, ҳужжатларни юбориш, тинтув, ашёвий далилларни мусодара қилиш ва бериш, экспертиза, айбланувчи ва гувоҳларни сўроқ қилиш, экспертларни тинглаш, шунингдек жойда кўздан кечиришни ўз ичига олади.

1. Жиноий ишлар бўйича ҳуқуқий ёрдам тўғрисидаги илтимосда қуйидагилар кўрсатилади:

а) сўров юборувчи ва сўров олувчи муассасанинг номи;

б) ишнинг мазмуни;

в) айбланувчилар ёки ҳукм этилганларнинг фамилия ва исмлари, уларнинг фуқаролиги ва касблари, имкони борича, айбланувчилар ёки ҳукм этилганларнинг туғилган жойи ва вақти, шунингдек уларнинг ота-оналарининг исмлари;

г) уларнинг вакилларининг фамилиялари, исмлари ва манзилгоҳлари;

д) илтимоснинг мазмуни, унинг бажарилиши учун зарур бўлган ахборот, жиноий хатти-ҳаракатнинг квалификацияси ва тавсифи.

2. Илтимослар ва уларга илова қилинаётган ҳужжатлар имзоланган ва уларни юборган муассасанинг муҳри босилган бўлиши керак.

1. Ҳуқуқий ёрдам тўғрисидаги илтимосни бажараётганда сўров олувчи муассаса ўз давлатининг қонунчилик нормаларини қўллайди. Бироқ сўров юборувчи муассаса илтимосига кўра сўров олувчи муассаса бошқа Аҳдлашувчи Томоннинг процессуал нормаларини қўллаши мумкин, агар улар сўров олувчи Томоннинг қонунчилигига зид келмаса.

2. Агар ҳуқуқий ёрдам тўғрисидаги илтимосни бажариш сўров олувчи муассасанинг ваколатига кирмаса, у ушбу илтимосни сўров олувчи Томоннинг ваколатли муассасасига юборади ва бу тўғрида сўров юборувчи муассасани хабардор қилади.

3. Сўров юборувчи муассасанинг илтимосига кўра сўров олувчи муассаса уни ҳуқуқий ёрдам тўғрисидаги илтимосни бажариш вақти ва жойи тўғрисида хабардор қилади.Сўров олувчи муассаса сўров юборувчи муассаса вакилларининг илтимос бажарилишида иштирок этишларига розилик бериши мумкин.

4. Ҳуқуқий ёрдам тўғрисидаги илтимос бажарилганидан сўнг сўров олувчи муассаса сўров юборувчи муассасага ҳужжатларни қайтариб беради ёки уни бажаришга тўсқинлик қилаётган сабаблар тўғрисида хабардор қилади.

1. Судда ёки Аҳдлашувчи Томонлардан бирининг бошқа муассасасида ишни кўриш давомида бошқа Аҳдлашувчи Томон ҳудудида яшовчи гувоҳ ёки экспертнинг қатнашиши зарур бўлса, ушбу Томоннинг суд ёки бошқа ваколатли муассасаси бошқа Аҳдлашувчи Томоннинг ваколатли муассасасига чақирув топшириш илтимоси билан мурожаат қилиши мумкин.

2. 1-бандда кўрсатилган ҳолда чақирув келмаганлик учун жарима солиш ёки бошқа мажбурий чораларни қўллаш таҳдидини ўз ичига олиши мумкин эмас.

3. Йўл ва яшаш харажатларини қоплаш, шунингдек гувоҳ ёки экспертларга компенсация тўлашни сўров юборувчи Томон амалга оширади.

4. Бошқа Аҳдлашувчи Томоннинг ваколатли муассасасига чақирув бўйича ўз хоҳишига биноан келган гувоҳ ёки эксперт унинг фуқаролигидан қатъи назар, ушбу Томон ҳудудида таъқиб этилиши, ҳибсга олиниши ёки ушбу мамлакат чегарасидан ўтгунига кадар қилинган хатти-ҳаракатлар учун жазоланиши мумкин эмас. Кўрсатилган шахслар, шунингдек уларнинг гувоҳлик кўрсатмалари ёки эксперт сифатидаги хулосалари билан боғлиқ ҳолда ҳам, ишни кўриш мавзу бўлган жиноий иш билан боғлиқ ҳаракатлар учун ҳам таъқиб этилиши, ҳибсга олиниши ёки жазоланиши мумкин эмас.

5. Гувоҳ ёки эксперт сўров юборувчи Томон ҳудудини уни ишни кўраётган муассаса унинг иштироки зарур эмаслиги тўғрисида хабардор қилган вақтдан бошлаб 15 кунлик муддат ўтгунига қадар тарк этмаса, 4-бандда кўзда тутилган иммунитетни йўқотади. Гувоҳ ёки эксперт унга боғлиқ бўлмаган вазиятларга кўра сўров юборувчи Томон ҳудудини тарк эта олмаган вақт бу муддатга киритилмайди.

1. Агар топширилаётган ҳужжатлар сўров олувчи Томон тилида тузилган бўлса ёки уларнинг ушбу Томон тилига тасдиқланган таржимаси бўлса, ҳужжатларни топшириш сўров олувчи муассаса томонидан ушбу масалани унинг давлатида мувофиқлаштирувчи ҳуқуқий қоидалар асосида амалга оширилади. Ўзга ҳолларда сўров олувчи муассаса ҳужжатларни фақатгина олувчининг розилиги билан топширади.

2. Топшириш тўғрисидаги илтимосда олувчининг аниқ манзилгоҳи ва топширилаётган ҳужжатнинг номи кўрсатилиши керак.

3. Агар ҳужжатлар топшириш тўғрисидаги илтимосда кўрсатилган манзилгоҳ бўйича топширилиши мумкин бўлмаса, сўров олувчи муассаса олувчининг аниқ манзилгоҳини билиш учун зарур чораларни кўради. Агар аниқ манзилгоҳни билиш мумкин бўлмаса, сўров олувчи муассаса сўров юборувчи муассасани бу тўғрида хабардор қилади ва унга топширилиши лозим бўлган ҳужжатларни қайтариб беради.

Ҳужжатларни топширишни тасдиқлаш сўров олувчи Томон ҳудудида амал қилаётган тартибларга мувофиқ равишда расмийлаштирилади. Топширишнинг тасдиғида топшириш вақти ва жойи кўрсатилади.

28-модда 3-банди қоидалари бажарилганида сўров олувчи Аҳдлашувчи Томон унинг ҳудудида ҳуқуқий ёрдам кўрсатиш билан боғлиқ бўлган барча харажатларини ўз зиммасига олади, ва уларнинг ўрнини қоплашни талаб қилмайди.

1. Ҳуқуқий ёрдам бериш тўғрисидаги илтимосга қуйидаги ҳолларда рад жавоби берилиши мумкин:

а) агар сўров олувчи Томон илтимосни бажариш унинг мамлакати суверенитети, хавфсизлиги ёки оммавий тартибига зарар етказиши мумкин деб ҳисобласа;

б) агар илтимос сўров олувчи Томоннинг қонунчилиги бўйича номақбул бўлса.

2. 1-бандда кўзда тутилган ҳолларда ҳуқуқий ёрдам кўрсатишга рад жавоби бериш асосланган бўлиши керак.

1. Ушбу Битимнинг 29-модда 1-банди ва 57-моддасида кўзда тутилган ҳоллардан ташқари илтимослар, шунингдек уларга илова қилинган материалларнинг сўров олувчи Томоннинг тилига, француз ёки инглиз тилига қилинган тасдиқланган таржимаси бўлади.

2. Таржима Аҳдлашувчи Томонлардан бирининг сўров юборувчи муассаса, расмий таржимон, нотариус ёки дипломатик вакил ёхуд консулхона ходими томонидан тасдиқланади.

3. Илтимосларни бажаришда сўров юборувчи Томоннинг тили ишлатилади.

1. Аҳдлашувчи Томонлар ушбу Шартнома қоидаларига мувофиқ бир-бирларига илтимосга кўра уларнинг ҳудудларида бўлган шахсларни жиноий жавобгарликка тортиш ёки ҳукмни ижро этиш учун ушлаб бериш мажбуриятларини оладилар.

2. Жиноий жавобгарликка тортиш учун тутиб бериш иккала Аҳдлашувчи Томон қонунчилигига биноан 12 ойдан кўп муҳлатга озодликдан маҳрум этиш ёки бошқа оғирроқ жазо кўзда тутилган жиноятлар ҳолларида амалга оширилади.

3. Ҳукмни ижро этиш учун тутиб бериш фақатгина иккала Аҳдлашувчи Томон қонунчилигига биноан шундай ҳисобланган жиноятлар учун амалга оширилади, ва агар ушбу шахс олти ойдан кўп муҳлатга озодликдан маҳрум этиш ёки бошқа оғирроқ жазога ҳукм этилган бўлса.

4. Агар тутиб бериш тўғрисидаги илтимос ҳар бири иккала Аҳдлашувчи Томон қонунчилигига биноан озодликдан маҳрум этишга олиб келадиган, бироқ улардан баъзилари ушбу модданинг 2 ва 3-бандларида кўзда тутилган шартларга жавоб бермайдиган бир-бирига боғлиқ бўлмаган бир нечта жиноятларга тегишли бўлса, унда сўров олувчи Томон бу жиноятлар учун тутиб беришга рози бўлиши мумкин.

1. Тутиб бериш қуйидаги ҳолларда амалга оширилмайди:

а) агар тутиб бериш тўғрисида юборилган илтимосда кўрсатилган шахс сўров олувчи Томоннинг фуқароси бўлса;

б) агар тутиб беришга сўров олувчи Томоннинг қонунчилиги бўйича йўл қўйилмаса ёки белгиланган муддат ўтиб кетганлиги сабабли ёки бошқа қонуний асосда ҳукм ижро этилиши мумкин бўлмаса;

в) агар тутиб бериш тақиқланган шахсга нисбатан сўроқ олувчи Томон ҳудудида ўшандай жиноят учун қонуний кучга кирган ҳукм чиқарилган ёки ишни олиб бориш тўхтатилган бўлса;

г) агар жиноят сўров олувчи Томон ҳудудида содир қилинган бўлса.

2. Агар сўров олувчи Томон тутиб берилиши керак бўлган шахс унинг фуқароси эканлиги асосида тутиб беришдан воз кечса, унда сўров юборувчи Томон илтимосига кўра у жиноий таъқиб этишни қўзғатади. Сўров юборувчи Томонга жиноятга тегишли бўлган ҳужжатлар, ахборот ва бошқа материаллар юборилади. Сўров юборувчи Томон жиноий таъқиб этишнинг натижалари тўғрисида хабардор қилади.

1. Жиноий жавобгарликка тортиш учун тутиб бериш тўғрисидаги илтимос билан бирга қамоққа олиш тўғрисидаги қарорнинг тасдиқланган нусхаси, жиноий хатти-ҳаракат шарт-шароитларнинг тавсифи ва жиноятни квалификацияловчи қонун нормасининг матни бўлиши керак. Агар жиноят натижасида моддий зарар етказилган бўлса, унда, имкони борича, унинг миқдорини кўрсатиш лозим.

2. Ҳукмни ижро этиш учун тутиб бериш тўғрисидаги илтимос билан бирга қонуний кучга кирган ҳукмнинг тасдиқланган нусхаси, шунингдек жиноятни квалификацияловчи қонун нормасининг тўлиқ матни бўлиши керак. Агар ҳукм қилинган шахс жазонинг бир қисмини ўтаган бўлса, у томонидан ўталган муддат кўрсатилади.

3. Тутиб бериш тўғрисидаги илтимос тутиб берилиши сўралаётган шахснинг фуқаролиги ва имкони борича, ташқи қиёфасининг тавсифи, унинг шахсига тегишли бўлган маълумотлар, яшаш жойи тўғрисидаги ахборотни ўз ичига олиши ва шулар билан бирга фотосурат ва бармоқ излари бўлиши керак.

4. Сўров юборувчи Аҳдлашувчи Томон тутиб берилиши сўралаётган шахс томонидан содир этилган хатти-ҳаракатларга тегишли бўлган далилларни илтимосга илова қилишга мажбур эмас.

Агар тутиб бериш тўғрисидаги илтимос барча зарурий ахборотни ўз ичига олмаса, сўров олувчи Томон қўшимча маълумотларни талаб қилиб олиши мумкин. Бунинг учун у икки ойдан ошмайдиган, бироқ узрли сабаблар бўлганида узайтирилиши мумкин бўлган муддатни белгилаши мумкин.

Тутиб бериш тўғрисидаги илтимосни олгач, сўров олувчи Томон тутиб берилиши илтимос қилинган шахсни қамоққа олиш учун дарҳол зарур чораларни кўради. Бу ушбу Шартнома қоидаларига кўра тутиб беришга йўл қўйилмайдиган ҳолларга тегишли эмас.

1. Тутиб берилиши сўралаётган шахс, агар сўров юборувчи Томон бу шахсга нисбатан вақтинча қамоққа олиш тўғрисида қарор, қонуний кучга кирган ҳукм ёки бошқа суд қарори чиқарилганини тасдиқласа, сўров юборувчи Томоннинг илтимосномаси бўйича тутиб бериш тўғрисидаги илтимоси олингунига қадар вақтинча қамоққа олиниши мумкин. Вақтинча қамоққа олиш тўғрисидаги илтимоснома почта, телеграф орқали ёки илтимоснома мазмунини ёзма равишда етказишнинг ҳар қандай бошқа усули билан етказилиши мумкин.

2. Қолдирилиши мумкин бўлмаган ҳолларда Аҳдлашувчи Томонларнинг ваколатли муассасалари, уларнинг ҳудудида бўлган шахсни, агар бу шахс Аҳдлашувчи Томон ҳудудида тутиб беришни келтириб чиқарадиган жиноятларни содир этганлиги тўғрисидаги маълумотларга эга бўлсалар, вақтинча, истисно тариқасида 1-бандда кўрсатилган илтимосномасиз қамоққа олишлари мумкин.

3. Бошқа Аҳдлашувчи Томон ушбу модданинг 1 ва 2-бандларига мувофиқ вақтинча қамоққа олиш вақти тўғрисида дарҳол хабардор қилиниши керак.

1. Ушбу Шартноманинг 39-моддасига биноан вақтинча қамоққа олинган шахс, агар тутиб бериш тўғрисидаги илтимос ёки қўшимча маълумотлар тўғрисидаги илтимоснома бўйича ҳужжатлар уни қамоққа олинганлиги тўғрисида бошқа Томон хабардор қилинган дақиқадан бошлаб 45 кун давомида олинмаган бўлса, озод қилиниши мумкин. Сўров юборувчи Томоннинг илтимосига кўра бу муддат 15 кунга узайтирилиши мумкин.

2. Агар сўров олувчи Аҳдлашувчи Томон сўров юборувчи Томоннинг вақтинча қамоққа олинган шахсни бошқа талаб қилиш нияти йўқлиги тўғрисида хабардор қилинган бўлса, у дарҳол уни озод қилади.

1. Сўров олувчи Томон, тутиб бериш тўғрисидаги илтимос бўйича қарор қабул қилгач, ўз томонидан, тутиб бериш тўғрисидаги илтимосга асос бўлганлар қаторига кирмайдиган ҳаракатлар учун тегишли шахсга қарши жиноий таъқиб этишни қўзғаш ёки бу шахс унинг ҳудудида жазони ўташи учун уни топширишни кечиктириши мумкин.

2. Топширишни кечиктириш ўрнига сўров олувчи Томон сўров юборувчи Томонга сўралган шахсни вақтинча топшириши мумкин. Вақтинча берилган шахс уни беришга сабаб бўлган процессуал ҳаракатлар бажарилиши билан дарҳол, вақтинча берилган дақиқадан бошлаб 4 ойдан кечиктирмасдан қайтарилиши керак.

Агар бир неча давлат битта шахсни тутиб беришни илтимос қилса, сўров олувчи Томон бу илтимосларнинг қайси бири қондирилиши ҳақида қарор қабул қилади.

1. Сўров олувчи Томоннинг розилигисиз тутиб берилган шахс жиноий тартибда таъқиб қилиниши, тутиб беришгача содир этилган ва тутиб беришга сабаб бўлмаган жиноят учун жазоланиши, тутиб беришгача содир этилган жиноятлар туфайли учинчи давлатга топширилиши мумкин эмас.

2. Розилик кўйидаги ҳолларда талаб этилмайди:

а) агар тутиб берилган шахс у берилган Аҳдлашувчи Томон ҳудудидан процессуал ҳаракатлар тугатилганидан кейин ёки, ҳукм чиқарилган ҳолда, жазони ижро этиш дақикасидан бошлаб бир ой давомида чиқиб кетмаса. Бу муддатга тутиб берилган шахс унга боғлиқ бўлмаган вазиятларга кўра сўров юборувчи Томоннинг ҳудудини тарк эта олмаган вақт киритилмайди,

б) агар тутиб берилган шахс сўров юборувчи Томоннинг ҳудудини тарк этгач, у ерга ўз хоҳишига биноан қайтган бўлса.

1. Сўров олувчи Томон сўров юборувчи Томонга тутиб бериш тўғрисидаги ўз қарори тўғрисида хабар беради.

2. Тутиб бериш тўғрисидаги илтимосни тўлиқ ёки қисман рад этиш ҳолида бундай қарорнинг сабаблари сўров юборувчи Томонга маълум қилинади.

3. Тутиб беришга розилик берилган ҳолда сўров олувчи Томон сўров юборувчи Томонга топшириш жойи ва вақти тўғрисида хабар қилади. Агар тутиб берилиши илтимосига розилик олинган шахсни сўров юборувчи Томон белгиланган вақтдан кейин бир ой давомида қабул қилиб олмаса, у озод этилади.

Агар тутиб берилган шахс одил судловдан бош тортган ва сўров олувчи Томон ҳудудига қайтган бўлса, унда сўров юборувчи Томон тутиб бериш тўғрисида янги илтимос юборганида ушбу Шартноманинг 36-моддасида кўрсатилган материалларни топшириш талаб этилмайди.

1. Аҳдлашувчи Томонларнинг ҳар бири бошқа Томоннинг илтимосига биноан бу Томонга учинчи давлат Томонидан ушлаб берилган шахсларни ўз ҳудудидан олиб ўтишга рухсат беради. Аҳдлашувчи Томонлар ушбу Шартнома қоидаларига биноан тутиб бериш зарур бўлмаган ҳолларда бунга рад жавоби беришлари мумкин.

2. Аҳдлашувчи Томонларнинг ваколатли муассасалари ҳар бир конкрет ҳолда транзитнинг усули, маршрути ва бошқа шартларини келишиб оладилар.

Аҳдлашувчи Томонлар тутиб берилган шахсларни жиноий таъқиб этишнинг натижалари тўғрисида бир-бирларини ўзаро хабардор қиладилар. Томонлар, шунингдек илтимосга биноан бир-бирларига қонуний кучга кирган ҳукмнинг нусхасини юборадилар.

Тутиб бериш ва вақтинча қамоққа олиш расмий маросимига фақатгина сўров олувчи Томоннинг қонунчилиги татбиқ этилади.

Тутиб бериш тўғрисидаги илтимосни асословчи ҳужжатлар билан бирга сўров олувчи Томоннинг тилига, француз ёки инглиз тилига қилинган тасдиқланган таржимаси бўлиши керак.

1. Аҳдлашувчи Томонлардан бирининг қонуний кучга кирган ҳукми асосида бошқа Аҳдлашувчи Томон ҳудудида озодликдан маҳрум этишга ҳукм қилинган фуқаролари, икки томоннинг розилиги билан ва ушбу Шартномада кўзда тутилган шартларда улар фуқаролари бўлган Аҳдлашувчи Томонга шу Томон ҳудудида жазони ўташ учун топширилади.

2. Маҳкумни жазони ўташ учун топшириш суди ҳукм чиқарган Аҳдлашувчи Томоннинг (ҳукм Давлати) илтимосига кўра рўй беради, агар бошқа Аҳдлашувчи Томон (ижро Давлати) маҳкумни қабул қилишга рози бўлса.

3. Маҳкум унинг фуқароси бўлган Аҳдлашувчи Томон, суди ҳукм чиқарган Аҳдлашувчи Томонга маҳкумни топшириш имкони тўғрисидаги масалани кўриб чиқиш илтимоси билан мурожаат қилиши мумкин.

Маҳкум, шунингдек унинг вакили ёки унинг оила аъзолари Аҳдлашувчи Томонлардан бирининг ваколатли маъмурларига 50-моддада кўзда тутилган ҳаракатни қўзғатиш тўғрисидаги илтимос билан мурожаат қилишлари мумкин.

Ҳукм Давлатининг ваколатли муассасалари маҳкумни шундай илтимос билан мурожаат этиш мумкинлиги тўғрисида хабардор қиладилар.

Маҳкумни топшириш у ҳукм этилишига сабаб бўлган жиноят ижро Давлатининг ҳам жиноий қонунчилигига мувофиқ жиноят деб ҳисоблансагина амалга оширилади.

1. Маҳкумни ижро Давлатига топшириш фақатгина маҳкумнинг розилиги билан амалга оширилади.

2. Агар маҳкум ўз розилигини тегишлича ифодалашга қодир бўлмаса, бундай розиликни унинг қонуний вакилидан олиш зарур.

Ижро Давлати иложи борича қисқа муддатда ҳукм Давлатини маҳкумни топширишга розилиги ёки буни рад этиши тўғрисида хабардор қилади.

1. Агар Аҳдлашувчи Томонлар топшириш тўғрисида келишиб олсалар, ижро Давлатининг ваколатли муассасалари қабул қилинган қарорни бажаришга мажбурлар.

2. Агар жазо характери ёки муддатлар ижро Давлатининг қонунчилигига зид келса ёки ушбу давлатнинг қонунчилиги буни талаб этса, ижро Давлатининг ваколатли муассасалари шу хилдаги жиноятлар учун ўз қонунчилиги кўзда тутган санкцияларга мувофиқ бу жазони ижро этишлари мумкин. Бу жазо, имкони борича, ўз характерига кўра ҳукм билан белгиланган жиноятга мос келиши керак. Характерига кўра ҳам, муддатлари бўйича ҳам жазо ҳукм Давлатида ўрнатилган санкцияларни кучайтириши мумкин эмас, ва шу хилдаги жиноят учун ижро Давлатининг қонунчилиги кўзда тутган максимумдан ошиб кетиши мумкин эмас.

3. Ижро Давлатининг ваколатли муассасалари ўрнатилган фактларга амал қилишга мажбур ва озодликдан маҳрум этишни бошқа хилдаги жазо билан алмаштиришлари мумкин эмас.

Ижро Давлати рози бўлган ҳолда Аҳдлашувчи Томонларнинг ваколатли муассасалари маҳкумни топшириш жойи, вақти ва шартларини энг қисқа муддатларда белгилайдилар. Маҳкумни топшириш ҳукм Давлати ҳудудида содир бўлади.

1. Жазони ижро этиш, жумладан шартли озод этиш, ижро этиш Давлатининг қонунчилиги билан аниқланади.

2. Амнистия ҳукм Давлатида бўлганидек, ижро Давлатининг ҳам қонунчилиги бўйича амалга оширилади.

3. Афв этиш ижро Давлатининг қонунчилиги бўйича амалга оширилади.

4. Фақатгина ҳукм Давлатининг суди ижро Давлатига топширилган маҳкумга нисбатан чиқарилган айблов ҳукмини қайта кўриб чиқиш тўғрисидаги ҳар қандай илтимосномалар бўйича қарорлар қабул қилишга ваколатлидир.

1. Аҳдлашувчи Томонлар ҳукмини ижро этишга таъсир қила оладиган барча вазиятлар ва хусусан, амнистия, афв этиш ва ҳукмни қайта кўриб чиқиш тўғрисидаги ҳар қандай илтимосномаларни кўриб чиқишнинг натижалари тўғрисида бир-бирларини хабардор қиладилар.

2. Ижро Давлати ҳукм Давлатини жазони ўташ тугаганлиги тўғрисида хабардор қилади.

Маҳкумни ижро Давлатига топшириш, имкони борича, 46-моддада кўзда тутилган шартларга мувофиқ содир этилади.

1. Маҳкумни топшириш тўғрисидаги илтимос ёзма равишда тақдим этилади.

2. Илтимосга қуйидагилар илова қилинади:

а) ҳукмнинг, унинг қонуний кучга кирганлигини тасдиқлаш билан, тасдиқланган нусхаси;

б) қонуннинг ишлатилган қоидалари матни;

в) маҳкум тўғрисида, унинг фуқаролиги, яшаш жойи ёки одатдаги турар жойи тўғрисида имкони борича аниқ маълумотлар;

г) маҳкумнинг ҳукм Давлатида жазонинг бир қисмини ўтаганини тасдиқловчи ҳужжатлар;

д) мазмуни маҳкумнинг розилигини акс эттирувчи протокол;

е) илтимосни кўриб чиқиш давомида муҳим бўла оладиган ҳар қандай бошқа ҳужжат.

Агар ижро Давлати унга тақдим этилган маълумот ва материалларни етарли эмас деб ҳисобласа, у зарур бўлган қўшимча маълумотларни талаб қилиши ва уларни тақдим этиш муддатларини белгилаши мумкин. Бу муддатлар асосланган илтимосга кўра узайтирилиши мумкин. Қўшимча ахборот бўлмаганда ижро Давлати унинг ихтиёрига тақдим этилган маълумотлар ва материаллар асосида қарор қабул қилади.

Топшириш тўғрисидаги илтимослар, шунингдек уларга илова қилинган материаллар уларнинг ҳақиқийлигини тасдиқлашни талаб этмайди ва улар билан бирга ижро Давлатининг тилига, француз ёки инглиз тилига қилинган таржималари бўлади.

Маҳкумни топшириш билан боғлиқ бўлган харажатларни, фақатгина ҳукм Давлати ҳудудида юзага келган харажатлардан ташқари, ижро Давлати ўз зиммасига олади.

Аҳдлашувчи Томонлар ўз қонунчилигига мувофиқ ва бошқа Аҳдлашувчи Томоннинг илтимосига биноан бошқа Томон ҳудудида жиноят қилган ўз фуқароларини жавобгарликка тортиш мажбуриятини оладилар.

1. 64-моддада кўзда тутилган жиноий таъқиб этишни қўзғатиш мақсадида Аҳдлашувчи Томонлар бир-бирларига қуйидаги маълумотларни ўз ичига олган ёзма илтимосларни йўллайдилар:

а) сўров юборувчи муассасанинг номи;

б) илтимосда кўрсатилган жиноят шу жумладан уни содир этиш вақти ва жойи, тўғрисидаги маълумотлар;

в) гумон қилинувчи, унинг фуқаролиги ва имкони борича, унинг яшаш жойи ёки бўлиш жойи тўғрисидаги маълумотлар.

2. Илтимосга қуйидагилар илова қилинади:

а) дастлабки тергов материаллари ёки уларнинг сўров олувчи Томон тилидаги тасдиқланган нусхалари;

б) ҳужжатлар ва жиноий процессда ашёвий далиллар бўлиб хизмат қила оладиган ҳар қандай бошқа ашёлар; бунда ушбу Шартноманинг 67-моддасининг қоидалари қўлланилади;

в) жиноят содир этилган жойда амал қилувчи қонунчиликка биноан содир этилган хатти-ҳаракатга нисбатан қўлланиладиган жиноий қонун қоидалари матни;

г) зарур бўлганда ва имкони бўлганда — гумон қилинувчининг фотосурати ва бармоқ излари.

3. Илтимос олган Аҳдлашувчи Томон, бошқа Томонни кўриб чиқишнинг натижалари тўғрисида хабардор қилади ва унга қонуний кучга кирган ҳукмнинг нусхасини беради.

1. Агар бошқа Томон ҳудудида қамоқда бўлган шахсларни гувоҳлар сифатида тинглаш зарурати юзага келса, сўров олувчи Томон бу шахсларни сўров юборувчи Томон ҳудудига уларни қамоқда ушлаб туриш ва уларнинг кўрсатмалари тинглаб бўлиниши билан имкони борича қисқа муддатларда қайтариб бериш шарти билан йўллашга розилик бериши мумкин.

2. Агар учинчи давлат ҳудудида қамоқда бўлган шахсларни гувоҳлар сифатида тинглаш зарурати юзага келса, Аҳдлашувчи Томонлар бу шахсларни ўз ҳудудларидан транзит билан олиб ўтишга рухсат берадилар.

3. Ушбу модданинг 1 ва 2-бандларида кўзда тутилган ҳолларга, имкони борича, ушбу Шартнома 28-моддасининг қоидалари қўлланилади.

1. Жиноят билан боғлиқ бўлган ашёлар, шунингдек жиноий процессда ашёвий далил бўлиб хизмат қила оладиган барча бошқа ашёлар сўров юборувчи Томонга ушбу шахсни унинг ўлими натижасида ёки бошқа сабабларга кўра тутиб бериш мумкин бўлмаган ҳолда ҳам берилади.

2. Сўров олувчи Томон ушбу ашёларни беришни, агар, унинг фикрича, улар бошқа жиноий иш бўйича иш олиб бориш учун зарур бўлса, вақтинча қолдириши мумкин.

3. Учинчи шахсларнинг берилаётган ашёларга ҳуқуқлари кучда қолади. Жиноий иш бўйича иш олиб бориш тугатилгандан кейин ушбу ашёлар уларни манфаатдор шахсларга топшириш мақсадида уларни тақдим этган Томонга қайтариб берилади.

Ашёларни бериш ва топшириш билан боғлиқ бўлган харажатларни, фақатгина сўров олувчи Томон ҳудудида юзага келган харажатлардан ташқари, сўров юборувчи Томон ўз зиммасига олади.

1. Аҳдлашувчи Томонлар бир йилда камида бир марта бошқа Томон фуқароларига нисбатан чиқарилган қонун кучига кирган айблов ҳукмлари тўғрисида бир-бирларига ахборот берадилар.

2. Аҳдлашувчи Томонлар бир-бирларига илтимосга кўра сўров олувчи Томон ҳудудида ҳукм этилган ва сўров юборувчи Томон ҳудудида жиноий жавобгарликка тортилаётган шахсларнинг судланганликлари тўғрисидаги маълумотларни тақдим этадилар.

3. 1 ва 2-бандларда кўзда тутилган ҳолларда Аҳдлашувчи Томонлар бир-бирларига, имкони борича, ҳукм этилган шахсларнинг бармоқ изларини берадилар.

Ушбу бўлим қоидалари Шартнома кучга киргунга қадар содир бўлган фактларга тегишли бўлган илтимосларга ҳам татбиқ этилади.

1. Ушбу Шартнома ратификация қилинади ва ратификация ёрлиқлари билан алмашилгандан сўнг 30 кун ўтиши билан кучга киради.

2. Ушбу Шартнома ноаниқ муддатга тузилади. Ҳар бир Аҳдлашувчи Томон уни дипломатик йўл билан денонсация қилиши мумкин. Бундай ҳолда Шартнома денонсация кунидан бошлаб олти ой ўтгач амал қилишини тўхтади.

Бунинг тасдиғи сифатида Аҳдлашувчи Томонларнинг ваколатли вакиллари ушбу Шартномани имзоладилар ва уни муҳрладилар.

Анқара шаҳрида, 1994 йил 23 июнида, икки нусхада, ҳар бири ўзбек ва турк тилларида тузилди, бунда барча матнлар бир хил кучга эга.