Ўзбекистон Республикаси Ҳукумати ва Россия Федерацияси Ҳукумати, кейинги ўринларда «Аҳдлашувчи Томонлар» деб аталади,

Ўзбекистон Республикаси билан Россия Федерацияси ўртасида давлатлараро муносабатларнинг асослари, дўстлик ва ҳамкорлик тўғрисида 1992 йил 30 майда имзоланган Шартнома қоидаларига амал қилиб, ташқи иқтисодий фаолият соҳасида ҳамкорлик тўғрисида 1992 йил 15 майдаги кўп томонлама Битимни эътиборга олиб,

оммавий қирғин қуроллари ва ракета воситаларини яратиш, уларни етказиб бериш учун ишлатилиши мумкин бўлган хом ашё, материаллар, асбоб-ускуналар, технологиялар ва хизматларни экспорт қилишни назорат этиш масалалари бўйича ишларни мувофиқлаштириш тўғрисида 1992 йил 26 июндаги кўп томонлама Битимни ҳисобга олиб,

Ўзбекистон Республикаси билан Россия Федерацияси ўртасидаги савдо-иқтисодий ҳамкорликни тенглик ва ўзаро фойдалилик асосида ривожлантиришга интилиб,

ҳар бир Аҳдлашувчи Томоннинг мустақил ташқи иқтисодий сиёсат ўтказиш ҳамда тегишли халқаро мажбуриятларни бажаришни ва эълон қилинган мақсадларни рўёбга чиқаришни таъминлашдан иборат суверен ҳуқуқидан келиб чиқиб,

товарлар, хизматлар, маблағлар ва ишчи кучининг ягона бозорини барпо этишга ёрдамлашиш ниятида,

қуйидагилар тўғрисида аҳдлашиб олдилар:

1. Ўзбекистон Республикаси билан Россия Федерацияси ўртасидаги савдо муносабатлари эркин савдо тартибида амалга оширилади.

Аҳдлашувчи Томонлар Аҳдлашувчи Томонлардан бирининг бож олиш ҳудудидан чиқувчи ва иккинчи Аҳдлашувчи Томоннинг бож олиш ҳудуди учун мўлжалланувчи бир хил ҳаракатга эга бўлган товарларнинг экспорти ёки импортига бож тўловларини, солиқлар ва йиғимларни жорий қилмайдилар, шунингдек, мазкур Битим доирасидаги товарларни экспорт ва ёки импорт қилишга миқдорий чеклашларни ёки эквивалент чораларни қўлламайдилар. Савдо тартибини қўллаш хусусиятлари товарларнинг келишилган номлари бўйича, мазкур Битимнинг таркибий қисми бўлган ҳар йилги икки томонлама ҳужжатлар билан расмийлаштирилади.

2. Аҳдлашувчи Томонлар мазкур Битимнинг таркибий қисми бўлувчи алоҳида ҳужжатда товарларнинг келиб чиқишини аниқлашнинг батафсил қоидаларини ишлаб чиқишга келишдилар, унга қуйидагилар асос қилиб олинади, яъни товарлар:

а) тўлалигича Аҳдлашувчи Томонларнинг ҳудудида ишлаб чиқарилади;

б) учинчи мамлакатда чиқарилган хом ашё, материаллар ва бутловчи буюмлардан фойдаланиб, Аҳдлашувчи Томоннинг ҳудудида ишлов беришга жалб этилади ва шу муносабат билан тўртта дастлабки белгиларидан келиб чиққан ҳолда товарларни тавсифлаш ва кодлаштиришнинг уйғунлашган тизими таснифи бўйича мансублигини ўзгартиради;

в) «б» бандда кўрсатилган хом ашё, материаллар ва бутловчи буюмлардан фойдаланган ҳолда ишлаб чиқарилади, бунда уларнинг умумий қиймати сотиладиган товарлар экспорт нархининг қайд қилинган улушидан ошмаслиги керак.

Аҳдлашувчи Томонлар:

мазкур Битимнинг кучи амал қиладиган товарларни импорт ёки экспорт қилишга нисбатан шундай вазиятда айнан шундай ички ишлаб чиқарилган товарларга ёки учинчи мамлакатларда ишлаб чиқарилган товарларга қўлланилмайдиган қандайдир махсус чеклашларни ёки талабларни жорий қилмайдилар;

Аҳдлашувчи Томонларнинг бирига тегишли бўлган товарларни омборларга жойлаш, юклаш-тушириш, сақлаш, ташиш, шунингдек, тўловлар ва тўловларни кўчиришга нисбатан шундай вазиятларда ўз товарларига ёки учинчи мамлакатларда ишлаб чиқарилган товарларга нисбатан қўлланиладиган бошқача қоидаларни қўллайдилар.

Аҳдлашувчи Томонлар мазкур Битим доирасида товарларни экспорт ёки импорт қилишга миқдорий чеклашларни ёки шуларга тенг чораларни қўллашдан тийилиб турадилар.

Аҳдлашувчи Томонлар миқдорий чеклашларни қўллаш муносабати билан пайдо бўлувчи барча масалаларни маслаҳатлашувлар йўли билан ҳал қилишга интиладилар.

Аҳдлашувчи Томонларнинг ҳар бири товарларни қайта экспорт қилишга йўл қўймайдилар, экспорт қилинадиган ушбу товарлар ишлаб чиқарилувчи иккинчи Аҳдлашувчи Томон тарифли ёки нотарифли тартибга солиш чораларини қўллайди. Томонлар қайта экспорт қилинадиган товарлар рўйхатини белгилайдилар, шунингдек, тариф билан ва нотариф бошқариш чоралари қўлланиладиган товарлар рўйхатларини айирбошлайдилар.

Бундай товарларни учинчи мамлакатларга қайта экспорт қилиш фақат мазкур товарларни ишлаб чиқарувчи мамлакат ҳисобланувчи давлат ваколатли органининг ёзма розилиги билан ва у белгилайдиган шартларда амалга оширилиши мумкин. Мазкур қоида бажарилмаган ҳолда манфаатларига зиён етган Аҳдлашувчи Томон бир томонлама тартибда рухсат берилмаган қайта экспортга йўл қўйган давлат ҳудудига товарларни олиб кетишни тартибга солиш чораларини жорий қилишга ҳақлидир. Бунда бундай қайта экспортдан тушган барча валюта тушуми тегишли товарлар чиқарилган мамлакатга қайтарилади.

Мазкур модданинг мақсадлари учун қайта экспорт деганда ишлаб чиқарилган товарни Аҳдлашувчи Томонлардан бирининг бож олиш ҳудудидан иккинчи Аҳдлашувчи Томоннинг учинчи мамлакатга экспорт қилиш мақсадида ўз бож олиш ҳудудидан олиб чиқиб кетиши тушунилади.

Аҳдлашувчи Томонлар мунтазам асосда бож масалалари, шу жумладан, бож статистикаси юзасидан тўла ҳажмда ахборот алмашиб турадилар. Аҳдлашувчи Томонларнинг тегишли ваколатли органлари бундай ахборотни алмашлаш тартибини келишиб оладилар.

1. Аҳдлашувчи Томонлар учинчи мамлакатлар билан савдо-сотиқда қўлланиладиган бож тўловлари ставкалари даражаларини яқинлаштириш чораларини кўрадилар ва шу мақсадда мунтазам маслаҳатлашувлар ўтказиб турадилар.

2. Аҳдлашувчи Томонлар ўз давлатларида амалда бўлган бож тарифлари тўғрисидаги тарифлардан барча истиснолар тўғрисида бир-бирларини хабардор қиладилар.

Аҳдлашувчи Томонлар инсофсизлик билан қилинган, жумладан, қуйидагиларда намоён бўлувчи амалий ишни мазкур Битим мақсадларига мос эмас деб ҳисоблайдилар;

корхоналар, уларнинг бирлашмалари ўртасида Аҳдлашувчи Томонларнинг ҳудудида рақобатга халақит бериш ёки чеклашни ёхуд унинг учун шарт-шароитни барбод этишни мақсад қилиб қўйган шартномалар тузишда;

бир ёки бир неча корхонанинг ўз устунлик мавқеидан фойдаланиб, Аҳдлашувчи Томонлар ҳудудининг барча ёки катта қисмида рақобатни чеклаб қўядиган хатти-ҳаракатларни қилишда.

Икки томонлама иқтисодий муносабатларни тарифли ёки нотарифли тартибга солиб бориш чораларини амалга оширишда статистик ахборотни алмашиш, бож аъмолларини бажариш учун Аҳдлашувчи Томонлар Товарларни тавсифлаш ва кодлаштиришнинг уйғунлашган тизимига ҳамда Европа иқтисодий ҳамжамиятининг биргаликдаги, тариф-статистика номланишига асосланган ягона тўққиз белгили Ташқи иқтисодий фаолиятнинг товарлар номенклатурасидан (ТИФ ТН) фойдаланишга келишиб олдилар. Бунда ўз давлатларининг эҳтиёжлари учун Аҳдлашувчи Томонлар зарурат бўлганда Товарлар номенклатурасини тўққиз белгидан ташқарида ривожлантиришни амалга оширадилар.

Товарлар номенклатурасининг эталон нусхасини юритишни Россия Федерацияси тегишли халқаро ташкилотлардаги мавжуд ваколатхоналари орқали, Ўзбекистон Республикаси бундай нусхани мустақил юритиш ҳақида билдирмаган вақт мобайнида амалга оширади.

Аҳдлашувчи Томонлар транзит эркинлиги қоидасига риоя қилиш мазкур Битим мақсадларига эришишнинг муҳим шарти эканлигига ҳамда уларнинг халқаро меҳнат тақсимоти ва кооперацияси тизимига қўшилиши жараёнининг асосий элементи ҳисобланишига розидирлар.

Шу муносабат билан ҳар бир Аҳдлашувчи Томон иккинчи Аҳдлашувчи Томоннинг ёки учинчи мамлакатнинг бож олиш ҳудудида ишлаб чиқарилган ҳамда бошқа Аҳдлашувчи Томоннинг ёки исталган учинчи томоннинг бож олиш ҳудуди учун мўлжалланган товарларни ўз ҳудуди орқали тўсиқсиз олиб ўтишни таъминлайди, экспортчиларга, импортчиларга ёки ташувчиларга транзитни таъминлаш учун барча мавжуд бўлган ва зарур воситалар ва хизматларни ўз экспортчиларига, импортчиларига ёки ташувчиларига ёхуд исталган учинчи мамлакатнинг экспортчиларига, импортчиларига ёки ташувчиларига айнан шу воситалар ва хизматларни берадиганидан ёмон бўлмаган шартларда беради.

Транспортнинг исталган туридаги тарифлар, шу жумладан, тушириш-юклаш ишлари учун тарифлар иқтисодий асосланган бўлади ҳамда товарларни омборларга жойлаш, юклаш-тушириш, сақлаш ва ташиш хизматлари ҳақини исталган учинчи давлатнинг валютасида тўлаш талаб қилинмайди.

Келишилган экспортни назорат қилиш сиёсатини ўтказиш учун Аҳдлашувчи Томонлар Давлатлараро мувофиқлаштириш кенгаши тузишлари мумкин.

Мазкур Битим қоидалари Аҳдлашувчи Томонлар ўртасида илгари тузилган битимлар қоидаларини кейинги қоидалар биринчиларига қанчалик номослиги ёки улар билан айнанлиги даражасига қараб ўзгартирилади. Аҳдлашувчи Томонлар ўз ваколатли органларига мазкур масала бўйича тегишли протокол тайёрлашни топширадилар.

Мазкур битим Аҳдлашувчи Томонларнинг илгари учинчи мамлакатлар билан тузган бошқа битимлари ҳаракатига дахл қилмайди.

Мазкур Битимдаги ҳеч бир нарса Аҳдлашувчи Томонларнинг учинчи давлатлар билан, шунингдек, уларнинг бирлашмалари ва халқаро ташкилотлар билан бўлган мазкур Битимнинг мақсадлари ва шартларига зид келмайдиган муносабатларини амалга оширишга монелик қилмайди.

Аҳдлашувчи Томонлар ўртасидаги мазкур Битим қоидаларини талқин қилиш ёки қўлланишга доир баҳслар музокаралар йўли билан ҳал этилади.

Аҳдлашувчи Томонлар шунга келишдиларки, Ўзбекистон Республикаси Россия Федерациясида ўз Савдо ваколатхонасини таъсис этади, Россия Федерацияси Ўзбекистон Республикасида ўз Савдо ваколатхонасини таъсис этади. Ушбу Савдо ваколатхоналарининг ҳуқуқий мақоми, уларнинг вазифалари, қаерга жойлашиши ва ташкил этиш тартиби қўшимча келишиб олинади.

Исталган давлат, мазкур Битимга, қўшиладиган давлат билан Аҳдлашувчи Томонлар ўртасида келишиб олинадиган шартларда, қўшилиши мумкин.

Томонлар 1992 йилнинг охиригача имзолаш мажбуриятини оладиган эркин савдо режимидан чиқариш тўғрисидаги Протокол ушбу Битимнинг таркибий қисми ҳисобланади.

Мазкур Битим Аҳдлашувчи Томонларнинг бунинг учун зарур бўлган давлат ичидаги аъмолларни бажарганликлари тўғрисидаги хабарномаларни алмашишган пайтидан кучга киради ҳамда Аҳдлашувчи Томонлардан бири бошқа Аҳдлашувчи Томонга унинг амал қилишини тўхтатиш мақсади ҳақида ёзма хабарнома юборган пайтдан бошлаб ўн икки ой ўтгунга қадар ўз кучида қолади.

1992 йил 13 ноябрда Москва шаҳрида ҳар бири ўзбек ва рус тилларида бўлган иккита асл нусхада тузилди, бунда ҳар икки матн бир хил кучга эгадир.