Ўзбекистон Республикаси Ҳукумати билан Украина Вазирлар Маҳкамаси, бундан кейин «Томонлар» деб аталувчилар,

амалдаги қонун ва меъёрлардан келиб чиқадиган ҳуқуқ ҳамда кафолатларни ҳурмат қилган ҳолда,

халқаро шартномалар қоидаларига амал қилиб,

ноқонуний кўчишга қарши баҳамжиҳат равишда кураш олиб бориш ниятида,

қуйидагилар тўғрисида аҳдлашиб олдилар:

1. Томонлардан ҳар бири бошқа Томоннинг тақдимига биноан қабул қилиб олувчи Томон давлатининг фуқароси эканлигига далиллар мавжуд бўлган тақдирда, тегишли ҳужжатларни тайёрлаб, топширувчи Томон давлати ҳудудига кириш ва унда бўлиш шартларига риоя қилмаган шахсларни қабул қилиб олади ва топширади.

2. Топширувчи Томон қабул қилиб олинадиган шахсларни топшириш учун зарур бўладиган ҳужжатларни тезлик билан расмийлаштиради.

3. Агар кейинги текширишларда топшириш-қабул қилиб олиш чоғида шахслар қабул қилган Томон давлатининг фуқароси бўлмаганлиги аниқланса, топширган Томон худди шундай тарзда фуқаролиги аниқланмаган шахсларни қайтариб олади.

1. Агар учинчи давлатларнинг фуқаролари ва фуқаролиги бўлмаган шахслар қабул қилувчи Томон давлати ҳудудидан топширувчи Томон давлати ҳудудига топширувчи Томон ҳудудига кириш ва унда бўлиш тартибини бузган ҳолда ўтган бўлсалар, қабул қилувчи Томон топширувчи Томон давлатининг тақдимига биноан уларни қабул қилади.

2. Шахсларни топшириш-қабул қилиб олиш юзасидан ушбу модданинг 1-бандида кўрсатилган мажбуриятлар кириш визаси ёки кирилган давлатнинг тегишли органлари томонидан расмийлаштирилган яшаб туриш учун рухсатномаси бор шахсларга нисбатан, улар мазкур давлат ҳудудига кирган бўлсалар, қўлланмайди.

3. Томонлар уларнинг ҳудудида ноқонуний яшаб турган учинчи давлатларнинг фуқароларини ўз давлатига қайтариб юбориш учун барча чораларни кўрадилар.

4. Топширувчи Томон давлати ҳудудида бўлган шахс кириш ва яшаб туриш шартларига риоя қилмаётган бўлса ва бундай шахс қабул қилувчи Томон тарафидан тақдим этилган ҳақиқий виза ёинки яшаб туриш учун рухсатномага эга бўлса, ушбу шахс қабул қилувчи Томон тарафидан қабул қилиб олиниши керак.

1. Қабул қилувчи Томон шахсларни топшириш-қабул қилиб олиш тўғрисидаги сўровларга ҳар қандай ҳолда ҳам ўттиз суткадан кечиктирмай жавоб қайтариши керак.

2. Қабул қилувчи Томон топшириш-қабул қилиб олиш масаласи келишиб бўлинган шахсларни, ҳар қандай шароитга қарамай, узоғи билан ўттиз кун ичида қабул қилиб олади. Бу муддат топширувчи Томоннинг сўровига кўра, шахсларни ўз вақтида топширишга халал берувчи сабаблар мавжуд бўлган тақдирда, узайтирилиши мумкин.

3. 2-моддада кўрсатилган шахсларни топшириш-қабул қилиб олиш учун тақдимномалар топширувчи Томон уларнинг қабул қилиб олувчи Томон давлати ҳудудидан кириши ва ўз давлати ҳудудида яшаб туришини ноқонуний деб топган санадан бошлаб олти ой ичида кўриб чиқилиши керак.

1. Агар Томонлардан бири бу тўғрисида илтимос қилса ва бошқа транзит давлатлари ҳамда тайинланган давлат тарафидан шахсни топшириш-қабул қилиб олиш кафолатланса, Томонлар учинчи давлатларнинг фуқаролари ва фуқаролиги бўлмаган шахсларга ўз давлати ҳудудидан шахсни топшириш-қабул қилиб олиш мақсадида транзит ўтишга рухсат берадилар.

2. Сўралаётган Томон транзит визасини расмийлаштириши шарт эмас.

3. Транзит ўтиши тасдиқланган шахслар, уларга рухсатнома берилган бўлишига қарамай, 1-модданинг 3-бандида кўзда тутилган шартларга кўра бошқа Томонга қайтарилиши мумкин. Мазкур шахслар, агар уларнинг учинчи давлат ҳудудидан транзит ўтиши ёки тайинланган давлат тарафидан қабул қилиниши кафолатланмаса, шунингдек юборилган шахсларнинг кейинги транзит давлати ва тайинланган давлат ҳудудига бормаганлиги учун жавобгарлик уларнинг зиммасида бўлса, улар бошқа Томонга қайтарилиши мумкин.

4. Томонлар ўзлари келган давлатга бевосита юборилиши мумкин бўлган шахсларнинг транзит йўналишларини қисқартиришлари мумкин.

Ушбу Битимни амалга ошириш учун шахслар тўғрисида маълумот лозим бўлса, ахборот фақат қуйидагилар билан чекланиши мумкин:

1) топширилаётган шахс ва лозим топилса, унинг оила аъзолари тўғрисида маълумотлар (фамилияси, исми, барча аввалги исмлари, лақаблари туғилган вақти ва жойи, жинси, ҳозирги ва барча бошқа фуқаролиги);

2) паспорти ёки унинг шахсини тасдиқлайдиган бошқа ҳужжати (бунга айни ҳужжатнинг номери, амал қилиш муддати, берилган санаси, берган орган, берилган жойи ва ҳ.лар ҳам киради);

3) топширилаётган шахсларнинг тайинини аниқлаш учун зарур бўладиган бошқа маълумотлар;

4) тўхташ жойлари ва йўналишлар;

5) Томонлардан бири тарафидан расмийлаштирилган яшаб туриш учун рухсатнома ёки визалар.

1. Топшираётган Томон ушбу Битимнинг 1 ва 2-моддасида тилга олинган шахсларни қабул қилаётган Томон давлати чегарасигача ташиш харажатларини қоплайди.

2. Тайинланган давлат чегарасигача транзит ташиш ва зарур ҳолларда қайтиш учун харажатларини топшираётган Томон тўлайди.

Томонлар ўртасида ушбу Битимни қўллаш ёки талқин қилишга тааллуқли ҳар қандай келишмовчиликлар маслаҳатлашув ва музокаралар орқали ҳал этилади.

Ўзбекистон Республикаси Ички ишлар вазирлиги билан Украина Ички ишлар вазирлиги ушбу Битимнинг таркибий қисми ҳисобланадиган алоҳида баённома тузиб, унда ушбу Битимни қўллашнинг зарур шартларини, жумладан қуйидагиларни келишиб оладилар:

1) ўзаро мулоқот тарзи;

2) топшириш-қабул қилиб олиш учун зарур бўлган ҳужжатлар ва маълумотлар;

3) ушбу Битимни амалга оширишга масъул бўлган органларнинг учрашувлари юзасидан келишувлар;

4) шахсларни топшириш-қабул қилиб олиш учун давлат чегаралари орқали халқаро ўтказиш пунктлари рўйхати;

5) ташиш шарт-шароитлари.

Ушбу Битим Томонларнинг Ўзбекистон Республикаси ва Украина иштирок этган бошқа халқаро шартномаларидан келиб чиқадиган ҳуқуқ ва мажбуриятларига дахл қилмайди.

Томонлар ўзаро келишувга кўра ушбу Битимга ўзгартиш ва қўшимчалар киритишлари мумкин. Улар ушбу Битим 11-моддасининг 1-бандида кўзда тутилган тартибда кучга киргач, унинг таркибий қисми ҳисобланади.

1. Ушбу Битим чекланмаган муддатга тузилган ва Томонлар дипломатик каналлар орқали нота алмашиб ушбу Битимни кучга киритиш учун зарур давлат ички процедураларини бажарганликлари тўғрисида бир-бирларини хабардор этганларидан сўнг ўттизинчи куни кучга киради.

2. Ушбу Битим Томонлардан бири бошқа Томонга тегишли нота олинган санадан кейин тўқсон кун ўтгач амал қилишдан тўхтайди.

Тошкент шаҳрида, 2000 йил 12 октябрда икки нусхада, ҳар бири ўзбек, украин ва рус тилларида тузилди, бунда барча матнлар бир хил кучга эга.

Ушбу Битим қоидаларини талқин қилишда рус тилидаги матндан фойдаланилади.