Ўзбекистон Республикаси «Аҳолини иш билан таъминлаш тўғрисида»ги Қонунининг 22-моддаси ҳамда Ўзбекистон Республикаси Вазирлар Маҳкамасининг 1999 йил 19 июлдаги 353-сон «Ҳақ тўланадиган жамоат ишларини ташкил қилиш тўғрисида»ги низомини тасдиқлаш ҳақида»ги қарорига биноан, тумандаги фуқароларни ҳақ тўланадиган жамоат ишларига жалб этиш учун зарур шароитлар яратиш, иқтисодиётнинг ва ижтимоий соҳанинг муҳим объектларини ишчи кучи билан таъминлашни, ишсизлар ўртасида боқимандаликнинг олдини олиш мақсадида қарор қиламан:

1. Ўзбекистон Республикаси «Аҳолини иш билан таъминлаш тўғрисида»ги Қонунининг 22-моддасига асосан 2013 йилда туманда ушбу қарорга иловада* кўрсатилган корхона, муассаса ва ташкилотларда ҳақ тўланадиган жамоат ишлари амалга оширилиши ташкил этилсин.

2. Туман Бандликка кўмаклашиш ва аҳолини ижтимоий муҳофаза қилиш маркази (Б. Абдуллаев)га иш қидираётган ва ишсиз шахслар таркиби ва сонини ҳисобга олган ҳолда ишчи кучига бўлган талаб ва таклифларни таҳлил қилиш асосида аҳолини иш билан таъминлаш минтақавий дастурининг махсус бўлимига киритиладиган ҳақ тўланадиган жамоат ишларини ташкил қилиш бўйича таклифларни тайёрлаш ва туман ҳокимлигига тақдим этиш вазифаси юклатилсин.

3. Ҳақ тўланадиган жамоат ишларини маблағ билан таъминлаш юқорида кўрсатилган низомнинг 23-бандида белгиланган тартибда амалга оширилсин.

4. Ўзгалар парваришига муҳтож ёлғиз кексалар, пенсионерлар ва ногиронларнинг уйига бориб ижтимоий хизмат кўрсатиш бўйича ҳақ тўланадиган жамоат ишларига жалб этилган, меҳнат бўлимларида рўйхатга олинган ишсиз фуқароларга иш ҳақи тўлаш харажатлари тўлиқ иш билан таъминлашга кўмаклашиш давлат жамғармаси маблағлари ҳисобидан амалга оширилиши белгилаб қўйилсин.

5. Мазкур қарор қабул қилиниши муносабати билан туман ҳокимининг 2012 йил 16 апрелдаги 189-сонли қарори ўз кучини йўқотган деб ҳисоблансин.

6. Ушбу қарорнинг ижросини назорат қилиш туман ҳокимининг ўринбосари А. Бобобеков зиммасига юклатилсин.