Ўзбекистон Республикаси Вазирлар Маҳкамасининг 2013 йил 3 декабрдаги 315-сонли «Республика аҳоли пунктларида санитария жиҳатидан тозалаш тизимини ривожлантириш ва такомиллаштириш чора-тадбирлари тўғрисида»ги (Ўзбекистон Республикаси қонун ҳужжатлари тўплами, 2013 й., 49-сон, 632-модда) ҳамда шу асосида вилоят ҳокимининг 2013 йил 7 декабрдаги 266-қ-сонли қарорлари ижросини ташкил этиш мақсадида қарор қиламан:

1. Ўзбекистон Республикаси Вазирлар Маҳкамасининг 2013 йил 3 декабрдаги 315-сонли «Республика аҳоли пунктларида санитария жиҳатидан тозалаш тизимини ривожлантириш ва такомиллаштириш чора-тадбирлари тўғрисида»ги ҳамда шу асосида вилоят ҳокимининг 2013 йил 7 декабрдаги 266-қ-сонли қарорлари раҳбарлик ва ижро учун қабул қилинсин.

2. Ўзбекистон Республикаси Вазирлар Маҳкамасининг ҳамда вилоят ҳокимининг мазкур қарорлари билан қуйидагилар республика минтақаларида аҳолининг қаттиқ маиший чиқиндиларини ташиб кетиш бўйича санитария жиҳатидан тозалашни ташкил қилишнинг асосий вазифалари этиб белгиланганлиги:

шаҳарлар ва аҳоли пунктларининг ташқи қиёфасига бўлган замонавий шаҳарсозлик талабларини ҳисобга олган ҳолда, қаттиқ маиший чиқиндиларни ташиб кетиш ва уларни санитария қоидалари ва нормаларига қатъий мувофиқ ҳолда жойлаштириш ишларининг ташкил этилишини таъминлаш;

барча босқичларда, шу жумладан полигонларда қаттиқ маиший чиқиндиларни тўплаш, сортларга ажратиш, ташиш, полигонларда кўмиб ташлашда санитария жиҳатидан тозалаш объектларидан фойдаланиш ва сақлаш ҳамда уларни санитария ва экология талабларига мувофиқ ҳолда утилизация қилиш ишларини ташкил этиш;

аҳоли бандлигини ошириш, санитария жиҳатидан тозалаш соҳасидаги ишларни самарали ташкил этиш учун қўшимча иш ўринлари ва шарт-шароитлар яратиш;

қаттиқ маиший чиқиндиларни ташиб кетиш бўйича хизматлар кўрсатадиган ташкилотларнинг моддий-техника базасини мустаҳкамлаш;

қаттиқ маиший чиқиндилар билан ишлаш объектларининг санитария ва экологик ҳолати юзасидан жамоатчилик назоратини таъминлаш маълумот учун қабул қилинсин.

3. Қуйидагилар:

2014-2015 йилларда Оқдарё туман Ободонлаштириш бошқармасини махсус техника билан жиҳозлаш дастури 1-иловага* мувофиқ;

2014-2015 йилларда туман аҳоли пунктларида ахлатларни тўплаш шохобчаларини қуриш ва уларни контейнерлар билан жиҳозлаш дастури 2-иловага* мувофиқ;

2014-2015 йилларда Ободонлаштириш бошқармаларининг фаолият кўрсатаётган қаттиқ маиший чиқиндилар полигонларини тартибга солиш ва уларни махсус техника билан жиҳозлаш дастури 3-иловага* мувофиқ;

юқоридаги қарорлар билан тасдиқланган дастурларни молиялаштириш манбалари 4-иловага* мувофиқ;

2014-2015 йилларда Оқдарё туман марказларида, туман посёлкаларида ва қишлоқ аҳоли пунктларида санитария жиҳатидан тозалашни ташкил этишга доир комплекс тадбирлар (кейинги ўринларда Комплекс тадбирлар деб аталади) 5-иловага* мувофиқ;

Оқдарё туман ҳокимлик даражасида Комплекс тадбирларни бажариш бўйича Ишчи гуруҳ таркиби 6-иловага* мувофиқ тасдиқлансин.

4. Туман Табиатни муҳофаза қилиш инспекцияси (Ж. Умаров), туман бош архитектори (А. Воҳидов), туман тиббиёт бирлашмаси (Д. Тоғаев), туман ҳокимлиги молия бўлими (Ҳ. Самандаров), туман ҳокимлиги иқтисодиёт бўлими (И. Нарзуллаев) белгиланган тартибда таъминласинлар:

ҳар йили 1 мартгача танлов савдолари ўтказиш, пудрат шартномаларини белгиланган тартибда тузиш ҳамда ахлатларни тўплаш шохобчалари ва қаттиқ маиший чиқиндилар полигонлари қуришнинг якуний манзилли рўйхатларини тасдиқлаш;

тасдиқланган дастурларнинг, Комплекс тадбирларнинг ва ажратилаётган маблағлардан мақсадли фойдаланишнинг амалга оширилиши юзасидан тизимли мониторинг олиб бориш;

улар ўртасида кооперация алоқаларини ўрнатилган ҳолда қаттиқ маиший чиқиндиларни сортларга ажратиш ва қайта ишлаш бўйича тижорат ташкилотлари ташкил этиш.

Вазирлар Маҳкамасининг 2013 йил 3 декабрдаги 315-сонли қарорининг 3-банди иккинчи, учинчи, олтинчи хатбошиларда кўрсатилган вазифалар ижрочилар томонидан туман ҳокимининг 2013 йил 17 декабрдаги 646-сонли қарори билан бажарилганлиги инобатга олинсин.

5. Белгилансинки, қаттиқ маиший чиқиндиларни ташиб кетиш хизматлари кўрсатиш туман марказида, шаҳарча посёлкаларида ва қишлоқ аҳоли пунктларида — Ободонлаштириш бошқармаси томонидан амалга оширилади.

6. Белгилаб қўйилсинки, туманда ахлатларни тўплаш шахобчалари қурилиши тугаллангач ва улар контейнерлар билан жиҳозлангач ахлатларни тўплаш шохобчалари, келгусида улардан фойдаланиш учун, санитария жиҳатидан тозалаш бўйича ихтисослаштирилган ташкилотлар томонидан текин фойдаланиш учун берилади.

7. ОАТБ «Агробанк» Лойиш филиали (А. Муродов) ва туман тижорат банкларига, махсус техника сотиб олиш, қаттиқ маиший чиқиндилар полигонларини тартибга солиш ва жиҳозлаш учун санитария жиҳатидан тозалаш бўйича ихтисослаштирилган ташкилотларга 2-иловага* мувофиқ имтиёзли кредитлар ажратиш тавсия этилсин.

8. Вазирлар Маҳкамасининг «Республика аҳоли пунктларини ободонлаштириш ишларини ташкил этишни такомиллаштириш чора-тадбирлари тўғрисида»ги 2013 йил 10 январдаги 4-сон қарорига (Ўзбекистон Республикаси ҚТ 2013 й., 1-сон, 2-модда) ўзгартириш ва қўшимчалар киритилганлиги муносабати билан туман ҳокимининг қарорига 7-иловага* мувофиқ ўзгартириш ва қўшимчалар киритилсин.

9. Мазкур қарорнинг бажарилишини назорат қилиш туман ҳокимининг биринчи ўринбосари Б. Кадиров зиммасига юклансин.

10. Ушбу қарор расмий эълон қилинган кундан эътиборан кучга киради.