Ўзбекистон Республикаси «Маҳаллий давлат ҳокимияти тўғрисида»ги Қонуннинг 6-моддасига асосан Оқолтин туман ҳудудидаги иш билан банд бўлмаган «ишсиз» мақоми берилган фуқароларни ишга жойлаштириш борасида вужудга келган оғир вазиятдан чиқиш ҳамда туман Бандликка кўмаклашиш ва аҳолини ижтимоий муҳофаза қилиш марказининг таклифларига кўра ташкилот ва корхоналарда ҳақ тўланадиган жамоат ишларини яъни, ҳамма учун қулай, махсус касб-ҳунар тайёргарлиги талаб қилмайдиган, вақтинчалик иш жойларини барпо этиш мақсадида қарор қиламан:

1. Оқолтин туман корхона, ташкилот ва муассасалар (1-иловадаги* рўйхат бўйича) раҳбарларига туман Бандликка кўмаклашиш ва аҳолини ижтимоий муҳофаза қилиш маркази билан биргаликда шартномалар асосида 2014 йил давомида ҳақ тўланадиган жамоат ишларини ташкил этиш вазифаси юклатилсин.

2. Ҳақ тўланадиган жамоат ишларини маблағ билан таъминлаш иш берувчилар томонидан ўз маблағлари, шунингдек маҳаллий бюджет ва иш билан таъминлашга кўмаклашиш давлат жамғармаси маблағлари ҳисобига амалга оширилади. Бунда ҳақ тўланадиган жамоат ишларига жалб қилинган фуқаролар меҳнатига ҳақ тўлаш харажатларининг:

давлат ҳокимияти органига қарашли корхоналар, муассасалар ва ташкилотлар бўйича 50 % иш берувчилар маблағлари, 50 % маҳаллий бюджет ва иш билан таъминлашга кўмаклашиш давлат жамғармаси маблағлари ҳисобига;

бошқа корхоналар, муассасалар ва ташкилотлар бўйича 75 % иш берувчилар маблағлари ва 25 % иш билан таъминлашга кўмаклашиш давлат жамғармаси маблағлари ҳисобига амалга оширилади.

3. Корхона, ташкилот ва муассасалар раҳбарлари туман Бандликка кўмаклашиш ва аҳолини ижтимоий муҳофаза қилиш маркази билан биргаликда ҳақ тўланадиган жамоат ишларини ташкиллаштиришни Ўзбекистон Республикаси Вазирлар Маҳкамасининг 1999 йил 19 июлдаги 353-сонли қарорининг 1-иловасига яъни «Ўзбекистон Республикасида ҳақ тўланадиган жамоат ишларини ташкил қилиш ҳақида»ги низомига асосан амалга оширилсин.

4. Мазкур қарорнинг ижросини назорат қилиш туман ҳокимининг ижтимоий иқтисодий масалалар бўйича ўринбосари М. Холбоев зиммасига юклатилсин.