Ўзбекистон Республикасининг «Аҳолини иш билан таъминлаш тўғрисида»ги Қонуни 17- ва 22-моддалари, Вазирлар Маҳкамасининг 1999 йил 19 июлдаги 353-сонли қарори билан тасдиқланган «Ҳақ тўланадиган жамоат ишларини ташкил қилиш тўғрисида»ги Низоми ҳамда Ўзбекистон Республикаси Президентининг 2007 йил 6 апрелдаги ПҚ-616-сонли қарорига асосан ишга жойлашишга муҳтож, касбга эга бўлмаган ёшларни, шунингдек иш билан банд бўлмаган ва ишсиз аҳолини ҳақ тўланадиган жамоат ишларига жалб этиш мақсадида, Ўзбекистон Республикасининг «Маҳаллий давлат ҳокимияти тўғрисида»ги Қонуни 6-моддасига асосан қарор қиламан:

1. Туман бандликка кўмаклашиш ва аҳолини ижтимоий муҳофаза қилиш марказининг ишга жойлашишга муҳтож иш билан банд бўлмаган аҳолининг (касбга эга бўлмаган ёшларни) бандлигини таъминлаш ҳамда туманнинг қишлоқ хўжалиги, ободонлаштириш ва кўкаламзорлаштириш ишларига кўмаклашишни ташкил этиш юзасидан «Ҳақ тўланадиган жамоат ишларини ташкил этиш тўғрисида»ги таклифи маъқуллансин.

2. Туман бандликка кўмаклашиш ва аҳолини ижтимоий муҳофаза қилиш марказида 2012 йил мобайнида иш қидирувчи сифатида рўйхатга олинган ва ишсиз деб эътироф этилган фуқароларни корхона, ташкилот ва муассасаларда ҳақ тўланадиган жамоат ишларига жалб этиш ва жамоат ишларига йўналтириладиган ишсизлар сони 1-иловага, жамоат ишларини ташкил этиш бўйича ишчи гуруҳ таркиби 2-иловага асосан тасдиқлансин.

3. Ҳақ тўланадиган ишларни бажариш учун юборилган шахсларга корхоналарда амалда бўлган ставкалар ва лавозим маошларидан (ишбай нархлар)дан келиб чиққан ҳолда, амалда бажарилган иш учун, аммо амалда ишлаган вақт учун ишсизлик бўйича нафақа миқдорининг 15 фоизга кўпайтирилганидан кам бўлмаган миқдорда иш ҳақи тўланади агар қонун ҳужжатларида бошқача ҳол назарда тутилмаган бўлса.

4. Белгилаб қўйилсинки:

ҳақ тўланадиган жамоат ишларига жалб қилинган фуқаролар меҳнатига ҳақ тўлаш харажатлари давлат ҳокимияти органларига қарашли корхоналар, муассасалар ва ташкилотлар бўйича — эллик фоизни иш берувчилар маблағлари ва эллик фоизи маҳаллий бюджет ҳамда Иш билан таъминлашга кўмаклашиш давлат жамғармаси маблағлари ҳисобига бошқа корхоналар, муассасалар ва ташкилотлар бўйича — етмиш беш фоизни иш берувчилар маблағлари ва йигирма беш фоизи Иш билан таъминлашга кўмаклашиш давлат жамғармаси маблағлари ҳисобига амалга оширилади;

Вазирлар Маҳкамасининг 1999 йил 19 июлдаги 353-сонли қарори билан тасдиқланган «Ҳақ тўланадиган жамоат ишларини ташкил қилиш тўғрисида»ги Низомнинг 25-бандига мувофиқ аҳолини иш билан таъминлашда ноқулай вазиятлар билан боғлиқ истисно холларда, шунингдек ҳақ тўланадиган жамоат ишларига жалб қилинган фуқаролар меҳнатига ҳақ тўлаш харажатлари Иш билан таъминлашга кўмаклашиш давлат жамғармаси маблағлари ҳисобига қуйидаги миқдорларда қопланиши мумкин;

жойлардаги давлат ҳокимияти мулки бўлган корхоналарда, хўжалик ҳисобидаги корхоналардан ташқари меҳнатга ҳақ тўлаш харажатларининг етмиш беш фоизи;

бошқа корхоналарда — меҳнатга ҳақ тўлаш учун харажатларни кўпи билан эллик фоизи.

5. Ўзгалар парваришига муҳтож ёлғиз кексалар, пенсионерлар ва ногиронларнинг уйига бориб ижтимоий хизмат кўрсатиш бўйича ҳақ тўланадиган жамоат ишларига жалб этилган, туман бандликка кўмаклашиш ва аҳолини ижтимоий муҳофаза қилиш марказида рўйхатга олинган ишсиз фуқароларга иш ҳақи тўлаш харажатлари тўлиқ Иш билан таъминлашга кўмаклашиш давлат жамғармаси маблағлари ҳисобидан амалга оширилади.

6. Туман бандликка кўмаклашиш ва аҳолини ижтимоий муҳофаза қилиш марказида иш қидирувчи сифатида рўйхатга олинган ва ишсиз деб эътироф этилган фуқароларнинг касб маҳорати, тажрибаси, ёши, жинси ва бошқа хусусиятларини ҳамда жамоат ишларини ташкил этаётган тегишли корхона, ташкилот ва муассасалардаги ишнинг турли, зарурий меҳнат шароитларини ҳисобга олган ҳолда ҳақ тўланадиган жамоат ишларига жалб қилиш туман бандликка кўмаклашиш ва аҳолини ижтимоий муҳофаза қилиш маркази директори М. Азизов зиммасига юклатилсин.

7. Мазкур қарорнинг ижросини таъминлаш хокимнинг иқтисодий ва ижтимоий ривожлантириш масалалари бўйича ўринбосари З. Баратовга юклатилиб, умумий назорат ўз зиммамда қолдирилсин.