Ўзбекистон Республикаси Ҳукумати ва Исроил Давлати Ҳукумати, бундан кейин «Аҳдлашувчи Томонлар» деб аталувчилар,

Қишлоқ хўжалиги соҳасида ва қишлоқ хўжалигига алоқадор соҳаларда ўзаро манфаатли ҳамкорликни ривожлантиришга бўлган интилишдан келиб чиқиб, ҳамда

Қишлоқ хўжалиги соҳасидаги ҳамкорликнинг кучайиши иккала мамлакат орасида мавжуд бўлган дўстона муносабатларнинг келгусида янада кучайишига олиб келади, деб ишониб,

қуйидагилар тўғрисида келишиб олдилар:

Аҳдлашувчи Томонлар ўзаро манфаатдорлик, тенглик ва ҳамжиҳатлик асосида қишлоқ хўжалиги соҳасида ҳамкорликни ривожлантирадилар.

Аҳдлашувчи Томонлар қишлоқ хўжалигининг қуйидаги соҳаларида ўзаро манфаатли ҳамкорлик жабҳаларини ривожлантиришга кўмаклашадилар:

1. Қишлоқ хўжалиги маҳсулотларини етиштириш ва унга бўлган талабни режалаштириш ҳамда прогнозлаш.

2. Экинлар ўстириш, жумладан уруғ олиш, генетика, селекция, ўсимликлар ҳимояси ва иссиқхоналар иши.

3. Чорвадорлик ва паррандачилик маҳсулотларини етиштириш, жумладан чорвадорлик генетикаси, кўпайиши ва физиологияси.

4. Тупроқни тадқиқ қилиш ва эрозия назорати.

5. Ирригациянинг замонавий методларини ривожлантириш.

6. Қишлоқ хўжалиги ишлаб чиқариши соҳасида сув ресурсларини бошқариш тизими.

7. Қишлоқ хўжалиги маҳсулотларини жойлаштириш ва сақлаш, жумладан концентратлар ишлаб чиқариш технологияси.

8. Ҳамкорликнинг Аҳдлашувчи Томонлар олдиндан келишиб оладиган бошқа соҳалари.

Аҳдлашувчи Томонлар орасидаги ҳамкорлик қуйидаги шаклларда амалга оширилиши мумкин:

1. Олимлар ва экспертларни алмашиш.

2. Икки томонлама симпозиум ва конференцияларни ташкил қилиш.

3. Илмий, техникавий ва иқтисодий ахборотларни алмашиш.

4. Ўзаро манфаатли қўшма лойиҳа ҳамда дастурларни режалаштириш ва амалга ошириш.

5. Сабзавотлар, мевалар, уруғлар ҳамда чорва молларининг генетик материалларини алмашиш.

6. Ҳамкорликнинг Аҳдлашувчи Томонлар орасида келишиб олинадиган бошқа шакллари.

1. Ушбу Битимни амалга ошириш учун Аҳдлашувчи Томонлар иккала мамлакатнинг ҳукумат ташкилотлари ҳамда ноҳукумат ташкилотлари, илмий-тадқиқот институтлари ва бошқа тегишли муассаса ҳамда компаниялари орасидаги ҳамкорлик ва алоқаларни қўллаб-қувватлайдилар.

2. Ушбу Битим доирасидаги ҳамкорлик Аҳдлашувчи Томонлар давлатларининг тегишли қонун-қоидаларига мувофиқ амалга оширилади.

Аҳдлашувчи Томонларнинг вакилларидан иборат ўзбек-исроил Қўшма қўмитаси тузилади. Мутахассислар Қўшма қўмита ишига кўмаклашадилар.

Қўшма қўмитанинг вазифалари қуйидагилардан иборат:

ушбу Битимни бажариш жиҳатларини аниқлаш;

ҳамкорлик бўйича ишчи дастурларини тайёрлаш;

ҳамкорликнинг конкрет дастур ва тадбирлари амалга оширилиши учун улар устидан назорат;

ҳамкорликнинг молиявий ҳамда маъмурий шарт-шароитларини белгилаш.

Қўшма қўмита навбатма-навбат Ўзбекистон Республикасида ҳамда Исроил Давлатида олдиндан келишилган кун тартиби бўйича йилига бир марта, ёки лозим бўлган пайтда йиғилиш ўтказади.

Ушбу Битим ҳамжиҳатлик принципига асосланади, бинобарин Аҳдлашувчи Томонлар ҳамкорликнинг қўшма дастурларини амалга ошириш учун чет эл молиявий маблағларини жалб этиш имкониятларини ҳам кўриб чиқадилар.

Ушбу Битим бўйича Ўзбекистон Республикаси Ҳукумати номидан Қишлоқ ва сув хўжалиги вазирлиги, Исроил Давлати Ҳукумати номидан Қишлоқ хўжалиги ва қишлоқ тараққиёти вазирлиги ижрочи агентликлар бўлиб ҳисобланади.

1. Ушбу Битим Аҳдлашувчи Томонларнинг ички юридик тартиботларига мувофиқ маьқулланади ёки ратификация қилинади ва ушбу маъқуллаш ёки ратификация тўғрисидаги иккинчи дипломатик нота санасидан бошлаб кучга киради.

2. Ушбу Битим беш (5) йил давомида амал қилади. Шундан сўнг Аҳдлашувчи Томонлардан ҳеч қайсиси иккинчи Аҳдлашувчи Томонни тегишли муддат туташидан камида олти (6) ой илгари ушбу Битим фаолиятини тўхтатиш истаги тўғрисида дипломатик каналлар орқали ёзма равишда хабардор қилмаса, ўз-ўзидан ҳар гал кейинги беш (5) йиллик муддатларга узаяди. Ушбу Битим фаолиятининг тўхтатилиши унга мувофиқ қабул қилинган, аммо ўша вақтга қадар бажариб бўлинмаган битимлар, контрактлар ёки лойиҳаларга таъсир қилмайди.

3. Аҳдлашувчи Томонларнинг ўзаро келишувига биноан ушбу Битимнинг қоидалари ўзгартирилиши ёки тўлдирилиши мумкин. Киритилган ҳар қандай ўзгартиш ёки тўлдиришни кучга киритиш тартиби ҳам ушбу Битимни кучга киритиш тартиби кабидир (қаранг: шу модда, 1-банд).

4. Аҳдлашувчи Томонлар ушбу Битимни асос қилиб олиб, ўзаро келишга ҳолда конкрет лойиҳалар бўйича Ижровий Битим ёки протоколлар тузишлари мумкин.

5. Ушбу Битим юзасидан келиб чиқиши мумкин бўлган баҳс ҳамда келишмовчиликлар Аҳдлашувчи Томонлар орасида музокара ва маслаҳатлашувлар олиб бориш орқали ҳал қилинади.

Қуддус шаҳрида 1998 йил 15 сентябрда, бу 5758 йилнинг 24 Элулига тўғри келади, икки нусхада, ўзбек, иврит ва инглиз тилларида тузилди, барча матнлар ўзаро тенг. Талқин қилишда ҳар хилликлар юзага келса, инглиз тилидаги матн устун кучга эга бўлади.