«Жисмоний тарбия ва спорт тўғрисида»ги Ўзбекистон Республикасининг Қонуни (Ўзбекистон Республикаси Олий Мажлисининг Ахборотномаси, 2000 й., 5-6-сон, 147-модда) ва Ўзбекистон Республикаси Вазирлар Маҳкамасининг 2003 йил 13 январдаги 15-сон «Оммавий тадбирларни ўтказиш қоидаларини тасдиқлаш тўғрисида»ги қарорига (Ўзбекистон Республикаси қонун ҳужжатлари тўплами, 2003 й., 1-2-сон, 10-модда) мувофиқ, шунингдек футбол бўйича спорт мусобақаларини ўтказишда жамоат хавфсизлигини таъминлаш мақсадида буюраман:

1. Футбол бўйича спорт мусобақаларини ўтказиш вақтида томошабинларнинг (мухлисларнинг) ўзини тутиш қоидалари иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Мазкур Қоидалар «Жисмоний тарбия ва спорт тўғрисида»ги Ўзбекистон Республикасининг Қонуни (Ўзбекистон Республикаси Олий Мажлисининг Ахборотномаси, 2000 й., 5-6-сон, 147-модда) ва Ўзбекистон Республикаси Вазирлар Маҳкамасининг 2003 йил 13 январдаги 15-сон «Оммавий тадбирларни ўтказиш қоидаларини тасдиқлаш тўғрисида»ги қарорига (Ўзбекистон Республикаси қонун ҳужжатлари тўплами, 2003 й., 1-2-сон, 10-модда) мувофиқ, Ўзбекистон Республикаси ҳудудида жойлашган спорт иншоотларида футбол бўйича спорт мусобақалари ва томоша тадбирларини ўтказиш вақтида томошабинларнинг (мухлисларнинг) ўзини тутиш тартибини белгилайди.

1. Спорт иншоотига кириш вақтида томошабинлар (мухлислар):

чиптага асосан спорт иншоотига кириш ва жойлашиш;

спорт иншооти ҳудудида жойлашган сақлаш камералари, буфет, кафе ҳамда ташкилотчилар ва спорт иншооти маъмурияти томонидан тақдим этилган бошқа хизматлардан белгиланган тартибда фойдаланиш;

пластик сурнайлар, дастаси пластикдан бўлган байроқчалар, дастаси йўқ байроқлар, фотоаппаратлар, мобиль телефонларни спорт иншоотига олиб кириш ҳуқуқига эга.

2. Мухлисларнинг гуруҳларига спорт иншоотига ичи кавак (телескопик) дастали байроқларни ва барабанларни олиб келишга рухсат этилади. Бунда байроқнинг максимал ҳажми – 1 х 2 м, дастасининг максимал узунлиги – 1,2 м бўлиши керак.

3. Мухлисларнинг гуруҳлари спорт иншооти маъмурияти ва ҳуқуқни муҳофаза қилиш органларининг масъул ходимлари билан келишган ҳолда катта футболка ва байроқларни бўш секторлар ва югуриш йўлакчаларига жойлаштириш, тўсиқларга баннер-транспарантларни осиб қўйишлари мумкин. Катта футболка, байроқлар, баннер-транспарантларда ҳақоратли ёзувлар, шунингдек қонун ҳужжатлари талабларига зид бошқа ёзувлар бўлмаслиги керак.

4. Томошабинлар (мухлислар):

спорт иншоотига кириш жараёнида махсус назоратдан (текширувдан) ўтиш вақтини ҳисобга олган ҳолда спорт иншоотига тадбир бошлангунга қадар келишга;

спорт иншооти маъмурияти ва ҳуқуқни муҳофаза қилиш органлари ходимларига чипталар, таклифномалар ёки тадбирга кириш ҳуқуқини берадиган рухсатномаларни кўрсатишга ҳамда уларнинг хавфсизлик ва тартибни сақлаш бўйича қонуний талабларини бажаришга мажбур.

5. Томошабинлар (мухлислар) спорт иншоотига кириш чоғида ҳуқуқни муҳофаза қилиш органлари томонидан махсус назоратдан (текширувдан) ўтказилади.

6. Томошабинларга (мухлисларга) қуйидагилар тақиқланади:

маст ҳолда спорт иншоотига кириш, спиртли ичимликларни олиб келиш, тамаки маҳсулотларини ёки бошқа маст қилувчи воситаларни спорт иншооти ҳудудида истеъмол қилиш;

ўзи билан ўқ отар қурол, тез ўт оладиган, портловчи, заҳарли, пиротехник, ўткир ҳидли моддаларни, санчадиган ёки кесадиган предметлар, чемоданлар, портфеллар, катта ўлчамдаги ўрамлар ва сумкалар, шиша идишларни, шунингдек бошқа томошабинларга ва тадбир ўтказишга берувчи бошқа буюмларни олиб келиш;

юз ёки тананинг бошқа қисмларини бўяш;

тадбирга жониворлар билан келиш;

миллий, ирқий, этник ёки диний адоватни қўзғашга қаратилган, тадбир иштирокчилари ва бошқа томошабинларни ҳақорат қиладиган белги ёки тимсол ва ёзувларни олиб юриш ёки очиқ намойиш этиш;

тадбир иштирокчиларининг қадр-қимматини камситувчи ҳайқириқлар ёки ҳаракатлар қилиш.

7. Агар меҳмон жамоа мухлисларининг жойи учрашувни қабул қилаётган жамоа мухлислари тарафида бўлса, спорт иншооти маъмурияти ва ҳуқуқни муҳофаза қилиш органлари ходимлари хавфсизликни таъминлаш мақсадида учрашувни қабул қилаётган жамоа мухлисларидан меҳмон жамоа мухлислари учун мўлжалланган секторга ўтишни талаб қилиши мумкин.

8. Футбол бўйича спорт мусобақалари ўтказилаётган вақтда томошабинлар (мухлислар):

ноқулай об-ҳаво шароитида жамоани турган ҳолда қўллаб-қувватлашлари;

фото ва видеосъёмкани амалга оширишлари;

ўйин вақтида жамоани фаол ва уюшган ҳолда қўллаб-қувватлашлари;

қўллаб-қувватловчи шиор ва чақириқлардан фойдаланишлари;

футбол ва унинг натижаси билан боғлиқ ахборот олиш ҳуқуқига эга.

9. Футбол бўйича спорт мусобақалари ўтказилаётган вақтда томошабинлар (мухлислар):

жамоат тартиби ва ахлоқ нормаларига риоя этишлари;

спорт иншоотининг жиҳозларига эҳтиёткорлик билан муносабатда бўлишлари;

ёнғин хавфсизлиги қоидаларига амал қилишлари;

бошқа жамоаларнинг мухлисларига нисбатан қўпол муносабатда бўлмасликлари;

бошқаларга нисбатан ҳурмат билан муносабатда бўлишлари, атрофдагиларга хавф соладиган ҳаракатларни содир этмасликлари;

шубҳали предметлар ва буюмларни кўрганда, шунингдек тутун ёки ёнғин содир бўлганда зудлик билан спорт иншооти маъмурияти ёки ҳуқуқни муҳофаза қилиш органлари ходимларига хабар беришлари;

фавқулодда вазиятлар юзага келганда тартибни сақлашга масъул бўлган шахслар кўрсатмасига асосан ҳаракат қилишлари;

давлат рамзларига, шунингдек Ўзбекистон Футбол федерацияси, Ўзбекистон Профессионал футбол лигаси, клублар ва жамоаларнинг рамзларига ҳурмат билан муносабатда бўлишлари шарт.

10. Футбол бўйича спорт мусобақалари ўтказилаётган вақтда томошабинларга (мухлисларга) қуйидагилар тақиқланади:

турли буюмларни футбол майдонига, футбол мусобақаси иштирокчиларига қараб улоқтириш,

машъала ёки гулханлар ёқиш;

футбол майдонига чиқиш, жамоалар, ҳакамлар, мураббийлар ва захира ўйинчилар жойлашган жойга, допинг назорати хонасига, расмий шахслар учун мўлжалланган хона ва VIP-ложага ёки стадионнинг бошқа махсус хоналарига кириш;

ўтиш жойларида, зиналарда ёки люкларда туриш, иштирокчилар ва томошабинларнинг (мухлисларнинг) ҳаракатларига халал бериш, ўриндиқ устига чиқиб олиш, тўсиқ ва панжараларга осилиш, ёритиш қурилмаларига, мачталар, қимирламайдиган конструкцияларга чиқиш, спорт иншооти мулкига зарар етказиш.

11. Футбол бўйича спорт мусобақаси якунига етганидан кейин томошабинлар (мухлислар) спорт иншоотидан чиқиб кетиш тартиби тўғрисида ахборот олиш ҳуқуқига эга.

12. Футбол бўйича спорт тадбири якунига етганидан кейин томошабинлар (мухлислар) белгиланган тартибга риоя қилган ҳолда спорт иншоотини тарк этишлари шарт.

13. Футбол бўйича спорт мусобақаси якунига етганидан кейин томошабинлар (мухлислар)га қуйидагилар тақиқланади:

спорт иншооти ёки клуб маъмурияти вакилисиз майдонга чиқиш, шунингдек спортчиларнинг кийим алмаштириш хоналарига, ҳакамларнинг ҳамда бошқа хизмат кўрсатиш хоналарига кириш;

бошқа шахсларнинг мулкига зарар етказиш;

футболчилар, мураббийлар ёки томошабинларга, шунингдек уларнинг транспорт воситаларига буюмлар улоқтириш.

14. Мазкур Қоидаларнинг талабларига риоя этмаган ёки унга бўйсунишдан бош тортган шахслар спорт иншоотига қўйилмайди ёки чиптанинг ҳақи тўлаб берилмасдан мусобақадан четлаштирилади.

15. Мазкур Қоидаларнинг талаблари бузилишида айбдор бўлган шахслар қонун ҳужжатларида белгиланган тартибда жавобгарликка тортиладилар.

16. Мазкур Қоидалар Ўзбекистон Республикаси Ички ишлар вазирлиги ва Ўзбекистон Футбол федерацияси билан келишилган.