Ўзбекистон Республикаси Ҳукумати билан Россия Федерацияси Ҳукумати, бундан кейин «Томонлар» деб аталувчилар,

икки давлат ўртасида дўстона яхши қўшничилик муносабатларини ривожлантириш, иқтисодий, савдо, илмий-техникавий, маданий ва бошқа хил муносабатларни мустаҳкамлаш истагида,

икки давлат фуқароларининг ўзаро келиб-кетишларини ҳуқуқий жиҳатдан тартибга солиш мақсадида,

қуйидагилар тўғрисида келишиб олдилар:

Бир Томон давлатининг фуқаролари бошқа Томон давлати ҳудудига ушбу Битимнинг таркибий қисмлари бўлган 1- ва 2-иловаларда кўрсатилган шахсни ва унинг фуқаролигини тасдиқловчи ҳужжатлардан бири асосида визасиз киришлари, чиқишлари, транзит ўтишлари, унда юришлари ва бўлишлари мумкин.

Томонлар давлатларининг учинчи давлатларда истиқомат қилувчи фуқаролари ҳам Томонлар давлатларининг ҳудудига визасиз киришлари, чиқишлари, унда юришлари, бўлишлари ва транзит ўтишлари мумкин.

Томонлар фуқароларининг кириш ва чиқишлари халқаро қатнов учун очиқ бўлган ўтказиш пунктлари орқали амалга оширилади..

Томонлар халқаро қатнов учун очиқ бўлган ўтказиш пунктларида чегарадан ўтиш ҳуқуқини берувчи ҳақиқий ва Томонлар давлатлари миллий қонунларига мувофиқ тегишли равишда расмийлаштирилган ҳужжатларга эга бўлган Томонлар давлатлари фуқароларини ўтказиш мажбуриятини оладилар ҳамда Томонларининг ваколатли органлари тарафидан чиқиши тақиқланган шахсларни учинчи давлатларга чиқармаслик чораларини кўрадилар.

Томонлар ушбу Битим қоидаларини татбиқ этиш соҳасига тааллуқли масалалар бўйича, жумладан шахсни ва унинг фуқаролигини тасдиқловчи амалдаги ҳужжатлар тўғрисида, уларни бериш ва ишлатиш тартибидаги ўзгартишлар тўғрисида, хорижий фуқароларнинг Томонлар давлатлари ҳудудида бўлиш қоидалари тўғрисида, шунингдек тегишли қонун ҳужжатлари тўғрисида бир-бирларини хабардор қиладилар.

Томонлар ўзаро аҳднома бўйича ушбу Битимнинг 1-ва 2-иловаларида кўрсатилган ҳужжатлар рўйхатларидаги ўзгартишлар қарор қабул қилишлари мумкин. Бунда, янги ҳужжатлар жорий қилинган ёки амалдаги ҳужжатларга ўзгартишлар киритиладиган бўлса, улар амал қилишга киритилишидан камида ўттиз сутка илгари Томонлар дипломатик каналлар орқали уларнинг намуналарини алмашадилар.

Бир Томон давлатининг фуқаролари бошқа Томон давлати ҳудудида бўлиш чоғида шу Томон давлатининг қонун-қоидаларига, жумладан шу давлатда амал қилувчи унда бўлиш қоидаларига риоя қилишлари лозим.

Бир Томон давлатининг ушбу Битим қоидаларини ёки бошқа Томон давлати ҳудудида бўлиш қоидаларини бузган фуқаролари Томонлар давлатларининг қонунларида кўзда тутилган тартибда ўзи фуқароси бўлган ёки доимий истиқомат қиладиган давлатга қайтариладилар.

Ушбу Битим давлат хавфсизлиги, жамоат тартиби ёки аҳоли соғлиғини муҳофаза қилишни таъминлаш учун зарур бўлган ҳолларда Томонларнинг ушбу Битим ёки унинг алоҳида қоидалари амал қилишини тўлиқ ёки қисман тўхтатиб туриш ҳуқуқига дахл қилмайди.

Бу ҳолда манфаатдор Томон бошқа Томон фуқароларининг визасиз кириши, чиқиши, бўлиши, унда юриши ва транзит ўтишига тегишли чеклашлар киритиши мумкин. Бу тўғрида манфаатдор Томон бошқа Томонни кўрсатилган чеклашлар жорий этилишидан 72 соат илгари дипломатик каналлар орқали хабардор қилади.

Ушбу Битим имзолангач, Томонлар ушбу Битимнинг 1- ва 2-иловаларда кўрсатилган ҳужжатларнинг намуналарини дипломатик каналлар орқали дарҳол алмашадилар.

Ушбу Битимни татбиқ этишда юзага келадиган масалаларни Томонлар маслаҳатлашув ва музокаралар орқали ҳал этадилар.

Томонлар ўзаро келишув бўйича ушбу Битимга зарур қўшимча ва ўзгартишлар киритишлари мумкин. Улар тегишли баённома тарзида расмийлаштирилади ва ушбу Битимнинг таркибий қисми ҳисобланади.

Ушбу Битим Томонларнинг Ўзбекистон Республикаси ва Россия Федерацияси иштирок этган бошқа халқаро шартномаларидан келиб чиқадиган ҳуқуқ ва мажбуриятларига дахл қилмайди.

Ушбу Битим имзоланган санадан бошлаб вақтинча қўлланади ва уни кучга киритиш учун лозим бўлган давлат ички процедуралари бажарилгани тўғрисида сўнгги хабарнома олинган санадан бошлаб кучга киради ҳамда бир Томон бошқа Томоннинг ушбу Битим фаолиятини тўхтатиш нияти тўғрисидаги хабарномасини олган санадан бошлаб 90 кун ўтгунга қадар амал қилади.

Минск шаҳрида 2000 йил 30 ноябрда икки нусхада, ҳар бири ўзбек ва рус тилларида тузилди, бунда иккала матн бир хил кучга эга.

1. Ўзбекистон Республикасининг дипломатик паспорти.

2. Ўзбекистон Республикаси фуқаросининг паспорти.

3. Туғилганлик тўғрисидаги гувоҳнома (16 ёшга тўлмаган болалар учун; уларнинг қонуний вакили кузатувидагина).

4. Хизмат сафари ёки таътил гувоҳномаси (ёзма буйруқ) мавжуд бўлган ҳолда ҳақиқий ҳарбий хизматни ўтаётган ҳарбий хизматчининг шахсий гувоҳномаси, ҳарбий билети.

5. Ҳаво кемаси экипажи аъзосининг учиш гувоҳномаси (учиш топшириқномасида ёзув бўлган ҳолда).

6. Темир йўл транспорти хизматчисининг шахсий гувоҳномаси (поезд ва рефрижератор бригадалари таркибида борилаётган вақтда).

7. Ўзбекистон Республикасига қайтиш гувоҳномаси (фақат Ўзбекистон Республикасига қайтиш учун).

1. Собиқ СССР фуқаросининг паспорти, унда шахснинг Россия Федерацияси фуқаролиги тўғрисида маълумотнома, қистирма илова, (белгиси экан) ва Россия фуқаролигига мансублиги тўғрисида матн, ёки 1992 йил 6 февралигача Россия Федерацияси ҳудудида рўйхатдан ўтганлиги (доимий қайд қилиш) тўғрисида штамп қўйилган бўлиши керак (2005 йил 31 декабргача).

2. Россия Федерацияси фуқаросининг паспорти.

3. Йўқолган паспорт ўрнига Россия Федерацияси Ички ишлар вазирлиги томонидан белгиланган шакл бўйича берилган фуқаронинг вақтинчалик шахсий гувоҳномаси.

4. Туғилганлик тўғрисида гувоҳнома (14 ёшга тўлмаган болалар учун).

5. Хизмат сафари гувоҳномаси, ёзма буйруқ ёки таътил билети мавжуд бўлган ҳолда ҳарбий хизматни ўтаётган ҳарбий хизматчининг шахсий гувоҳномаси, ҳарбий билети.

6. Дипломатик паспорт.

7. Хизмат паспорти.

8. Россия Федерацияси рамзлари туширилган чет эл паспорти.

9. Россия Федерацияси фуқаролиги тўғрисидаги ёзув ёки белгиси бўлган собиқ СССР рамзи туширилган умумфуқаро хорижий паспорти.

10. Денгизчи паспорти (кема роли ёки ундан кўчирма мавжуд бўлган ҳолда).

11. Ҳаво кемаси экипажи аъзосининг учиш гувоҳномаси (учиш топшириқномасида ёзув бўлган ҳолда).

12. Темир йўл транспорти хизматчисининг шахсий гувоҳномаси (поезд ва рефрижератор бригадалари таркибида борилаётган вақтда).

13. Россия Федерациясига қайтиш гувоҳномаси (фақат Россия Федерациясига қайтиш учун).