Ўзбекистон Республикаси Ҳукумати билан Россия Федерацияси Ҳукумати, бундан кейин «Аҳдлашувчи Томонлар» деб аталувчилар,

иккала давлат ўртасида ва улар давлатлари ҳудудидан транзит тарзда йўловчилар ҳамда юкларни автомобилда халқаро ташиш соҳасида ҳамкорликни янада ривожлантириш ва такомиллаштириш ҳамда бу қатновни енгиллатиш истагида,

қуйидагилар тўғрисида аҳдлашиб олдилар:

Ушбу Битимга мувофиқ Ўзбекистон Республикасида ёки Россия Федерациясида рўйхатга олинган автотранспорт воситаларида иккала давлат ўртасида ҳамда уларнинг ҳудудидан транзит тарзда, шунингдек учинчи мамлакатларга/дан йўловчилар ва юкларни мунтазам ва номунтазам ташишлар амалга оширилади,

1. Йўловчиларни автобусларда мунтазам ташиш Аҳдлашувчи Томонларнинг ваколатли органлари ўртасидаги келишувга биноан ташкил этилади.

2. Бундай ташишларни ташкил этиш тўғрисидаги таклифларни Аҳдлашувчи Томонларнинг ваколатли органлари бир-бирига берадилар. Бундай таклифларда ташувчининг номи, босиб ўтиладиган йўналиш, ҳаракат, тарифлар, ташувчи томонидан йўловчилар чиқариладиган ва тушириладиган тўхташ бекатлари, шунингдек ташишларни амалга ошириш мўлжалланадиган давр ҳамда унинг мунтазамлиги жадвали акс эттирилиши керак.

3. Аҳдлашувчи Томонларнинг ваколатли органлари ўз давлатлари ҳудуди бўйлаб йўловчиларни мунтазам ташишни ташкил этиш тўғрисида (ёзма равишда) келишиб оладилар.

1. Иккала давлат орасида ёки улар ҳудудидан транзит тарзда йўловчиларни автобусда номунтазам ташишни амалга ошириш учун (ушбу Битимнинг 4-моддасида кўзда тутилган ташишлар бундан мустасно) Аҳдлашувчи Томонлар давлатларининг ваколатли органлари тарафидан бериладиган рухсатномалар олиниши керак. Аҳдлашувчи Томонлар давлатларининг ваколатли органлари рухсатнома бланкларини алмашиш тартибини ўзаро белгилайдилар.

2. Аҳдлашувчи Томонлар давлатларининг ваколатли органлари рухсатномаларни улар давлатларининг ҳудудидан ўтадиган йўл қисми учун берадилар.

3. Йўловчиларни автобусларда ҳар галги номунтазам ташиш учун, агар рухсатноманинг ўзида бошқача тартиб кўрсатилмаган бўлса, бир гал бориш ва келиш ҳуқуқини берадиган рухсатнома берилиши лозим.

4. Аҳдлашувчи Томонларнинг ваколатли органлари йўловчиларни номунтазам ташиш учун бериладиган рухсатномаларнинг ўзаро келишилган нусхалари миқдорини бир-бирига ҳар йили бериб турадилар.

Бундай нусхаларда рухсатномани берган давлатни ваколатли орган масъул шахсининг муҳри ҳамда имзоси бўлиши керак.

1. Муайян йўловчиларнинг таркиби ўзгармайдиган гуруҳи бир автобуснинг ўзида бутун йўналиш бўйлаб ташиладиган бўлса, йўловчиларни ташиш бўйича қуйидаги номунтазам ташишларни бажариш учун рухсатнома олиш шарт эмас:

а) бу қатнов шу автобус рўйхатга олинган Аҳдлашувчи Томон давлати ҳудудида бошланадиган ва тугайдиган йўналиш бўйлаб ташилса;

б) автобус рўйхатга олинган Аҳдлашувчи Томон давлати ҳудудида бошланиб, иккинчи Томон давлати ҳудудида тугайдиган йўналишда амалга оширилса, шу шарт биланки, автобус бу ҳудудни бўш тарк этса.

2. Бузилган автобус бошқа автобус билан алмаштирилганида рухсатнома талаб қилинмайди.

3. Ушбу модданинг 1-бандида кўрсатилган ташишлар амалга оширилаётганида ҳайдовчида йўловчилар рўйхати бўлиши лозим.

Иккала давлат ўртасида ёки улар ҳудудидан транзит тарзда юк ташиш рухсатномасиз амалга оширилади.

1. Юксиз ёки юк билан кетаётган автотранспорт воситасининг ўлчамлари ҳамда оғирлик кўлами бошқа Аҳдлашувчи Томон давлатида белгиланган меъёрдан ошадиган бўлса, шунингдек хавфли юкларни ташиш учун ташувчи бошқа Аҳдлашувчи Томон ваколатли органининг махсус рухсатномасини олиши керак бўлади.

2. Ушбу модданинг 1-бандида тилга олинган рухсатномада автотранспорт воситасининг муайян йўналиш бўйлаб ҳаракатланиши кўрсатилган бўлса, ташиш ана шу йўналиш бўйлаб олиб борилиши керак.

1. Ушбу Битимда кўзда тутилган ташишлар Ўзбекистон Республикаси ва Россия Федерацияси қонунларига мувофиқ фақат халқаро ташишларни амалга оширишга рухсат олган ташувчилар томонидангина амалга оширилиши мумкин.

2. Халқаро ташишларни амалга ошираётган Аҳдлашувчи Томонларнинг автотранспорт воситалари ўз давлатининг қайдлов ҳамда таниқлик белгиларига эга бўлишлари керак. Юк автомобиллари ва шатакчи автомобиллар Томонлар давлатларининг қайдлов ҳамда таниқлик белгиларига эга бўлсагина тиркама ва ярим тиркамалар бошқа давлатларнинг қайдлов ҳамда таниқлик белгиларига эга бўлиши мумкин.

1. Ташувчига бошқа Аҳдлашувчи Томон давлати ҳудудида жойлашган пунктлар оралиғида йўловчилар ва юк ташишга рухсат берилмайди.

2. Бир Аҳдлашувчи Томон давлатининг ташувчиси, агар бошқа Аҳдлашувчи Томон ваколатли органининг махсус рухсатини олган бўлса, бошқа Аҳдлашувчи Томон давлати ҳудудидан учинчи давлат ҳудудига ва учинчи давлат ҳудудидан бошқа Аҳдлашувчи Томон давлати ҳудудига ташишларни амалга ошириши мумкин.

Аҳдлашувчи Томонларнинг ваколатли органлари учинчи давлатларга/дан ташишлар учун рухсатнома бериш тартибини белгилайдилар ҳамда йил сайин тегишли миқдордаги бундай рухсатномаларни алмашлаб турадилар.

1. Автобус ёки юк автомобилининг ҳайдовчиси ўзи бошқараётган автотранспорт воситасининг тоифасига тўғри келадиган миллий ёки халқаро ҳайдовчилик гувоҳномасига ва автотранспорт воситаси учун миллий қайдлов ҳужжатларига эга бўлиши керак.

2. Миллий ёки халқаро ҳайдовчилик гувоҳномаси ҳамда қайдлов ҳужжатлари Йўл ҳаракати тўғрисида 1968 йил 8 ноябрда имзоланган Вена Конвенциясида белгиланган намунага мувофиқ бўлиши лозим.

3. Халқаро андозага мос бўлган рухсатнома, юк ташиш учун юкхатлар ва бошқа ҳужжатлар, автотранспорт воситаси ҳайдовчисида туриши ва Аҳдлашувчи Томонлар ваколатли назорат органлари талаб қилганидаёқ кўрсатилиши лозим.

Ушбу Битим доирасида йўловчилар ва юкларни ташийдиган автотранспорт воситалари автомобиль йўлларидан фойдаланганлик ва уни тутиб туриш, автотранспорт воситаларига эга бўлганлик ҳамда ундан фойдаланишга боғлиқ йиғим ва тўловлардан озод қилинади, пуллик автомобиль йўлларидан, автомагистраллардан, кўприк ва тоннеллардан ўтганлик учун, жумладан шу Аҳдлашувчи Томони автотранспорт воситаларидан ҳам ундириладиган йиғим ва тўловлар бундан мустасно.

1. Ушбу Битимда кўзда тутилган ташишлар амалга оширилаётганда қуйидагилар бошқа Аҳдлашувчи Томон давлати ҳудудига олиб кирганлик учун йиғим ва божлардан озод қилинади:

а) ҳар бир автотранспорт воситаси модели учун тайёрловчи заводда кўзда тутилган, двигателнинг таъминот тизимига технологик ва конструктив жиҳатдан боғланган идишлардаги ёнилғи, шунингдек тайёрловчи завод томонидан тиркама ва яримтиркамаларга ўрнатилган идишлардаги, қиздириш ёки совутиш қурилмаларининг ишлаши учун мўлжалланган ёнилғи;

б) ташиш давомида асқотадиган миқдорда мойлаш материаллари;

в) халқаро ташишни амалга ошираётган автотранспорт воситаси йўл босаётганда яхши ишлаши учун лозим даражада эҳтиёт қисмлар ва асбоб-ускуналар.

2. Фойдаланилмаган ва алмаштирилган эҳтиёт қисмлар қайтариб олиб чиқилиши ёхуд тегишли Аҳдлашувчи Томон давлатининг божхона қонунларида белгиланган йўқ қилишнинг божхона режимига топширилиши лозим.

Ушбу Битимда кўзда тутилган йўловчилар ва юкларни ташиш автотранспорт воситалари эгаларининг учинчи шахсларга етказилган зарар учун фуқаролик масъулияти мажбурий суғуртаси шарти билан амалга оширилади. Ташувчи ушбу ташишларни амалга оширадиган ҳар бир автотранспорт воситасини олдиндан суғурта қилдиришга мажбур.

1. Чегара, божхона ва санитария назорати Ўзбекистон Республикаси ва Россия Федерацияси қатнашган халқаро шартномаларнинг қоидалари асосида амалга оширилади, бу шартномалар орқали тартибга солинмаган масалалар юзасидан эса ҳар бир Аҳдлашувчи Томонлар давлатларининг қонунлари қўлланади.

2. Тез тиббий ёрдамга муҳтож бўлган шахсларни ташишда, йўловчиларни автобусда мунтазам ташишда, шунингдек тез бузиладиган юкларни ҳамда жониворлар ташишда чегара, божхона ва санитария назорати навбатсиз амалга оширилади.

Ташувчилар йўл ҳаракати қоидалари ҳамда автотранспорт воситаси қайси давлат ҳудудида бўлса ўша Томон давлатининг қонунларига риоя қилишга мажбур.

1. Ушбу Битим қоидалари бузилган ҳолларда ҳудудида автотранспорт воситаси рўйхатга олинган Аҳдлашувчи Томоннинг ваколатли органи давлати ҳудудида қоидабузарлик юз берган бошқа Аҳдлашувчи Томон ваколатли органининг илтимосига кўра, амалдаги қонунлардан қатъи назар, қуйидаги тадбирлардан бирини амалга оширишга мажбур:

а) қоидабузарлик такрорланса, ташишни амалга ошириш рухсатномаси ёки маълум муддатга олиб қўйилиши ё бекор қилиниши тўғрисида ташувчини огоҳлантириш;

б) қоидабузарлик юз берган бошқа Аҳдлашувчи Томон давлати ҳудудига киришни маълум муддатга тақиқлаш ёки бекор қилиш.

Аҳдлашувчи Томонларнинг ваколатли органлари кўрилган чоралар тўғрисида бир-бирларини хабардор қиладилар.

2, Ушбу модданинг қоидалари бошқа Томон давлати ташувчисига ҳудудида қоидабузарлик юз берган давлатда амал қиладиган қонунларда кўзда тутилган санкциялар қўлланишига монелик қилмайди.

1. Ушбу Битимни амалга ошириш учун Аҳдлашувчи Томонларнинг ваколатли органлари бевосита алоқаларни амалга оширадилар, Аҳдлашувчи Томонлардан бири ваколатли органининг таклифига биноан йўловчилар ва юкларни ташиш учун рухсатнома тизимига дахлдор масалаларни ҳал қилиш учун музокара ва маслаҳатлашувлар ўтказадилар, шунингдек берилган рухсатномалардан фойдаланиш тўғрисида тажриба ва ахборот алмашадилар.

2. Ушбу модданинг 1-бандида кўзда тутилган ишларни амалга ошириш мақсадида Аҳдлашувчи Томонлар ваколатли органлари вакилларидан иборат Аралаш комиссия ташкил этилади.

Аралаш комиссия халқаро автомобиль ташишлари соҳасида Аҳдлашувчи Томонлар ўртасида муносабатларга тааллуқли барча масалаларни кўриб чиқади.

Ушбу Битим, шунингдек Ўзбекистон Республикаси ва Россия Федерацияси иштирок этган халқаро шартномалар орқали тартибга солинмаган масалалар ҳар бир Аҳдлашувчи Томон давлатининг қонунларига мувофиқ ҳал этилади.

Аҳдлашувчи Томонлар ушбу Битимни талқин этиш ва қўллаш юзасидан келиб чиқадиган барча баҳсли масалаларни музокара ўтказиш ва маслаҳатлашувлар орқали ҳал этадилар.

Ушбу Битим Аҳдлашувчи Томонларнинг Ўзбекистон Республикаси ва Россия Федерацияси иштирок этган халқаро шартномаларидан келиб чиқадиган ҳуқуқ ва мажбуриятларига дахл қилмайди.

Аҳдлашувчи Томонлар ўзаро келишиб, ушбу Битимга ўзгартиш ва қўшимчалар киритишлари мумкин. Улар алоҳида баённомалар тарзида расмийлаштирилади ва ушбу Битимнинг таркибий қисми ҳисобланади.

1. Ушбу Битим Аҳдлашувчи Томонларнинг уни кучга киритиш учун давлат ички процедураларини бажарганликлари тўғрисида дипломатик каналлар орқали йўллаган охирги хабарлари олинган санадан 30 кун ўтгач кучга киради.

2, Ушбу Битим чекланмаган муддатга тузилган бўлиб, Аҳдлашувчи Томонлардан бири дипломатик каналлар орқали бошқа Аҳдлашувчи Томонни унинг фаолиятини тўхтатиш ўз ниятидан хабардор қилган кундан сўнг олти ойгача амал қилади.

Тошкент шаҳрида, 2000 йил 19 майда икки нусхада, ўзбек ва рус тилларида тузилди, бунда иккала матн бир хил кучга эга.

Ўзбекистон Республикаси Ҳукумати билан Россия Федерацияси Ҳукумати халқаро автомобиль қатнови 2000 йил 19 майда Тошкент шаҳрида имзоланган Битимни (бундан кейин Битим деб аталувчи) қўллаш юзасидан қуйидаги аҳдлашувга эришдилар:

1. Битимдаги « Томонларнинг ваколатли органлари» деганда қуйидагилар кўзда тутилади:

Ўзбекистон Томонидан:

2-, 3-, 8-, 15-, 16-моддалар бўйича — Ўзбекистон автомобиль ва дарё транспорти агентлиги;

9-модданинг 3-банди бўйича — Ўзбекистон Республикаси Ички ишлар вазирлиги;

6-модда бўйича — «Ўзавтойўл» Давлат акционерлик концерни ҳамда Ташқи иқтисодий алоқалар вазирлиги;

Россия Томонидан:

Россия Федерацияси Транспорт вазирлиги;

6-модданинг йирик ўлчамли ва оғир юкларни ташишга тааллуқли қисми бўйича — шунингдек Россия йўл Агентлиги ҳамда Россия Федерацияси Ички ишлар вазирлиги;

9-модданинг 3-банди бўйича — шунингдек Россия Федерацияси Ички ишлар вазирлиги.

2. Битимда қўлланадиган атамалар қуйидагиларни англатади:

а) «ташувчи» — Аҳдлашувчи Томонлардан бири давлатининг ҳудудида рўйхатга олинган, ушбу Аҳдлашувчи Томон давлатининг қонунларига биноан йўловчилар ва юкларни халқаро ташишга рухсат олган ҳар қандай жисмоний ёки юридик шахс;

б) «автотранспорт воситаси»:

йўловчиларни ташишда — автобус, яъни йўловчиларни ташишга мўлжалланган, ҳайдовчи ўрнини қўшганда камида тўққизта ўриндиққа эга бўлган автотранспорт воситаси, шунингдек багажларни ташиш учун тиркама;

юкларни ташишда — юк ташишга мўлжалланган механик узатмали автотранспорт воситаси, бунга тиркама ва ярим тиркамалар ҳам киради;

в) «йўловчиларни мунтазам ташиш» — Аҳдлашувчи Томонларнинг ваколатли органлари ўртасида келишилган ҳаракат жадвали, тарифлар ва ташувчи томонидан йўловчилар тушириладиган/чиқариладиган тўхташ бекатлари билан ҳаракатнинг бошланиш ва якуний пунктлари кўрсатилган тарзда йўловчиларни автобусларда ташиш;

г) «йўловчиларни номунтазам ташиш» «йўловчиларни мунтазам ташиш» атамаси қамровига кирмайдиган тарзда йўловчиларни автобусларда ташишнинг барча турлари;

д) «санитария назорати» — санитария, ветеринария, шунингдек фитосанитария назоратини англатади.

3. Пуллик автомобиль йўллари, кўприк ва тоннеллар бор бўлган ҳолларда ташувчи муқобил бепул автомобиль йўллари бўйлаб ташишни амалга ошириш имкониятига ҳам эга бўлиши лозим.

Аҳдлашувчи Томонларининг ваколатли органлари Ўзбекистон Республикаси ва Россия Федерацияси ҳудудида амал қиладиган пуллик автомобиль йўллари тўғрисида ахборот алмашиб турадилар.

4. Ушбу Битимда кўзда тутилган қоидалар иккала давлат ташувчиларини Аҳдлашувчи Томонлар давлатларининг қонунларида кўзда тутилган божхона процедураларига риоя қилишдан озод этмайди.

Ушбу Баённома Битимнинг таркибий қисми ҳисобланади ва Битимнинг 21-моддаси қоидаларига мувофиқ кучга киради.

Тошкент шаҳрида, 2000 йил 19 майда икки нусхада, ўзбек ва рус тилларида тузилди, бунда иккала матн бир хил кучга эга.