Ўзбекистон Республикаси Ҳукумати билан Австрия Республикаси Федерал Ҳукумати, бундан кейин «Аҳдлашувчи Томонлар» деб аталувчилар,

икки томонлама муносабатларнинг ривожланишига кўмаклашишга интилиб,

халқаро жиноятчиликка қарши курашда ҳамкорликнинг икки давлат учун муҳим аҳамиятга эга эканлигини тушуниб,

гиёҳвандлик воситалари ва психотроп моддаларнинг ноқонуний савдоси, икки давлатнинг хавфсизлигига ва бошқа муҳим манфаатларига таҳдид солаётган халқаро жиноятчиликнинг бошқа кўринишларини тарқалишидан ташвишланаётганликларини изҳор қилиб,

уюшган халқаро жиноятчиликка қарши курашда қўшма фаолиятни мувофиқлаштиришни истаб ва;

БМТ Бош Ассамблеясининг уюшган жиноятчиликка қарши курашда халқаро ҳамкорлик тўғрисида 1990 йил 14 декабрдаги 45/123 Резолюцияси, шунингдек гиёҳвандлик воситалари тўғрисида 1961 йил 30 мартдаги Умумий Конвенцияси, Баённома орқали 1972 йил 25 мартда унга киритилган ўзгартишлар, психотроп моддалар тўғрисида 1971 йил 21 февралдаги Конвенция ҳамда БМТнинг гиёҳвандлик воситалари ва психотроп моддаларнинг ноқонуний айланишига қарши кураш тўғрисида 1988 йил 20 декабрдаги Конвенциясидан келиб чиққан ҳолда,

қуйидагилар тўғрисида аҳдлашиб олдилар:

1. Аҳдлашувчи Томонлар ўз давлатларининг қонунчилиги ва халқаро мажбуриятларига асосланиб, ўзларининг ваколатли идоралари орқали мазкур Битимнинг бандларига мувофиқ, жиноятчиликка қарши курашда ҳамкорликни олиб борадилар.

2. Аҳдлашувчи Томонлар ўзларининг ваколатли идораларининг рўйхатларини алмашадилар ва ушбу рўйхатлардаги ўзгаришлар тўғрисида бир-бирларини дипломатик каналлар орқали хабардор қиладилар.

3. Ушбу Битимни бажариш мақсадида ваколатли идоралар бир-бирлари билан тўғридан тўғри ҳамкорлик қиладилар.

1. Аҳдлашувчи Томонлар ўз давлатларининг қонунчилиги ва халқаро мажбуриятларига асосланиб ўзларининг ваколатли идоралари орқали биринчи навбатда, қуйидаги жиноий кўринишларга қарши курашда ҳамкорликни олиб борадилар:

а) гиёҳванд воситалар, психотроп моддалар ва прекурсорларни ноқонуний ўстириш, ишлаб чиқариш, олиб кириш, олиб чиқиш, ташиш ва савдо қилиш;

б) халқаро экстремизм ва терроризм, гаровга олиш ва жамоат хавфсизлигига таҳдид солаётган бошқа хавфли тажовузлар;

в) кишининг ҳаёти, соғлиғи ва эркинлигига қарши жиноятлар;

г) қурол-яроғ, ўқ-дори, портловчи моддалар, ядровий ва радиоактив моддаларни ноқонуний ишлаб чиқариш ва ноқонуний савдо қилиш ҳамда ман этилган заҳарли ва хавфли чиқиндиларнинг ташиб ўтилиши;

д) пул ва бошқа тўлов воситалари, қимматбаҳо қоғозлар ва ҳужжатларни қалбакилаштириш, ҳамда уларнинг ноқонуний тарқалиши;

е) санъат асарлари ва антиквар буюмларнинг ноқонуний савдоси ва контрабандаси;

ё) иқтисодиёт соҳасидаги жиноятлар ва жиноий фаолият натижасида олинган даромадларни қонунийлаштириш;

ж) фоҳишабозликдан фойдаланиш ва одамларни сотиш;

з) шахсларни чегарадан ноқонуний олиб ўтиш;

и) автотранспорт воситалари ва бошқа қимматбаҳо товарларнинг ноқонуний операциялари;

к) товламачилик;

л) компьютер соҳасидаги жиноятчилик.

2. Аҳдлашувчи Томонлар ўзларининг миллий қонунчилигига мувофиқ, шахс ва буюм қидируви, шунингдек номаълум жасадларнинг шахсини аниқлаш борасида бир-бирларини қўллаб-қувватлайдилар.

1. Аҳдлашувчи Томонлар ўртасидаги ҳамкорлик ушбу Битимга кўра Аҳдлашувчи Томонлар давлатларининг миллий қонунчилигига мувофиқ амалга оширилади ва қуйидагиларни ўз ичига олади:

а) жиноятларни фош этиш ва тергов қилиш ҳамда жамоат хавфсизлигига катта хавф туғдирувчи жиноятни бартараф қилиш мақсадида ахборот алмашиш;

б) ҳуқуқий қоидаларни қўллаш, жиноятчиликнинг олдини олиш, шунингдек криминалистикадаги усуллар, воситалар ва техникани қўллаш борасидаги тажриба алмашиш;

в) жиноятчиликнинг маълум бир соҳасидаги экспертлар тажрибасини алмашиш ва экспертлар учрашувларини ташкиллаштириш;

2. Аҳдлашувчи Томонлар ушбу Битимга кўра ва ўз давлатларининг миллий қонунчилигига мувофиқ қуйидагилар тўғрисида ахборот алмашадилар:

а) гиёҳванд воситаларни топиш ва аниқлашда янги усулларни қўллаш, уларнинг ноқонуний олиб ўтишдаги янги йўналишлари, ноқонуний айланишга келиб тушаётган гиёҳванд моддаларнинг янги кўринишлари, уларнинг хусусиятлари ва тайёрлаш технологияси;

б) уюшган гуруҳлар томонидан жиноятларни содир этиш усуллари, уларнинг таркиби, тузилиши, фаолият доираси ва жиноий алоқалари;

в) жиноий фаолиятдан олинган даромадларни қонунийлаштириш усуллари ва шу каби фаолиятга алоқадорлиги гумон қилинаётган ташкилотлар, банк муассасалари ва фирмалар;

г) бошқа Аҳдлашувчи Томон давлатининг ҳудудида доимий истиқомат қиладиган ёки вақтинча бўлиб турган, ушбу Битимнинг 2-моддасида кўзда тутилган жиноятларни содир этганликда гумон қилинаётган шахслар.

1. Аҳдлашувчи Томонлар ушбу Битим доирасида ҳамкорликни ёзма сўровларга мувофиқ олиб борадилар.

2. Зарурат туғилганда сўровга лозим бўлган ҳужжатлар илова қилинади. Аҳдлашувчи Томонлар сўровнинг бажарилишини енгиллаштириш мақсадида, қўшимча маълумот сўраш ҳуқуқига эгалар.

3. Агар маълумот бошқа Аҳдлашувчи Томон учун қизиқиш уйғотди дейишга асос бўлса, Аҳдлашувчи Томонлар сўровсиз ўз ташаббусларига кўра бир-бирларига маълумот юборишлари мумкин.

4. Аҳдлашувчи Томонлар ўртасидаги ҳамкорлик алоқа зобитлари орқали ҳам олиб борилиши мумкин. Алоқа зобити маълумот ва ахборот бериш фаолияти билан шуғулланади ва ижро этувчи ҳуқуқларга эга бўлмайди.

1. Аҳдлашувчи Томонлар ўртасидаги жисмоний шахслар тўғрисида ўзаро маълумот бериш бераётган томон давлатининг қонунчилигига мувофиқ қуйидаги тамойилларга кўра амалга оширилади:

а) олинган маълумотларни улар белгиланмаган бошқа мақсадларда, тақдим этаётган ваколатли идоранинг розилигисиз фойдаланиш мумкин эмас;

б) ноаниқ маълумотлар берилган ёки бериш учун мўлжалланмаган маълумотлар бериб юборилгани аниқланса, олинган маълумотларни ўчириш ёки тўғрилаш зарур. Олувчи ваколатли идора бу тўғрида дарҳол хабардор қилинади.

Кўрсатилган қоидалар, шунингдек улар юборилган мақсадларни бажаришда маълумотлар керак бўлмаган ҳолда ҳам қўлланилади.

с) Аҳдлашувчи Томонлардан бирининг ваколатли идорасининг сўрови келиб тушган ҳолда, ушбу маълумотларнинг ҳар қандай қўлланилиши тўғрисида хабардор қилиниши зарур.

2. Аҳдлашувчи Томонларнинг ваколатли идоралари шахслар тўғрисида маълумотларга нисбатан таъсир қилиши ёки ўзгаришга олиб келиши мумкин бўлган шарт-шароитлар тўғрисида бир-бирларини хабардор қиладилар.

3. Шахслар тўғрисида маълумотларни тақдим этувчи ва олувчи ваколатли идоралар уларнинг берилиши ва қабул қилинишини рўйхатга олиш мажбуриятига эга.

4. Тақдим этувчи томоннинг розилигига кўра манфаатдор шахсга унинг илтимосига биноан миллий қонунларга мувофиқ у тўғридаги мавжуд маълумотлар тўғрисида маълумотнома берилади.

5. Қабул қилиб олувчи ваколатли идора шахслар тўғрисида берилган маълумотларни ноқонуний тарзда эга бўлиш, ўзгартириш ёки ошкора қилишдан самарали ҳимоя қилиш мажбуриятига эга.

1. Аҳдлашувчи Томонлардан бири сўровнинг бажарилиши оқибатида давлатнинг суверенитети, хавфсизлиги, жамоат тартиби (ordre public) ёки унинг давлатининг бошқа муҳим манфаатларини бузади деб ҳисобласа, бутунлай ёки вақтинча ёрдам беришдан бош тортиши ёки маълум бир шартлар қўйиши мумкин.

2. Сўровнинг бажарилишини рад этиш қарори қабул қилинган ҳолда сўралаётган Аҳдлашувчи Томоннинг ваколатли идоралари сўраётган Аҳдлашувчи Томонни бу тўғрида рад жавобининг сабабини кўрсатган ҳолда ёзма хабардор қиладилар.

Ушбу Битим Аҳдлашувчи Томонларнинг бошқа икки томонлама ёки кўп томонлама шартномаларидан келиб чиқадиган ҳуқуқ ва мажбуриятларига дахл қилмайди.

Ушбу Битим жиноий ишлар бўйича ҳуқуқий ёрдам кўрсатиш ва экстрадиция масалаларига, шунингдек солиқ ҳамда божхона қонунчиликларини бузиш билан боғлиқ ишларга дахл қилмайди.

Зарур ҳолларда Томонлар ваколатли идораларининг бошқарув ходимлари ушбу Битимни самарали қўллаш воситалари ва йўлларини муҳокама қилиш учун учрашишлари, шунингдек ҳамкорликни ривожлантириш ва мукаммаллаштириш бўйича мумкин чораларни кўришлари мумкин.

Томонларнинг ўзаро розилигига кўра ушбу Битимга ўзгартишлар киритилиши мумкин.

1. Ушбу Битим унинг кучга кириши учун зарур бўлган давлат ички процедураларини бажарганликлари тўғрисида Томонларнинг ўзаро хабар қилганларидан сўнг 60 кун ўтгач кучга киради.

2. Ушбу Битим номаълум муддатга тузилади.

3. Ушбу Битим Томонлар тарафидан дипломатик каналлар орқали денонсация қилиниши мумкин, Томонлардан бири бошқа Томондан хабарнома олганидан сўнг олти ой ўтгач, ушбу Битим амал қилишини тўхтатади.

Тошкент шаҳрида 2001 йил 2 ноябрда икки нусхада, ҳар бири ўзбек ва немис тилларида тузилди, бунда барча матнлар бир хил кучга эга.