Ўзбекистон Республикаси Ҳукумати ва Россия Федерацияси Ҳукумати—бундан кейин Томонлар деб аталувчилар,

Ўзбекистон Республикаси билан Россия Федерацияси ўртасида тузилган стратегик шерикчилик тўғрисида 2004 йил 16 июндаги Шартнома, Ўзбекистон Республикаси билан Россия Федерацияси ўртасидаги иттифоқчилик тўғрисида 2005 йил 14 ноябрдаги Шартнома, Ўзбекистон Республикаси билан Россия Федерацияси ўртасида ҳарбий ва ҳарбий-техникавий соҳаларда ҳар томонлама ҳамкорликни янада чуқурлаштириш тўғрисида 1999 йил 11 декабрдаги Шартнома ҳамда Ўзбекистон Республикаси Ҳукумати билан Россия Федерацияси Ҳукумати ўртасида ҳарбий-техникавий ҳамкорлик тўғрисида 1995 йил 27 июлдаги Битимга амал қилган ҳолда,

икки томонлама ҳарбий-техникавий ҳамкорлик жараёнида фойдаланиладиган ва (ёки) олинган интеллектуал фаолият натижаларига бўлган ҳуқуқларини самарали ҳимоя қилишни таъминлаш заруратини англаб,

тенглик ва ўзаро манфаатдорлик принципларига асосланиб,

қуйидагилар тўғрисида келишиб олдилар:

Мазкур Битимда қўлланиладиган тушунчалар қуйидаги маъноларни англатади:

«ҳарбий-техникавий ҳамкорлик» — ҳарбий мақсадларга мўлжалланган маҳсулотларни олиб чиқиш ва олиб кириш, шунингдек етказиб бериш ва сотиб олиш ҳамда уни ишлаб чиқиш, ишлаб чиқариш ва модернизация қилиш билан боғлиқ халқаро муносабатлар соҳасидаги Томонларнинг фаолияти;

«интеллектуал мулк» — 1967 йил 14 июлда Стокгольм шаҳрида имзоланган ва 1972 йил 2 октябрда ўзгартириш киритилган Бутунжаҳон интеллектуал мулк ташкилотини таъсис этувчи Конвенциянинг 2-моддасида белгиланган мазмунда тушунилади;

«ахборот» — икки томонлама ҳарбий-техникавий ҳамкорлик, уларни амалга ошириш ва (ёки) тақдим этиш шаклидан қатъи назар, олинган натижалар жараёнида тузилган шартномалар (контрактлар) предметига тааллуқли предметлар, фактлар, воқеалар, ҳодисалар ва жараёнлар тўғрисида маълумотлар;

«махфий ахборот» — ҳужжатлаштирилган ахборот, «ноу-хау», шунингдек учинчи шахсларнинг хабари бўлмаганлиги сабабли аниқ ёки потенциал тижорий қийматга эга, қонуний асосда эркин олиш мумкин бўлмаган ва эгаси унинг муҳофазасини таъминлаш бўйича чоралар кўради;

«ҳарбий мақсадга мўлжалланган маҳсулот» — қурол-аслаҳа, ҳарбий техника, ишлар, хизматлар, интеллектуал фаолият натижалари, жумладан уларга (интеллектуал мулкка) бўлган мутлоқ ҳуқуқлар ва икки томонлама ҳарбий-техникавий ҳамкорликка дахлдор ахборот;

«интеллектуал фаолият натижалари» — техник ва илмий-техник ҳужжатларда сақланаётган, моддий сақловчиларда қайд этилган ҳамда намуналарда, буюмларнинг макетларида сақланаётган илмий, конструкторлик, техник ва технологик қарорлар, шунингдек уларга (интеллектуал мулкка) бўлган мутлоқ ҳуқуқлар;

«фойдаланиладиган интеллектуал фаолият натижалари» — Битим доирасидан ташқари яратилган интеллектуал фаолият натижалари, жумладан шартнома (контракт)нинг Томонлари ёки иштирокчилари эга бўлган ва (ёки) тасарруф этадиган ҳамда улардан фойдаланиш Битим доирасидаги ҳамкорлик фаолиятини амалга ошириш учун зарур мустақил тадқиқотлар натижалари;

«интеллектуал фаолиятдан олинган натижалар» — икки томонлама ҳарбий-техникавий ҳамкорлик доирасида тузилган шартномалар (контрактлар)ни бажариш жараёнида яратилган интеллектуал фаолият натижалари;

«шартнома (контракт) иштирокчилари» — Томонлар давлатларининг қонунчилигига мувофиқ ҳарбий мақсадга мўлжалланган маҳсулотлар бўйича ташқи савдо фаолиятини амалга ошириш ваколатига эга бўлган ва икки томонлама ҳарбий-техникавий ҳамкорликни амалга оширишга қаратилган шартномалар (контрактлар) имзолаган Томонлар давлатларининг юридик шахслари.

Мазкур Битимнинг мақсади Ўзбекистон Республикаси ва Россия Федерация қонунчилиги, шунингдек Томонлар давлатлари иштирокчиси бўлган халқаро шартномаларга мувофиқ, икки томонлама ҳарбий-техникавий ҳамкорлик жараёнида фойдаланиладиган ва (ёки) олинган интеллектуал фаолият натижаларига бўлган ҳуқуқларни ҳимоя қилишни таъминлашдир.

Мазкур Битимни амалга оширишда Томонларнинг ваколатли органлари бўлиб:

Ўзбек Томонидан — Ўзбекистон Республикаси ташқи иқтисодий алоқалар, инвестициялар ва савдо вазирлиги;

Россия Томонидан — Россия Федерацияси Адлия вазирлиги ва Россия Федерацияси Мудофаа вазирлиги.

Мазкур Битимни амалга ошириш ваколати бошқа ваколатли органга берилганда ёки ваколатли органнинг номланиши ёки вазифалари ўзгарган ҳолатда тегишли Томон бошқа Томонни бу ҳақида дипломатик каналлар орқали хабардор этади.

Шартнома (контракт) иштирокчилари икки томонлама ҳарбий-техникавий ҳамкорлик жараёнида тузиладиган интеллектуал фаолият натижаларини ҳуқуқий ҳимоя қилишни таъминлашни назарда тутадиган шартнома (контракт) лойиҳалари тўғрисида Томонларнинг ваколатли органларини хабардор қиладилар.

Икки томонлама ҳарбий-техникавий ҳамкорлик жараёнида фойдаланиладиган ва олинган интеллектуал фаолият натижаларига бўлган ҳуқуқларни ҳимоя қилиш қуйидагича амалга оширилади:

интеллектуал фаолият натижаларини фойдаланишга ва (ёки) олишга бўлган ҳуқуқларини ҳимоя қилиш билан боғлиқ масалаларни келишиш ва (ёки) маслаҳатлашувлар ўтказиш;

интеллектуал фаолият натижаларини қўллаш соҳасида ҳуқуқбузарликларни огоҳлантириш бўйича тадбирлар амалга ошириш;

бир Томоннинг бошқа Томон сўровига асосан интеллектуал фаолият натижаларидан фойдаланиш ва уларни ҳимоя қилишга оид норматив-ҳуқуқий ҳужжатларни тақдим қилиш;

интеллектуал фаолият натижаларига бўлган ҳуқуқларни ҳимоя ва муҳофаза қилиш масалалари юзасидан тажриба ва ахборот алмашиш;

агар Томонлар давлатларининг бошқа давлатлар олдидаги халқаро мажбуриятларига ва Томонлар давлатлари қонунчилигига зид келмаса ҳар бир Томоннинг интеллектуал мулкни қўриқлашнинг ўзига хос хусусиятларини акс эттирувчи бошқа халқаро шартномаларда иштирокига оид халқаро ҳамкорлиги юзасидан тажриба ва ахборот алмашиш;

Мазкур рўйхат якуний бўлиб ҳисобланмайди ва у Томонлар ўзаро келишуви асосида аниқлаштирилиши, ўзгартирилиши ва тўлдирилиши мумкин.

Ҳар бир Томон ўз давлати қонунчилиги ҳамда Ўзбекистон Республикаси ва Россия Федерацияси иштирокчилари бўлган халқаро шартномалар қоидалари доирасида бошқа Томондан олинган интеллектуал фаолият натижаларининг ҳуқуқий муҳофазасини таъминлайди.

Агар Томонлардан бири шартномалар (контрактлар) амалга оширилиши давомида олинган натижалар Томонлар давлатлари қонунчилиги билан муҳофаза қилинмаяпти деб ҳисобласа, Томонлар икки томонлама ҳарбий-техникавий ҳамкорликни амалга ошириш доирасида интеллектуал фаолият натижаларини муҳофаза этиш юзасидан кечиктирмасдан маслаҳатлашувлар ўтказадилар.

Томонлар ва (ёки) шартнома (контракт) иштирокчилари икки томонлама ҳарбий-техникавий ҳамкорлик доирасида тузиладиган шартномаларда (контрактларда) қуйидагиларни назарда тутадилар:

Томонлар ва (ёки) шартнома (контракт) иштирокчилари давлатлари қўшган ҳиссасини инобатга олган ҳолда интеллектуал фаолият натижаларидан олинган ҳуқуқларни тақсимлаш ва белгилаш тартибини;

фойдаланилаётган ва (ёки) олинган интеллектуал фаолият натижаларини муҳофазасини таъминлашга оид мажбуриятларни;

фойдаланилаётган ва (ёки) олинган интеллектуал фаолият натижаларини Томонлар давлатлари ҳудудларида ва учинчи давлатлар ҳудудларида қўллаш шартлари ва тартибини;

агар бошқа Томоннинг интеллектуал фаолият натижаларини муҳофазага оид ўз мажбуриятларини бузган ҳолатда бир Томоннинг ҳуқуқларини;

махфий ахборотдан фойдаланиш ва тақдим этишга оид ҳар бир Томоннинг ва (ёки) шартнома (контракт) иштирокчиларининг ҳуқуқларини ва уни ҳимоясини таъминлашга доир уларнинг мажбуриятларини;

интеллектуал фаолият натижаларига оид маълумотларни бериш, алмашиш ва нашр қилиш тартиби ва шартларини.

Ҳар бир Томон ўз давлати қонунчилигига, шунингдек Ўзбекистон Республикаси ва Россия Федерацияси иштирокчи бўлган халқаро шартномаларга мувофиқ интеллектуал фаолият натижаларидан фойдаланишга, уларга бўлган ҳуқуқлар бошқа Томоннинг давлатига ва (ёки) шартнома (контракт) иштирокчисига тегишли, ҳарбий мақсадлардаги маҳсулотларни ишлаб чиқишда, ишлаб чиқаришда, модернизация қилишда ҳамда уни учинчи давлат ҳудудида тарқатишда мазкур Томон давлатининг ёзма розилигисиз йўл қўймаслик мақсадида чоралар кўради.

Томонлардан бири томонидан қўлланилаётган ва (ёки) олинган интеллектуал фаолият натижаларига бўлган ҳуқуқларни иккинчи Томонга бериш Томонлар давлатларининг қонунчилигига мувофиқ амалга оширилади.

Томонлар учинчи давлатлар манфаатлари йўлида, бир Томоннинг давлатида ишлаб чиқилган ёки етказиб берилган ҳарбий мақсадлардаги маҳсулотлар модернизациясини амалга оширишни, агар бундай модернизация жараёнида интеллектуал фаолият натижаларини, шунингдек Томонлар бир-бирларига тақдим этган махфий ахборотларни қўллаш тахмин қилинган бўлса, ёзма шаклда ўзаро келишадилар.

Томонлар ва (ёки) шартнома (контракт) иштирокчилари ўзаро келишув бўйича интеллектуал фаолиятдан олинган натижаларга муҳофаза ҳужжатларини олишга ариза бериш мақсадга мувофиқлигини ва (ёки) уларни махфий ҳимоя қилиш тартибини ўзаро келишган ҳолда белгилайдилар.

Томонлар муҳофаза ҳужжатларига ариза беришда қуйидагиларга амал қиладилар:

Ўзбекистон Республикасида яратилган интеллектуал фаолият натижаларига бўлган муҳофаза ҳужжатларига ариза биринчи навбатда Ўзбекистон Республикасининг интеллектуал мулк объектларини муҳофаза қилиш бўйича ваколатли органига топширилади;

Россия Федерациясида яратилган интеллектуал фаолият натижаларига бўлган муҳофаза ҳужжатларига ариза биринчи навбатда Россия Федерацияси қонунчилигига мувофиқ шундай аризаларни кўриб чиқиш ваколатига эга бўлган ижроия ҳокимиятининг федерал органларига топширилади.

Амалда қўлланилаётган интеллектуал фаолият натижалари ҳақидаги ахборот бераётган Томон ва (ёки) шартнома (контракт) иштирокчиси томонидан махфий деб белгиланган ва тан олинган ахборот уни олаётган Томон ва (ёки) шартнома (контракт) иштирокчиси томонидан ўз-ўзидан махфий ахборот деб тан олинади ва муҳофаза қилинади.

Интеллектуал фаолият натижалари ҳақидаги ахборот Томонлар ва (ёки) шартнома (контракт) иштирокчилари томонидан ўзаро келишилган ҳолда махфий деб тан олинади.

Махфий ахборотлар алмашинуви ва муҳофаза қилиш шартлари 2003 йил 31 октябрдаги Ўзбекистон Республикаси Ҳукумати ва Россия Федерацияси Ҳукумати ўртасида махфий ахборотни ўзаро ҳимоя қилиш тўғрисида Битимга асосан белгиланади.

Мазкур Битим қоидалари Ўзбекистон Республикаси ва Россия Федерацияси иштирок этаётган бошқа халқаро шартномалардан келиб чиқувчи Томонларнинг ҳуқуқ ва мажбуриятларига дахл қилмайди.

Томонларнинг ўзаро келишувига кўра мазкур Битимга алоҳида баённомалар билан расмийлаштириладиган ўзгартиришлар киритилиши мумкин, уларнинг кучга кириш тартиби Томонларнинг ўзаро келишувига кўра белгиланади.

Томонлар ўртасида мазкур Битим қоидаларини талқин қилиш ёки қўллаш билан боғлиқ баҳслар вужудга келганда, Томонларнинг ваколатли органлари маслаҳатлашувлар ёки музокаралар ўтказадилар.

Мазкур Битим Томонларнинг унинг кучга кириши учун зарур ички давлат процедураларини бажарганлиги тўғрисидаги сўнгги ёзма равишда хабардор қилинган кундан бошлаб кучга киради.

Мазкур Битим 5 йил муддатга тузилади ва агар Томонлардан бирортаси мазкур Битимнинг амал қилиш муддати тугашидан камида 6 ой олдин ёзма равишда унинг амалини тугатиш нияти борлиги тўғрисида бошқа Томонга хабар бермаса, у ўз-ўзидан кейинги беш йиллик муддатларга чўзилади.

Агар Томонлар ўзгача келишмасалар мазкур Битим амал қилишининг тугаши Битимнинг 5, 7 ва 9-моддаларида кўрсатилган мажбуриятларни бажарилишига дахл қилмайди.

Тошкент шаҳрида 2007 йил 28 ноябрда, ҳар бири ўзбек ва рус тилларида икки нусхада тузилди, бунда иккала матн ҳам бир хил кучга эга.