Ўзбекистон Республикасининг «Ветеринария тўғрисида»ги Қонуни талабларини бажариш мақсадида Ўзбекистон Республикаси Вазирлар Маҳкамасининг 2007 йил 21 декабрдаги 03-38-144-сонли баёнига мувофиқ буюраман:

1. «Соғин сигирлар, қўй ва эчкиларнинг маститларини даволашда линкомаст (конюлали шприцлар) препаратини қўллаш бўйича Қўлланма» иловага мувофиқ тасдиқлансин.

2. Мазкур ҳужжат Ўзбекистон Республикаси Адлия вазирлигида давлат рўйхатидан ўтказилган кундан бошлаб 10 кун ўтгандан кейин кучга киради.

3. Мазкур Қўлланма тасдиқланиши муносабати билан Ўзбекистон Республикаси Давлат ветеринария бош бошқармаси томонидан 2007 йил 14 сентябрда тасдиқланган «Соғин сигирлар, қўй ва эчкиларнинг маститларини даволашда линкомаст (конюлали шприцлар) препаратини қўллаш бўйича Қўлланма» ўз кучини йўқотган деб ҳисоблансин.

4. Мазкур буйруқнинг ижросини назорат қилишни ўз зиммамда қолдираман.

1. Линкомаст (Lincomast) — таркибида фаол таъсир этувчи моддалари сифатида линкомицин гидрохлорид, гентамицин сульфат, преднизолон ацетат ва ёрдамчи компонентлари мавжуд бўлган комплекс препарат.

2. Ташқи кўринишига кўра ўзига хос ҳидли, оқдан оч-сариқ ранггача бўлган малҳамсимон масса.

3. Линкомаст 8 граммли, таркибида 250 мг линкомицин гидрохлорид, 80 мг гентамицин сульфат, 5 мг преднизолон ацетат бўлган конюлали шприцларга қадоқланади.

4. Препарат қуруқ, қуёш нурларидан ҳимояланган, болаларнинг қўли етмайдиган жойда, 25°С ҳароратда сақланади.

Препаратнинг яроқлилик муддати сақлаш шартларига риоя қилинганда тайёрланган кунидан бошлаб 2 йил.

5. Линкомицин ва гентамицин патоген микроорганизмларга Str. agalactiae, Str. dysgalactiae, Str. uberis, Staph, aureus, E. coli, Corinebact. pyogenes, Mycoplasma bovigenitalium ва бошқаларга нисбатан фаол.

6. Преднизолон ацетат яллиғланишга қарши таъсирга эга.

7. Линкомаст сигирлар, урғочи буйволлар, қўй ва эчкиларнинг сут бериш давридаги линкомицин ва гентамицинга таъсирчан патоген микроорганизмлар қўзғатган ўткир клиник ва субклиник маститларни даволаш учун қўлланилади.

8. Ўткир клиник маститларда препарат сут безларидаги аввал сути бутунлай соғиб олинган ва антисептик ишлов берилган елиннинг зарарланган қисмига қуйидаги дозаларда юборилади: сигирларга — битта конюлали шприц, қўй ва эчкиларга — шприц таркибининг 1/3 қисмидан то 1/2 қисмигача. 12 соатдан сўнг елиннинг зарарланган чорак қисми соғиб ташланади ва препарат батамом соғайгунча қайтадан қўлланилади (3 кундан 5 кунгача).

9. Сут бериш давридаги субклиник ва сурункали маститларда препарат юқорида кўрсатилган дозаларда сигир, қўй ва эчкилар елинининг зарарланган чорагига, кечқурун сутни соғиб олингандан кейин қўлланилади. Эртасига эрталабки соғишдан кейин препарат яна юборилади ва ушбу муолажа кун давомида ҳар 3-4 соатда такрорланади. Бир суткадан сўнг кечқурун препаратни яна қайтадан қўлланилади.

10. Даволаш даврида ва препарат сўнгги марта қўлланилгандан кейин 72 соат давомида сутни (елиннинг соғлом қисмларидан соғилган) истеъмол қилишга йўл қўйилмайди. Елиннинг касалланган қисмидаги сутни алоҳида идишга соғиб олинади ва яроқсизлантирилади, соғлом қисмидан соғилган сутни қайнатиб, сўнгра ҳайвонларга берилади.

Ҳайвонларни сўйишга препарат қўлланилгандан 2 кун ўтгач рухсат этилади. Белгиланган муддатдан аввал сўйилган гўштдан гўштхўр ҳайвонларга емиш сифатида ёки гўшт суяк уни ишлаб чиқаришда фойдаланилади.

11. Сенсибилизация ҳолатлари рўй бермаслиги учун препаратни тери ва шиллиқ пардаларга тегишига йўл қўймаслик керак.

12. Препарат ушбу Қўлланма талабларига мувофиқ келмаган тақдирда, унинг қўлланилиши тўхтатилиб, бу ҳақида Ўзбекистон ветеринария препаратлари давлат илмий назорат лабораториясига қуйидаги манзил бўйича мурожаат қилинади: 100178, Тошкент ш., А.Юнусов кўчаси, 1а уй. Тел./факс: 228-76-14, 229-30-47. E-mail: uzgnkl@rambler.ru. Бир вақтнинг ўзида лабораторияга препаратнинг лаборатория билан келишилган миқдордаги очилмаган ўрамлари ва препаратнинг қўлланмага мувофиқ келмаслигининг тўлиқ тавсифи жўнатилади.