Ўзбекистон Республикасининг «Ветеринария тўғрисида»ги Қонуни талабларини бажариш мақсадида Ўзбекистон Республикаси Вазирлар Маҳкамасининг 2007 йил 21 декабрдаги 03-38-144-сонли баёнига мувофиқ буюраман:

1. «Паррандаларнинг бактериал инфекцияларида перорал қўлланилувчи энроксим 10 % ли кукун препаратини қўллаш бўйича Қўлланма» иловага мувофиқ тасдиқлансин.

2. Мазкур ҳужжат Ўзбекистон Республикаси Адлия вазирлигида давлат рўйхатидан ўтказилган кундан бошлаб 10 кун ўтгандан кейин кучга киради.

3. Мазкур Қўлланма тасдиқланиши муносабати билан Ўзбекистон Республикаси Давлат ветеринария бош бошқармаси томонидан 2007 йил 14 августда тасдиқланган «Паррандаларнинг бактериал инфекцияларида перорал қўлланилувчи энроксим 10 % ли кукун препаратини қўллаш бўйича Қўлланма» ўз кучини йўқотган деб ҳисоблансин.

4. Мазкур буйруқнинг ижросини назорат қилишни ўз зиммамда қолдираман.

1. Энроксим 10 % ли кукуни (Pulvis Aenroxim 10%) — фаол таъсир этувчи моддаси сифатида энрофлоксацин ва тўлдирувчилари бўлган микробларга қарши препарат.

Синонимлари: ренровет, энрофлокс, колмик Е.

2. Препарат ташқи кўринишига кўра оч сариқ рангли кукун, 1,0 г кукун таркибида таъсир этувчиси сифатида 100 мг энрофлоксацин мавжуд.

3. Препарат шиша флаконларга ёки полиэтилен идиш ва қопқоқли полиэтилен флаконларга ёки фольгали ўрамларга 5,0, 10, 20, 50, 100, 200, 500 ва 1000 граммдан қадоқланади.

Препарат қуруқ бинода, болалар қўли етмайдиган жойда, 25°С дан юқори бўлмаган ҳароратда, «Б» рўйхати бўйича сақланади.

Препаратнинг яроқлилик муддати сақлаш шартларига риоя қилинганда тайёрланган кунидан бошлаб 3 йил.

4. Энроксим таркибига кирувчи энрофлоксацин фторхинолонлар гуруҳига мансуб ва кенг кўламдаги бактерияларга қарши таъсирга эга, граммусбат ва грамманфий микроорганизмлар, шу жумладан эшерихиялар, сальмонеллалар, пастереллалар, стафилококклар, кслебсиеллалар, псевдомонадлар, бордетеллар, кампиллобактериялар, кориебактериялар, протея ва микоплазмаларга нисбатан фаол.

5. Энроксим парранда ошқозон-ичак трактидан яхши сўрилади ва организмнинг барча орган ва тўқималарига тарқалади. Препаратнинг қондаги максимал концентрациясига 1,5-2 соатдан кейин эришилади ва у 6 соат давомида сақланади, терапевтик концентрация эса 24 соат мобайнида сақланиб туради.

6. Препаратнинг оғиз орқали юборилган асосий қисми ўзгармаган ҳолда сийдик ва сафро орқали ажралади.

7. Энроксим паррандаларга колибактериоз, сальмонеллез, некротик энтерит, стрептококкоз, гемофилез, кампилобактерияли гепатит, микоплазмоз, ва бошқа қўзғатувчилари энрофлоксацинга таъсирчан бўлган касалликларида даволаш ва олдини олиш мақсадида қўлланилади.

8. Препарат паррандаларга озуқага қўшилган ҳолда 1 кг парранда вазнига 100 мг дозада (ёки 1 кг препарат 1000 кг озуқага) 3 — 5 кун давомида, сальмонеллёзда эса 5 — 7 кун давомида қўлланилади.

9. Тавсия этилган дозаларда қўшимча асоратлар кузатилмайди.

10. Препарат энрофлоксацин тухум билан ажралиб чиқиши туфайли тухум қўювчи товуқларга қўлланилмайди, ҳамда антагонстик таъсир пайдо бўлиши сабабли левомицетин, тетрациклин ва макролидлар гуруҳига мансуб препаратлар билан биргаликда қўлланилмайди.

11. Паррандаларни сўйишга препарат сўнгги марта қўлланилгандан кейин 12 кун ўтгач рухсат этилади. Белгиланган муддатдан аввал сўйилган гўштдан, гўштхўр ҳайвонларга емиш сифатида ёки гўшт суяк уни ишлаб чиқаришда фойдаланилади.

12. Препарат ушбу Қўлланма талабларига мувофиқ келмаган тақдирда, унинг қўлланилиши тўхтатилиб, бу ҳақида Ўзбекистон ветеринария препаратлари давлат илмий назорат лабораториясига қуйидаги манзил бўйича мурожаат қилинади: 100178, Тошкент ш., А.Юнусов кўчаси, 1а уй. Тел./факс: 228-76-14, 229-30-47. E-mail: uzgiikl@rambler.ru. Бир вақтнинг ўзида лабораторияга препаратнинг лаборатория билан келишилган миқдордаги очилмаган ўрамлари ва препаратнинг қўлланмага мувофиқ келмаслигининг тўлиқ тавсифи жўнатилади.