Ўзбекистон Республикасининг «Ветеринария тўғрисида»ги Қонуни талабларини бажариш мақсадида Ўзбекистон Республикаси Вазирлар Маҳкамасининг 2007 йил 21 декабрдаги 03-38-144-сонли Баёнига мувофиқ буюраман:

1. «Итларни гижжасизлантириш учун вормит (таблеткалар) препаратини қўллаш бўйича Қўлланма» иловага мувофиқ тасдиқлансин.

2. Мазкур ҳужжат Ўзбекистон Республикаси Адлия вазирлигида давлат рўйхатидан ўтказилган кундан бошлаб 10 кун ўтгандан кейин кучга киради.

3. Мазкур Қўлланма тасдиқланиши муносабати билан Ўзбекистон Республикаси Давлат ветеринария бош бошқармаси томонидан 2006 йил 10 февралда тасдиқланган «Итларни гижжасизлантириш учун вормит (таблеткалар) препаратини қўллаш бўйича Қўлланма» ўз кучини йўқотган деб ҳисоблансин.

4. Мазкур буйруқнинг ижросини назорат қилишни ўз зиммамда қолдираман.

1. Вормит — итлар учун кенг таъсир кўламига эга бўлган антгельминтик препарати. Ҳар бир таблетка таркиби: празиквантель 50 мг, пирантель памоат 144 мг, фебантель 150 мг ва тўлдирувчилардан иборат.

2. Препарат 10 та таблеткадан блистерларга, картон қутиларга 10 блистердан қадоқланади.

3. Препарат ташқи кўринишига кўра ўйиқ чизиқли (кертикли) кулрангсимон тусли оқ ёки деярли оқ рангдаги таблеткалар.

4. Препарат эҳтиёткорлик билан (Б рўйхати) қуруқ, салқин, ёруғлик тушмайдиган ва болаларнинг қўли етмайдиган жойда, 25°С дан юқори бўлмаган ҳароратда сақланади.

Яроқлилик муддати сақлаш шартларига риоя қилинганда 3 йил.

5. Вормит турлича таъсир этиш усуллари ва кўламига эга бўлган учта фаол компонентдан ташкил топган.

6. Празиквантель цестодларга қарши фаол. У жигарга сингдирилади ва сафро билан ажралади. Овқат ҳазм қилиш трактига сафро билан киргандан сўнг цестодларга таъсир кўрсатади, натижада паразит сут эмизувчи хўжайини томонидан ҳазм қилинишига ўзининг қаршилик кучини йўқотади. Шунинг учун аксарият паразитлар ҳазм бўлиб кетади ва бутун гельминтлар, сколексларни ҳам киритган ҳолда, камдан-кам ҳолларда ахлат ичидан топилади. Кўпгина ҳолатларда уларнинг бўлинган ва қисман ҳазм бўлган бўлаклари ҳайвонлар ахлатида топилиши мумкин.

7. Пирантель памоат немотодларга қарши фаол. У нематодларнинг холинергик рецепторларига таъсир этиб, уларни спазматик фалажликка олиб келади. Ичак трактининг перистальтик ҳаракатлари гельминтларни ахлат билан ажратиб чиқаради.

8. Фебантель нематодларга қарши фаол бўлиб, паразит энергияси метаболизмига тўсқинлик қилади.

9. Препарат итларнинг гельминтозларини, шу жумладан қуйидагилар қўзғатган: Dipylidium caninum, Taenia pisiformis, Echinococcus granulosus, Echinococcus multilocularis, Ancylostoma caninum, Uncinaria stenocephala, Toxocara canis, Toxascaris leonina ва Trichuris vulpis даволаш ва олдини олишда қўлланилади.

10. Дозировкаси: 10 кг ҳайвон вазнига 1 таблетка ҳисобида олиниб, итга бевосита оғиз орқали ёки емиш билан, бир маротаба ёки ветеринария мутахассиси кўрсатмасига биноан берилади.

Препарат урғочи итларга сут эмизиш даврида қўлланилиши мумкин.

11. Вормит урғочи итларга, шунингдек таркибида празиквантель бўлган препаратлар билан бир вақтда қўллаш тавсия этилмайди.

12. Қўшимча асоратлар камдан-кам учрайди, лекин қусиш, вақтинчалик иштаҳа йўқолиши, диарея (ич кетиши), ҳолсизлик, уйқу босиши ва аллергик таъсирлар кузатилиши мумкин.

13. Итларни гижжасизлантиришда маҳаллий ҳудудни ифлослантирмаслик мақсадида умумий гигиеник қоидаларга риоя этиш даркор, айниқса Е. multilocularis томонидан қўзғатилган гельминтозларга шубҳа туғилган ҳолларда.

Одамлар итларга таблетка берганларидан сўнг қўлларини ювишлари лозим. Таблетканинг фойдаланилмаган қисмини йўқ қилиш зарур. Препарат билан ишлаганда ҳеч қандай махсус чоралар талаб этилмайди.

14. Препарат ушбу Қўлланма талабларига мувофиқ келмаган тақдирда, унинг қўлланилиши тўхтатилиб, бу ҳақида Ўзбекистон ветеринария препаратлари давлат илмий назорат лабораториясига қуйидаги манзил бўйича мурожаат қилинади: 100178, Тошкент ш., А.Юнусов кўчаси, 1а уй. Тел./факс: 228-76-14, 229-30-47. E-mail: uzgnkl@rambler.ru. Бир вақтнинг ўзида лабораторияга препаратнинг лаборатория билан келишилган миқдордаги очилмаган ўрамлари ва препаратнинг қўлланмага мувофиқ келмаслигининг тўлиқ тавсифи жўнатилади.