Ўзбекистон Республикасининг «Ветеринария тўғрисида»ги Қонуни талабларини бажариш мақсадида Ўзбекистон Республикаси Вазирлар Маҳкамасининг 2007 йил 21 декабрдаги 03-38-144-сонли Баёнига мувофиқ буюраман:

1. «Ҳайвон ва паррандаларнинг инфекцион касалликларини даволаш ва олдини олишда тиамфеникол 20%ли препарат кукунини қўллаш бўйича Қўлланма» иловага мувофиқ тасдиқлансин.

2. Мазкур ҳужжат Ўзбекистон Республикаси Адлия вазирлигида давлат рўйхатидан ўтказилган кундан бошлаб 10 кун ўтгандан кейин кучга киради.

3. Мазкур Қўлланма тасдиқланиши муносабати билан Ўзбекистон Республикаси Давлат ветеринария бош бошқармаси томонидан 2007 йил 14 августда тасдиқланган «Ҳайвон ва паррандаларнинг инфекцион касалликларини даволаш ва олдини олишда тиамфеникол 20%ли препарат кукунини қўллаш бўйича Қўлланма» ўз кучини йўқотган деб ҳисоблансин.

4. Мазкур буйруқнинг ижросини назорат қилишни ўз зиммамда қолдираман.

1. Тиамфеникол 20%ли кукуни (Tiamphenicol pulvis 20%) — фаол таъсир этувчи моддаси сифатида тиамфеникол антибиотикли препарат. Синонимлари: Тиамфеникола глицинат ацетилцистеинат, флуимуцил.

2. Таркиби: 100 г препарат таркибида 20,0 г (20000000 UE) тиамфеникол ва 80,0 г тўлдирувчи мавжуд.

3. Ташқи кўринишига кўра бир турдаги оқдан оч сариқ ранггача бўлган, аччиқ таъмли кукун.

4. Чиқарилиш шакли — банка ва полиэтилен флаконларга ёки алюмин фольгали ёки аралаш материаллардан тайёрланган пакетларга 10,0; 20,0; 50,0; 100,0; 200,0; 400,0; 500,0 ва 1000,0 г дан қадоқланган кукун.

Препарат қуруқ бинода, болалар қўли етмайдиган жойда, 25°С дан юқори бўлмаган ҳароратда, «Б» рўйхати бўйича сақланади.

Препаратнинг яроқлилик муддати сақлаш қоидаларига риоя қилинганда тайёрланган кунидан бошлаб 3 йил.

5. Препарат таркибига кирувчи тиамфеникол амфениколлар гуруҳига мансуб антибиотик. У хлорамфениколга ўхшаш ва кенг кўламдаги бактерияларга қарши таъсирга эга. Граммусбат ва грамманфий микроорганизмлар, риккетсийлар, баъзи йирик вируслар ва протозойлар, стрептококклар, стафилококклар, пневмококклар, колибактериялар, сальмонеллалар, пастереллалар, спирохетлар, пситаккоз вируслари (орнитоз), Q — безгаги ва бошқаларнинг ривожланишини камайтиради. Хлорамфениколдан фарқли равишда у апластик анемияни вужудга келтирмайди (бош мия суягига қон етказиш функцияси пасайиши таъсирида қондаги гемоглобин моддасининг камайиб кетиши), жигар ва буйракка зарар етказмайди.

6. Препарат организмдан асосан ахлат ва сийдик орқали ажралади.

7. От ва тойларга, йирик ва майда шохли молга: нафас ва ҳазм қилиш органларининг ўткир ва сурункали касалликлари (қўзғатувчилари грамманфий организмлар бўлган пневмониялар, энтерит, колибактериоз, сальмонеллез, пастереллез, бактериал артиритлар, септицемиялар) да қўлланилади.

8. Она чўчқаларнинг «метрит-мастит-агалактия» синдроми (ММА-синдроми), нафас олиш ва ҳазм қилиш органлари инфекциялари (шу жумладан сальмонеллез, дизентерия) ва бошқа инфекцияларини даволаш мақсадида қўлланилади.

9. Паррандаларнинг микоплазмоз, нафас ва ҳазм қилиш органлари инфекцияларини (шу қаторда инфекцион ринит, пастереллез, сальмонеллез, колиинфекция ва бошқалар) даволашда қўлланилади.

10. Препарат орал равишда қўлланилади, кукуннинг керакли дозаси касал ҳайвоннинг бир марталик овқатланишига мўлжалланган озуқасининг 1/2-1/3 қисмига яхшилаб аралаштирилади. Дозировкаси: 3,5-4,5 г/ кг озуқага (700000-900000 UE). Даволаш курси 3—5 кун.

11. Тавсия этилган дозаларда қўшимча асоратлар кузатилмайди. Доза ошириб юборилганда томир торитишиши, коллапс ва нафас олиш қийинлашуви пайдо бўлади. Аналептиклар ва симптоматик даволаш белгиланади.

12. Кавш қайтарувчи ҳайвонларга катта дозаларда юборилганда тиамфеникол овқат ҳазм қилиш трактини микрофлорасини бўшаштиради ва микозлар, авитаминозлар, ошқозон олди атонияси ва тимпаниясини қўзғатади. Бундай ҳолларда Гастровет, Румитон препаратларини ҳўллаш тавсия этилади.

13. Препаратни сийдик йўллари, нафас ва овқат ҳазм қилиш органларининг микотик касалликларида, ҳамда амфениколларга ўта таъсирчанликда қўллаш тавсия этилмайди. Препарат ачитқилар, сульфаниламидлар, уротропин билан бирга қўлланилмайди. Тетрациклинлар сафига мансуб антибиотиклар билан бирга қўлланилиши мумкин. Препаратнинг терапевтик таъсири ҳайвонларга витаминларга бой озуқалар берилганда кучаяди.

14. Ҳайвонларни сўйишга препарат сўнгги марта қўлланилгандан кейин 10 кун, паррандаларни 5 кун ўтгач рухсат этилади.

Сутдан истеъмол мақсадида фойдаланишга препарат қўлланилгач 3 кундан сўнг рухсат этилади.

15. Белгиланган муддатдан аввал сўйилган гўшт ва олинган тухумдан гўштхўр ҳайвонларга емиш сифатида ёки гўшт суяк уни ишлаб чиқаришда фойдаланилади.

16. Препарат билан ишлашда шахсий гигиена ва хавфсизлик техникасининг умумий қоидаларига риоя этиш лозим.

17. Препарат ушбу Қўлланма талабларига мувофиқ келмаган тақдирда, унинг қўлланилиши тўхтатилиб, бу ҳақида Ўзбекистон ветеринария препаратлари давлат илмий назорат лабораториясига қуйидаги манзил бўйича мурожаат қилинади: 100178, Тошкент ш., А.Юнусов кўчаси, 1а уй. Тел./факс: 228-76-14, 229-30-47. E-mail: uzgnkl@rambler.ru. Бир вақтнинг ўзида лабораторияга препаратнинг лаборатория билан келишилган миқдордаги очилмаган ўрамлари ва препаратнинг қўлланмага мувофиқ келмаслигининг тўлиқ тавсифи жўнатилади.