Ўзбекистон Республикасининг «Ветеринария тўғрисида»ги Қонуни талабларини бажариш мақсадида Ўзбекистон Республикаси Вазирлар Маҳкамасининг 2007 йил 21 декабрдаги 03-38-144-сонли Баёнига мувофиқ буюраман:

1. «Янги туғилган ва ўсаётган ҳайвон ва паррандаларнинг турли касалликларини даволаш ва олдини олишда гентамицин сувда эрувчи препарат кукунини қўллаш бўйича Қўлланма» иловага мувофиқ тасдиқлансин

2. Мазкур ҳужжат Ўзбекистон Республикаси Адлия вазирлигида давлат рўйхатидан ўтказилган кундан бошлаб 10 кун ўтгандан кейин кучга киради.

3. Мазкур Қўлланма тасдиқланиши муносабати билан Ўзбекистон Республикаси Давлат ветеринария бош бошқармаси томонидан 2007 йил 17 августда тасдиқланган «Янги туғилган ва ўсаётган ҳайвон ва паррандаларнинг турли касалликларини даволаш ва олдини олишда гентамицин сувда эрувчи препарат кукунини қўллаш бўйича Қўлланма» ўз кучини йўқотган деб ҳисоблансин.

4. Мазкур буйруқнинг ижросини назорат қилишни ўз зиммамда қолдираман.

1. Гентамицин сувда эрувчи кукуни (Gentamycinum pulvis hidrosolubilis) — фаол таъсир этувчи модда сифатида гентамицин антибиотик ва витаминларга эга бўлган комплекс препарат. Синонимлари: гарамицин, гентабиотик.

2. Таркиби: гентамицин сульфат 1,6 г., ретинол (витамин А) 0,100 г., тиамин бромид (витамин B₁) 0,200 г., рибофлавин (витамин В₂) 0,050 г., никотинамид (витамин РР) 0,460 г., аскорбин кислотаси (витамин С) 0,500 г. ва 0,100 гача бўлган тўлдирувчилар.

3. Ташқи кўринишига кўра оч сариқдан то сариқ ранггача бўлган сувда яхши эрувчи кукун.

4. Чиқарилиш шакли — 100,0, 200,0, 500,0 ва 1000,0 г дан банка ва полиэтилен флаконларга ёки алюдоин фольга қоғозли ва аралаш материаллардан тайёрланган пакетларга қадоқланган кукун.

Препарат қуруқ бинода, болалар қўли етмайдиган жойда, 25°С дан юқори бўлмаган ҳароратда, «Б» рўйхати бўйича сақланади.

Препаратнинг яроқлилик муддати сақлаш шартларига риоя қилинганда тайёрланган кунидан бошлаб 2 йил.

5. Гентамицин сульфат кенг кўламдаги микробларга қарши таъсири билан характерланувчи аминогликозидлар гуруҳига мансуб антибиотик.

Кўпгина граммусбат ва грамманфий микроорганизмларга: кўк йирингли ва ичак таёқчалари, тифопаратифоз ва дизентерия бактерияларига, шу жумладан ўта барқарор стафилококка нисбатан фаол.

Гентамицин микроб ҳужайраларига бактерицид таъсир кўрсатиб, кўпаювчи ҳужайралардаги оқсил синтезини бостиради.

Гентамицин қабул қилинганда қонда яхши сўрилмайди, шу омил туфайли унинг асосан янги туғилган ва ўсаётган ҳайвонларнинг овқат ҳазм қилиш тракти касалликларида микробларга қарши юқори таъсирчанлиги белгиланади. Ошқозон-ичак трактидаги микробларга қарши таъсири 8—12 соат давомида сақланиб туради.

Витамин А-организмга умумий (системали) таъсир кўрсатиб, ўсиш ва ривожланишнинг меъёрда бўлишини таъминлаб туради. Витамин А асаб, эпителиал ҳужайраларининг яшаши ва суяклар ўсиши учун зарур. Бўй ўсиши ва жинсий функцияларни йўлга қуяди.

В комплексидаги витаминлар—организмнинг турли функцияларига фаол таъсир кўрсатади, модда алмашинуви ва нерв-рефлектор регуляциясига таъсири орқали, улар турли патологик жараёнларда ижобий натижаларга олиб келади, углеводородлар, оқсил ва ёғлар алмашинувини яхшилайди. Ачитиш-тикланиш жараёнларига таъсир кўрсатади. В комплексидаги гиповитаминозларнинг ривожланишидан сақлайди.

Никотин кислотаси—овқат ҳазм қилиш трактининг суюқлик ажратиб чиқариш фаолиятини оширади, жигар фаолиятини ва бош миянинг қон билан таъминланишини яхшилайди.

Витамин С—организмнинг турли функцияларига таъсир этади: капиллярларнинг ўтказувчанлиги, суяк тўқималарининг ўсиши ва ривожланиши, нохуш таъсирларга қарши иммунобиологик таъсирчанликни кучайтиради, буйрак усти безининг гормонлари маҳсулотини барқарорлаштиради, тўқималарнинг янгиланишига имкон яратади.

6. Препарат организмдан асосан ахлат ва сийдик орқали ажралади.

7. Препарат қуйидаги мақсадларда:

ҳайвон ва паррандаларнинг касалликларини олдини олиш ва маҳсулдорлигини оширишда;

даволаш мақсадида асосан янги туғилган ва ўсаётган ҳайвонлардаги гентамицинга таъсирчан ва бошқа антибиотикларга чидамли микроорганизмлар қўзғатган овқат ҳазм қилиш тракти касалликлари бузоқлар, чўчқа болалари колибактериозлари, сальмонеллезларида, жўжаларнинг пуллорозларида, жўжалардаги пуллороз ва колибактериознинг аралаш инфекциялари ва бошқа касалликларда қўлланилади.

8. Қўллаш усули: ичимлик суви билан ичирилади (паррандаларга), сув ёки сут билан сўрғич, бутилка, сув хўракка солиб ичирилади ёки ҳайвон ва парранда озуқасига қўшиб (ёки эритилган ҳолатда) берилади. Даволаш курси 5—7 кун. Суткалик дозаси қуйидагича:

9. Препаратни буйрак фаолиятининг бузилиши қўшилган ичак касалликларининг оғир геморрагик ҳолларида қўлланилмайди.

10. Ҳайвонларни сўйишга препарат сўнгги марта қўлланилгандан сўнг камида 10 кун ўтгач рухсат этилади.

Белгиланган муддатдан аввал сўйилган гўшт ва олинган тухумдан гўштхўр ҳайвонларга емиш сифатида ёки гўшт суяк уни ишлаб чиқаришда фойдаланилади.

11. Препарат билан ишлашда шахсий гигиена ва хавфсизлик техникасининг умумий қоидаларига риоя этиш лозим.

12. Препарат ушбу Қўлланма талабларига мувофиқ келмаган тақдирда, унинг қўлланилиши тўхтатилиб, бу ҳақида Ўзбекистон ветеринария препаратлари давлат илмий назорат лабораториясига қуйидаги манзил бўйича мурожаат қилинади: 100178, Тошкент ш., А. Юнусов кўчаси, 1а уй. Тел./факс: 228-76-14, 229-30-47. E-mail: uzgnkl@rambler.ru. Бир вақтнинг ўзида лабораторияга препаратнинг лаборатория билан келишилган миқдордаги очилмаган ўрамлари ва препаратнинг қўлланмага мувофиқ келмаслигининг тўлиқ тавсифи жўнатилади.