Ўзбекистон Республикасининг «Ветеринария тўғрисида»ги Қонуни талабларини бажариш мақсадида Ўзбекистон Республикаси Вазирлар Маҳкамасининг 2007 йил 21 декабрдаги 03-38-144-сонли Баёнига мувофиқ буюраман:

1. Ҳайвон ва паррандалардаги эндо ва эктопаразитларга қарши бронтел (10 % ли инъекцион эритма) препаратини қўллаш бўйича Қўлланма иловага мувофиқ тасдиқлансин.

2. Мазкур ҳужжат Ўзбекистон Республикаси Адлия вазирлигида давлат рўйхатидан ўтказилган кундан бошлаб 10 кун ўтгандан кейин кучга киради.

3. Мазкур Қўлланма тасдиқланиши муносабати билан Ўзбекистон Республикаси Давлат ветеринария бош бошқармаси томонидан 2005 йил 31 майда тасдиқланган «Ҳайвон ва паррандалардаги эндо ва эктопаразитларга қарши бронтел (10 % ли инъекцион эритма) препаратини қўллаш бўйича Қўлланма» ўз кучини йўқотган деб ҳисоблансин.

4. Мазкур буйруқнинг ижросини назорат қилиш бошлиқ ўринбосари М. Юсупов зиммасига юклатилсин.

1. Бронтел — 1 мл таркибида таъсир этувчи модда сифатида махсус эритувчи ичидаги 100 мг клозантел моддаси бўлган паразитларга қарши препарат.

2. Ташқи кўринишига кўра шаффоф оч сарғиш эритма.

3. Бронтел флаконларга 10, 50, 100 ёки 200 мл дан қадоқланади.

4. Препарат ёруғликдан ҳимояланган жойда +5°С дан +25°С гача ҳароратда сақланади.

Препаратнинг яроқлилик муддати сақлаш шартларига риоя қилинганда 2 йил.

5. Клозантел — қуйидаги структурадаги: N-(5 хлоро-4[(4 хлоро-фенил) цианометил]-2-метилфенил-2-гидрооксид-3,5-дийодобензамид) салициланиддан олинган синтетик препарат.

6. Клозантелнинг паразитларга қарши ўзига хос таъсири паразитларнинг энергетик метаболизмини ўзгартириб, сўнгра уларни ҳалок қилувчи электронлар ўтказиш жараёнини тўхтатиш ва тормозлаш орқали ифодаланади.

7. Бронтел терапевтик дозаларда эмбриотоксик ва тератоген таъсирларга эга эмас, ҳамда қўшимча асоратлар чақирмайди.

8. Бронтел йирик шохли мол, қўй, эчки, итларнинг турли локализациядаги экто ва эндопаразитлар вужудга келтирган бир қатор паразитар касалликларини даволаш ва олдини олиш учун қўлланилади.

9. Препарат тери остининг бир жойига майдаланган дозаларда юборилади. Мушак атрофига фақатгина йирик шохли молга қўлланилади.

10. Қўллаш дозаси ва вақти қуйидаги жадвалга асосан амалга оширилади;

11. Препарат фосфороорганик препаратлар билан бир вақтда қўлланилмайди.

12. Эмланган жойда 2-3 кундан сўнг ўз-ўзидан йўқолиб кетувчи ёйилган шиш пайдо бўлиши мумкин.

13. Ҳайвонларни сўйишга препарат қўлланилгач, камида 28 кундан сўнг, сутни истеъмол қилишга 14 кундан сўнг рухсат этилади. Белгиланган муддатдан аввал сўйиш зарурияти туғилганда, гўштдан маҳсулот бермайдиган ҳайвонларга, мўйнали ҳайвонлар ва итларга емиш сифатида фойдаланилади.

14. Препарат ушбу Қўлланма талабларига мувофиқ келмаган тақдирда, унинг қўлланилиши тўхтатилиб, бу ҳақида Ўзбекистон ветеринария препаратлари давлат илмий назорат лабораториясига қуйидаги манзил бўйича мурожаат қилинади: 100178, Тошкент ш., А.Юнусов кўчаси, 1а уй. Тел./факс: 228-76-14, 229-30-47. E-mail: uzgnkl@tkt.uz. Бир вақтнинг ўзида лабораторияга препаратнинг лаборатория билан келишилган миқдордаги очилмаган ўрамлари ва препаратнинг қўлланмага мувофиқ келмаслигининг тўлиқ тавсифи жўнатилади.