Ўзбекистон Республикасининг «Ветеринария тўғрисида»ги Қонуни талабларини бажариш мақсадида Ўзбекистон Республикаси Вазирлар Маҳкамасининг 2007 йил 21 декабрдаги 03-38-144-сонли Баёнига мувофиқ буюраман:

1. Ҳайвонларнинг бактериал касалликларини даволаш ва олдини олишда бровацилин (эмлаш учун кукун) препаратини қўллаш бўйича Қўлланма иловага мувофиқ тасдиқлансин.

2. Мазкур ҳужжат Ўзбекистон Республикаси Адлия вазирлигида давлат рўйхатидан ўтказилган кундан бошлаб 10 кун ўтгандан кейин кучга киради.

3. Мазкур Қўлланма тасдиқланиши муносабати билан Ўзбекистон Республикаси Давлат ветеринария бош бошқармаси томонидан 2006 йил 14 сентябрда тасдиқланган «Ҳайвонларнинг бактериал касалликларини даволаш ва олдини олишда бровацилин (эмлаш учун кукун) препаратини қўллаш бўйича Қўлланма» ўз кучини йўқотган деб ҳисоблансин.

4. Мазкур буйруқнинг ижросини назорат қилиш бошлиқ ўринбосари М. Юсупов зиммасига юклатилсин.

1. Бровацилин — 1г таркибида антибиотикларнинг стерилланган тузлари: бицилин—1 — 500 минг. ҲБ, натрий бензилпенициллин — 300 минг. ҲБ, прокаин-бензилпенициллин—200 минг. ҲБ мавжуд бўлган бактерияларга қарши препарат.

2. Бровацилин ташқи кўринишига кўра оқ ёки оч сарғимтир рангли кукун.

3. Препарат шиша флаконларга 0,25, 0,5, 1 ва 2 г дан қадоқланади.

4. Бровацилин ёруғлик тушмайдиган, болалар қўли етмайдиган жойда 20°С гача ҳароратда сақланади.

Препаратнинг яроқлилик муддати сақлаш шартларига риоя қилинганда тайёрланган кунидан бошлаб 3 йил.

5. Пенициллин тузлари аралашмаси кенг кўламдаги бактерицид таъсирга эгалиги билан ажралиб туради. Таъсир кўлами граммусбат (Staphylococcus spp,, Streptococcus spp., Clostridium spp., Corynebacterium diphtheriae., Bacillus antracis) ва баъзи грамманфий микроорганизмлар, шунингдек спирохетлар (Borrelia, Leptospira, Treponema), кўпчилик актиномицетлар (Actinomyces bovis, Actinobacillis lignieresii) ва патоген микроорганизмларнинг баъзи бошқа турларига тегишли.

6. Мушак орасига юборилганда концентрациянинг юқори даражасига натрий бензилпенициллин ва прокаин-бензилпенициллин ҳисобига эмлашнинг биринчи соатидаёқ эришилади, ҳамда бициллин-1 нинг препаратнинг ёрдамчи қўшимчалари билан биргаликдаги пролонгация таъсирига кўра шу даражада 72 соат давомида сақланади.

7. Препарат аминогликозидлар гуруҳига мансуб антиботиклар (гентамицин, канамицин, неомицин, стрептомицин ва шунга ўхшаш) билан синергик таъсирга эга.

8. Бровацилин ҳайвонларнинг пенициллинларга таъсирчан микроорганизмлар қўзғатган инфекцияларида (актиномикоз, рожа, некробактериоз, пастереллез, стрептококкоз, стафилококкоз, септицемия, шунингдек пневмония, мастит, эндометрит, абсцесс, флегмонлар ва шу кабиларда) даволовчи ва профилактика воситаси сифатида, ҳамда препаратнинг қонда узоқ вақт сақланувчи терапевтик концентрациясини таъминлаш мақсадида қўлланилади.

9. Дозалари ва қўллаш усуллари.

а) Бровацилин суспензияси асептик тарзда, препаратли флаконга 1 г препаратга 3 мл эритувчи ҳисобида инъекция учун стерилланган сув ёки хлорли натрийнинг изотоник эритмасини қўшган ҳолда бевосита қўллаш олдидан тайёрланади.

б) Флакон яхшилаб чайқатилгандан сўнг, олинган суюқликни мушак орасига чуқурроқ юборилади. Йирик ҳайвонларга ҳар бир флакон тананинг бошқа-бошқа жойларига юборилади.

в) Минимал терапевтик (ва профилактик) миқдори (дозаси):

йирик шохли мол, от ва чўчқаларга 1 кг тирик вазнга 10 000ҲБ;

қўй, эчки, қуён, ит ва мушукларга 1 кг тирик вазнга 15 000ҲБ;

мўйнали ҳайвонлар ва уй паррандаларига 1 кг тирик вазнга 30 000ҲБ.

Касаллик оғир ўтган ҳолларда ушбу дозаларни 20—50% га ошириш мақсадга мувофиқдир.

10. Қарши кўрсатмалар.

Бровацилин антагонистлар вазифасини бажарувчи макролидлар гуруҳига мансуб антибиотиклар (эритромицин, тилозин ва бошқ.) ва тетрациклин билан бир вақтда қўлланилмайди.

Пенициллинга индивидуал таъсирчанлиги бўлган ҳайвонларга қўлланилмайди. Аллергик таъсирлар пайдо бўлган тақдирда ҳайвонларга парэнтерал равишда адреналин, димедрол ва 10% кальций хлор эритмаси доимий дозаларда юборилади.

11. Ҳайвонларни сўйишга бровацилин қўлланилгач 15 кундан сўнг рухсат этилади. Даволаш даврида ва ундан кейинги 4 кун давомида олинган сут ва тухумларни истеъмол қилиш ман этилади.

12. Препарат ушбу қўлланма талабларига мувофиқ келмаган тақдирда, унинг қўлланилиши тўхтатилиб, бу ҳақида Ўзбекистон ветеринария препаратлари давлат илмий назорат лабораториясига қуйидаги манзил бўйича мурожаат қилинади: 100178, Тошкент ш., А.Юнусов кўчаси, 1а уй. Тел./факс: 228-76-14, 229-30-47. E-mail: uzgnkl@tkt.uz. Бир вақтнинг ўзида лабораторияга препаратнинг лаборатория билан келишилган миқдордаги очилмаган ўрамлари ва препаратнинг қўлланмага мувофиқ келмаслигининг тўлиқ тавсифи жўнатилади.