Ўзбекистон Республикаси Вазирлар Маҳкамасининг 2007 йил 12 декабрдаги «Ўзбекистон Республикаси Вазирлар Маҳкамасининг 2003 йил 9 июлдаги 308-сон қарори билан тасдиқланган Қимматли қоғозлар бозорида касбий фаолиятни (инвестиция институтларининг қимматли қоғозлар бозоридаги фаолиятини) лицензиялаш тўғрисидаги низомга ўзгартириш киритиш ҳақида»ги 255-сонли қарорининг 2-банди ижросини таъминлаш мақсадида Ўзбекистон Республикаси Марказий банки Бошқаруви ва Давлат рақобат қўмитаси ҳузуридаги Қимматли қоғозлар бозорини мувофиқлаштириш ва ривожлантириш маркази қарор қиладилар:

1. Банкларнинг қимматли қоғозлар бозорида инвестиция воситачиси, инвестиция активларини бошқарувчи ва инвестиция консультанти сифатида касбий фаолиятни амалга оширишига оид талаблар тўғрисидаги низом иловага мувофиқ тасдиқлансин.

2. Мазкур қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кундан кейин кучга киритилсин.

Мазкур Низом Ўзбекистон Республикаси Президентининг «Банк тизимини янада ривожлантириш ва бўш пул маблағларини банк айланмасига жалб этиш чора-тадбирлари тўғрисида» 2007 йил 7 ноябрдаги ПҚ-726-сонли қарори ҳамда Ўзбекистон Республикаси Вазирлар Маҳкамасининг 2007 йил 12 декабрдаги 255-сонли қарорига мувофиқ, банкларнинг қимматли қоғозлар бозорида инвестиция воситачиси, инвестиция активларини бошқарувчи ва инвестиция консультанти сифатида касбий фаолиятни амалга оширишига оид талабларни белгилаб беради.

1. Мазкур Низомда қуйидаги асосий тушунчалар қўлланилади:

банк — қонунчиликда банк фаолияти деб ҳисобланадиган фаолият турлари мажмуини Ўзбекистон Республикаси Марказий банки томонидан берилган лицензияси асосида амалга оширадиган тижорат ташкилоти бўлган юридик шахсдир;

қимматли қоғозлар бозори фаолиятини тартибга солувчи ваколатли давлат органи — Ўзбекистон Республикасининг Давлат рақобат қўмитаси ҳузуридаги Қимматли қоғозлар бозорини мувофиқлаштириш ва ривожлантириш маркази.

2. Банк Ўзбекистон Республикаси Марказий банкидан банк фаолиятини амалга ошириш ҳуқуқини берувчи лицензияни олган вақтдан бошлаб қимматли қоғозлар бозорида инвестиция воситачиси, инвестиция активларини бошқарувчи ва инвестиция консультанти сифатида касбий фаолиятни амалга ошириш ҳуқуқига эгадир.

Бунда қимматли қоғозлар бозорида юқорида кўрсатилган касбий фаолиятни амалга ошириш учун алоҳида лицензия олиш талаб этилмайди.

3. Банкларнинг қимматли қоғозлар бозорида инвестиция воситачиси, инвестиция активларини бошқарувчи ва инвестиция консультанти сифатида касбий фаолияти, агар ушбу Низомда бошқача тартиб белгиланмаган бўлса, қонун ҳужжатларида ушбу фаолият турларига ўрнатилган талабларга риоя қилган ҳолда амалга оширилади.

4. Банкда инвестиция воситачиси, инвестиция активларини бошқарувчи ва инвестиция консультанти сифатида касбий фаолиятни амалга ошириш билан боғлиқ банк операциялари бўйича жавобгарлик юклатилган таркибий бўлинма (кейинги ўринда — бўлинма) бўлиши лозим.

5. Бўлинманинг ходимлари ўрнатилган тартибда банк (филиал) раҳбарининг тегишли қарори (буйруғи) асосида тайинланадилар.

6. Бўлинманинг ходимлари қонунчиликда белгиланган тартибда қимматли қоғозлар бозорини тартибга солувчи ваколатли давлат органи томонидан берилган қимматли қоғозлар билан операцияларни амалга ошириш ҳуқуқини берувчи малака аттестатига эга бўлиши лозим. Бунда, мазкур бўлинма раҳбари бўлган ходим қимматли қоғозлар билан операцияларни амалга ошириш ҳуқуқини берувчи I тоифали малака аттестатига эгалик қилиши лозим.

7. Қимматли қоғозлар билан операцияларни амалга ошириш ҳуқуқини берувчи малака аттестатини олиш учун ўтказиладиган аттестация тартиби қимматли қоғозлар бозорини тартибга солувчи ваколатли давлат органи томонидан қонунчиликда белгиланган тартибда ўрнатилади.

8. Банк томонидан инвестиция воситачиси, инвестиция активларини бошқарувчи ва инвестиция консультанти сифатида қимматли қоғозлар билан амалга оширилган битимлар бўйича ҳужжатларни бўлинма ходимлари имзолашлари (виза қўйишлари) лозим.

9. Ишончли бошқарувдаги инвестиция активларнинг ўртача йиллик қиймати миқдорини ҳисоблаш банк томонидан «Бошқарувчи компаниялар ўз маблағлари миқдорининг ҳисоби ва инвестиция активларининг ўртача йиллик қийматини аниқлаш тартиби тўғрисида»ги низом (2004 йил 5 март, рўйхат рақами 1322) қоидаларига биноан амалга оширилади.

10. Қимматли қоғозлар билан амалга оширилаётган шартномаларни тузишда бир томон бўлиб қатнашаётган банк мазкур шартномани рўйхатга олиш ҳуқуқига эга эмас.

11. Банклар қимматли қоғозлар бўйича биржадан ташқари битимларни рўйхатга олишда биржадан ташқари битимларнинг рўйхатини юритиш талабларига риоя қилишлари ҳамда рўйхатга олинган битимлар бўйича қимматли қоғозлар бозорини тартибга солувчи ваколатли давлат органига қонунчиликда белгиланган тартибда ахборот тақдим этишлари лозим.

12. Инвестиция воситачиси, инвестиция активларини бошқарувчи ва инвестиция консультанти сифатида қимматли қоғозлар бозорида профессионал фаолият тўғрисидаги ахборотни ошкор қилиш банк томонидан қонунчиликда ўрнатилган тартибда амалга оширилади.

13. Банклар инвестиция воситачиси, инвестиция активларини бошқарувчи ва инвестиция консультанти сифатида касбий фаолиятни амалга ошириш жараёнида банк сири тўғрисидаги қонунчиликка риоя қилишлари лозим ҳамда хизматда фойдаланиладиган ахборотга эга бўлиб, бу ахборотдан битимлар тузиш учун фойдаланиш ва ушбу ахборотни битимлар тузиш учун учинчи шахсларга берилиши тақиқланади.

14. Қимматли қоғозлар бозорини тартибга солувчи ваколатли давлат органи қимматли қоғозлар бозорида инвестиция воситачиси, инвестиция активларини бошқарувчи ва инвестиция консультанти сифатида фаолият юритувчи банкдан, улар томонидан амалга оширилган қимматли қоғозлар билан операциялар ва битимлар бўйича ахборотни қонунчиликда белгиланган тартибда талаб қилиш ва олиш ҳуқуқига эга.

15. Республика ҳудудларида жойлашган қимматли қоғозлар бозорида инвестиция воситачиси, инвестиция активларни бошқарувчи ва инвестиция консультанти сифатида фаолият юритувчи банк филиаллари қонунчиликда кўзда тутилган ахборотни қимматли қоғозлар бозорини тартибга солувчи ваколатли давлат органининг жойлардаги тегишли ҳудудий бўлимларига қонунчиликда белгиланган тартибда тақдим этади.

16. Банкларнинг қимматли қоғозлар бозорида инвестиция воситачиси, инвестиция активларини бошқарувчиси ва инвестиция консультанти сифатидаги касбий фаолиятини назорат қилиш ва тартибга солиш функцияси Ўзбекистон Республикаси Марказий банки томонидан қимматли қоғозлар бозори фаолиятини тартибга солувчи ваколатли давлат органи билан биргаликда амалга оширилади.

17. Қимматли қоғозлар бозорини тартибга солувчи ваколатли давлат органига инвестиция воситачиси, инвестиция активларини бошқарувчи ва инвестиция консультанти сифатида фаолият юритувчи банк томонидан қимматли қоғозлар бозори тўғрисидаги қонун ҳужжатларини бузганлиги ҳақида ахборот келиб тушганда қимматли қоғозлар бозорини тартибга солувчи ваколатли давлат органи қонун ҳужжатларига мувофиқ чоралар кўришга, шунингдек Ўзбекистон Республикаси Марказий банкига чоралар кўриш учун маълумотлар юбориш ҳуқуқига эга.

18. Мазкур Низом талаблари ижроси бўйича назорат Ўзбекистон Республикаси Марказий банки ва қимматли қоғозлар бозорини тартибга солувчи ваколатли давлат органи томонидан амалга оширилади.

19. Мазкур Низом талабларини бузган шахслар қонунчиликка мувофиқ жавобгар бўладилар.