Ўзбекистон Республикаси Ҳукумати билан Қувайт Давлати Ҳукумати, бундан кейин «Томонлар» деб аталувчилар,

Ички хавфсизлик соҳасида ҳамкорликни ривожлантириш истагида,

жиноятларнинг барча кўринишларига, хусусан, терроризм, уюшган жиноятчилик ва гиёҳванд воситалар ҳамда психотроп моддаларнинг ноқонуний юргизилишига қарши курашда бир-бирлари билан тажриба алмашишга бўлган интилишларини эътироф этиб,

жиноятчиликка қарши курашда халқаро ҳамкорликнинг ўта муҳимлигини таъкидлаб,

суверенитет, тенглик ва ўзаро фойдали ҳамкорлик тамойилларидан келиб чиқиб, ҳамда ўзларининг халқаро мажбуриятлари ва қонунчилигига амал қилиб,

1. Томонлар жиноятчиликка қарши курашда ушбу Битим қоидаларига мувофиқ ўзларининг ваколатли органлари орқали ҳамкорлик қиладилар.

2. Ушбу Битим мақсадларида ваколатли органлар қуйидагилардир:

— Ўзбекистон Республикаси учун — Бош прокуратура, Ички ишлар вазирлиги, Миллий хавфсизлик хизмати, Давлат чегараларини ҳимоялаш қўмитаси, Давлат божхона қўмитаси;

— Қувайт Давлати учун — Ички ишлар вазирлиги.

3. Томонлар ушбу Битим кучга киргандан кейин бир ой ичида ваколат доираси, манзили ва бошқа ахборотни ўзида акс этган ваколатли органлар рўйхатларини алмашадилар. Томонлар ўзларининг рўйхатларига киритиладиган ҳар бир ўзгариш тўғрисида бир-бирларини зудлик билан хабардор этадилар.

1. Томонлар хавфли жиноятларнинг барча кўринишларини, хусусан қуйидагиларнинг олдини олиш, аниқлаш, бартараф этиш ва тергов қилишда ҳамкорлик қиладилар:

1) терроризм ва экстремизм;

2) уюшган жиноятчилик;

3) гиёҳванд воситалар ва психотроп моддаларнинг ноқонуний юргизилиши;

4) қалбаки пул белгилари, қимматбаҳо қоғозлар ва кредит карточкалари, ҳамда паспортлар, визалар ва шахсни тасдиқловчи бошқа ҳужжатларни тайёрлаш ва тарқатиш;

5) жиноий фаолият натижасида олинган даромадларни қонунийлаштириш;

6) ўқ-дорилар, қурол-яроғ, портлатиш мосламалари, заҳарловчи, портловчи моддалар ҳамда радиоактив материалларнинг ноқонуний юргизилиши;

7) кўчар маданий ва тарихий бойликларга тажовуз қилиш.

2. Томонлар қуйидагиларни амалга оширишда ҳамкорлик қиладилар:

1) жиноий фаолиятга дахлдор бўлган ўғирланган буюмлар, шунингдек Томонлардан бирининг ҳудудида жойлашганлиги гумон қилинаётган транспорт воситаларининг жойини аниқлаш;

2) жисмоний шахслар, аэропортлар, йўллар, тоннеллар ва бошқа объектларнинг хавфсизлигини таъминлаш соҳасида маслаҳатлашувлар ўтказиш;

3) маълумотларни ишлаб чиқиш соҳасида хавфсизликни таъминлаш;

4) етказиб беришни назорат қилиш усулини қўллаш.

Томонлар жиноятчиликка қарши кураш ва хавфсизликни таъминлаш соҳасида ҳамкорликни қуйидаги шаклларда амалга оширадилар:

1) жиноятнинг олдини олиш, аниқлаш, бартараф этиш ва фош этишга ҳамда ушбу Битимнинг 2-моддасига мувофиқ бошқа масалаларни ҳал этишга ёрдам бериши мумкин бўлган ахборотни алмашиш;

2) шахслар фаолияти, буюмлар ва тегишли ҳисоб-китоблар бўйича ҳужжатларни ўрганиш орқали ушбу Битимнинг 2-моддасида кўрсатиб ўтилган жиноят фактларини тергов қилишда ёрдам кўрсатиш;

3) уюшган жиноий гуруҳларнинг фаолиятини олдини олишга йўналтирилган ва мувофиқлаштирилган тадбирларни амалга ошириш;

4) стажировкалар, маслаҳатлашувлар ва семинарларни ташкиллаштириш орқали ҳам тажриба алмашиш.

1. Ушбу Битим доирасида иккала Томон ўртасидаги ҳамкорлик бошқа Томонга ёрдам кўрсатиш тўғрисида ёзма сўровни юбориш орқали амалга оширилади.

2. Агар Томонлардан бири олган ахборот, унинг фикрига кўра, бошқа Томон учун муҳим аҳамиятга эга бўлса, бундай ахборот бу Томонга сўров олинмасдан туриб юборилади.

3. Ёрдам кўрсатаётган Томон давлати сўровнинг бажарилишида унинг махфийлигини таъминлаш борасида зарур чораларни кўради.

4. Сўровнинг бажарилиши инсон ҳуқуқларига зиён келтирса, суверенитет ёки давлат хавфсизлигига зарар келтирса, ёхуд сўраётган Томон давлатининг қонунчилигига зид бўлса, Томонлардан бири уни бутунлай ёки қисман рад этиш ҳуқуқига эга бўлади.

5. Агар Томонлардан бири ёрдамни бутунлай ёки қисман рад этса, бу Томон бошқа Томонни ёзма равишда рад жавобининг сабабларини келтириб хабардор этади.

1. Томонлар, агар бундай ахборот махфий ҳисобланса, ёки юбораётган Томон бошқа сабабларга кўра уни ошкор этишни истамаётган бўлса, қонунчиликка мувофиқ бир-бирларидан олинган ахборотнинг махфийлигини таъминлайдилар. Ахборотнинг махфийлик даражасини юбораётган Томон белгилайди. Ушбу қоида мазкур Битим доирасида тақдим этилган техник воситалар, ускуна ва материалларга ҳам тааллуқли.

2. Томонлардан бири тақдим этган ахборот, материаллар ва техник воситалар учинчи томонга уларни тақдим этган Томоннинг розилигисиз берилмайди.

1. Томонлар йўловчи ва юкларнинг халқаро ташувларига жалб этилган тижорат ташувчилари фойдаланаётган транспорт воситалари ушбу Битимнинг 2-моддасида кўрсатиб ўтилган жиноий фаолиятни амалга ошириш учун фойдаланмаслигини таъминлаш мақсадида тегишли чораларни кўрадилар.

2. Ҳар бир Томон ушбу Битимнинг 2-моддасида кўрсатиб ўтилган жиноятни содир этиш учун транспорт воситаларидан фойдаланишнинг олдини олиш мақсадида тижорат ташувчилари зарур хавфсизлик чоралар кўришларини таъминлайди.

3. Томонлар транспорт воситалари ва юклардан рухсатсиз фойдаланиш ҳамда тегишли хавфсизлик чораларини амалга ошириш мақсадида чегарадан ўтказиш нуқталарида ва божхона назорати амалга ошириладиган бошқа ҳудудларда тижорат ташувчилари ва тегишли органлар ўртасида ҳамкорликни қўллаб-қувватлайдилар.

Ушбу Битим иккала Томоннинг улар имзолаган бошқа икки томонлама ёки кўп томонлама шартномалар бўйича ҳуқуқ ёхуд мажбуриятларига зиён келтирмайди, шунингдек жиноий ишлар ҳамда ушлаб топшириш бўйича ҳуқуқий ёрдам кўрсатиш масалаларига дахл қилмайди.

Ушбу Битим Томонларнинг ёзма розилигига кўра ўзгартирилиши мумкин. Бу ҳолда бундай ўзгартишлар алоҳида баённома орқали расмийлаштирилади.

1. Томонлар ушбу Битим қоидаларини амалга ошириш мақсадида Томонларнинг ваколатли вакилларидан ташкил топган Қўшма Комиссияни таъсис этадилар.

2. Қўшма Комиссия ўзаро манфаатли бўлган масалаларни кўриб чиқиш ҳамда ўзаро келишилган қарорларни қабул қилиш учун зарур ҳолларда ва тез-тез ўз мажлисларини навбатма-навбат Томонлар давлатларининг пойтахтларида ўтказади.

Ушбу Битим беш йил амал қилади ва Томонлардан бири бошқа Томонни дипломатик каналлар орқали унинг кучга кириши учун зарур бўлган ички ҳуқуқий процедуралар бажарилганлиги тўғрисида хабардор этган сўнгги хабарнома олинган куни кучга киради.

Ушбу Битим Томонлардан бири бошқа Томонни ёзма равишда ва дипломатик каналлар орқали унинг амал қилишини тўхтатиш тўғрисида ўз нияти ҳақида хабардор қилмагунга қадар, ўз-ўзидан худди шундай муддатларга узаяверади. Ушбу Битим бошқа Томоннинг хабарномаси олингандан сўнг олти ой ўтгач амал қилишни тўхтатади.

Ал-Қувайт шаҳрида 2004 йил 19 январда, ҳижрий 1424 йил 27 зулқидада, икки нусхада, ўзбек, араб ва инглиз тилларида тузилди, бунда барча матнлар бир хил кучга эга. Келишмовчиликлар юзага келган ҳолларда инглиз тилидаги матн асосий ҳисобланади.