Темурийлар тарихи Давлат музейи зиммасига юклатилган вазифаларни амалда бажариш мақсадида Вазирлар Маҳкамаси қарор қилади:

1. Ўзбекистон Республикаси Фанлар академияси ва Маданият ишлари вазирлиги 2 ой муддатда республика музейларининг Темурийлар тарихига мансуб экспонатлари рўйхатини аниқласинлар ва уларни Темурийлар тарихи Давлат музейига текин бериш бўйича таклифларни Вазирлар Маҳкамасига киритсинлар.

2. Амир Темур ва Темурийлар даври экспонатлари кўргазмасини ташкил этиш ҳамда кейинчалик чет эл тўпламларидан уларнинг аслини ёки нусхаларини сотиб олиш масалаларини ишлаб чиқиш бўйича иловага* мувофиқ таркибда Комиссия тузилсин.

3. Комиссия:

2 ой муддатда Ўзбекистон Республикаси элчихоналари иштирокида жойларда Амир Темур ва Темурийлар даври экспонатларига эга бўлган музейлар ва ташкилотлар билан 1997 йилнинг иккинчи ярмида Ўзбекистонда ушбу экспонатлар кўргазмасини уюштириш имкониятлари ва шарт-шароитлари тўғрисида музокаралар ўтказсин;

ушбу тадбирга йирик чет эл музейларини жалб этишда, кўргазмани ташкил қилишга ва каталоглар нашр этишга маблағлар ажратишда ёрдам кўрсатиш мақсадида ҲСОМ ҳомийлигида кўргазмани ўтказиш имкониятлари тўғрисида Халқаро музейлар кенгаши (ҲСОМ)га мурожаатнома лойиҳасини бир ой муддатда тайёрласин;

Молия вазирлиги билан биргаликда кўргазмани ташкил этиш учун зарур молиявий маблағлар ажратиш бўйича таклифларни 3 ой муддатда тайёрласин ва Вазирлар Маҳкамасига тақдим этсин;

кўргазмани ўтказиш дастурини 1997 йилнинг май ойида Вазирлар Маҳкамасига киритсин;

кўргазмани ўтказиш натижалари бўйича эксперт хулосалар асосида Амир Темур ва Темурийлар даври тарихий ҳужжатлари ҳамда қадимий ёдгорликлари аслини ёки нусхаларини сотиб олиш юзасидан таклифларни Вазирлар Маҳкамасига тақдим этсин.

4. Музей ходимларининг чекланган сони (Вазирлар Маҳкамасининг 1996 йил 14 мартдаги 99-сон қарори билан ажратилган 22 нафарни қўшган ҳолда) 75 нафар, шу жумладан илмий ходимлар ва мутахассислар сони 40 нафар этиб белгилансин. Тузилма ва штатлар рўйхатини музей директори Фанлар академияси Президенти билан келишган ҳолда тасдиқлаши белгилаб қўйилсин.

5. Ўзбекистон Республикаси Молия вазирлиги:

1997 йил ва кейинги йиллар прогнозларида музей биноси ҳамда ходимлари учун харажатларга Фанлар академияси тариф сеткасига мувофиқ маблағлар ажратишни назарда тутсин;

музейга битта енгил автотранспорт харажатлари учун лимит ажратсин.

6 «Тошшаҳарйўловчитранс» давлат уюшмаси музейга белгиланган тартибда лимит бўйича енгил автотранспорт ажратсин.

7. Ўзбекистон Республикаси Алоқа вазирлиги музейга белгиланган тартибда 2 та ҳукумат АТС телефонлари ўрнатилишини таъминласин.

8. Музей директорига вазирларнинг ўринбосарлари учун белгиланган моддий-маиший ва тиббий хизмат кўрсатиш шароитлари татбиқ этилсин.

9. Мазкур қарорнинг бажарилишини назорат қилиш Бош вазир ўринбосари А.А. Азизхўжаев зиммасига юклансин.