Ўзбекистон Республикасининг «Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида»ги ва «Аудиторлик фаолияти тўғрисида»ги қонунларига мувофиқ Ўзбекистон Республикаси Иқтисодиёт ва молия вазирлиги ҳамда Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти қарор қилади:

1. Ўзбекистон Республикаси Молия вазирлиги ва Бош прокуратура ҳузуридаги Иқтисодий жиноятларга қарши курашиш департаментининг 2018 йил 14 ноябрдаги 145, 45-сон қарори (рўйхат рақами 3101, 2018 йил 15 декабрь) (Қонун ҳужжатлари маълумотлари миллий базаси, 17.12.2018 й., 10/18/3101/2331-сон) билан тасдиқланган Аудиторлик ташкилотлари учун жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича ички назорат қоидаларига иловага мувофиқ ўзгартириш ва қўшимчалар киритилсин.

2. Мазкур қарор расмий эълон қилинган кундан эътиборан уч ойдан кейин кучга киради.

1. 4-банднинг иккинчи хатбошиси қуйидаги таҳрирда баён этилсин:

«ўз таваккалчиликларини олдини олиш, аниқлаш, баҳолаш, ҳужжатлаштириш ва камайтиришга доир тегишли чораларни кўриш;».

2. 9 ва 10-бандлар қуйидаги таҳрирда баён этилсин:

«9. Масъул ходим лавозимига қуйидаги шахслар тайинланиши мумкин эмас:

ўз фаолиятида ва шахсий хулқ-атворида ишониб топширилган бўлинмани нотўғри бошқаргани ёки ишни виждонан юритмаганини намоён этган шахслар;

террорчилик фаолиятида ёки оммавий қирғин қуролини тарқатишда иштирок этаётган ёки иштирок этишда гумон қилинаётган шахслар;

иқтисодиёт соҳасидаги, бошқарув тартибига қарши, жиноий фаолиятдан олинган даромадларни легаллаштириш, терроризмни молиялаштириш ва оммавий қирғин қуролларини тарқатишни молиялаштириш, уюшган жиноятчилик, гиёҳванд моддаларнинг ноқонуний савдоси, коррупция ва ахборот технологиялари билан боғлиқ жиноятларни содир этганлик учун судланганлик ҳолати тугалланмаган ёки судланганлиги олиб ташланмаган шахслар.

Ушбу бандда назарда тутилган талаблар аудиторлик ташкилотининг раҳбари, муассислари ва бенефициар мулкдорларига, шунингдек бухгалтерия ҳисобини юритиш бўйича турдош хизматларни кўрсатувчи ходимларига ҳам татбиқ этилади.

10. Аудиторлик ташкилотлари масъул ходимларнинг ҳар йили камида бир марта жиноий фаолиятдан олинган даромадларни легаллаштириш, терроризмни молиялаштириш ва оммавий қирғин қуролини тарқатишни молиялаштиришнинг замонавий технологиялари, усуллари ва тенденциялари тўғрисида хабардорлигини ошириш ҳамда уларга жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича қонунчилик ҳужжатлари ва мажбуриятларнинг барча жиҳатларини аниқ тушунтириб бериш мақсадида ўқитилиши ва малакаси оширилишини таъминлайди.».

3. Қуйидаги мазмундаги 10¹-банд билан тўлдирилсин:

«10¹. Масъул ходим ҳар йили аудиторлик ташкилотининг ходимлари учун қуйидаги йўналишлар бўйича инструктаж шаклида ўқув машғулотларини ўтказади:

жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисидаги қонунчилик ҳужжатлари билан ходимларни таништириш;

жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашишнинг услублари ва замонавий усулларини ўрганиш;

ички назоратни амалга ошириш бўйича амалий машғулотлар.

Аудиторлик ташкилотининг ходимларини ўқитиш дастури аудиторлик ташкилотининг раҳбари томонидан тасдиқланади.».

4. 11-банднинг учинчи хатбошиси қуйидаги таҳрирда баён этилсин:

«ички ва ташқи вазиятлар ўзгаришини инобатга олган ҳолда ички назорат тизимини ташкил этиш бўйича мониторингни амалга оширади, шунингдек ушбу Қоидалар ва ички қоидалар талабларига риоя қилиниши назоратини амалга оширади;».

5. Қуйидаги мазмундаги 15¹-банд билан тўлдирилсин:

«15¹. Аудиторлик ташкилотининг назорати остида ёки аҳамиятли таъсири доирасида битта ёки бир нечта пул маблағлари ёки бошқа мол-мулк билан боғлиқ операцияларни амалга оширувчи ташкилотлар бўлган тақдирда, ички қоидалар гуруҳий ёндашув асосида ишлаб чиқилиши ва қуйидагиларни ўз ичига олиши керак:

жиноий фаолиятдан олинган даромадларни легаллаштириш, терроризмни молиялаштириш ва (ёки) оммавий қирғин қуролини тарқатишни молиялаштириш билан боғлиқ таваккалчиликларни бошқариш ҳамда мижозларни лозим даражада текширишни таъминлаш учун зарур бўлган маълумотлар алмашинуви қоидалари ва тартиб-таомиллари;

жиноий фаолиятдан олинган даромадларни легаллаштиришга, терроризмни молиялаштиришга ва (ёки) оммавий қирғин қуролини тарқатишни молиялаштиришга қарши курашиш мақсадлари учун зарур бўлган ҳолларда филиаллар ва шуъба корхоналар томонидан ўз мижозлари, уларнинг ҳисобварақлари ва операциялари тўғрисидаги маълумотларни бош ташкилотга тақдим этиш, шунингдек мазкур маълумотларни гуруҳ даражасида олиш талаблари;

тақдим этилаётган маълумотларнинг махфийлигини ҳимоя қилиш ва ундан фойдаланиш, шу жумладан унинг ошкор этилишининг олдини олиш учун зарур бўлган чоралар.».

6. 16 ва 17-бандлар қуйидаги таҳрирда баён этилсин:

«16. Аудиторлик ташкилотининг хорижий филиаллари ва шуъба корхоналари (агар мавжуд бўлса) жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича чора-тадбирларни амалга оширишда ўзи жойлашган мамлакат талабларига риоя этишлари керак.

Агар жойлашган мамлакатнинг қонунчилик ҳужжатларида жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича Ўзбекистон Республикасининг қонунчилик ҳужжатларига нисбатан енгилроқ талаблар белгиланган бўлса, аудиторлик ташкилотининг хорижий филиаллари ва шуъба корхоналари мазкур Қоидаларга амал қилишлари керак.

17. Аудиторлик ташкилоти ўзининг хорижий филиаллари ва шуъба корхоналаридан улар жойлашган мамлакат қонунчилигидаги тақиқлар туфайли жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича тегишли чораларни қўллаш мумкин бўлмаган тақдирда бош ташкилотга ахборот беришни талаб қилиши шарт.

Ўз навбатида, аудиторлик ташкилоти бу ҳақда Ўзбекистон Республикаси Иқтисодиёт ва молия вазирлиги ҳамда махсус ваколатли давлат органини хабардор қилиши лозим.».

7. Қуйидаги мазмундаги 17¹-банд билан тўлдирилсин:

«17¹. Аудиторлик ташкилотининг филиали ва (ёки) шуъба корхонаси мавжуд бўлган тақдирда ушбу филиал ва (ёки) шуъба корхона ходимларининг штат жадвалига масъул ходим лавозими киритилиши ёки аудиторлик ташкилоти раҳбарининг қарорига кўра бош ташкилотнинг масъул ходими ёхуд мазкур филиал ва (ёки) шуъба корхонанинг раҳбари масъул ходим этиб тайинланиши мумкин.

Аудиторлик ташкилоти ходимларининг филиал ва шуъба корхонанинг масъул ходими, раҳбари ва ходимлари билан ўзаро ҳамкорлик қилиш тартиби аудиторлик ташкилотининг ички ҳужжатлари билан белгиланади.».

8. 20-банд қуйидаги мазмундаги тўртинчи хатбоши билан тўлдирилсин:

«иш муносабатларининг ёки режалаштирилаётган операцияларнинг мақсади ва хусусиятини ўрганишни;»;

тўртинчи ва бешинчи хатбошилар тегишли равишда бешинчи ва олтинчи хатбошилар деб ҳисоблансин.

9. 21-банднинг тўртинчи хатбошиси қуйидаги таҳрирда баён этилсин:

«амалий иш муносабатларини доимий чуқур мониторинг қилиб бориши лозим.».

10. 22-бандда:

қуйидаги мазмундаги тўртинчи хатбоши билан тўлдирилсин:

«мижоз томонидан режалаштирилган ёки ўтказилган операцияларнинг мақсадларини ўрганиш;»;

тўртинчи хатбоши бешинчи хатбоши деб ҳисоблансин;

қуйидаги мазмундаги хатбоши билан тўлдирилсин:

«Мижозни лозим даражада текширишнинг кучайтирилган чора-тадбирларини, айнан мижоздан, у томонидан амалга оширилаётган операциялар бўйича пул маблағлари ёки бошқа мол-мулкнинг манбалари ҳақидаги маълумотларни олиш ва (ёки) мазкур мижоз томонидан ўтказилиши режалаштирилган ёки ўтказилган операцияларнинг мақсадларини ўрганишни амалга ошириш имкони бўлмаган тақдирда аудиторлик ташкилоти бу ҳақда махсус ваколатли давлат органига хабар бериши ва бундай мижоз билан амалий иш муносабатларига киришиш ёки бундай мижознинг операцияларини амалга оширишни рад этиши керак.».

11. 27-банддаги «юридик шахслар учун» деган сўзлар «аудиторлик ташкилотининг мижозлари учун» деган сўзлар билан алмаштирилсин.

12. 29-банднинг бешинчи хатбошисидаги «ҳар йили» деган сўзлар «ҳар йили 10 январга қадар» деган сўзлар билан алмаштирилсин.

13. 57-банд қуйидаги мазмундаги хатбоши билан тўлдирилсин:

«Ўзбекистон Республикаси Иқтисодиёт ва молия вазирлиги аудиторлик ташкилотлари томонидан белгиланган тартибда тақдим этиладиган маълумотлар асосида ички назоратни ташкил этилиши ва унинг самарадорлиги бўйича мазкур Қоидаларга риоя қилиниши устидан масофавий мониторинг олиб боради.».

14. Қуйидаги мазмундаги 57¹-банд билан тўлдирилсин:

«57¹. Аудиторлик ташкилотининг раҳбари ички ва ташқи вазиятларнинг ўзгаришини инобатга олган ҳолда, аудиторлик ташкилотининг ички назорат тизимини доимий равишда мониторинг қилади ва самарадорлигини баҳолаб боради, шунингдек самарали ишлашини таъминлаш учун заруратга қараб уни мустаҳкамлайди.

Аудиторлик ташкилотида ички аудит хизмати мавжуд бўлганда, ички назорат тизими самарадорлигининг мониторинги ички аудит хизмати томонидан амалга оширилади.».