Oʻzbekiston Respublikasi Vazirlar Mahkamasining 2004-yil 4-fevraldagi 54-sonli “Alkogolli va tamaki mahsulotlariga aksiz markalarining yangi namunalarini joriy etish toʻgʻrisida”gi qaroriga muvofiq Oʻzbekiston Respublikasi Moliya vazirligi, Davlat soliq qoʻmitasi va Davlat bojxona qoʻmitalari qaror qiladilar:

1. Ilova qilinayotgan “Alkogolli va tamaki mahsulotlariga yangi namunadagi aksiz markalarini joriy etish tartibi toʻgʻrisida”gi nizom tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.

Mazkur Nizom Oʻzbekiston Respublikasi Prezidentining 2006-yil 7-noyabrdagi “Alkogolli mahsulotlarni ishlab chiqarish va sotish samaradorligini oshirishga doir qoʻshimcha chora-tadbirlar toʻgʻrisida”gi PQ-505-son qaroriga (Oʻzbekiston Respublikasi qonun hujjatlari toʻplami, 2006-yil, 45-son, 440-modda) va Oʻzbekiston Respublikasi Vazirlar Mahkamasining 1996-yil 14-avgustdagi “Oʻzbekiston Respublikasi hududida tamaki mahsulotlariga va spirtli ichimliklarga aksiz markalarini joriy etish tartibi toʻgʻrisida”gi 285-son qaroriga (Oʻzbekiston Respublikasi Hukumati qarorlari toʻplami, 1996-y., 8-son, 24-modda) muvofiq alkogolli va tamaki mahsulotlariga yangi namunadagi aksiz markalarini joriy etish tartibini belgilaydi.

1. Alkogolli va tamaki mahsulotlariga yangi namunadagi aksiz markalari Oʻzbekiston Respublikasi Vazirlar Mahkamasining qarori bilan belgilangan muddatlarda amalga kiritiladi va har 2 yilda yangilanadi.

Amal qilish muddati tugagan aksiz markalari yopishtirilgan alkogolli va tamaki mahsulotlari markalanmagan hisoblanadi hamda ular belgilangan tartibda olib qoʻyilishi va yoʻq qilinishi kerak.

2. Oʻzbekiston Respublikasi hududida yangi namunadagi aksiz markalari joriy etilgan paytdan boshlab eski namunadagi aksiz markalarini xarid qilish va ularga buyurtmalarni joylashtirishga doir buyurtmanomalarni qabul qilish taqiqlanadi.

Eski namunadagi aksiz markali alkogolli va tamaki mahsulotlarini Oʻzbekiston Respublikasi hududida sotishga mazkur Nizomning 5 va 10-bandlari talablarini hisobga olgan holda yangi namunadagi aksiz markalari joriy etilgan kundan boshlab toʻqqiz oy mobaynida ruxsat beriladi.

3. Yangi namunadagi aksiz markalari belgilangan tartibda ishlab chiqaruvchilar va importchilarning nomi yozilgan kod raqamlari bilan birga buyurtiriladi, alkogolli mahsulot uchun aksiz markalarida esa ishlab chiqaruvchi korxonaning nomi va isteʼmol idishining litrdagi hajmi ham koʻrsatiladi.

4. Eski namunadagi aksiz markalarini yoʻqotish boʻyicha xarajatlarni eski namunadagi aksiz markalari yoki ular bilan markalangan mahsulotga ega boʻlgan ishlab chiqaruvchi korxonalar va importchilar amalga oshiradi.

5. Yangi namunadagi aksiz markalari joriy etilganidan keyin alkogolli va tamaki mahsulotlari ishlab chiqaruvchi korxonalar eski namunadagi aksiz markalari yopishtirilgan mahsulotlarni sotishni eski namunadagi aksiz markalari yopishtirilgan tovarlarni sotishning ruxsat etilgan muddati tugashidan besh oy oldin toʻxtatadi.

6. Alkogolli va tamaki mahsulotlarini ishlab chiqaruvchi korxonalarda yangi namunadagi aksiz markalari joriy etilgan kunda va eski namunadagi aksiz markalari yopishtirilgan tovarlarni sotishning ruxsat etilgan muddati tugashiga qadar besh oy qolgan kunda eski namunadagi aksiz markalari yopishtirilgan mahsulot qoldiqlari, shuningdek foydalanilmagan eski namunadagi aksiz markalarining qoldiqlari inventarizatsiya qilinadi.

7. Ishlab chiqaruvchi korxonalarda eski namunadagi aksiz markalari yopishtirilgan alkogolli va tamaki mahsulotlari mavjud boʻlganda, eski namunadagi aksiz markalari yopishtirilgan tovarlarni sotishning ruxsat etilgan muddati tugashiga qadar besh oy qolgan kunda tayyor mahsulot qoldiqlari yangi namunadagi aksiz markalari yangidan yopishtirilib, tovarlardan eski namunadagi aksiz markalari olib tashlanishi kerak.

8. Tovarlardan olib tashlangan aksiz markalari va eski namunadagi aksiz markalari yopishtirilgan tovarlarni sotishning ruxsat etilgan muddati tugashiga qadar besh oy qolgan kunda qayd etilgan, foydalanilmagan eski namunadagi aksiz markalarining qoldiqlari korxonada tashkil etiladigan komissiya tomonidan kuydirish yoʻli bilan yoʻq qilinishi kerak, bu haqda tegishli dalolatnoma tuziladi.

9. Inventarizatsiyani oʻtkazish komissiyasiga soliq va moliya organlarining vakillari, ishlab chiqaruvchi korxonalarning xodimlari (maʼmuriyat vakillari, aksiz markalar uchun masʼul shaxslar, buxgalteriya xodimi) kiritiladi. Komissiya tarkibi korxona rahbarining buyrugʻi bilan tasdiqlanadi. Inventarizatsiyalash (mazkur Nizomga ilovaga binoan dalolatnoma — roʻyxat shaklida rasmiylashtiriladi) natijalari aksiz markalarini hisobga olish maʼlumotlari bilan solishtiriladi. Aksiz markalari kamomadi uchun mazkur korxona rahbariyati va moddiy javobgar shaxs qonunchilik hujjatlariga muvofiq javobgar boʻladi.

Komissiya inventarizatsiyalash toʻgʻri, oʻz vaqtida va belgilangan tartibga rioya qilgan holda oʻtkazilishi, shuningdek aksiz markalari toʻliq hajmda yoʻq qilinishi uchun javob beradi.

10. Oʻzbekiston Respublikasi hududida yangi namunadagi aksiz markalarining joriy etilishi bilan uning hududiga eski namunadagi aksiz markalari yopishtirilgan alkogolli va tamaki mahsulotlarini olib kirish eski namunadagi aksiz markalari yopishtirilgan tovarlarni sotishning ruxsat etilgan muddati tugashiga besh oy qolganda toʻxtatiladi.

11. Eski namunadagi ishlatilmagan aksiz markalarining qoldiqlari ular inventarizatsiya qilinganidan keyin tarkibida bojxona, moliya organlari va importchilarning vakillari boʻlgan komissiya tomonidan yoʻq qilinishi (kuydirish yoʻli bilan) kerak. Eski namunadagi aksiz markalarining ishlatilmagan qoldiqlarini importchi tovarlarni sotishning ruxsat etilgan muddati tugashidan besh oy oldin eksportchidan qabul qilib olishi kerak. Talab qilib olingan eski namunadagi aksiz markalari tarkibida bojxona, moliya organlari va importchilarning vakillari boʻlgan komissiya tomonidan yoʻq qilinadi (kuydirish yoʻli bilan). Eski namunadagi aksiz markalarining yoʻq qilinishi toʻgʻrisida tegishli dalolatnoma tuziladi.

12. Komissiya tarkibi aksiz markalarini yoʻq qilish joyidagi hududiy bojxona organi rahbarining buyrugʻi bilan tasdiqlanadi.

Komissiya inventarizatsiyalash toʻgʻri, oʻz vaqtida va belgilangan tartibga rioya qilgan holda oʻtkazilishi, shuningdek aksiz markalari toʻliq hajmda yoʻq qilinishi uchun javob beradi.

13. Alkogolli va tamaki mahsulotlariga yangi namunadagi aksiz markalari joriy etilgan kundan boshlab savdo tashkilotlari, shu jumladan ulgurji savdoni amalga oshiruvchilari, ushbu tovarlarni ishlab beruvchi korxonalardan ham yangi, ham eski namunalardagi aksiz markalari bilan birga xarid qiladilar. Savdo tashkilotlari tomonidan eski namunadagi aksiz markalari yopishtirilgan tovarlarning xarid qilinishi eski namunadagi aksiz markalari yopishtirilgan tovarlarni sotishning ruxsat etilgan muddati tugashiga qadar besh oy qolganda toʻxtatiladi.

14. Savdo tashkilotlari eski namunadagi aksiz markalari yopishtirilgan mahsulotni Oʻzbekiston Respublikasi hududida eski namunadagi aksiz markalari yopishtirilgan alkogolli va tamaki mahsulotlarini sotishning belgilangan muddati tugashiga qadar sota oladilar.

15. Eski namunadagi aksiz markalari yopishtirilgan tovarlarni sotishning belgilangan muddati tugaydigan kunda savdo tashkilotlari eski namunadagi aksiz markalari yopishtirilgan alkogolli va tamaki mahsulotlarining qoldiqlarini inventarizatsiyalashni oʻtkazadilar (uning natijalari mazkur Nizomga ilovaga koʻra dalolatnoma — roʻyxat shaklida rasmiylashtiriladi).

16. Inventarizatsiyani oʻtkazish uchun savdo tashkilotlarida soliq va moliya organlarining vakillari, savdo tashkilotlarining masʼul xodimlaridan (rahbar, moddiy javobgar shaxs, buxgalteriya xodimi) komissiya tashkil etiladi, u mazkur savdo tashkiloti rahbariyatining buyrugʻi bilan tasdiqlanadi. Komissiya inventarizatsiyalash toʻgʻri, oʻz vaqtida va belgilangan tartibga rioya qilgan holda oʻtkazilishi uchun javob beradi.

17. Inventarizatsiya qilish paytida savdo tashkilotlarida boʻlgan, amal qilish muddati oʻtib ketgan aksiz markalari bilan markalangan alkogolli va tamaki mahsulotlari qonunchilikka muvofiq olib qoʻyilishi va yoʻq qilinishi kerak.

19. “Agrobank” OATBning mintaqaviy boʻlinmalari yangi namunadagi aksiz markalari joriy qilinishidan bir kun oldin importchilarga eski namunadagi aksiz markalari berishni toʻxtatadilar.

20. “Agrobank” OATB mintaqaviy boʻlinmalarida mavjud boʻlgan eski namunadagi aksiz markalari qoldiqlari boʻyicha inventarizatsiya tarkibida soliq va moliya organlari, aksiz markalari tegishli boʻlgan ishlab chiqaruvchi korxonalar va importchilarning vakillari hamda tegishli bankning masʼul xodimlari (rahbariyati, buxgalteriya xodimi va aksiz markalari uchun moddiy javobgar shaxsi) boʻlgan komissiya tomonidan oʻtkaziladi va oʻsha kuni markalar (ishlab chiqaruvchi korxonalar uchun moʻljallanganlaridan tashqari) yoʻq qilinadi (kuydirish yoʻli bilan), bu haqda komissiya tomonidan tegishli dalolatnoma tuziladi.

“Agrobank” OATBning mintaqaviy boʻlinmalarida ishlab chiqaruvchi korxonalar uchun moʻljallangan eski namunadagi aksiz markalarining qoldiqlari boʻyicha soliq va moliya organlari, ishlab chiqaruvchi korxonalar vakillari va tegishli bankning masʼul xodimlari (rahbariyat, buxgalteriya xodimi va aksiz markalari uchun moddiy jihatdan masʼul boʻlgan javobgar shaxs) tarkibidagi komissiya tomonidan eski namunadagi aksiz markalari yopishtirilgan tovarlarni sotishga ruxsat etilgan muddatning tugashiga qadar besh oy oldin inventarizatsiya oʻtkazilib, shu kunning oʻzida markalar yondirish yoʻli bilan yoʻq qilinadi, bu haqda komissiya tomonidan tegishli dalolatnoma tuziladi.

21. Eski namunadagi aksiz markalarini inventarizatsiyalash yakunlari hisob boʻyicha tekshiriladi. Inventarizatsiyalash chogʻida belgilangan aksiz markalarining kamomadi uchun mazkur bank rahbariyati (moddiy javobgar shaxs) qonunchilik hujjatlariga muvofiq javobgar boʻladi.

22. Komissiya inventarizatsiyalash toʻgʻri, oʻz vaqtida va belgilangan tartibga rioya qilgan holda oʻtkazilishi, shuningdek aksiz markalari toʻliq hajmda yoʻq qilinishi uchun javob beradi.

23. “Agrobank” OATB mintaqaviy boʻlinmalarining inventarizatsiyalashdan keyin yoʻq qilingan eski namunadagi aksiz markalarini yetkazib berish va saqlash boʻyicha xarajatlari boʻlinmalarning oʻz mablagʻlari hisobiga qoplanadi.

25. Mazkur Nizom AT “Paxta bank” bilan kelishilgan.