Oʻzbekiston Respublikasi Prezidentining “Respublikada dori-darmonlar sotishni tartibga solish toʻgʻrisida” 1994-yil 14-iyuldagi Farmonini ijro etish yuzasidan hamda respublika aholisini dori-darmonlar, vaksinalar va tibbiy buyumlar bilan taʼminlashni yaxshilash maqsadida Vazirlar Mahkamasi qaror qiladi:

1. Quyidagilar tasdiqlansin:

Respublika dorixona muassasalarida dori-darmonlar va tibbiy buyumlar sotish qoidalari 1-ilovaga muvofiq;

cheklangan chakana narxlarda sotiladigan va barcha dorixona muassasalarida mavjudligi majburiy boʻlgan eng zarur dori-darmonlar roʻyxati 2-ilovaga muvofiq.

2. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda 15 kun muddatda Oʻzbekiston Respublikasining Jinoyat kodeksiga va Oʻzbekiston Respublikasining maʼmuriy huquqbuzarliklar toʻgʻrisidagi kodeksiga Dori-darmonlar va tibbiy buyumlar sotish qoidalarini buzganlik uchun javobgarlikni kuchaytirishga oid oʻzgartirish va qoʻshimchalar kiritish haqidagi takliflarni ishlab chiqsin va Vazirlar Mahkamasiga taqdim etsin.

3. Oʻzbekiston Respublikasi Moliya vazirligi Oʻzbekiston Respublikasi Sogʻliqni saqlash vazirligi bilan birgalikda:

bir hafta muddatda eng zarur dori-darmonlar va tibbiy buyumlarning cheklangan chakana narxlarini ishlab chiqsin va tasdiqlasin hamda mulkchilik shakllaridan qatʼi nazar, barcha dorixona muassasalariga yetkazsin;

ikki hafta muddatda ushbu qarorning 2-ilovasiga kiritilgan eng zarur dori-darmonlar va tibbiy buyumlarni berish va ularning cheklangan chakana narxlari oʻrtasidagi farqning oʻrnini qoplash uchun “Dori-darmon” davlat-aksionerlik uyushmasi huzuridagi narxlarni tartibga solish jamgʻarmasini tuzish va undan foydalanish tartibini ishlab chiqsin va tasdiqlasin.

4. “Oʻzfarmsanoat” davlat-aksionerlik konserni:

2-ilovada qayd etilgan dori-darmonlar va tibbiy buyumlarni Oʻzbekiston Respublikasi Sogʻliqni saqlash vazirligining buyurtmanomasi hajmida ishlab chiqarishni taʼminlasin;

Oʻzbekiston Respublikasi Fan va texnika davlat qoʻmitasi, Fanlar akademiyasi va xalqaro “EKOSAN” jamgʻarmasi bilan birgalikda respublikada oʻsimliklardan olinadigan mahalliy dori-darmon xomashyosi asosida oʻzimizning farmatsevtika ishlab chiqarishimizni tashkil etish dasturini ishlab chiqsin va 1994-yilning 1-oktabrigacha Vazirlar Mahkamasiga taqdim etsin.

5. Oʻzbekiston Respublikasi Tashqi iqtisodiy aloqalar vazirligi va Sogʻliqni saqlash vazirligi Tashqi iqtisodiy faoliyat milliy banki bilan birgalikda 1994-yilning 15-sentabrigacha boʻlgan muddatda respublikaga dori-darmonlar va tibbiy asbob-uskunalarni import boʻyicha keltirish uchun Yevropa Hamjamiyati Komissiyasi tomonidan beriladigan 68 million AQSh dollari miqdoridagi kreditning rasmiylashtirilishini va keyinchalik toʻldirilishini tugallasin.

6. Oʻzbekiston Respublikasi Davlat mulki qoʻmitasi va “Dori-darmon” davlat-aksionerlik uyushmasi 3-ilovaga* muvofiq dorixona muassasalarini 1994-yilning ikkinchi yarim yilligida davlat tasarrufidan chiqarish va xususiylashtirishga oid tashkiliy chora-tadbirlarni amalga oshirsinlar.

7. Oʻzbekiston Respublikasi Sogʻliqni saqlash vazirligi “Dori-darmon” davlat-aksionerlik uyushmasining dori-darmonlarning sifatini nazorat qilish inspeksiyasini Oʻzbekiston Respublikasi Sogʻliqni saqlash vazirligi huzuridagi dori-darmonlar sifati boʻyicha nazorat komissiyasiga aylantirsin.

8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 4-ilovaga* muvofiq dori-darmonlar, vaksinalar va tibbiy buyumlar sotib olish uchun “Dori-darmon” davlat-aksionerlik uyushmasiga va uning hududiy boʻlinmalariga markazlashtirilmagan manbalardan Rossiya rubli summasiga teng miqdorlarda pul mablagʻlari, shu jumladan, xorijiy valyuta, shuningdek, moddiy resurslar ajratsinlar.

9. Oʻzbekiston Respublikasi Vazirlar Mahkamasining 1994-yil 19-apreldagi 215-son qarori bilan tasdiqlangan korxonalar (tashkilotlar)ga faoliyatning ayrim turlari bilan shugʻullanish huquqini beradigan maxsus ruxsatnomalar (litsenziyalar) berish tartibi toʻgʻrisidagi nizomning 2-bandidagi (yigirmanchi xatboshi) “ishlab chiqarish” soʻzidan keyin “va sotish” soʻzlari qoʻshib qoʻyilsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M. Q. Qoraboyev zimmasiga yuklansin.

1. Oʻzbekiston Respublikasida dori-darmonlar sotish bilan shugʻullanishga “Dori-darmon” davlat-aksionerlik uyushmasining dorixona muassasalariga, shuningdek, mulkchilik shakllaridan qatʼi nazar, uning hududiy boʻlinmalariga va Oʻzbekiston Respublikasi Sogʻliqni saqlash vazirligining maxsus ruxsatnomasi (litsenziyasi) ga ega boʻlgan boshqa dorixona muassasalariga ruxsat etiladi.

Qayd etib oʻtilgan dorixona muassasalarida dori-darmonlarni sotishga faqat maxsus farmatsevtik maʼlumotga ega boʻlgan shaxslarga ruxsat beriladi.

2. Dori-darmonlar va tibbiy buyumlarning jismoniy va yuridik shaxslar tomonidan dorixona muassasalaridan tashqarida bozorlarda, koʻchada, jamoat joylarida va uyda sotilishi qatʼiyan taqiqlanadi.

3. Oʻzbekiston Respublikasida roʻyxatga olinmagan va sifati “Dori-darmon” davlat-aksionerlik uyushmasining hududiy nazorat-tahliliy xizmatlarida nazoratdan oʻtmagan farmatsevtik preparatlarni sotish taqiqlanadi.

4. Dori-darmonlarni aholiga vrachning retsepti va retseptisiz berish, shuningdek, davolash-profilaktika muassasalariga beriladigan dori-darmonlar roʻyxati va ularni berish qoidalari Oʻzbekiston Respublikasi Sogʻliqni saqlash vazirligi tomonidan tasdiqlanadi.

5. Dori-darmonlarni ruxsatnomalarsiz (litsenziyalarsiz) sotish bilan shugʻullanuvchi yuridik va jismoniy shaxslar Oʻzbekiston Respublikasi qonunchiligiga muvofiq javobgarlikka tortiladilar.

6. Barcha dorixona muassasalari qaysi idoraga qarashliligi va mulkchilik shaklidan qatʼi nazar, majburiy assortimentdagi dori-darmonlar va tibbiy buyumlarga majburiy tartibda ega boʻlishlari va ularning erkin sotilishini taʼminlashlari shart.

Dorixona muassasalarida mavjud boʻlishi shart boʻlgan dori-darmon vositalari boʻlmaganda belgilangan tartibda ularni shunga oʻxshashlari bilan almashtirishga ruxsat etiladi.

7. Sogʻliqni saqlash vazirligi tomonidan vrachning retseptisiz berishga ruxsat etilgan dori-darmonlardan tashqari barcha dori-darmonlar dorixonalardan faqat belgilangan shakllardagi retseptlarga koʻra beriladi.

8. Vrach retseptisiz beriladigan dori-darmonlar va tibbiy buyumlar tayyor dori-darmon beriladigan vitrinaga narxi koʻrsatilgan holda qoʻyiladi.

9. Davolash-profilaktika muassasalari vrachlariga kasalxonada dori-darmonlar boʻlmaganda statsionar davolanishda boʻlgan bemorlarga retsept yozib berishga ruxsat etiladi. Bunda dori naqd pulga sotib olinganligi haqidagi maʼlumot kasallik tarixiga yozib qoʻyilishi shartdir.

10. Bemorlarga bepul va imtiyozli retseptlar boʻyicha dori-darmonlar, mulkchilik shakllaridan qatʼi nazar, barcha dorixona muassasalaridan beriladi.

Xirurgik kasal boʻlgan urush nogironlariga, qatnashchilariga va ushbu toifaga tenglashtirilgan bemorlarga, shuningdek, Oʻzbekiston Respublikasi Vazirlar Mahkamasining “Aholini dori-darmonlar bilan taʼminlashga Doir qoʻshimcha chora-tadbirlar toʻgʻrisida” 1993-yil 8-yanvardagi 15-son qaroriga 2-ilovada koʻrsatilgan chakana narxlar 100 foiz chegiriladigan bemorlarga yarani bogʻlash materiallari retseptda “xirurgik kasal” degan yozuv qayd etilgan holda vrachlarning retseptlari boʻyicha bepul beriladi.

11. Agar retseptda zaharli, narkotik va boshqa ingrediyentlar qoʻshilmasidagi kuchli taʼsir qiluvchi vositalar yozib berilgan boʻlsa, ularni tayyorlangan dori tarkibiga kiritmay alohida berish taqiqlanadi.

12. Vrach tomonidan zaharli, narkotik yoki kuchli taʼsir etuvchi moddani bir marta qabul qilishdan ortiqcha dozada, bu retseptda tegishli ravishda rasmiylashtirilmay yozilgan boʻlsa, dorixona xodimi dorini bir martalik qabul qilish uchun belgilangan dozaning yarmi miqdorida berishga majbur.

13. Pushti rangdagi maxsus retsept blanklarida yozib berilgan narkotik dori-darmon vositalari hududiy davolash-profilaktika muassasalariga faqat shu maqsadlar uchun biriktirib qoʻyilgan dorixonalardan beriladi.

Zaharli va narkotik preparatlar berish huquqiga ega boʻlgan dorixona va davolash-profilaktika muassasalarining roʻyxati joylardagi sogʻliqni saqlash organlari va “Dori-darmon” uyushmasining hududiy birlashmalari tomonidan belgilanadi.

Etilmorfin gidroxlorid, kodein, fosfat kodein va natriy etaminalning boshqa dori-darmon vositalari bilan aralashmasi shahar (shahar yoki qishloq maʼmuriy tumani) doirasida barcha dorixonalar tomonidan oʻzlari joylashgan hududdagi davolash- profilaktika muassasalarining retseptlari boʻyicha beriladi.

14. Tarkibida narkotik va zaharli moddalar boʻlgan dorilar uchun berilgan retseptlar 10 kun mobaynida, qolganlari esa yozib berilgan kundan boshlab bir oy davomida haqiqiy hisoblanadi.

15. Vrach retseptlari boʻyicha dorixonalardan dori-darmonlarni berish normasi davolashning bir kursi uchun belgilanadi.

Favqulodda hollarda (bemorning shahardan joʻnab ketishi, dorixonaga muntazam qatnashining iloji yoʻqligi va boshqalar) dorixona xodimlariga vrach tomonidan tayinlangan dori-darmonni uzoq muddat amalda boʻladigan retseptlar boʻyicha ikki oy davomida davolanish uchun zarur boʻlgan miqdorda bir yoʻla berishga ruxsat etiladi.

16. Etil spirtini:

ambulatoriyaga qatnab davolanadigan bemorlarga vrach retsepti boʻyicha sof holda va “Kompress qilish uchun” (arashlashtirish miqdori koʻrsatilgan holda) yoki “Terini ishqalash uchun” yozuvli retsept boʻyicha, ingrediyentlar aralashmasida — koʻpi bilan 50 gramm;

retseptda “Maxsus tayinlash boʻyicha” degan yozuvi boʻlgan, imzo va davolash-profilaktika muassasasining muhri bilan tasdiqlangan kasali surunkali davom etadigan bemorlarga — 100 grammgacha;

tibbiyot maqsadlarida muassasalar va tashkilotlarga — “Dori-darmon” uyushmasining hududiy birlashmalari tomonidan belgilanadigan norma boʻyicha berishga ruxsat etiladi.

17. Tarkibida zaharli, narkotik moddalar va etil spirti boʻlgan ekstemporal usulida tayyorlangan dorilarni berishda bemorlarga retsept oʻrniga yuqori qismida sariq yoʻli va unda qora shriftda “Signatura” degan yozuv boʻlgan signatura beriladi. Tayyor dori-darmonlarni berishda zarur boʻlgan hollarda dori-darmonni qoʻllash usuli koʻrsatilgan yorliq ilova qilinadi.

18. Uzoq vaqt amalda boʻladigan retsept boʻyicha dori-darmonlarni berishda retsept bemorga qaytarib beriladi, bunda uning orqa tomoniga berilgan preparatning soni va berilgan sana yozib qoʻyiladi. Bemor dorixonaga navbatdagi kelganda oldingi olingan dori-darmonlar haqidagi belgilar hisobga olinadi. Retseptning amalda boʻlish muddati tugagach “Retsept haqiqiy emas” degan tamgʻa bosiladi va dorixonada qoldiriladi.

19. Tarkibida narkotik, zaharli moddalar, etil spirti, psixotrop, uxlatadigan depressiyaga qarshi, neytroleptik vositalar, steroid gormonlar, trankvilizatorlar boʻlgan dorilar, tarkibida 8-oksixinol hosilasi boʻlgan preparatlar, anabolik aktivlikka ega boʻlgan vositalar, tabletka holidagi klofelin uchun berilgan retseptlar, shuningdek, imtiyozli shartlarda yoki bepul berilgan dorilar uchun berilgan retseptlar dorixonada qoldiriladi.

Imtiyozli shartlarda yoki bepul berilgan dori-darmonlarning retseptlari dorixonalarda uch yil davomida, maxsus pushti rangdagi blanklar boʻyicha berilgan dorilar retseptlari — 5 yil, tarkibida zaharli moddalar, etil spirti boʻlgan dorilarga berilgan retseptlar, miyani aynitib qoʻyish quvvatiga ega boʻlgan preparatlar va anabolik vositalarga berilgan retseptlar bir yil davomida, boshqa dorilarga berilgan retseptlar — bir oy davomida saqlanadi.

Retseptlar saqlash muddati tugagach yoʻq qilinadi. Dorixonada qoldiriladigan retseptlarni belgilangan saqlash muddati tugagach yoʻq qilish tartibi “Dori-darmon” davlat-aksionerlik uyushmasi tomonidan belgilanadi.

20. Dorixona tomonidan imtiyozli shartlarda yoki bepul berilgan dori-darmonlarga haq toʻlash mahalliy organlar yoki sogʻliqni saqlash muassasalari tomonidan shartnomaga asosan amalga oshiriladi.

21. Dorixonalarning yuridik va jismoniy shaxslardan sifatini oldindan tekshirmasdan dori-darminlarni qabul qilishi taqiqlanadi.

22. Respublika hududida faoliyat koʻrsatayotgan barcha dorixona muassasalarining, mulkchilik shakllaridan qatʼi nazar, mazkur qoidalarga rioya qilishlarini nazorat qilish Oʻzbekiston Respublikasi Sogʻliqni saqlash vazirligi huzuridagi dori-darmonlar sifati boʻyicha nazorat komissiyasiga yuklanadi.

1. Aspirin

2. Analgin

3. Borli surtki

4. Har xil bintlar

5. Tibbiy paxta

6. Validol

7. Gorchichnik

8. Dimedrol

9. Dibazol

10. Levomitsetin

11. Valerian suyuqligi

12. Nitroglitserin

13. Yod suyuqligi

14. Inyeksiyalar uchun novokain

15. Papaverin

16. Ammiak eritmasi

17. Koʻk dori

18. Senadeksin

19. Eufillin

20. Ferramid