«Аҳоли бандлиги тўғрисида»ги Ўзбекистон Республикаси Қонунининг 9-боби ҳамда Вазирлар Маҳкамасининг 2017 йил 5 декабрдаги 965-сонли қарори билан тасдиқланган «Ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш учун иш ўринларининг энг кам сонини белгилаш ва захирага қўйиш тартиби тўғрисида»ги Низомга асосан 2026 йил учун иш ўринларини банд қилиб қўйиш мақсадида, «Маҳаллий давлат ҳокимияти тўғрисида»ги Ўзбекистон Республикаси Қонунининг 6- ва 24-моддаларигаасосан, қарор қиламан:

1. Қуйидагилар раҳбарлик ва ижро учун қабул қилинсин:

а) Ўзбекистон Республикаси Президентининг «Меҳнат муносабатлари ва касбга тайёрлаш тизимини такомиллаштириш ҳамда иш берувчиларни рағбатлантиришга оид қўшимча чора-тадбирлар тўғрисида» 2025 йил 4 августдаги ПФ-126-сон Фармонига асосан:

б) Ўзбекистон Республикаси Президентининг «Ўзбекистон Республикасида маҳаллий давлат ҳокимияти вакиллик органлари фаолиятини 2030 йилгача ривожлантириш концепциясини тасдиқлаш тўғрисида» 2025 йил 23 июндаги ПФ-98-сон Фармонига асосан, ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш учун иш ўринларининг энг кам сонини белгилаш ва захирага қўйиш;

хўжалик юритувчи субъектлар фақат ногиронлиги бўлган шахслар, оилавий (маиший) зўравонликдан жабрланган шахслар, камбағал оилалар реестридаги оилаларнинг аъзолари, муқобил жойлаштириш шаклларида тарбияланган етим шахслар ҳамда ота-она қарамоғидан маҳрум бўлган шахслар учун иш ўринларининг мажбурий захираларини шакллантириши, бунда мажбурий захиралаш ходимлар умумий сонининг 3 фоизидан ошмаслиги ҳамда ходимлар сони 100 нафардан ортиқ бўлган ташкилотларга нисбатан қўлланилиши;

бюджет ташкилотлари ва давлат улуши 50 фоиздан юқори бўлган корхоналар эса фақат ногиронлиги бўлган шахслар, оилавий (маиший) зўравонликдан жабрланган шахслар, камбағал оилалар реестридаги оилаларнинг аъзолари, муқобил жойлаштириш шаклларида тарбияланган етим шахслар, ота-она қарамоғидан маҳрум бўлган шахслар, жазони ижро этиш муассасаларидан озод қилинган ҳамда одам савдосидан жабрланган шахслар учун иш ўринларининг мажбурий захираларини шакллантириши, бунда мажбурий захиралаш ходимлар умумий сонининг 7 фоизидан ошмаслиги ва ходимлар сони 20 нафардан ортиқ бўлган ташкилотларга татбиқ этилиши.

2. Шеробод тумани Камбағалликни қисқартириш ва бандликка кўмаклашиш бўлими (Ш.Эгамбердиев) ҳамда туман «Инсон» ижтимоий хизматлар маркази туман ҳудудидаги ташкилотлар бўйича 2026 йилда аҳолининг ижтимоий эҳтиёжманд тоифалари учун иш ўринларини белгилаш бўйича қуйидаги таклифлари маъқуллансин:

Ходимлар сони 20 нафардан ортиқ бўлган давлат ташкилотларида мажбурий захираланадиган иш ўринлари ходимлар умумий сонининг 7 фоизидан ошмаган миқдорда, ходимлар сони 100 нафардан ортиқ бўлган хўжалик юритувчи субъектларда (давлат улуши 50 фоиздан юқори бўлган корхоналар бундан мустасно) эса мажбурий захираланадиган иш ўринлари ходимлар умумий сонининг 3 фоизидан ошмаган миқдорда бўлиши белгилансин.

2026 йил учун жами 98 та иш ўрни захирага қўйилсин, жумладан:

ногиронлиги бўлган шахслар учун — 15,3 % (15 киши);

оилавий (маиший) зўравонликдан жабрланган шахслар учун — 1,02 % (1 киши);

камбағал оилалар реестридаги оилаларнинг аъзолари учун — 77,55 % (76 киши);

муқобил жойлаштириш шаклларида тарбияланган етим ва ота-она қарамоғидан маҳрум бўлган шахслар учун — 1,02 % (1 киши);

жазони ижро этиш муассасаларидан озод қилинган шахслар учун — 3,06 % (3 киши);

одам савдосидан жабрланган шахслар учун — 2,04 % (2 киши).

3. 2026 йилда ижтимоий эҳтиёжманд тоифаларни ишга жойлаштириш мақсадида давлат ташкилотлари томонидан мажбурий захира қўйиладиган иш ўринларининг манзилли рўйхати 1-иловага мувофиқ тасдиқлансин.

4. Корхоналар, ташкилотлар ва муассасалар раҳбарлари:

захирага қўйиладиган иш ўринларининг камида 25 фоизини йил бошланишидан олдин, ўн кундан кечиктирмай тайёр ҳолда таъминлаши ва бу ҳақида туман Камбағалликни қисқартириш ва бандликка кўмаклашиш бўлимига маълум қилиши;

қолган иш ўринларини календар йилнинг биринчи чорагида захирага қўйиши ва чорак якунидан сўнг ўн кундан кечиктирмай маълумот тақдим этиши;

ишга жойлаштириш бўйича ҳар ойда, ҳисобот ойидан кейинги ойнинг 5-санасигача ахборот бериб бориши шарт.

Захирага қўйиладиган иш ўринларини сақлаш тартиби «Аҳоли бандлиги тўғрисида»ги Қонуннинг 40-моддасига мувофиқ амалга оширилади.

5. Ўзбекистон Республикаси Президентининг 2025 йил 14 февралдаги ПҚ-64-сон қарорига мувофиқ, белгиланган энг кам сондан ортиқ миқдорда ижтимоий эҳтиёжманд шахсларни ишга қабул қилган иш берувчиларга — ҳар бир ходим учун 12 ой давомида ойига БҲМнинг 2 баравари миқдорида субсидия тўлаб берилсин.

6. Ўзбекистон Республикаси «Аҳоли бандлиги тўғрисида»ги Қонуннинг 3-, 13-, 34-, 38-, 39-, 40-, 41-моддаларига асосан, ушбу қарор талаблари бажарилмаган тақдирда иш берувчилар қонунчиликда белгиланган тартибда жавобгарликка тортилади.

7. Ўзбекистон Республикаси Вазирлар маҳкамасининг 965-сон қарор билан тасдиқланган Низомнинг 21-банди, 2-қисмига мувофиқ, захирага қўйиладиган иш ўринларини яратмаслик учун жарима тўлаш ташкилотни мажбуриятдан озод қилмайди.

8. Шеробод тумани Камбағалликни қисқартириш ва бандликка кўмаклашиш бўлими (Ш.Эгамбердиев):

ушбу қарор нусхасини 5 кун ичида 1-иловада келтирилган ташкилотлар раҳбарларига етказсин ва бажарилиши устидан назоратни таъминласин;

ишга қабул қилиш рад этилганда ёки иш ўринлари яратилмаганда мансабдор шахсларни белгиланган тартибда маъмурий жавобгарликка тортишни таъминласин.

9. Мазкур қарор оммавий ахборот воситаларида эълон қилинсин ва ҳокимликнинг расмий веб-сайтига жойлаштирилсин.

10. Мазкур қарорнинг ижросини назорат қилиш туман ҳокимининг биринчи ўринбосари У.Хамраев зиммасига юклансин.

11. Мазкур қарор қабул қилинган кундан кучга киради.