O‘zbekiston Respublikasi Prezidentining 2021-yil 27-avgustdagi PF-6300-son “Davlat moliyaviy nazorati tizimini yanada takomillashtirish chora-tadbirlari to‘g‘risida”gi va 2024-yil 10-iyuldagi PF-100-son “Budjet mablag‘laridan foydalanish ustidan moliyaviy nazoratni kuchaytirish bo‘yicha qo‘shimcha chora-tadbirlar to‘g‘risida”gi farmonlariga muvofiq O‘zbekiston Respublikasi Hisob palatasi qaror qiladi:

1. Davlat moliyaviy nazorat organlari va ichki audit xizmatlari tomonidan O‘zbekiston Respublikasi Hisob palatasining “Davlat auditi” dasturiy kompleksidan foydalanish tartibi to‘g‘risidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Iqtisodiyot va moliya vazirligi, Raqamli texnologiyalar vazirligi va O‘zbekiston Respublikasi Bosh prokuraturasi bilan kelishilgan.

3. Mazkur qaror rasmiy e’lon qilingan kundan e’tiboran kuchga kiradi.

Mazkur Nizom davlat moliyaviy nazorat organlari va ichki audit xizmatlari tomonidan O‘zbekiston Respublikasi Hisob palatasining (bundan buyon matnda Hisob palatasi deb yuritiladi) “Davlat auditi” dasturiy kompleksidan foydalanish tartibini belgilaydi.

1. Mazkur Nizomda quyidagi asosiy tushunchalar qo‘llaniladi:

“Davlat auditi” dasturiy kompleksi (bundan buyon matnda “Davlat auditi” dasturi deb yuritiladi) — davlat moliyaviy nazorat organlari va ichki audit xizmatlarining nazorat (audit) tadbirlarini ro‘yxatga olish, nazorat (audit) tadbirlarining natijalarini jamlash, saqlash, ishlov berish hamda hisobotlar shakllantirish imkonini beruvchi Hisob palatasining axborot tizimi;

davlat moliyaviy nazorat organlari — O‘zbekiston Respublikasi Hisob palatasi, O‘zbekiston Respublikasi Iqtisodiyot va moliya vazirligi hamda uning tasarrufidagi vakolatli organlar va O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi;

davlat organlari va tashkilotlari — ichki audit xizmati tashkil etilgan respublika ijro etuvchi hokimiyat organlari, davlat maqsadli jamg‘armalari, Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari hamda boshqa budjet tashkilotlari;

ichki audit xizmati — davlat organlari va tashkilotlarida ichki audit faoliyatini amalga oshiruvchi hamda boshqa tarkibiy tuzilmalardan mustaqil tarkibiy bo‘linma;

nazorat (audit) tadbirlari — davlat moliyaviy nazorat organlari va ichki audit xizmatlari xodimlari tomonidan davlat moliyaviy nazorati va ichki audit xizmati maqsadlariga erishishga qaratilgan nazorat (audit) obyektida, shu jumladan masofaviy ravishda amalga oshiriladigan jarayon;

nazorat (audit) tadbirlari natijalari — davlat moliyaviy nazorat organlari va ichki audit xizmati xodimlari tomonidan nazorat (audit) obyektlarida, shu jumladan masofaviy ravishda o‘tkazilgan nazorat (audit) tadbirlarida aniqlanib, ularning yakuni bo‘yicha rasmiylashtirilgan hujjatlarda aks ettirilgan ma’lumotlar;

foydalanuvchi subyektlar — “Davlat auditi” dasturidan foydalanuvchi davlat moliyaviy nazorat organlari hamda ichki audit xizmati xodimlari;

administrator — “Davlat auditi” dasturiga huquqiy egalik qiluvchi, kirish huquqlarini va undan foydalanishni boshqaruvchi va nazorat qiluvchi Hisob palatasi;

texnik administrator — “Davlat auditi” dasturini texnik qo‘llab-quvvatlash va takomillashtirib borishni amalga oshiruvchi tashkilot;

operator — davlat moliyaviy nazorat organlari hamda ichki audit xizmatining “Davlat auditi” dasturida ro‘yxatdan o‘tgan va hujjatlarni yaratish, ma’lumotlarni kiritish, tahrirlash, yangilab borish, hisobini yuritish va boshqa amallarni bajarish vakolati berilgan mas’ul xodimlari.

2. “Davlat auditi” dasturidan foydalanishning maqsadi davlat organlari va tashkilotlarida budjet to‘g‘risidagi qonunchilik hujjatlarining buzilish holatlarini tahlil qilish, takroriy va asossiz moliyaviy nazorat (audit) tadbirlarining oldini olish maqsadida ularning samaradorligini oshirish uchun davlat moliyaviy nazorat organlari va ichki audit xizmatlarining nazorat (audit) tadbirlariga doir ma’lumotlarni to‘plash, qayta ishlash, saqlash orqali hisob va hisobot jarayonini avtomatlashtirishdan iborat.

3. Quyidagilar “Davlat auditi” dasturidan foydalanishning asosiy vazifalari hisoblanadi:

nazorat (audit) tadbirlarini ro‘yxatga olish;

davlat moliyaviy nazorat organlari va ichki audit xizmatlarining yillik ish rejalariga kiritiladigan nazorat (audit) tadbirlarini majburiy tartibda Hisob palatasi bilan kelishish;

davlat moliyaviy nazorat organlari va ichki audit xizmatlarining nazorat (audit) obyektlari, shuningdek davlat organlari va tashkilotlari to‘g‘risida ma’lumotlar (vazifa va funksiyalari, tashkiliy tuzilmasi, shtat birliklari, xodimlar) bazasini shakllantirish;

nazorat (audit) tadbirlari natijalarini to‘plash, saqlash va qayta ishlash orqali hisobotlarni shakllantirish;

nazorat (audit) obyektlari tomonidan nazorat (audit) tadbirlari bo‘yicha yozma fikr bildirish;

fuqarolar ishtirokida o‘tkaziladigan nazorat (audit) obyektlarini aniqlash;

nazorat (audit) obyektlariga ko‘rsatmalar yuborish va ularning ijrosini nazorat qilish;

nazorat (audit) tadbirlari natijalari yuzasidan tegishli davlat organlariga xabarnomalar yuborish imkonini yaratish.

4. “Davlat auditi” dasturida quyidagilar foydalanuvchi subyektlar sifatida ro‘yxatdan o‘tkaziladi va ularga quyidagi kirish huquqlari beriladi:

davlat moliyaviy nazorat organlari hamda davlat organlari va tashkilotlarining rahbari va o‘rinbosari uchun — “tasdiqlovchi” huquqi;

davlat moliyaviy nazorat organlari hamda davlat organlari va tashkilotlari rahbari o‘rinbosari, tarkibiy bo‘linmalari boshliqlari uchun — “ma’qullovchi” huquqi;

davlat moliyaviy nazorat organlari hamda ichki audit xizmati xodimlari (2 nafargacha) uchun — “operator” huquqi;

davlat moliyaviy nazorat organlari hamda ichki audit xizmatining “operator” huquqi berilmagan xodimlari uchun — “foydalanuvchi” huquqi.

5. Davlat moliyaviy nazorat organlari hamda davlat organlari va tashkilotlari tomonidan “Davlat auditi” dasturida ro‘yxatdan o‘tkazish uchun Hisob palatasiga so‘rovnoma taqdim etiladi. So‘rovnomada quyidagilar ko‘rsatilishi lozim:

foydalanuvchi subyektlarning familiyasi, ismi va otasining ismi;

foydalanuvchi subyektlarning lavozimi va ular faoliyat yurituvchi bo‘linmaning nomi;

foydalanuvchi subyektlarning pasport (ID-karta) seriyasi va raqami;

jismoniy shaxsning shaxsiy identifikatsiya raqami (JSHSHIR);

mazkur Nizomning 4-bandida nazarda tutilgan kirish huquqlari ro‘yxati;

O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi hamda davlat organlari va tashkilotlarining ichki audit xizmatlari xodimlarining malaka sertifikati raqami;

foydalanuvchi subyektlarning elektron pochta manzili.

6. “Davlat auditi” dasturida xodimlarni operator sifatida ro‘yxatdan o‘tkazish va shaxsiy kabinetni ochish uchun davlat moliyaviy nazorat organlari hamda davlat organlari va tashkilotlari rahbarining xodimga “operator” vazifasi yuklatilgan buyrug‘i nusxasi so‘rovnomaga ilova qilinishi lozim.

7. Foydalanuvchi subyektlarni “Davlat auditi” dasturida ro‘yxatdan o‘tkazish so‘rovnoma taqdim etilgan kundan boshlab ikki ish kunidan kechiktirmasdan Hisob palatasi tomonidan amalga oshiriladi.

8. Taqdim etilgan so‘rovnomada mazkur Nizomning 5-bandida nazarda tutilgan ma’lumotlar bo‘lmasa yoki to‘liq ko‘rsatilmagan bo‘lsa Hisob palatasi tomonidan foydalanuvchi subyektlarni “Davlat auditi” dasturida ro‘yxatdan o‘tkazish rad etiladi.

9. Davlat moliyaviy nazorat organlari hamda davlat organlari va tashkilotlarining foydalanuvchi subyektlarini ro‘yxatdan o‘tkazish uchun kamchiliklarni bartaraf etgan holda takroran so‘rovnoma taqdim etishi mumkin.

10. Mazkur Nizomning 8-bandida ko‘rsatilgan ro‘yxatdan o‘tkazishni rad etish asoslari mavjud bo‘lmasa, foydalanuvchi subyektlar “Davlat auditi” dasturida ro‘yxatdan o‘tkaziladi hamda shaxsiy kabinet ochiladi.

11. Foydalanuvchi subyektlarning “Davlat auditi” dasturidagi shaxsiy kabinetida quyidagi ma’lumotlar saqlanishi shart:

foydalanuvchi subyektning identifikatori (ID-raqami);

shaxsiy kabinetning yaratilgan sanasi va vaqti;

foydalanuvchi subyektning lavozimi va shaxsini tasdiqlovchi hujjat ma’lumotlari.

12. “Davlat auditi” dasturidan ro‘yxatdan o‘tkazilgan foydalanuvchi subyektlar ushbu dasturdagi shaxsiy kabinetiga Yagona identifikatsiya tizimi (OneID) yoki elektron raqamli imzo orqali kirish huquqiga ega bo‘ladi, bunda dasturga o‘ziga tegishli bo‘lmagan Yagona identifikatsiya tizimi (OneID) yoki elektron raqamli imzo orqali kirish taqiqlanadi.

13. Davlat moliyaviy nazorat organlari, davlat organlari va tashkilotlari foydalanuvchi subyektlari bilan mehnat shartnomasi bekor qilinganda, ular boshqa lavozimga o‘tkazilganda yoki ularning “Davlat auditi” dasturidan foydalanish huquqi bekor qilinishi yoxud o‘zgarishiga sabab bo‘ladigan boshqa holatlar yuz bergan vaqtdan boshlab bir ish kuni ichida Hisob palatasini yozma xabardor qilishi kerak.

Bunda, Hisob palatasi tomonidan yigirma to‘rt soat ichida foydalanuvchi subyektlarning “Davlat auditi” dasturiga kirish huquqlari yangilanadi yoki ularning shaxsiy kabineti bloklanadi hamda arxivga ko‘chiriladi va kamida bir yil davomida saqlanadi.

14. “Davlat auditi” dasturidan foydalanish huquqi bekor qilingan shaxslar o‘rniga boshqa foydalanuvchi subyektlarni ro‘yxatdan o‘tkazish ushbu bobda belgilangan tartibda amalga oshiriladi.

15. Foydalanuvchi subyektlar “Davlat auditi” dasturidan ro‘yxatdan o‘tkazilgandan so‘ng uch ish kuni ichida operator tomonidan ushbu dasturga tegishli davlat moliyaviy nazorat organi, davlat organi yoki tashkilotining nomi, soliq to‘lovchining identifikatsiya raqami, manzili, vazifa va funksiyalari, tarkibiy tuzilmasi, shtat jadvali, davlat moliyaviy nazorat organi yoki ichki audit xizmati xodimlari tarkibi to‘g‘risidagi ma’lumotlar kiritiladi hamda doimiy ravishda yangilab boriladi.

16. Davlat moliyaviy nazorat organlari va ichki audit xizmatlarining kelgusi yil uchun yillik rejalari (dasturlari) loyihalarini “Davlat auditi” dasturida shakllantirish, kelishish va tasdiqlash quyidagi tartibda amalga oshiriladi:

a) kelgusi yil uchun yillik reja (dastur) loyihasi har yili dekabr oyining 10-sanasiga qadar shakllantiriladi va Hisob palatasiga kelishish uchun yo‘naltiriladi;

b) Hisob palatasi kelishish uchun kelib tushgan yillik reja (dastur) loyihasini nazorat (audit) obyektida o‘tkazilishi rejalashtirilgan nazorat (audit) tadbirlari takrorlanmasligi va asoslanganligi nuqtai nazardan besh ish kuni ichida ko‘rib chiqadi.

Bunda:

davlat moliyaviy nazorat organlari va ichki audit xizmatlarining yillik rejasida (dasturida) ayni bir obyektda bir xil masala yuzasidan nazorat (audit) tadbirini o‘tkazish rejalashtirilgan bo‘lsa, ushbu nazorat (audit) tadbiri takroriy hisoblanadi (bundan mavjud jinoyat ishlari doirasida o‘tkaziladigan nazorat tadbirlari bundan mustasno) hamda Hisob palatasi tomonidan yillik rejani (dasturni) kelishish rad etiladi;

davlat moliyaviy nazorat organlari va ichki audit xizmatlari tomonidan obyektda nazorat (audit) tadbirini o‘tkazish uchun muayyan asoslar (qonunchilikdagi majburiy talab, xavf tahlili natijalari) mavjud bo‘lmasa, nazorat (audit) tadbirini o‘tkazish asossiz deb hisoblanadi hamda Hisob palatasi tomonidan yillik rejani (dasturni) kelishish rad etiladi;

v) kelishish rad etilgan yillik rejaga (dasturga) davlat moliyaviy nazorat organlari va ichki audit xizmatlari tomonidan tegishli tuzatishlar kiritilgan holda Hisob palatasiga kelishish uchun qayta yuboriladi;

g) ko‘rib chiqilgan yillik reja (dastur) Hisob palatasi tomondan kelishiladi;

d) Hisob palatasi bilan kelishilgan yillik reja (dastur) davlat moliyaviy nazorat organi, davlat organi yoki tashkilotining rahbari tomonidan har yili dekabr oyining 25-sanasiga qadar tasdiqlanadi.

17. Davlat moliyaviy nazorat organlari va ichki audit xizmatlarining yillik rejasiga (dasturiga) o‘zgartirish kiritish va tasdiqlash ushbu Nizomning 16-bandida nazarda tutilgan tartibda amalga oshiriladi. Bunda, Hisob palatasi tomonidan kelishilgan yillik rejaga (dasturga) o‘zgartirishlar davlat moliyaviy nazorat organi, davlat organi yoki tashkilotining rahbari tomonidan shu kunning o‘zida tasdiqlanishi lozim.

Yillik rejaga (dasturga) o‘zgartirish kiritish asosli bo‘lishi lozim.

18. Davlat moliyaviy nazorat organlari va ichki audit xizmatlari tomonidan nazorat (audit) tadbirlarini o‘tkazish to‘g‘risidagi buyruqlar “Davlat auditi” dasturida yaratiladi hamda ular tasdiqlanganidan so‘ng ushbu dasturda avtomatik ravishda ro‘yxatga olinadi va raqam beriladi.

19. “Davlat auditi” dasturida yaratilgan buyruqlar ushbu dasturning o‘zida yoki “ijro.gov.uz” ijro intizomi idoralararo hujjat aylanish tizimi orqali tasdiqlanishi mumkin.

20. “Davlat auditi” dasturida ro‘yxatga olinmagan nazorat (audit) tadbirlari noqonuniy hisoblanadi.

21. Davlat moliyaviy nazorat organlari va ichki audit xizmatlari tomonidan o‘tkazilgan nazorat (audit) tadbirlariga doir barcha hujjatlar axborot tizimida jamlanadi, bundan davlat siri yoki qonun bilan qo‘riqlanadigan boshqa sirni tashkil etuvchi ma’lumotlar mustasno.

Bunda, nazorat (audit) tadbirlari hisoboti (dalolatnoma, ma’lumotnoma) tasdiqlanganidan so‘ng nazorat (audit) tadbiriga oid hujjatlar va ma’lumotlar uch ish kunidan kechiktirmasdan “Davlat auditi” dasturiga kiritilishi lozim.

22. Ichki audit xizmatlari tomonidan Hisob palatasining “Masofaviy audit” axborot tizimi orqali yuborilgan risk-tahlillarni o‘rganish natijalari to‘g‘risidagi ma’lumotlar o‘n kun ichida “Davlat auditi” dasturiga kiritiladi.

23. Ichki audit xizmatlari “Davlat auditi” dasturi orqali bir ish kuni ichida quyidagi holatlar yuzasidan O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasini xabardor qiladi:

o‘zi aniqlagan va vakolati doirasida hal etish imkoni bo‘lmagan budjet to‘g‘risidagi qonunchilik hujjatlarining buzilish holatlari;

aniqlangan budjet to‘g‘risidagi qonunchilik hujjatlarining buzilish holatlari, moliyaviy xato va kamchiliklar, maqsadsiz va noqonuniy xarajatlar, pul mablag‘lari va tovar-moddiy boyliklar kamomadi;

jinoyat alomatlari, korrupsiyaga doir huquqbuzarliklar alomatlari (shu jumladan, ichki audit tadbirini amalga oshirgan shaxslar tomonidan) aniqlangan taqdirda, tegishli choralar ko‘rish (hujjatlashtirish, oldini olish choralarini ko‘rish) va huquqni muhofaza qiluvchi organlarga materiallarni yuborish yuzasidan.

24. Nazorat (audit) tadbirlari materiallarining huquqni muhofaza qiluvchi organlarga yuborilganligi, tuzilgan ma’muriy bayonnomalar va sudlar tomonidan qo‘llanilgan ma’muriy jazo choralari to‘g‘risidagi ma’lumotlar operator tomonidan “Davlat auditi” dasturiga uch ish kuni ichida kiritiladi.

25. “Davlat auditi” dasturi orqali fuqarolar ishtirokidagi audit o‘tkaziladigan obyektlarni va davlat moliyaviy nazorati organlari faoliyati samaradorligini jamoatchilik tomonidan baholash O‘zbekiston Respublikasi Vazirlar Mahkamasining 2022-yil 10-iyundagi 326-son “Fuqarolar ishtirokidagi audit o‘tkaziladigan obyektni aniqlash va davlat moliyaviy nazorati organlari faoliyati samaradorligini jamoatchilik tomonidan baholab borish tartibi to‘g‘risidagi nizomni tasdiqlash haqida”gi qaroriga asosan aniqlanadi hamda natijalari e’lon qilib boriladi.

26. Nazorat (audit) tadbirlari natijalari bo‘yicha nazorat (audit) obyektlariga yoki ulardan yuqori turuvchi organlarga kiritiladigan ko‘rsatma, taqdimnoma, taklif va tavsiyalar “Davlat auditi” dasturi orqali yuboriladi hamda ularning ijrosi davlat moliyaviy nazorat organlari va ichki audit xizmatlari tomonidan monitoring qilinadi.

27. Nazorat (audit) tadbirlari natijalari hamda davlat moliyaviy nazorat organlari va ichki audit xizmatlarining samaradorligi bo‘yicha hisobotlar “Davlat auditi” dasturiga kiritilgan ma’lumotlar asosida avtomatik ravishda shakllanadi.

28. “Davlat auditi” dasturiga ma’lumotlarning o‘z vaqtida va to‘g‘ri kiritilishini ta’minlashga davlat moliyaviy nazorat organlari hamda ichki audit xizmati rahbarlari mas’ul hisoblanadi.

29. Texnik administrator “Davlat auditi” dasturini texnik qo‘llab-quvvatlash va axborot xavfsizligi uchun mas’ul hisoblanadi.

30. Quyidagilar texnik administratorning vazifalari hisoblanadi:

texnik qo‘llab-quvvatlash orqali “Davlat auditi” dasturining barqaror, uzluksiz va samarali ishlashini ta’minlash;

tizimning normativ-huquqiy hujjatlar, axborot xavfsizligi bo‘yicha texnik jihatdan tartibga solish sohasidagi normativ hujjatlar asosida faoliyat yuritishini ta’minlash;

tizimning axborot xavfsizligini hamda ma’lumotlarning to‘liqligini ta’minlash;

Hisob palatasi tomonidan taqdim etilgan takliflar asosida “Davlat auditi” dasturini takomillashtirish va uning texnik sozlamalarini o‘zgartirish.

31. “Davlat auditi” dasturida hujjatlar va ma’lumotlarni yaratish, kiritish, yuklash, tahrirlash, qayta ishlash, yuborish, hisobini yuritish va hisobotlar chiqarish operator tomonidan amalga oshiriladi.

32. Quyidagilar operatorning vazifalari hisoblanadi:

davlat moliyaviy nazorat organlari hamda davlat organlari va tashkilotlariga oid mazkur Nizomning 15-bandida nazarda tutilgan ma’lumotlarni o‘z vaqtida kiritish, yangilash va tahrir qilish;

nazorat (audit) tadbirlari to‘g‘risidagi hujjatlar va ma’lumotlarni o‘z vaqtida yaratish, kiritish, yuklash, tahrirlash, qayta ishlash, yuborish va qabul qilish;

aniqlangan xatolar yoki nosozliklar haqida Hisob palatasiga xabar berish.

33. Operator:

o‘z vakolatlari doirasida “Davlat auditi” dasturidan foydalanish;

xizmat vazifalari uchun zarur bo‘lgan ma’lumotlarni olish;

administratordan va texnik administratordan yordam so‘rash;

“Davlat auditi” dasturi bo‘yicha takliflar kiritish huquqiga ega.

34. Operator:

axborot xavfsizligi qoidalariga rioya qilish;

“Davlat auditi” dasturi orqali qonunchilikka zid harakatlarni amalga oshirmaslik;

kiritilgan hujjat va ma’lumotlarning o‘z vaqtida kiritilishi, haqqoniyligi, to‘liqligi va to‘g‘riligini ta’minlash;

Hisob palatasining mazkur Nizomda nazarda tutilgan qonuniy talablariga amal qilishga majbur.

35. Mazkur Nizom talablarining buzilishida aybdor bo‘lgan shaxslar qonunchilikka muvofiq javobgar bo‘ladilar.