Tashqi iqtisodiy faoliyatni yanada erkinlashtirish, import operatsiyalarini boj-tarif bilan tartibga solishni takomillashtirish, boj poshlinalarini unifikatsiya qilish, faoliyat koʻrsatayotgan korxonalarni yanada zamonaviylashtirish va texnologiya bilan qayta jihozlash uchun qulay shart-sharoitlar yaratish, mamlakatimizning raqobatga bardoshli mahsulotlarini ishlab chiqarishni taʼminlaydigan yangi zamonaviy ishlab chiqarishlarni tashkil etish maqsadida Vazirlar Mahkamasi qaror qiladi:

2. Yuridik shaxslar tomonidan oʻz ehtiyojlari uchun chetdan keltirilayotgan, shuningdek vazirliklar, idoralar va xoʻjalik birlashmalarining tashqi savdo kompaniyalari (birlashmalari), “Oʻzinterimpeks”, “Oʻzmarkazimpeks”, “Oʻzsanoatmashimpeks”, “Markazsanoateksport” davlat-aksiyadorlik tashqi savdo kompaniyalari hamda lizing kompaniyalari orqali belgilangan tartibda tasdiqlanadigan roʻyxatga muvofiq chetdan keltirilayotgan texnologiya jihozlari hamda butlovchi buyumlar va ehtiyot qismlarga import boj poshlina stavkasi, agar ularni yetkazib berish texnologiya jihozlari yetkazib berish uchun tuzilgan kontrakt shartlarida nazarda tutilgan boʻlsa, 2004-yil 1-yanvardan boshlab nol foiz miqdorida belgilansin.

Oʻzbekiston Respublikasi Davlat bojxona qoʻmitasi, Davlat soliq qoʻmitasi oʻz ehtiyojlari uchun chetdan keltirilgan texnologiya jihozlaridan belgilangan maqsadda foydalanilishi ustidan qatʼiy nazorat oʻrnatsinlar. Chetdan keltirilgan texnologiya jihozlari (texnologiya jihozlari yetkazib berishga tuzilgan kontrakt shartlariga muvofiq chetdan keltirilgan butlovchi buyumlar va ehtiyot qismlar)dan belgilangan maqsadda foydalanilmagan, shuningdek import qilingan vaqtdan boshlab uch yil mobaynida sotilgan va tekin berilgan taqdirda ularga nisbatan qonun hujjatlarida belgilangan import boj poshlinalari stavkalari tatbiq etiladi.

3. Quyidagilar:

respublikaga chetdan keltiriladigan kompyuter maʼlumotlarini uzatish tarmoqlarini tashkil etish uchun asbob-uskunalar, kompyuter texnikasi va ular uchun butlovchi anjomlar, dasturiy vositalar Oʻzbekiston Respublikasi Prezidentining 2002-yil 30-maydagi PF-3080-son Farmoniga muvofiq 2006-yil 1-yanvargacha boʻlgan muddatga boj toʻlovlaridan (bojxonada rasmiylashtirishlar uchun yigʻimlardan tashqari) ozod qilinganligi;

3-ilovaga* muvofiq chetdan keltiriladigan yogʻoch materiallar va yogʻochliklar uchun Vazirlar Mahkamasining 2003-yil 7-iyuldagi 305-son qaroriga muvofiq import boj poshlinasining nol stavkalari va yagona boj toʻlovi belgilanganligi maʼlumot uchun qabul qilinsin.

4. Belgilab qoʻyilsinki, 2004-yil 1-yanvargacha “vaqtinchalik saqlash” bojxona rejimi ostida boʻlgan tovarlarni erkin muomalaga chiqarishda 2004-yil 1-fevralgacha Vazirlar Mahkamasining “Import boj poshlinalarini unifikatsiya qilishga doir qoʻshimcha chora-tadbirlar toʻgʻrisida” 2002-yil 31-maydagi 189-son qarori bilan tasdiqlangan stavkalar qoʻllanadi.

“Vaqtinchalik saqlash” rejimidan erkin muomalaga chiqariladigan barcha tovarlarga 2004-yil 1-fevraldan boshlab ushbu qaror bilan tasdiqlangan import boj poshlinalari stavkalari qoʻllanadi.

5. Idoralararo boj-tarif Kengashi (E.M. Gʻaniyev) oʻziga yuklangan vazifalarga muvofiq tovarlar (ishlar, xizmatlar) eksporti va importi tarkibi hamda hajmlarining mutanosibligi ustidan doimiy monitoringni taʼminlasin va zarurat boʻlganda Vazirlar Mahkamasiga tashqi savdo operatsiyalarini tarif bilan va tarifsiz tartibga solish yuzasidan qoʻshimcha chora-tadbirlar koʻrishga doir takliflar kiritsin.

6. Vazirlar Mahkamasining “Import boj poshlinalarini unifikatsiya qilishga doir qoʻshimcha chora-tadbirlar toʻgʻrisida” 2002-yil 31-maydagi 189-son qarori 2-bandining birinchi xatboshi, 3-bandi va qarorga 1-ilova (Oʻzbekiston Respublikasi QT, 2002-y., 5-son, 28-modda) oʻz kuchini yoʻqotgan deb hisoblansin.

7. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.