Oʻzbekiston Respublikasi Oliy Majlisi Senati Kengashining 2024-yil 3-dekabrdagi KQ-9-V-sonli Qarori bilan tasdiqlangan Oʻzbekiston Respublikasi Prezidenti Sh.M. Mirziyoyevning 2024-yil 19-noyabrdagi Oʻzbekiston Respublikasi Oliy Majlisi Senatining birinchi majlisidagi nutqida belgilangan ustuvor vazifalarni amalga oshirish boʻyicha Senatning harakatlar dasturi 21-bandining ijrosini taʼminlash maqsadida “Oʻzbekiston Respublikasi Oliy Majlisining Senati toʻgʻrisida”gi Konstitutsiyaviy Qonunning 16-moddasi, “Oʻzbekiston Respublikasi Oliy Majlisi Senatining Reglamenti toʻgʻrisida”gi Qonunning 6-moddasi muvofiq Oʻzbekiston Respublikasi Oliy Majlisi Senatining Kengashi qaror qiladi:

1. Xalq deputatlari viloyat, tuman, shahar Kengashi tomonidan Kengash soʻrovini, mahalliy Kengash deputati tomonidan deputat soʻrovini yuborish tartibi ilovaga muvofiq tasdiqlansin.

2. Xalq deputatlari viloyat, tuman, shahar Kengashlariga bir oy muddatda Xalq deputatlari viloyat, tuman, shahar Kengashi tomonidan Kengash soʻrovini, mahalliy Kengash deputati tomonidan deputat soʻrovini yuborish tartibini oʻz sessiyalarida koʻrib chiqish va tasdiqlash tavsiya etilsin.

3. Oʻzbekiston Respublikasi Oliy Majlisi Senati devonining Hududiy vakillik organlari faoliyatini oʻrganish markazi (Q. Muqumov) ushbu Qaror ijrosini taʼminlashda xalq deputatlari viloyat, tuman, shahar Kengashlari kotibiyatlariga amaliy yordam koʻrsatib borsin.

4. Mazkur Qarorning ijrosini nazorat qilish Oʻzbekiston Respublikasi Oliy Majlisi Senatining Mahalliy hokimiyat vakillik organlari faoliyatini kuchaytirishga koʻmaklashuvchi komissiyasi (A. Tuychiyev) zimmasiga yuklansin.

5. Ushbu Qaror qabul qilingan kundan eʼtiboran kuchga kiradi.

1. Xalq deputatlari viloyat, tuman, shahar Kengashi (bundan buyon matnda mahalliy Kengash deb yuritiladi) tomonidan Kengash soʻrovini, mahalliy Kengash deputati tomonidan deputat soʻrovini yuborish tartibi (bundan buyon matnda Tartib deb yuritiladi) mahalliy Kengash doimiy komissiyalari, deputatlari va mahalliy Kengash kotibiyatlari tomonidan Kengash soʻrovi hamda deputat soʻrovini tayyorlash tartibi va uning mazmuni hamda tuzilishiga doir talablar, shuningdek, ularni yuborish tartibini belgilaydi.

2. Tartib “Mahalliy davlat hokimiyati toʻgʻrisida”gi, “Xalq deputatlari viloyat, tuman va shahar Kengashi deputatining maqomi toʻgʻrisida”gi Oʻzbekiston Respublikasi qonunlari hamda boshqa qonun hujjatlariga muvofiq ishlab chiqilgan.

3. Xalq deputatlari tuman va shahar Kengashi hamda deputati soʻrovi tegishincha davlat organlari hamda tashkilotlarining tuman hamda shahar boʻlinmalari mansabdor shaxslariga, xalq deputatlari viloyat va Toshkent shahar Kengashi hamda deputati soʻrovi tegishincha davlat organlari hamda tashkilotlarining viloyat va Toshkent shahar boʻlinmalari mansabdor shaxslariga yuboriladi.

4. Kengash soʻrovi va deputat soʻrovi tezkor-qidiruv faoliyatini amalga oshiruvchi organlarning, surishtiruv hamda tergov organlarining, sudlarning ish yurituvidagi muayyan ishlar va materiallarga, shuningdek, ijro ishi yuritish hamda notarial ish yuritishning muayyan materiallarini koʻrib chiqish bilan bogʻliq faoliyatga taalluqli boʻlishi mumkin emas.

5. Kengash soʻrovi Tartibning 3-bandiga muvofiq davlat organlari va tashkilotlarining mansabdor shaxslariga qonunlarning, hududlarni ijtimoiy-iqtisodiy rivojlantirish dasturlarining ijrosi masalalari hamda ularning vakolatlariga kiradigan boshqa muhim masalalar yuzasidan asoslantirilgan tushuntirish berish yoki nuqtai nazarini bayon etish talabi qoʻyilgan mahalliy Kengash murojaat qilishining alohida shaklidir.

6. Mahalliy Kengash doimiy va muvaqqat komissiyalari, partiya guruhlari, deputatlar oʻz tashabbusi bilan yoki mahalliy Kengash raisining topshirigʻiga muvofiq mahalliy Kengash tomonidan Kengash soʻrovi yuborilishi haqida taklif ishlab chiqishi mumkin.

7. Kengash soʻrovi loyihasini tayyorlash quyidagi bosqichlarni oʻz ichiga qamrab oladi:

Kengash soʻrovining predmeti va maqsadini aniqlash;

Kengash soʻrovining predmeti doirasida avval mahalliy Kengash yoki uning doimiy va muvaqqat komissiyalari tomonidan oʻrganish oʻtkazilganlik holatini aniqlash, oʻrganish oʻtkazilgan taqdirda uning natijalarini tahlil qilish;

Kengash soʻrovi tayyorlash uchun zarur boʻlgan materiallarni (tegishli sohani tartibga soluvchi normativ-huquqiy hujjatlar, xorijiy mamlakatlar tajribasi, huquqni qoʻllash amaliyotida vujudga kelgan muammolar, davlat organlari va tashkilotlari, nodavlat notijorat tashkilotlaridan kelib tushgan maʼlumotlar, jismoniy hamda yuridik shaxslarning murojaatlari, ommaviy axborot vositalari, Internet jahon axborot tarmogʻida eʼlon qilingan materiallar va boshqalar) yigʻish;

mavjud materiallar asosida xulosa shakllantirish va Kengash soʻrovi loyihasini tayyorlash;

Kengash soʻrovi loyihasini huquqiy va boshqa zarur ekspertizalardan oʻtkazish.

8. Zarur hollarda Kengash soʻrovi loyihasini tayyorlash maqsadida ishchi guruh tuzilishi, huquqni qoʻllash amaliyotida vujudga kelgan muammolar bevosita tegishli davlat organlarida yoki hududlarga chiqib oʻrganilishi mumkin.

Ishchi guruh tarkibiga hududdan saylangan senatorlar, mahalliy Kengash deputatlari, mahalliy Kengash kotibiyati xodimlari, tegishli sohalar uchun masʼul boʻlgan vazirliklarning, davlat qoʻmitalarining yoki idoralarning hududiy boʻlinmalari, boshqa manfaatdor davlat organlarining, ilmiy va boshqa tashkilotlarning vakillari, shuningdek, faol fuqarolik pozitsiyasiga ega fuqarolar kiritilishi mumkin. Bunda nodavlat tashkilotlari vakillari hamda fuqarolar oʻz roziligi bilan ishchi guruh tarkibiga kiritiladi.

9. Kengash soʻrovi loyihasining matni quyidagi tarkibiy qismlardan iborat boʻladi:

kirish qismi (Kengash soʻrovining predmeti va maqsadi, tegishli sohada amalga oshirilgan ishlarning qisqacha mazmuni);

asoslantiruvchi qism (huquqni qoʻllash amaliyotida vujudga kelgan muammolar);

yakunlovchi qism (qonunlarning, hududlarni ijtimoiy-iqtisodiy rivojlantirish dasturlarining ijrosi masalalari, asoslantiruvchi qismda koʻrsatilgan muammolar yechimi hamda ularning vakolatlariga kiradigan boshqa muhim masalalar yuzasidan asoslantirilgan tushuntirish berish yoki nuqtai nazarini bayon etish talabi, javob taqdim etish shakli va muddati).

10. Kengash soʻrovi loyihasi matni quyidagilar tahlili asosida shakllantiriladi:

Kengash soʻrovi predmetiga taalluqli normativ-huquqiy va boshqa hujjatlar;

qonunchilikka muvofiq mahalliy Kengash, uning doimiy va muvaqqat komissiyalari hamda mahalliy Kengash deputatlari tomonidan oʻtkazilgan nazorat-tahlil tadbirlari materiallari (mahalliy budjet ijrosining borishini koʻrib chiqish, mansabdor shaxslarning hisobot hamda axborotlarini eshitish, qonun hujjatlarining ijrosi holatini, huquqni qoʻllash amaliyotini oʻrganish, Kengash tekshiruvi va boshqalar);

tegishli soha huquqni qoʻllash amaliyoti boʻyicha ilmiy seminar, konferensiya, davra suhbati va boshqa tadbirlar materiallari;

davlat organlari hamda boshqa manfaatdor idoralarning maʼlumotlari;

ommaviy axborot vositalarida, Internet jahon axborot tarmogʻida eʼlon qilingan materiallar;

huquqni qoʻllash amaliyoti va aholini tashvishga solayotgan muammolar boʻyicha oʻtkazilgan sotsiologik soʻrovlar natijalari;

jismoniy va yuridik shaxslarning murojaatlari, shu jumladan mahalliy Kengashning veb-saytiga hamda ijtimoiy tarmoqlardagi sahifalariga kelib tushgan murojaatlar;

xorijiy mamlakatlarda Kengash soʻrovi predmetida nazarda tutilayotgan muammolarni bartaraf qilish boʻyicha amalga oshirilgan tajriba;

statistik va boshqa maʼlumotlar.

11. Kengash soʻrovi loyihasining matni bayon etishning tizimliligi va ketma-ketligiga muvofiq boʻlib, loʻnda, oddiy hamda ravon tilda shakllantiriladi.

Kengash soʻrovi loyihasi matnidagi jumlalar rasmiy til uslubidan va yuridik atamalardan foydalanilgan holda, umumiy qabul qilingan grammatika, imlo hamda punktuatsiya qoidalariga muvofiq tuziladi.

12. Kengash soʻrovi loyihasida ogʻzaki nutq shakllari, davlat tilida teng maʼnoli soʻzlar va tushunchalar mavjud boʻlgan taqdirda, chet tillari atamalari, eskirgan hamda koʻp maʼnoni anglatadigan soʻzlar hamda iboralar, majoziy taqqoslashlar, sifatlashlar, kinoyalar, abbreviatura va qisqartmalar (bundan umumiy qabul qilingan abbreviatura, qisqartmalar, shuningdek, qonunosti hujjatlarining ilovalaridagi tashkilotlarning qisqartirilgan nomlari mustasno) qoʻllanilishiga yoʻl qoʻyilmaydi.

13. Kengash soʻrovi loyihasida amaldagi normativ-huquqiy hujjatlarga, Oʻzbekiston Respublikasi Prezidenti tomonidan rasmiy chiqishlarda va tegishli majlislarda belgilangan ustuvor vazifalar hamda topshiriqlarga havolalar kiritilishiga yoʻl qoʻyiladi.

Bunda havolalar aniq boʻlishi va tegishincha muayyan normativ-huquqiy hujjat yoki uning alohida qoidalari, Oʻzbekiston Respublikasi Prezidentining rasmiy chiqishi hamda tegishli majlislari aniq koʻrsatilishi kerak.

14. Kengash soʻrovi loyihasida soʻrovga javob berishning shakli (ogʻzaki yoki yozma) toʻgʻrisidagi talablar boʻlishi kerak.

15. Kengash soʻrovi loyihasi belgilangan tartibda tayyorlangandan soʻng u dastlabki tarzda doimiy yoki muvaqqat komissiya majlisida koʻrib chiqiladi.

16. Doimiy yoki muvaqqat komissiya Kengash soʻrovi loyihasi tayyorlanishi uchun masʼul boʻlgan deputatning axborotini eshitib, mahalliy Kengash tomonidan Kengash soʻrovi yuborish masalasini mahalliy Kengashning navbatdagi sessiyasi kun tartibi loyihasiga kiritish yoki kiritmaslik boʻyicha mahalliy Kengash raisiga taklif kiritish haqida qaror qabul qiladi.

17. Mahalliy Kengash raisi tomonidan Kengash soʻrovi yuborish masalasini mahalliy Kengashning navbatdagi sessiyasi kun tartibiga kiritish haqida qaror qabul qilingan taqdirda, doimiy yoki muvaqqat komissiya:

mahalliy Kengash sessiyasida Kengash soʻrovi boʻyicha soʻzga chiqadigan maʼruzachini;

mahalliy Kengash qarori loyihasi va boshqa zarur materiallar tayyorlanishi uchun masʼul deputatni belgilaydi.

18. Shundan soʻng mahalliy Kengash doimiy va muvaqqat komissiyalari, partiya guruhlarining mahalliy Kengash tomonidan Kengash soʻrovi yuborish haqidagi taklifi mahalliy Kengash raisi tomonidan mahalliy Kengashning navbatdagi sessiyasi kun tartibi loyihasiga kiritiladi.

19. Kengash soʻrovini yuborish masalasi mahalliy Kengash sessiyasida muhokama qilinganda mahalliy Kengash sessiyasi ochiq, oshkora oʻtkaziladi va ommaviy axborot vositalari tomonidan yoritilishi mumkin.

Zarurat boʻlganda mahalliy Kengash yopiq majlis oʻtkazish haqida qaror qabul qilishi mumkin.

20. Kengash soʻrovi yuborish masalasi koʻrib chiqilganda mahalliy Kengash va uning doimiy hamda muvaqqat komissiyalari majlislarida davlat organlari hamda tashkilotlari, nodavlat notijorat tashkilotlarining, ilmiy muassasalarning vakillari, mutaxassislar va olimlar, matbuot organlarining, televideniye, radio hamda boshqa ommaviy axborot vositalarining vakillari taklif qilinishi mumkin.

21. Sessiyada raislik qiluvchi tomonidan Kengash soʻrovi yuborish toʻgʻrisidagi masala koʻrib chiqilayotganda maʼruzachilar va qoʻshimcha maʼruzachilar bilan kelishuvga koʻra, qoida tariqasida, maʼruza uchun — 30 daqiqagacha, qoʻshimcha maʼruza uchun — 20 daqiqagacha hamda yakunlovchi soʻz uchun 15 daqiqagacha vaqt belgilanadi.

Muzokaralarda soʻzga chiquvchi deputatlarga 10 daqiqagacha vaqt beriladi. Muzokaralarda takroran soʻzga chiqish uchun, shuningdek, savollar, takliflar, xabarlar, maʼlumotlar uchun 3 daqiqagacha vaqt beriladi.

Sessiyada hozir boʻlgan deputatlar koʻpchiligining roziligi bilan raislik qiluvchi Kengash soʻrovi yuborish toʻgʻrisidagi masalani muhokama qilishning umumiy vaqtini, savollar va javoblar uchun ajratiladigan vaqtni belgilab qoʻyishi, soʻzlash vaqtini uzaytirishi mumkin.

Deputat Kengash soʻrovi yuborish toʻgʻrisidagi masala boʻyicha muzokaralarda koʻpi bilan ikki marta soʻzga chiqishi mumkin.

Muzokaralarni toʻxtatish toʻgʻrisida qaror qabul qilingandan keyin maʼruzachi va qoʻshimcha maʼruzachi yakunlovchi soʻzni aytish huquqiga ega.

Agar soʻzga chiquvchi ajratilgan vaqtdan ortiq soʻzlasa yoki muhokama etilayotgan masala yuzasidan fikr bildirmayotgan boʻlsa, sessiyada raislik qiluvchi uni avval ogohlantirib, keyin soʻzdan mahrum qiladi.

22. Kengash soʻrovini yuborish haqidagi mahalliy Kengash qarori mahalliy Kengash deputatlarining umumiy sonining koʻpchilik ovozi bilan qabul qilinadi.

23. Kengash soʻrovini yuborish haqidagi mahalliy Kengash qarori qabul qilingan kundan boshlab oʻn kalendar kun ichida Kengash soʻrovi tegishli boʻlgan mansabdor shaxsga “E-kengash” mahalliy hokimiyat vakillik organlari portali orqali yuboriladi. Kengash soʻrovi yuborish haqidagi mahalliy Kengash qaroriga Kengash soʻrovining matni va boshqa asoslantiruvchi materiallar ilova qilinadi.

24. Kengash soʻrovi yuborilgan mansabdor shaxs Kengash soʻroviga yozma javobni, agar boshqa muddat belgilanmagan boʻlsa, soʻrov olingan kundan eʼtiboran oʻn kalendar kundan kechiktirmay yuborishi lozim.

Kengash soʻroviga javobda soʻrovda qoʻyilgan masalalarning har biri boʻyicha aniq va batafsil asoslantirilgan maʼlumotlar ochib berilishi kerak.

Kengash soʻroviga javob oʻz nomiga soʻrov yuborilgan mansabdor shaxs yoki uning vazifalarini vaqtincha bajarayotgan shaxs tomonidan imzolanadi.

25. Kengash soʻrovi yuzasidan kelib tushgan yozma javob mahalliy Kengash kotibiyati tomonidan tanishib chiqish va u yuzasidan masʼul doimiy yoki muvaqqat komissiyani belgilash uchun mahalliy Kengash raisiga taqdim etiladi.

26. Kengash soʻroviga kelib tushgan javobni koʻrib chiqishga masʼul etib belgilangan doimiy yoki muvaqqat komissiya yozma javobda koʻrsatilgan maʼlumotlar asosliligini tekshiradi va u yuzasidan zarur materiallar tayyorlaydi.

27. Kengash soʻroviga javob bergan mansabdor shaxs tomonidan Kengash soʻrovi ijro etilishi natijalari doimiy yoki muvaqqat komissiyaning navbatdagi majlisida koʻrib chiqiladi. Ushbu koʻrib chiqish natijalari boʻyicha doimiy yoki muvaqqat komissiya qaror qabul qiladi.

28. Agar Kengash soʻroviga yozma javobdagi axborot belgilangan masalalar yuzasidan toʻliq javobni qamrab olmagan, qayd etilgan sohalarda muammolarni bartaraf etish boʻyicha zarur choralar koʻrilmagan yoki nazarda tutilmagan boʻlsa, masʼul doimiy yoki muvaqqat komissiya Kengash soʻroviga javobni Kengash soʻrovi yuborilgan mansabdor shaxsga u yuzasidan mulohazalar va takliflarni koʻrsatgan holda ushbu mansabdor shaxsga maromiga yetkazish uchun qaytarib yuborishi mumkin.

29. Kengash soʻroviga javob Kengash soʻrovi yuborilgan mansabdor shaxsga doimiy yoki muvaqqat komissiya tomonidan qaytarib yuborish toʻgʻrisida qaror qabul qilingan taqdirda, unda qayta javob berishning muddati koʻrsatiladi.

Qaytarib yuborilgan Kengash soʻroviga javob kelib tushganda u umumiy tartibda koʻrib chiqiladi.

Bunda, agar kelib tushgan javobdagi axborot belgilangan masalalar yuzasidan toʻliq javobni qamrab olmagan, qayd etilgan sohalarda muammolarni bartaraf etish boʻyicha zarur choralar koʻrilmagan yoki nazarda tutilmagan boʻlsa, mazkur masala mahalliy Kengashning navbatdagi sessiyasida koʻrib chiqiladi.

30. Kengash soʻroviga yozma javob mahalliy Kengashning sessiyasida koʻrib chiqilganda u sessiyada raislik qiluvchi tomonidan oʻqib eshittiriladi. Yozma javobning nusxalari mahalliy Kengash sessiyasida oʻqib eshittirilguniga qadar oldindan mahalliy Kengash deputatlariga yuboriladi.

31. Kengash soʻrovi oʻz nomiga soʻrov yuborilgan mansabdor shaxs Kengash soʻroviga ogʻzaki javobni mahalliy Kengashning sessiyasida mahalliy Kengash tomonidan belgilagan muddatda beradi.

32. Mansabdor shaxsning Kengash soʻroviga javobini eshitish natijalari boʻyicha mahalliy Kengash tomonidan qaror qabul qilinadi. Mahalliy Kengash qarori qabul qilingan kundan boshlab oʻn kun ichida tegishli mansabdor shaxsga yuboriladi.

33. Agar mahalliy Kengash qarorida Kengash soʻroviga javob bergan mansabdor shaxsga tavsiyalar yoki topshiriq boʻlsa, mahalliy Kengashning ushbu qarorida bayon etilgan tavsiyalar yoki topshiriqlarning ijrosini nazorat qilish uchun masʼul boʻlgan doimiy yoxud muvaqqat komissiya ham koʻrsatiladi.

34. Deputat soʻrovi Tartibning 3-bandiga muvofiq tegishli hududda joylashgan davlat hokimiyati va boshqaruvi organlarining mansabdor shaxslariga ularning vakolatlariga kiradigan masalalar yuzasidan asoslantirilgan tushuntirish berish yoki oʻz nuqtai nazarini bayon qilish talabi qoʻyilgan deputat murojaat qilishining alohida shaklidir.

35. Deputat soʻrovi davlat hokimiyati va boshqaruvi organlarining mansabdor shaxslariga, qoida tariqasida, tegishli saylov okrugi saylovchilarining huquqlari hamda qonuniy manfaatlarini taʼminlash bilan bogʻliq masalalar yuzasidan yuboriladi.

36. Deputat soʻrovi mahalliy Kengash deputatining shaxsiy tashabbusi asosida amalga oshiriladi.

37. Deputat soʻrovi “E-kengash” mahalliy hokimiyat vakillik organlari portalidagi “deputat soʻrovi” blankasida rasmiylashtiriladi va soʻrov muallifi tomonidan imzolanadi.

38. Deputat soʻrovida quyidagilar boʻlishi kerak:

Deputat soʻrovi yuboriladigan mansabdor shaxsning familiyasi, ismi, otasining ismi hamda uning lavozimi;

deputat soʻrovining sabablarini qisqacha asosi;

asoslantirilgan tushuntirish berish yoki nuqtai nazarini bayon etish talabi, javob taqdim etish shakli va muddati.

39. Deputat soʻrovi qisqa va tushunarli shaklda bayon etilishi kerak.

40. Deputat soʻrovini mansabdor shaxslardan muayyan harakatni amalga oshirish yoki amalga oshirmaslik boʻyicha ruxsat olish tarzida yuborish mumkin emas.

41. Deputat soʻrovi yuborilishidan avval u mahalliy Kengash kotibiyati tomonidan roʻyxatga olinadi.

Deputat soʻrovi mansabdor shaxslarga “E-kengash” mahalliy hokimiyat vakillik organlari portali orqali yuboriladi.

42. Deputat soʻrovi yuborilgan mansabdor shaxs unga yozma ravishda, agar boshqa muddat belgilanmagan boʻlsa, soʻrov olingan kundan eʼtiboran oʻn kundan kechiktirmay yuboradi.

43. Deputat soʻroviga javobni u qaysi mansabdor shaxsga yuborilgan boʻlsa, oʻsha mansabdor shaxs yoki uning vazifasini bajaruvchi shaxs imzolashi kerak.

Deputat soʻroviga javob ushbu soʻrovni yuborgan deputatning mahalliy Kengashiga yuboriladi.

Deputat soʻrovi kelib tushgan javob mahalliy Kengash kotibiyatida roʻyxatga olinadi hamda u kotibiyat tomonidan soʻrovni imzolagan deputatga yetkaziladi.

44. Mahalliy Kengash deputati oʻzi aʼzo boʻlgan mahalliy Kengashning tegishli doimiy komissiyasini deputat soʻrovini yuborganligi haqida soʻrov yuborilgan kun xabardor qiladi.

45. Deputat soʻroviga javob mahalliy Kengashning tegishli doimiy komissiyasining navbatdagi majlisida koʻrib chiqilishi mumkin.

46. Agar deputat soʻroviga javob mahalliy Kengash doimiy komissiyasining majlisida koʻrib chiqilgan boʻlsa, uni koʻrib chiqish natijalari yuzasidan doimiy komissiya qaror qabul qiladi. Mahalliy Kengash doimiy komissiyaning qarori deputat soʻroviga javob bergan mansabdor shaxsga yuboriladi.

47. Agar deputat soʻroviga javob soʻrovda koʻrsatilgan muddatni buzgan holda kelgan boʻlsa yoki agar javobda mavjud boʻlgan axborot deputat soʻrovida koʻtarilgan hamma masalalarni hal qilmasa, soʻrov yuborgan deputat aʼzo boʻlgan mahalliy Kengashning doimiy komissiyasi mahalliy Kengash raisiga deputat soʻrovi yuzasidan axborotni mahalliy Kengashning sessiyasi muhokamasiga olib chiqish haqida taklif kiritishi mumkin.

48. Mahalliy Kengash raisi mahalliy Kengash doimiy komissiyasi vakilining, agar ishtirok etgan boʻlsa, deputat soʻroviga javob bergan mansabdor shaxsning axborotini eshitib, muhokama natijalari boʻyicha deputat soʻrovi toʻgʻrisidagi axborotni mahalliy Kengashning navbatdagi sessiyasi kun tartibi loyihasiga kiritish yoki kiritmaslik masalasini hal qiladi.

49. Agar deputat soʻrovi yuzasidan kelib tushgan javobni mahalliy Kengashning navbatdagi sessiyasi kun tartibiga kiritish haqida qaror qabul qilingan boʻlsa, mazkur masala Tartibda belgilangan qoidalarni inobatga olgan holda koʻrib chiqiladi.

Bunda mahalliy Kengash deputatlariga deputat soʻrovi, unga kelib tushgan javob, mahalliy Kengash doimiy komissiyasining qarori, mahalliy Kengash qarorining loyihasi va boshqa zarur materiallar oldindan taqdim etiladi.

50. Deputat soʻrovi haqidagi axborot koʻrib chiqilganida mahalliy Kengash sessiyasiga deputat soʻroviga javob bergan mansabdor shaxs taklif qilinadi. Ushbu mansabdor shaxs oʻz vakolatlariga kiradigan masalalar yuzasidan asoslantirilgan tushuntirish berishi yoki nuqtai nazarini bayon qilishi shart.

51. Mahalliy Kengash oʻz vakolatlari doirasida Kengash soʻrovi, shuningdek, agar deputat soʻroviga doir masala mahalliy Kengashning sessiyasida koʻrib chiqilgan boʻlsa, deputat soʻrovi natijalari boʻyicha:

Kengash soʻrovi, deputat soʻrovi yuborilgan mansabdor shaxslarni tegishli javobgarlikka tortish, ularni lavozimidan ozod etish toʻgʻrisida tegishli davlat organlariga, Vazirlar Mahkamasi yoki Oliy Majlis Senatiga taklif va tavsiyalar kiritishi;

tegishli davlat organlariga hamda tashkilotlariga qonunchilik hujjatlarining, davlat dasturlarining ijrosi, oʻz zimmalariga yuklatilgan vazifalar hamda funksiyalarning amalga oshirilishi samaradorligini oshirishga qaratilgan chora-tadbirlar koʻrish yuzasidan taklif va tavsiyalar kiritishi;

Kengash soʻrovi hamda deputat soʻrovi boʻyicha tayyorlangan materiallarni vakolatli davlat organlariga oʻz vakolatlariga muvofiq koʻrib chiqish uchun yuborishi;

fuqarolarning huquqlari va qonun bilan qoʻriqlanadigan manfaatlarini buzish hollari yoki qonun hujjatlarini buzishning boshqa hollari maʼlum boʻlib qolgan taqdirda ularga darhol chek qoʻyish choralarini koʻrish talabi bilan tegishli davlat organlariga hamda tashkilotlariga hamda mansabdor shaxslarga murojaat qilishi;

Kengash soʻrovi va deputat soʻrovi natijalarini eʼlon qilishi (mahalliy Kengashning Internet jahon axborot tarmogʻidagi, ijtimoiy tarmoqlardagi rasmiy sahifalari, ommaviy axborot vositalari) mumkin.

52. Kengash soʻrovi loyihasini tayyorlagan mahalliy Kengash deputati va mahalliy Kengash kotibiyati masʼul xodimi Kengash soʻroviga doir materiallar qonunchilikka muvofiqligi, unda koʻrsatilayotgan maʼlumotlar asosliligi uchun shaxsan javobgar hisoblanadi.

53. Tartib buzilishida aybdor boʻlgan shaxslarga nisbatan belgilangan tartibda intizomiy yoki boshqa javobgarlik choralari qoʻllanilishi mumkin.

54. Tartibga oʻzgartish va qoʻshimchalar kiritish, uni oʻz kuchini yoʻqotgan deb topish Senat Kengashi qarori asosida amalga oshiriladi.